བཙན་བྱོལ་བོད་མིའི་ཆེས་མཐོའི་ཁྲིམས་ཞིབ་ཁང་།
ཁྲིམས་ཞིབ་པ་རིམ་བྱོན།
ཁྲིམས་ཞིབ་ཁང་འོག་མ།
ཁྲིམ་ཞིབ་ཁང་གི་འཛིན་སྐྱོང་།
ཁྲིམས་འཛིན་ཡར་རྒྱས།
བྱེད་སྒོའི་རྩ་འཛིན།


 

གཅིག བཙན་བྱོལ་བོད་མིའི་ཆེས་མཐོའི་ཁྲིམས་ཞིབ་ཁང་།

ཆེས་མཐོའི་ཁྲིམས་ཞིབ་ཁང་ནི་བོད་མིའི་སྒྲིག་འཛུགས་དང༌། མི་མང་གི་གནས་སྐབས་དམིགས་བསལ་དགོས་མཁོ་དང་འཚམས་པའི་ཁྲིམས་འཛིན་གོང་ན་མེད་པ་དེ་ཡིན།

ཀ) ཆེས་མཐོའི་ཁྲིམས་ཞིབ་ཁང་གསར་འཛུགས་དང་།  འཕེལ་རིམ།

བཙན་བྱོལ་བོད་མིའི་བཅའ་ཁྲིམས་དོན་ཚན་ ༦༢ པའི་ཆ་རྐྱེན་འོག་ཕྱི་ལོ་ ༡༩༩༢ ཟླ་ ༣ ཚེས་ ༡༡ ཉིན་བཙན་བྱོལ་བོད་མིའི་ཁྲིམས་ལུགས་དབང་འཛིན་གྱི་ཆེས་མཐོའི་ཁྲིམས་ཞིབ་ཁང་འདི་ཉིད་བཞུགས་སྒར་དྷ་རམ་ས་ལར་དབུ་འཛུགས་གནང་ཡོད།

  • ཆེས་མཐོའི་ཁྲིམས་ཞིབ་ཁང་ཐོག་མར་དབུ་འཛུགས་གནང་སྐབས་ཁྲིམས་ཞིབ་པ་ཆེ་བ་གཅིག་ལས་མེད་པ་དང། ཕྱི་ལོ་ ༡༩༩༧ ཟླ་ ༠༡ ཚེས་ ༢༩ ཉིན་ཁྲིམས་ཞིབ་པ་གཞན་གཉིས་བསྐོ་གཞག་དམ་འབུལ་མཛད་དེ། ད་ལྟའི་ཁྲིམས་ཞིབ་ཁང་གི་གྲུབ་ཆ་ཚང་བར་བགྱིས་ཡོད།
  • ཆེས་མཐོའི་ཁྲིམས་ཞིབ་ཁང་གསར་འཛུགས་གནང་བ་ནས་ཕྱི་ལོ་ ༢༠༠༤ བར། ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་ཆེ་བ་དང་། ཁྲིམས་ཞིབ་པ་གཞན་གཉིས་བཅས་༸གོང་ས་༸སྐྱབས་མགོན་ཆེན་པོས་འོས་འཛུགས་གནང་བར་སྤྱི་འཐུས་ལྷན་ཚོགས་ཀྱི་སྤྱི་འཐུས་རྩ་འབོར་གསུམ་ཆ་གཉིས་ཡན་གྱིས་མོས་མཐུན་བྱུང་ན་དེ་ལ་༸གོང་ས་༸སྐྱབས་མགོན་ཆེན་པོས་རྒྱལ་ཁབ་ཀྱི་དབུ་འཛིན་གྱི་མཚན་ཐོག་ནས་བསྐོ་གཞག་མཛད་ཡོད། 
  • ༢༠༠༤ ལོའི་བཅའ་ཁྲིམས་བསྐྱར་བཅོས་ ༡༥ པར།  ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་ཆེ་བ་དང༌། ཁྲིམས་ཞིབ་པ་གཞན་གཉིས་བཅས་སོ་སོ་ནི་ཆེས་མཐོའི་ཁྲིམས་ཞིབ་པ་ཆེ་བ་དང༌། སྤྱི་འཐུས་ཚོགས་གཙོ་ཚོགས་གཞོན། བཀའ་བློན་ཁྲི་པ་བཅས་ནས་བསྐོ་འཛུགས་བྱས་པའི་མི་འགྲོ་གསུམ་མམ་ལྔ་ཡོད་པའི་འདེམས་སྒྲུག་ཚོགས་ཆུང་གིས་ཉིས་ལྡབ་ལས་མ་ཉུང་བའི་འཆར་ཕུལ་ལྟར་༸གོང་ས་༸སྐྱབས་མགོན་ཆེན་པོས་འོས་འཛུགས་གནང་བར་སྤྱི་འཐུས་ལྷན་ཚོགས་ཀྱི་སྤྱི་འཐུས་རྩ་འབོར་གསུམ་ཆ་གཉིས་ཡན་གྱིས་མོས་མཐུན་བྱུང་ན་དེ་ལ་༸གོང་ས་༸སྐྱབས་མགོན་ཆེན་པོས་རྒྱལ་ཁབ་ཀྱི་དབུ་འཛིན་གྱི་མཚན་ཐོག་ནས་བསྐོ་གཞག་མཛད་ལམ་བཟོས།
  • ༢༠༡༡ ལོའི་བཅའ་ཁྲིམས་བསྐྱར་བཅོས་ ༢༥ པར།  ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་ཆེ་བ་དང༌། ཁྲིམས་ཞིབ་པ་གཞན་གཉིས་བཅས་སོ་སོའི་གོ་ཡུལ་སྟོང་པ་ནམ་ཐོན་ལ་ཆེས་མཐོའི་ཁྲིམས་ཞིབ་པ་ཆེ་བ་དང༌། སྤྱི་འཐུས་ཚོགས་གཙོ་ཚོགས་གཞོན། བཀའ་བློན་ཁྲི་པ་(སྐབས་ ༡༥ པའི་གྲོས་ཚོགས་ཚོགས་དུས་ ༤ པར་སྲིད་སྐྱོང་ཞེས་བསྐྱར་བཅོས་གཏན་འབེབས་གནང་།) བཅས་ནས་སྐབས་དེའི་འོས་མི་འདེམས་སྒྲུག་ཁོ་ནའི་ཆེད་བསྐོ་འཛུགས་བྱས་པའི་མི་འགྲོ་གསུམ་མམ་ལྔ་ཡོད་པའི་འདེམས་སྒྲུག་ཚོགས་ཆུང་གིས་ཉིས་ལྡབ་ལས་མ་ཉུང་བའི་འཆར་ཕུལ་ལྟར་སྤྱི་འཐུས་ལྷན་ཚོགས་སུ་འོས་བསྡུའི་ལམ་ནས་མང་མོས་ཐོབ་པ་དེར་ཁྲིམས་ཞིབ་པ་ཆེ་བའམ་ཁྲིམས་ཞིབ་པར་འོས་ཐོན་བྱུང་བར་ངོས་འཛིན་བྱ་རྒྱུ་ཞེས་བསྐྱར་བཅོས་གཏན་འབེབས་གནང་།
  • ཕྱི་ལོ་ ༢༠༡༡ ལོའི་བཅའ་ཁྲིམས་བསྐྱར་བཅོས་ ༢༥ པ་གཏན་འབེབས་མ་གནང་གོང་། ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་ཆེ་བ་དང་ཁྲིམས་ཞིབ་པ་གཞན་གཉིས་བཅས་སུ་བསྐོ་གཞག་མཛད་པའི་སྐྱེ་བོ་དེ་དག་གིས་ལས་ཁུར་དུ་མ་ཞུགས་གོང་ྋགོང་ས་༸སྐྱབས་མགོན་ཆེན་པོ་མཆོག་གི་སྐུ་མདུན་དུ་ཁྲིམས་ལུགས་གཏན་འབེབས་བྱས་པའི་ཚིག་གཞི་ལྟར་ལས་ཁུར་དམ་བཅའ་འབུལ་བཞེས་མཛད་སྲོལ་ཡོད་ཀྱང་།  བཅའ་ཁྲིམས་བསྐྱར་བཅོས་ ༢༥ པ་གཏན་འབེབས་གནང་རྗེས།  ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་ཆེ་བར་འོས་ཐོན་བྱུང་འཕྲལ་ལས་ཁུར་དུ་མ་ཞུགས་གོང་འཁྱུར་ཉེའི་ཁྲིམས་ཞིབ་པ་ཆེ་བའམ་ལས་ཚབ་ཀྱི་མདུན་དུ་ཁྲིམས་ལུགས་གཏན་འབེབས་བྱས་པའི་ཚིག་གཞི་ལྟར་ལས་ཁུར་དམ་བཅའམ།  ཁས་ལེན་ཞུ་དགོས།  ཁྲིམས་ཞིབ་པ་གཞན་གཉིས་འོས་ཐོན་བྱུང་འཕྲལ་ཁྲིམས་ཞིབ་པ་ཆེ་བའི་མདུན་ལས་ཁུར་དུ་མ་ཞུགས་པའི་གོང་ཁྲིམས་ལུགས་གཏན་འབེབས་བྱས་པའི་ཚིག་གཞི་ལྟར་ལས་ཁུར་དམ་བཅའམ། ཁས་ལེན་ཞུ་དགོས་ཞེས་བསྐྱར་བཅོས་གནང་བ་མ་ཟད། སྤྱི་འཐུས་ཚོགས་གཙོ་ཚོགས་གཞོན་དང་། སྲིད་སྐྱོང་དང་བཀའ་བློན་རྣམ་པ། རང་དབང་ཅན་གྱི་སྡེ་ཚན་གསུམ་གའི་འགན་འཛིན་དང་ཚོགས་གཙོ། འགན་འཛིན་ལས་འཕར་དང་ཚོགས་མི་བཅས་པས་ཀྱང་ཁྲིམས་ཞིབ་པ་ཆེ་བའམ་ལས་ཚབ་ཀྱི་མདུན་དུ་ལས་འཁུར་དམ་འབུལ་ཞུ་དགོས་པ་ཡིན། ( ༢༠༠༦ ལོར་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་རྩ་ཁྱབ་བསྒྲགས་གནང་བ་ལྟར། བཅའ་ཁྲིམས་བསྐྱར་བཅོས་ ༢༠ པར་༸གོང་ས་༸སྐྱབས་མགོན་ཆེན་པོ་མཆོག་མཛད་ཁོམ་མ་གྱུར་པའི་སྐབས། སྤྱི་འཐུས་ཚོགས་གཙོ་ཚོགས་གཞོན་ནས་ཁྲིམས་ཞིབ་པ་ཆེ་བའམ་ཁྲིམས་ཞིབ་པ་གཞན་གང་རུང་གི་མདུན་དུ་ལས་ཁུར་དམ་འབུལ་ལེན་ཆོག་པའི་གཏན་འབེབས་མཛད།)

ཁ) ཁྲིམས་ཞིབ་ཁང་གི་རྩ་འཛིན་ཁྲིམས་ཡིག

བཙན་བྱོལ་བོད་མིའི་བཅའ་ཁྲིམས་ཀྱི་དོན་ཚན་ ༦༧ པར། ཆེས་མཐོའི་ཁྲིམས་ཞིབ་ཁང་ནས་བཙན་བྱོལ་བོད་མིའི་ཁྲིམས་ཞིབ་ཁང་གི་རྩ་འཛིན་ཁྲིམས་ཡིག་དང༌། འགྲོ་ལུགས། སྒྲིག་གཞི་བཅས་བཟོ་འགོད་ཆོག་པའི་འགན་དབང་ཡོད་ཅེས་གསལ་བའི་དགོངས་དོན་ལྟར། ཕྱི་ལོ་ ༡༩༩༡ ལོར་ཆེས་མཐོའི་ཁྲིམས་ཞིབ་ཁང་གི་གོ་སྒྲིག་འོག་ཁྲིམས་ཡིག་ཟིན་བྲིས་ཚོགས་ཆུང་ཆེད་འཛུགས་བསྐྱངས་ཏེ། ཁྲིམས་ཡིག་ཟིན་བྲིས་ཚོགས་ཆུང་གི་གཙོ་འཛིན་ཁྲིམས་ཞིབ་པ་ཆེ་བ་གྲ་ཕྱི་ཕུན་རབ་བློ་བཟང་དར་རྒྱས་མཆོག་དང༌། ཚོགས་མི་ཁྲིམས་དོན་སློབ་སྟོན་པ་ས་སྐྱ་ཕུན་ཚོགས་ཕོ་བྲང་གི་གདུང་སྲས་ཨ་ནནྡ་བཛྲ་རིན་པོ་ཆེ། དྲུང་ཡིག་ཆེན་མོ་རྣམ་རྒྱལ་ཚེ་རིང༌། དྲུང་ཆེ་ལས་འཕར་བྲེ་སྲང་ཚེ་རིང༌། ཁྲིམས་ལུགས་རིག་པ་བ་ཕུར་བུ་རྡོ་རྗེ། ཟུང་འབྲེལ་དྲུང་ཆེ་ཚེ་རིང་དོན་གྲུབ། དྲུང་ཆེ་གཞོན་པ་བློ་བཟང་རྡོ་རྗེ་བཅས་ཀྱིས་གཙོ་བོ་བཅའ་ཁྲིམས་ཀྱི་དོན་ཚན་ཁག་གཞིར་བཟུང་ཐོག  གནས་ཡུལ་ཕྱིའི་རྒྱལ་ཁབ་སོ་སོའི་ཁྲིམས་དང་མ་འགལ་ཞིང༌། རང་རེ་བཙན་བྱོལ་བོད་གཞུང་མང་སྤྱི་སྒེར་གྱི་གནས་སྟངས་དང་དགོས་མཁོ་སོགས་ལའང་འོས་ཤིང་འཚམས་པ་གཙོ་བཟུང་གིས་ལེགས་ཆ་སྡུད་སྒྲིག་གནང་ཞིང༌། དེ་ཡང་བོད་མིའི་སྲོལ་རྒྱུན་ཁྲིམས་ལུགས་དང༌། འགྲོ་སྟངས། གཞན་ཡང་ཕྱིའི་མང་གཙོའི་རྒྱལ་ཁབ་ཁག་གི་གནའ་དེང་ཁྲིམས་ལུགས་རྩ་འགྲེལ་འདྲ་མིན་གྱིས་གཙོས་འབྲེལ་ཡོད་ཡིག་ཆ་སོགས་ལ་ཞིབ་འཇུག་གིས་ལེགས་ཆ་བླངས་མཐར། བཙན་བྱོལ་བོད་མིའི་ཁྲིམས་ཞིབ་ཁང་གི་ཁྲིམས་ལུགས་དབང་འཛིན་གྱི་རྩ་འཛིན་ཁྲིམས་ཡིག་དང༌། སྤྱི་མང་གཏུག་བཤེར་འགྲོ་ལུགས་རྩ་འཛིན་ཁྲིམས་ཡིག དཔང་རྟགས་རྩ་འཛིན་ཁྲིམས་ཡིག་བཅས་ཁྲིམས་ཡིག་གསུམ་བཟོ་འགོད་གནང་སྟེ། སྤྱི་ནོར་ྋགོང་ས་ྋསྐྱབས་མགོན་ཆེན་པོ་མཆོག་ལ་འཆར་འབུལ་ཞུས་དོན་ལྟར། ཕྱི་ལོ་ ༡༩༩༦ ཟླ་ ༣ ཚེས་ ༢༨ ཉིན་ྋསྤྱི་ནོར་ྋགོང་ས་སྐྱབས་མགོན་ཆེན་པོ་མཆོག་གིས་ཆོག་མཆན་བཀའ་འཁྲོལ་ཕྱག་རྟགས་རིན་པོ་ཆེ་སྩལ་སྨིན་བྱུང་སྟེ་ཁྲིམས་ཡིག་ཏུ་གཏན་ལ་ཕབ་ཡོད། 

༡) ཁྲིམས་ལུགས་དབང་འཛིན་གྱི་རྩ་འཛིན་ཁྲིམས་ཡིག

ཁྲིམས་ཡིག་འདིར་ལེའུ་ ༩ དང༌།  ནང་གསེས་དོན་ཚན་ ༨༣ ། ཟུར་སྣོན་ཡིག་ཆ་ ༥ བཅས་ཡོད་པ་དང༌།  ཁྲིམས་ཡིག་འདིའི་དོན་ཚན་ཁག་གི་ནང་དོན་གཙོ་བོ་ནི་ཁྲིམས་ཡིག་གི་ཁྱབ་ཚད།  ཆེས་མཐོའི་ཁྲིམས་ཞིབ་ཁང་དང༌། ཁྲིམས་ཞིབ་ཁང་འོག་མ་ཁག་གི་ངོ་བོ་དང༌། གྲུབ་ཆ། འགན་དབང༌། ཁྲིམས་ཁོངས་ཁྱབ་ཚད། ཁྲིམས་ཞིབ་པའི་ཐོབ་ཐང༌།  འཛིན་སྐྱོང། ཁྲིམས་ཞིབ་ཁང་གོང་འོག་གི་ལས་བྱེད་བསྐོ་གཞག་བཀོད་སྒྲིག་དང་དེ་དག་གི་བླང་དོར་ཐོབ་ཐང་། ཁྲིམས་འཛིན་ཡར་རྒྱས་ཁང༌། གཏུག་བཤེར་བྱ་རིམ།  སྣ་ཚོགས། ཁྲིམས་ཡིག་བསྐྱར་བཅོས་ཀྱི་ཆ་རྐྱེན་བཅས་ཀྱི་གནད་དོན་ཞིབ་ཕྲ་འཁོད་ཡོད་པ་དང་། ཁྲིམས་ཡིག་འདིར་ཕྱི་ལོ་ ༢༠༡༧ ཟླ་ ༥ ཚེས་ ༢༩ བར་བསྐྱར་བཅོས་ཐེངས་ ༨ གནང་ཡོད།

༢) སྤྱི་མང་གཏུག་བཤེར་འགྲོ་ལུགས་རྩ་འཛིན་ཁྲིམས་ཡིག

ཁྲིམས་ཡིག་འདིའི་ནང་ལེའུ་ ༡༥ དང༌། ནང་གསེས་དོན་ཚན་ ༨༩ ། ཟུར་སྣོན་ཡིག་ཆ་ ༢༢ བཅས་ཡོད་པ་དང༌།  ཁྲིམས་ཡིག་འདིའི་དོན་ཚན་ཁག་གི་ནང་དོན་གཙོ་བོ་ནི་ཁྲིམས་ཡིག་གི་ཁྱབ་ཚད་དང༌། ཁྲིམས་ཞིབ་ཁང་གོང་འོག་སོ་སོའི་ཁྲིམས་ཁོངས་ཁྱབ་ཚད། ཁ་མཆུའི་འགྲོ་གྲོན། གྱོད་ཡ་ཉམ་ཐག་ལ་མཐུན་རྐྱེན།  གྱོད་ཡ་དོ་བདག་གི་ཞུ་སྒོ་ཁག་དང༌།  གྱོད་ཡའི་འཐུས་མི་དང་།  གྱོད་ཡའི་ངོ་ཚབ། ཁྲིམས་རྩོད་པ་བསྐོ་གཞག་བཅས་ཀྱི་སྐོར།  ཁ་མཆུ་ཞུ་གཏུག་གི་སྙན་ཞུ་དང་བརྡ་སྦྱོར། ཁ་མཆུ་ཉན་ཞིབ་དང་ཞིབ་གཅོད། ཁ་མཆུ་ཐག་གཅོད་ཀྱི་བཅད་ཁྲ། གོང་ཞུ། བསྐྱར་ཞིབ་དང༌། དོགས་གཅོད། བཟོ་བཅོས། ཁ་མཆུ་བྱེ་བྲག་པ། སྣ་ཚོགས།  ཁྲིམས་ཞིབ་ཁང་ལ་ཁྱད་གསོད།  རང་ཆས་སུ་ཡོད་པའི་དབང་ཆ། བསྐྱར་བཅོས་བཅས་ཁ་མཆུ་ཞུ་གཏུག་སྐབས་ཀྱི་བྱ་རིམ་ཞིབ་ཕྲ་འཁོད་ཡོད་པ་དང་། ཁྲིམས་ཡིག་འདིར་ཕྱི་ལོ་ ༢༠༡༩ ཟླ་ ༡༠ ཚེས་ ༡༤ བར་བསྐྱར་བཅོས་ཐེངས་ ༥ གནང་ཡོད།

༣) དཔང་རྟགས་རྩ་འཛིན་ཁྲིམས་ཡིག

ཁྲིམས་ཡིག་འདིའི་ནང་ལེའུ་ ༡༤ དང༌། ནང་གསེས་དོན་ཚན་ ༨༣ ཡོད་པ་དང༌། ཁྲིམས་ཡིག་འདིའི་དོན་ཚན་ཁག་གི་ནང་དོན་གཙོ་བོ་ནི་ཁྲིམས་ཡིག་གི་ཁྱབ་ཚད་དང༌། དགོས་དམིགས།  དཔང་རྟགས་སྤྱིར་སྟངས་ཀྱི་འགྲེལ་བཤད། དཔང་རྟགས་སུ་བླང་བྱ་ཡིན་མིན་གྱི་འགྲོ་ལུགས། འབྲེལ་ཆགས། དཔང་པོ་བྱེད་འཕེར།  དཔང་པོར་བརྟག་ཞིབ། བསམ་ཚུལ་གྱི་དཔང་རྟགས།  གཟུགས་ཕུང་ལས་གྲུབ་པའི་དཔང་རྟགས།  ངག་ཐོག་དཔང་རྟགས། གསང་ཉར་ཐོབ་དབང༌།  གཞན་བརྗོད་དཔང་རྟགས།  ཁུངས་སྐྱེལ་མ་དགོས་པའི་དངོས་གནས།  ཁུངས་སྐྱེལ་གྱི་འགན་ཁུར། བསྐྱར་བཅོས་བཅས་ཀྱི་སྐོར་བྱ་རིམ་གསལ་པོ་འཁོད་ཡོད་པ་དང་། ཁྲིམས་ཡིག་འདིར་ཕྱི་ལོ་ ༢༠༡༢ ཟླ་ ༧ ཚེས་ ༡༠ བར་བསྐྱར་བཅོས་ཐེངས་ ༣ གནང་ཡོད། 

༡) ཁྲིམས་ལུགས་དབང་འཛིན་གྱི་རྩ་འཛིན་ཁྲིམས་ཡིག

  1. ཁྲིམས་ཡིག་འདིར་ལེའུ་ ༩ དང༌། ནང་གསེས་དོན་ཚན་ ༨༣ ཟུར་སྣོན་ཡིག་ཆ་ ༣ བཅས་ཡོད་པ་དང༌། ཁྲིམས་ཡིག་འདིའི་དོན་ཚན་ཁག་གི་ནང་དོན་གཙོ་བོ་ཁྲིམས་ཡིག་གི་ཁྱབ་ཚད། ཆེས་མཐོའི་ཁྲིམས་ཞིབ་ཁང་དང༌། ཁྲིམས་ཞིབ་ཁང་འོག་མ་ཁག་གི་ངོ་བོ་དང༌། གྲུབ་ཆ། འགན་དབང༌། ཁྲིམས་ཁོངས་ཁྱབ་ཚད། ཁྲིམས་ཞིབ་པའི་ཐོབ་ཐང༌། འཛིན་སྐྱོང། ཁྲིམས་ཞིབ་ཁང་གོང་འོག་གི་ལས་བྱེད་བསྐོ་གཞག་བཀོད་སྒྲིག་དང་དེ་དག་གི་བླང་དོར་ཐོབ་ཐང་། ཁྲིམས་འཛིན་ཡར་རྒྱས་ཁང༌། གཏུག་བཤེར་བྱ་རིམ། སྣ་ཚོགས། ཁྲིམས་ཡིག་བསྐྱར་བཅོས་ཀྱི་ཆ་རྐྱེན་བཅས་ཀྱི་གནད་དོན་ཞིབ་ཕྲ་འཁོད་ཡོད་པ་དང་། ཁྲིམས་ཡིག་འདིར་ཕྱི་ལོ་ ༢༠༡༢ ཟླ་ ༧ ཚེས་ ༡༠ བར་བསྐྱར་བཅོས་ཐེངས་ ༦ གནང་ཡོད།

༢) སྤྱི་མང་གཏུག་བཤེར་འགྲོ་ལུགས་རྩ་འཛིན་ཁྲིམས་ཡིག

  1. ཁྲིམས་ཡིག་འདིའི་ནང་ལེའུ་ ༡༥ དང༌། ནང་གསེས་དོན་ཚན་ ༨༩ ཟུར་སྣོན་ཡིག་ཆ་ ༢༠ བཅས་ཡོད་པ་དང༌། ཁྲིམས་ཡིག་འདིའི་དོན་ཚན་ཁག་གི་ནང་དོན་གཙོ་བོ་ཁྲིམས་ཡིག་གི་ཁྱབ་ཚད་དང༌། ཁྲིམས་ཞིབ་ཁང་གོང་འོག་སོ་སོའི་ཁྲིམས་ཁོངས་ཁྱབ་ཚད། ཁ་མཆུའི་འགྲོ་གྲོན། གྱོད་ཡ་ཉམ་ཐག་ལ་མཐུན་རྐྱེན། གྱོད་ཡ་དོ་བདག་གི་ཞུ་སྒོ་ཁག་དང༌། གྱོད་ཡའི་འཐུས་མི་དང་། གྱོད་ཡའི་ངོ་ཚབ། ཁྲིམས་རྩོད་པ་བསྐོ་གཞག་བཅས་ཀྱི་སྐོར། ཁ་མཆུ་ཞུ་གཏུག་གི་སྙན་ཞུ་དང་བརྡ་སྦྱོར། ཁ་མཆུ་ཉན་ཞིབ་དང་ཞིབ་གཅོད། ཁ་མཆུ་ཐག་གཅོད་ཀྱི་བཅད་ཁྲ། གོང་ཞུ། བསྐྱར་ཞིབ་དང༌། དོགས་གཅོད། སྣ་ཚོགས། ཁྲིམས་ཞིབ་ཁང་ལ་ཁྱད་གསོད། རང་ཆས་སུ་ཡོད་པའི་དབང་ཆ། བསྐྱར་བཅོས་བཅས་ཁ་མཆུ་ཞུ་གཏུག་སྐབས་ཀྱི་བྱ་རིམ་ཞིབ་ཕྲ་འཁོད་ཡོད་པ་དང་། ཁྲིམས་ཡིག་འདིར་ཕྱི་ལོ་ ༢༠༡༢ ཟླ་ ༧ ཚེས་ ༡༠ བར་བསྐྱར་བཅོས་ཐེངས་ ༢ གནང་ཡོད།

༣) དཔང་རྟགས་རྩ་འཛིན་ཁྲིམས་ཡིག

  1. ཁྲིམས་ཡིག་འདིའི་ནང་ལེའུ་ ༡༤ དང༌། ནང་གསེས་དོན་ཚན་ ༨༣ ཡོད་པ་དང༌། ཁྲིམས་ཡིག་འདིའི་དོན་ཚན་ཁག་གི་ནང་དོན་གཙོ་བོ་ཁྲིམས་ཡིག་གི་ཁྱབ་ཚད་དང༌། དགོས་དམིགས། དཔང་རྟགས་སྤྱིར་སྟངས་ཀྱི་འགྲེལ་བཤད། དཔང་རྟགས་སུ་བླང་བྱ་འོས་མིན་གྱི་འགྲོ་ལུགས། འབྲེལ་ཆགས་དཔང་པོ་འཕེར་ཚད། དཔང་པོར་བརྟག་ཞིབ། བསམ་ཚུལ་གྱི་དཔང་རྟགས། གཟུགས་ཕུང་ལས་གྲུབ་པའི་དཔང་རྟགས། ངག་ཐོག་དཔང་རྟགས། གསང་ཉར་ཐོབ་དབང༌། གཞན་བརྗོད་དཔང་རྟགས། ཁུངས་སྐྱེལ་མ་དགོས་པའི་དངོས་གནས། ཁུངས་སྐྱེལ་གྱི་འགན་ཁུར། བསྐྱར་བཅོས་བཅས་ཀྱི་སྐོར་བྱ་རིམ་གསལ་པོ་འཁོད་ཡོད་པ་དང་། ཁྲིམས་ཡིག་འདིར་ཕྱི་ལོ་ ༢༠༡༢ ཟླ་ ༧ ཚེས་ ༡༠ བར་བསྐྱར་བཅོས་ཐེངས་ ༣ གནང་ཡོད།

ག) ཆེས་མཐོའི་ཁྲིམས་ཞིབ་ཁང་གི་ངོ་བོ་དང༌། འགན་དབང༌།

༡) བོད་མིའི་སྒྲིག་འཛུགས་དང༌།  མི་མང་ལ་ཡུལ་དུས་གནས་སྐབས་སུ་དམིགས་བསལ་དགོས་མཁོ་དང་འཚམས་པའི་ཁྲིམས་ལུགས་དབང་འཛིན་གྱི་ཆེས་མཐོའི་ཁྲིམས་ཞིབ་ཁང་ནི་བཙན་བྱོལ་བོད་མི་སྤྱི་སྒེར་ཡོངས་ཀྱི་གྱོད་གཏུག་གོང་ཞུ་བྱ་ཡུལ་མཐར་ཐུག་གི་ཁྲིམས་ཞིབ་ཁང་དང༌། བོད་མིའི་ཁྲིམས་དང་ལམ་སྲོལ་རྣམ་པ་འདྲ་མིན་གྱི་ཁྲིམས་ཞིབ་སྟངས་འཛིན་བཀོད་ཁྱབ་ལག་བསྟར་བཅས་བྱ་རྒྱུའི་འགན་དབང་ཡོད་པའི་བོད་མིའི་སྒྲིག་འཛུགས་ཀྱི་ཁྲིམས་འཛིན་གོང་ན་མེད་པ་དེ་ཡིན།

༢) ཁྲིམས་ཞིབ་ཁང་ནང་དུ་གཏུག་བཤེར་གྱི་བྱ་རིམ་གང་བྱུང་བ་རྣམས་ཡིག་ཐོག་གམ། སྒྲ་འཛིན་འཕྲུལ་ཆས་གང་རུང་ཐོག་གཏན་འཇགས་སུ་རྩ་འཛིན་ཉར་འཇོག་བྱེད་པའི་ཆེས་མཐོའི་ཁྲིམས་ཞིབ་ཁང་ཡིན།

༣) ཆེས་མཐོའི་ཁྲིམས་ཞིབ་ཁང་ནས་བཙན་བྱོལ་བོད་མིའི་ཁྲིམས་དང་ལམ་ལུགས་ཀྱི་ཁྲིམས་རྩོད་པའི་བླང་དོར་ཞུ་སྒོའི་སྒྲིག་གཞི་དང་། ཁྲིམས་ཞིབ་ཁང་འོག་མ་ཁག་གི་སྒྲིག་གཞི་དང་ལམ་སྟོན་ཇི་དགོས་སྐབས་བསྟུན་བཟོ་འགོད་ཀྱིས་ལག་བསྟར་བྱེད་ཆོག་པ་ཡིན།

༤) ཆེས་མཐོའི་ཁྲིམས་ཞིབ་ཁང་ནས་བཙན་བྱོལ་བོད་མིའི་བཅའ་ཁྲིམས་དང༌། སྤྱི་འཐུས་ལྷན་ཚོགས་ནས་གཏན་ལ་ཕབ་པའི་ཁྲིམས་ལུགས་ཁག་གཞིར་བཟུང་ཁྲིམས་ཞིབ་ཁང་གི་རྩ་འཛིན་ཁྲིམས་ཡིག་དང༌། འགྲོ་ལུགས། སྒྲིག་གཞི་བཅས་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་ཆེ་བ་དང༌། ཁྲིམས་ཞིབ་པ་གཞན་གཉིས་བཅས་སྤྱི་མོས་ཀྱིས་བཟོ་འགོད་དང་འབྲེལ་གཏན་འབེབས་བྱུང་མཚམས་ནས་ལག་ལེན་བསྟར་ཆོག

༥) ཆེས་མཐོའི་ཁྲིམས་ཞིབ་ཁང་ནས་གཏན་འཇགས་སམ་འཕྲལ་སེལ་གང་རུང་གི་ཁྲིམས་ཞིབ་ཁང་འོག་མ་ཁག་གསར་འཛུགས་དང༌། ཕྱིར་བསྡུ་བྱེད་ཆོག

༦) ཁྲིམས་ཞིབ་ཁང་འོག་མ་རྣམས་དང༌།  ཁྲིམས་དོན་དང་འབྲེལ་བའི་ལས་ཁུངས་ཁག་གི་ལས་དོན་བྱེད་ཕྱོགས་དང༌།  འཛིན་སྐྱོང་གི་བྱ་བར་ཞིབ་འཇུག་ལམ་སྟོན་དང་སྟངས་འཛིན་བྱེད་ཆོག

༧) གཞན་ཡང་རང་རེའི་གནས་བབས་ལ་བསྟུན་ཏེ་ཁྲིམས་ཞིབ་བྱེད་འོས་པའམ། རང་རེས་ཁྲིམས་ཞིབ་བྱ་རྒྱུར་གནས་ཡུལ་རྒྱལ་ཁབ་ཀྱི་ཁྲིམས་དབང་ཐོག་ནས་དགག་པ་མེད་པའི་སྤྱི་སྒེར་གྱི་རྩོད་གཞི་ཁག་བཅས་ལ་ཆེས་མཐོའི་ཁྲིམས་ཞིབ་ཁང་ནས་བོད་མིའི་ཁྲིམས་དང༌། ལམ་སྲོལ་རྣམ་པ་འདྲ་མིན་གྱི་ཁྲིམས་ཞིབ་དང༌། བཀོད་འདོམས་བྱེད་ཆོག

༨) བོད་ཀྱི་ཡུལ་མིའི་གཞི་རྩའི་རང་དབང་དང་ཐོབ་ཐང་ཁག་སྲུང་སྐྱོབ་ཆེད་དགོས་ངེས་ཀྱི་བཀོད་འདོམས་བྱེད་ཆོག

༩) བོད་མིའི་སྒྲིག་འཛུགས་ཀྱི་ཁྲིམས་ལུགས་དང༌།  ཆབ་སྲིད་དབང་འཛིན་གྱི་བཀའ། སྒྲིག་གཞི་བཅས་གང་ཡང་བཅའ་ཁྲིམས་ཀྱི་དོན་ཚན་གང་རུང་དང་འགལ་ཚེ། ཆེས་མཐོའི་ཁྲིམས་ཞིབ་ཁང་ནས་འགལ་བའི་ཆ་དེ་རྩ་འཛིན་མེད་པའི་ཐག་གཅོད་བྱེད་ཆོག

ང) ཆེས་མཐོའི་ཁྲིམས་ཞིབ་ཁང་གི་གྲུབ་ཆ།

༡) ཆེས་མཐོའི་ཁྲིམས་ཞིབ་ཁང་ལ་ཁྲིམས་ཞིབ་པ་ཆེ་བ་གཅིག་དང༌། སྤྱི་འཐུས་ལྷན་ཚོགས་ནས་ཁྲིམས་ཞིབ་པའི་གྲངས་སྤར་དགོས་པའི་ཁྲིམས་ལུགས་མ་བཟོས་བར་ཁྲིམས་ཞིབ་པ་གཞན་གཉིས་བཅས་དགོས་པ་ཡིན།

༢) ཆེས་མཐོའི་ཁྲིམས་ཞིབ་ཁང་དུ་ཚོགས་མི་གསུམ་ལས་མི་མང་བའི་བཤེར་དཔང་ལྷན་ཚོགས་ཤིག་དགོས་གལ་བྱུང་ན་འཛུགས་ཆོག་པ་ཡིན།

༣) གྱོད་གཞི་གལ་ཆེའི་རིགས་ཀྱི་ཁྲིམས་ཞིབ་ལ་དགོས་གལ་ནམ་བྱུང་མཚམས་གྱོད་གཞིའི་གནད་དོན་ལ་ཉམས་མྱོང་ཡོད་པའི་གཟུ་དཔང་ཚོགས་མི་གྲངས་དགུ་ལས་མ་བརྒལ་བ་ཞིག་བཤེར་དཔང་ཡོད་མེད་ལ་མ་ལྟོས་པར་བསྐོ་གཞག་བྱེད་ཆོག་པ་ཡིན།

ཅ) ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ། 

༡) ཆེས་མཐོའི་ཁྲིམས་ཞིབ་པ་ཆེ་བ་དང༌། ཁྲིམས་ཞིབ་པ་གཞན་གཉིས་བཅས་སོ་སོའི་གོ་ཡུལ་སྟོང་པ་ནམ་ཐོན་ལ་ཆེས་མཐོའི་ཁྲིམས་ཞིབ་པ་ཆེ་བ་དང༌། སྤྱི་འཐུས་ཚོགས་གཙོ་ཚོགས་གཞོན། སྲིད་སྐྱོང་བཅས་ནས་སྐབས་དེའི་འོས་མི་འདེམས་སྒྲུག་ཁོ་ནའི་ཆེད་བསྐོ་འཛུགས་བྱས་པའི་མི་འགྲོ་གསུམ་མམ་ལྔ་ཡོད་པའི་འདེམས་སྒྲུག་ཚོགས་ཆུང་གིས་ཉིས་ལྡབ་ལས་མ་ཉུང་བའི་འཆར་ཕུལ་ལྟར་སྤྱི་འཐུས་ལྷན་ཚོགས་སུ་འོས་བསྡུའི་ལམ་ནས་མང་མོས་ཐོབ་པ་དེར་ཁྲིམས་ཞིབ་པ་ཆེ་བའམ་ཁྲིམས་ཞིབ་པར་འོས་ཐོན་བྱུང་བར་ངོས་འཛིན་བྱ་རྒྱུ།

༢) ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་ཆེ་བར་འོས་ཐོན་བྱུང་འཕྲལ་ལས་འཁུར་དུ་མ་ཞུགས་གོང་འཁྱུར་ཉེའི་ཁྲིམས་ཞིབ་པ་ཆེ་བའམ་ལས་ཚབ་ཀྱི་མདུན་དུ་ཁྲིམས་ལུགས་གཏན་འབེབས་བྱས་པའི་ཚིག་གཞི་ལྟར་ལས་ཁུར་དམ་བཅའམ།   ཁས་ལེན་བྱེད་དགོས། ཁྲིམས་ཞིབ་པ་གཞན་གཉིས་འོས་ཐོན་བྱུང་འཕྲལ་ཁྲིམས་ཞིབ་པ་ཆེ་བའི་མདུན་ལས་ཁུར་དུ་མ་ཞུགས་པའི་གོང་ཁྲིམས་ལུགས་གཏན་འབེབས་བྱས་པའི་ཚིག་གཞི་ལྟར་ལས་ཁུར་དམ་བཅའམ། ཁས་ལེན་བྱེད་དགོས།

༣) ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་ཆེ་བ་དང༌། ཁྲིམས་ཞིབ་པ་གཞན་གཉིས་བཅས་སུ་རུང་སྤྱི་འཐུས་ལྷན་ཚོགས་ཀྱི་སྤྱི་འཐུས་རྩ་འབོར་གསུམ་ཆ་གཉིས་ཡན་གྱིས་འཕོ་འགྱུར་དགོས་པའི་གྲོས་ཆོད་བཞག་སྟེ་འཕོ་འགྱུར་བྱ་དགོས་བྱུང་བའམ།  དོ་བདག་ནས་དགོངས་ཤོག་ཕུལ་ན་ལས་དེ་མིན་ཁྲིམས་ཞིབ་པ་ཆེ་བའི་ལས་རྒྱུན་ལོ་ལྔའམ། རང་ལོ་དྲུག་ཅུ་རེ་ལྔ་ཧྲིལ་པོ་ལོན་པ་གང་སྔའི་བར་ཡིན། ཁྲིམས་ཞིབ་པ་གཞན་གཉིས་རང་ལོ་དྲུག་ཅུ་རེ་ལྔ་མ་ལོན་བར་ལས་ཁུར་རྒྱུན་འཛིན་བྱ་རྒྱུ།

ཆ) ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་རིམ་བྱོན།

ཨང་།  མཚན། ཁྲིམས་ཞིབ་པ། ཁྲིམས་ཞིབ་པ་ཆེ་བ། མཛད་འཁུར་འཁྱུར་ཚེས།
བསྐོ་ཚེས། དམ་འབུལ།  བསྐོ་ཚེས། དམ་འབུལ། 
གྲ་ཕྱི་ཕུན་རབ་བློ་བཟང་དར་རྒྱས། ༌༌༌༌ ༌༌༌༌ ༡༩༩༢།༠༢།༠༤ ༡༩༩༢།༠༣།༡༠ ༢༠༠༢།༠༩།༡༩
སྲོང་ཕུ་ཚང་མདོ་སྔགས་བསྟན་འཛིན། ༡༩༩༧།༠༡།༢༠ ༡༩༩༧།༠༡།༢༩ ༌༌༌༌ ༌༌༌༌ ༢༠༠༢།༠༣།༡༧
ཞེ་བོ་བློ་བཟང་དར་རྒྱས། ༡༩༩༧།༠༡།༢༠ ༡༩༩༧།༠༡།༢༩ ༌༌༌༌ ༌༌༌༌ ༡༩༩༩།༠༢།༡༧
བྱ་དུར་བསོད་ནམས་བཟང་པོ། ༢༠༠༡།༠༩།༢༤ ༢༠༠༡།༠༩།༢༦ ༢༠༠༢།༠༩།༢༤ ༢༠༠༢།༡༠།༠༡ ༢༠༠༤།༠༩།༢༨
གྲེས་མའི་ནང་པ་རྣམ་རྒྱལ་ཚེ་རིང་། ༢༠༠༢།༠༣།༡༨ ༢༠༠༢།༠༣།༢༠ ༢༠༠༤།༠༩།༡༥ ༢༠༠༤།༡༠།༡༤ ༢༠༠༩།༡༠།༡༣
གྲོང་རེ་ཚང་བློ་བཟང་མཁས་གྲུབ། ༢༠༠༢།༠༩།༢༤ ༢༠༠༢།༡༠།༠༡ ༌༌༌༌ ༌༌༌༌ ༢༠༠༥།༠༧།༠༡
ཨ་མྱེ་ཚང་ཐུབ་བསྟན་བཀྲ་ཤིས། ༢༠༠༤།༠༩།༡༥ ༢༠༠༤།༡༠།༡༤ ༌༌༌༌ ༌༌༌༌ ༢༠༠༩།༠༧།༢༧
རྒན་ཆེན་ངག་དབང་འཕེལ་རྒྱལ། ༢༠༠༥།༠༩།༡༥ ༢༠༠༥།༡༢།༡༦ ༢༠༠༩།༠༩།༢༣ ༢༠༠༩།༡༠།༡༦ ༢༠༡༤།༡༠།༡༥
ཆུ་སྟེང་ངག་དབང་ཐུབ་བསྟན། ༢༠༠༩།༠༩།༡༤ ༢༠༠༩།༡༠།༡༦ ༌༌༌༌ ༌༌༌༌ ༢༠༡༣།༠༦།༣༠
༡༠ ན་མེ་བླ་ཁང་ཚེ་རིང་དོན་གྲུབ། ༢༠༡༠།༠༣།༡༥ ༢༠༡༠།༣།༢༤ ༌༌༌༌ ༌༌༌༌ ༢༠༡༦།༡༠།༣༡
༡༡ ཆོས་ཁྲི་སྟེང་པ་ངག་དབང་ཆོས་གྲགས། ༌༌༌༌ ༢༠༡༣།༡༠།༠༣ ༌༌༌༌ ༌༌༌༌ ༢༠༡༨།༠༩།༠༢
༡༢ བཀའ་བརྒྱུད་དོན་གྲུབ། ༌༌༌༌ ༌༌༌༌ ༌༌༌༌ ༢༠༡༤།༡༠།༡༥ ༢༠༡༩།༡༠།༡༥
༡༣ འབུམ་རམས་པ་ངག་དབང་རབ་རྒྱལ། ༌༌༌༌ ༢༠༡༦།༡༡།༠༡ ༌༌༌༌ ༌༌༌༌ ༢༠༡༩།༡༢།༣༡
༡༤ ཀརྨ་དགྲ་འདུལ། ༌༌༌༌ ༢༠༡༨།༡༠།༠༡ ༌༌༌༌ ༌༌༌༌
༡༥ དྭགས་པོ་བསོད་ནམས་ནོར་བུ། ༌༌༌༌༌ ༌༌༌༌༌ ༌༌༌༌ ༢༠༡༩།༡༠།༡༥
༡༦ བསྟན་འཛིན་ལུང་རྟོགས། ༌༌༌༌ ༢༠༢༠།༠༡།༡༠ ༌༌༌༌༌ ༌༌༌༌༌

 

གཉིས།  ཁྲིམས་ཞིབ་ཁང་འོག་མ།

ཆེས་མཐོའི་ཁྲིམས་ཞིབ་ཁང་གི་གཤམ་འོག་ཏུ་སྐོར་སྐྱོད་ཁྲིམས་ཞིབ་ཁང༌དང་། དེའི་འོག་ཏུ་ས་གནས་ཁྲིམས་ཞིབ་ཁང་བཅས་ཁྲིམས་ཞིབ་ཁང་རིམ་པ་གཉིས་ཡོད།

ཀ) སྐོར་སྐྱོད་ཁྲིམས་ཞིབ་ཁང་།

༡) ས་གནས་ཁྲིམས་ཞིབ་ཁང་ཁག་ནས་ཐག་གཅོད་བྱས་པའི་བཅད་ཁྲ་གོང་ཞུ་དང་། སྐོར་སྐྱོད་ཁྲིམས་ཞིབ་ཁང་གི་ཐོག་མའི་གཏུག་བཤེར་གྱི་ཁྲིམས་ཁོངས་ཁྱབ་ཚད་དུ་ཡོད་པའི་ཁ་མཆུ་རིགས་ཞུ་གཏུག་ཆེད། ཕྱི་ལོ་ ༢༠༢༠ ཟླ་ ༨ ཚེས་ ༢༨ ཉིན་རྒྱ་གར་བྱང་ཕྱོགས་བདེ་སྐྱིད་གླིང་གཞིས་ཆགས་སུ་བཙན་བྱོལ་བོད་མིའི་སྐོར་སྐྱོད་ཁྲིམས་ཞིབ་ཁང་གསར་འཛུགས་བྱས་ཡོད། 

ཁ) ས་གནས་ཁྲིམས་ཞིབ་ཁང་།

ཕྱི་ལོ་ ༢༠༡༨ ཟླ་ ༢ ཚེས་ ༣ ཉིན། ཆེས་མཐོའི་ཁྲིམས་ཞིབ་ཁང་ནས་ས་གནས་ཁྲིམས་ཞིབ་ཁང་ཁག་གི་ས་ཁོངས་ཁྱབ་ཚད་དང་། གཏན་འཇགས་དང་འཕྲལ་སེལ་ཁ་མཆུ་ཞུ་གཏུག་བྱ་ཡུལ་གཏན་འབེབས་ཀྱི་ཡོངས་ཁྱབ་གསལ་བསྒྲགས་གནང་སྟེ། ཕྱི་ལོ་ ༢༠༡༢ ཟླ་ ༡༡ ཚེས་ ༢༡ ཉིན་ས་གནས་ཁྲིམས་ཞིབ་ཁང་ཁག་གི་འཕྲལ་སེལ་ཁ་མཆུ་ཞུ་གཏུག་བྱ་ཡུལ་བཀོད་སྒྲིག་གནང་བའི་ས་ཁོངས་ཁྱབ་ཚད་ལ་བསྐྱར་བཅོས་གནང་ཡོད། 

༡) བྱང་ཕྱོགས་བོད་མིའི་ས་གནས་ཁྲིམས་ཞིབ་ཁང་ནི་ཕྱི་ལོ་ ༢༠༠༡ ཟླ་ ༡༡ ཚེས་ ༡༩ ཉིན་སྡེ་ར་ལྡུན་བདེ་སྐྱིད་གླིང་གཞིས་ཆགས་སུ་ཟུར་འཛུགས་གནང་བ་དང་། བྱང་ཕྱོགས་བོད་མིའི་ས་གནས་ཁྲིམས་ཞིབ་ཁང་གི་ཁྱབ་ཁོངས་སུ། ༡། སྡེ་ར་ལྡུན། ༢། ར་ཇ་སྤུར་བུད་མེད་མཉམ་ལས། ༣། ཧར་པ་སྤུར་འདོད་རྒུ་གཡུལ་རྒྱལ་གླིང་། ༤། སྤོན་ཊ་ཆོལ་གསུམ། ༥། སྤུར་ཝ་ལ་ས་སྐྱ་གཞིས་ཆགས། ༦། ས་ཊོན་ཀཿཐོག ༧། ཀུམ་རའོ། ༨། སྦིར་བོད་ཚོགས། ༩། སྦིར་སྡེ་དགེ ༡༠། ཅོན་ཏ་ར་ནང་ཆེན། ༡༡། བཀྲ་ཤིས་ལྗོངས། ༡༢། མན་ཌི། ༡༣། ཀུ་ལུ་དཔལ་རབ་གླིང་། ༡༤། སིམ་ལ་སྤྱི་ཁྱབ་ལས་ཁུངས། ༡༥། ཌོ་ལན་ཇི་བོན་གཞིས། ༡༦། ཌལ་ཧོར་ཕུན་ཚོགས་གླིང་། ༡༧། དྷ་རམ་ས་ལ། ༡༨། ལྡི་ལི་བསམ་ཡས་གླིང་། ༡༩། ཝ་ར་ཎ་སི། ༢༠། འབུམ་སྡེ་ལ། ༢༡། བསྟན་འཛིན་སྒང་། ༢༢། ཏི་ཛུ་དར་རྒྱས་གླིང་། ༢༣། ཀྲུ་ཀྲིང་། ༢༤། མེའོ་ཆོས་འཕེལ་གླིང༌། ༢༥། ཤི་ལོང་། ༢༦། འབྲུག ༢༧། འཇོ་ཁེལ་བསམ་འགྲུབ་གླིང༌། ༢༨། བལ་ཡུལ་རྒྱལ་ས་དང་འཕགས་ཤིང་། ༢༩། མཆོད་རྟེན་དང་འཇོར་སྤ་ཊི། ༣༠། ར་སོ་བ་དགེ་རྒྱས་གླིང་། ༣༡། ཤར་ཁུམ་བདེ་ལེགས་གླིང་། ༣༢། ཝ་ལུང་བསམ་འཕེལ་གླིང་། ༣༣། གློ་ཚེ་རོགས་རྣམ་རྒྱལ་གླིང་། ༣༤། གློ་སྒྲིག ༣༥། སྤོག་ར་བཀྲ་ཤིས་དཔལ་འཁྱིལ། ༣༦། སྤོག་ར་བཀྲ་ཤིས་གླིང་། ༣༧། རྡོར་པ་ཀྲན་ནོར་འཛིན་གླིང་། ༣༨། རྡོར་གླིང་། ༣༩། ཀ་སྦུག ༤༠། སྒང་ཏོག ༤༡། ར་ཝང་ལ་ཀུན་ཕན་གླིང༌། ༤༢། སོ་ན་རྡ་བཀྲ་ཤིས་གླིང་བཅས་ས་གནས་འགོ་འཛིན་སོ་སོའི་ཁྱབ་ཁོངས་དང་། འདབས་འབྲེལ་ཁ་འཐོར་བོད་མི་ཡོངས་རྫོགས་ཚུད་ཡོད།

༢) ལྷོ་ཕྱོགས་བོད་མིའི་ས་གནས་ཁྲིམས་ཞིབ་ཁང་ནི་ཕྱི་ལོ་ ༢༠༠༣ ཟླ་ ༥  ཚེས་ ༡༡ ཉིན་སྦེལ་ཀོབ་ལུགས་བསམ་གཞིས་ཆགས་སུ་ཟུར་འཛུགས་གནང་བ་དང་། ལྷོ་ཕྱོགས་བོད་མིའི་ས་གནས་ཁྲིམས་ཞིབ་ཁང་གི་ཁྱབ་ཁོངས་སུ། ༡། ལུགས་ཟུང་བསམ་གྲུབ་གླིང་། ༢། བདེ་སྐྱིད་སླར་གསོ། ༣། ཧོན་སུར་རབ་རྒྱས་གླིང༌། ༤། ཀོ་ལི་གལ་དོན་ལྡན་གླིང༌། ༥། མོན་གོ་འདོད་རྒུ་གླིང༌། ༦། བྷེང་ལོར་ལྷོ་སྤྱི། ༧། བྷན་རྡ་ར་ནོར་རྒྱས་གླིང་། ༨། མན་སྤར་ཕན་བདེ་གླིང༌། ༩། ཨོ་ལྡི་ཤ་ཕུན་ཚོགས་གླིང༌བཅས་ས་གནས་འགོ་འཛིན་སོ་སོའི་ཁྱབ་ཁོངས་དང་། འདབས་འབྲེལ་ཁ་འཐོར་བོད་མི། ༡༠། བྱང་ཨ་རི། ༡༡། ལྷོ་ཨ་རི། ༡༢། སུད་སི། ༡༣། དབྱིན་ལན། ༡༤། ཕ་རན་སི། ༡༥། བྷེལ་ཇེམ། ༡༦། རུ་སོག ༡༧། ཉི་ཧོང༌། ༡༨། ཨོ་སི་ཀྲི་ལི་ཡ། ༡༩། ཐའེ་ཝན། ༢༠། ཨ་ཕི་རི་ཀ་བཅས་སྐུ་ཚབ་དོན་གཅོད་སོ་སོའི་ཁྱབ་ཁོངས་དང་། འདབས་འབྲེལ་ཁ་འཐོར་བོད་མི་ཡོངས་རྫོགས་ཚུད་ཡོད། 

༣) ལ་དྭགས་བོད་མིའི་ས་གནས་ཁྲིམས་ཞིབ་ཁང་ནི་ཕྱི་ལོ་ ༢༠༡༢ ཟླ་ ༨ ཚེས་ ༡༣ ཉིན་ལྕོག་ལམ་སར་བསོད་ནམས་གླིང་གཞིས་ཆགས་སུ་ཟུར་འཛུགས་གནང་བ་དང་། ལ་དྭགས་བོད་མིའི་ས་གནས་ཁྲིམས་ཞིབ་ཁང་གི་ཁྱབ་ཁོངས་སུ། བསོད་ནམས་གླིང་ལ་སྤྱི་ལས་ཁུངས་ཀྱི་ཁྱབ་ཁོངས་དང་། འཇའ་མུ་ཀ་ཤི་མིར་མངའ་ཁུལ་ཁ་འཐོར་བོད་མི་ཡོངས་རྫོགས་ཚུད་ཡོད།

༤) ཕྱི་ལོ་ ༢༠༡༢ ཟླ་ ༨ ཚེས་ ༡༣ ཉིན་འབྲས་ལྗོངས་ལྷོ་ཕྱོགས་ར་ཝང་ལ་ཀུན་ཕན་གླིང་གཞིས་ཆགས་སུ་ཤར་ཕྱོགས་བོད་མིའི་ས་གནས་ཁྲིམས་ཞིབ་ཁང་ཟུར་འཛུགས་གནང་ནའང་། ལོ་ངོ་གསུམ་ལྷག་རིང་ཁྱབ་ཁོངས་ས་གནས་ནས་ཁ་མཆུ་ཞུ་གཏུག་བྱེད་མཁན་བྱུང་མེད་སྟབས། ཕྱི་ལོ་ ༢༠༡༦ ཟླ་ ༣ ཚེས་ ༣༡ ནས་ཕྱིར་བསྡུ་གནང་སྟེ། ཤར་ཕྱོགས་ས་གནས་ཁྲིམས་ཞིབ་ཁང་གི་ཁྱབ་ཁོངས་ས་གནས་རྣམས་བྱང་ཕྱོགས་ས་གནས་ཁྲིམས་ཞིབ་ཁང་དུ་ཟླ་བསྒྲིལ་བཏང་། 

གསུམ།  ཁྲིམས་ཞིབ་ཁང་གི་འཛིན་སྐྱོང༌།

ཆེས་མཐོའི་ཁྲིམས་ཞིབ་ཁང་དང༌། ཁྲིམས་ཞིབ་ཁང་འོག་མ་ཁག་ལ་འགན་འཛིན་སྡེ་ཚན་དང་ལས་བྱའི་སྡེ་ཚན་བཅས་ཀྱི་ས་མིག་ཇི་དགོས་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་ལྷན་ཚོགས་སུ་གོ་བསྡུར་གཏན་འབེབས་ཀྱིས་བཀའ་ཤག་བརྒྱུད་ལས་བྱེད་འདེམས་བསྐོ་ལྷན་ཁང་ལ་འབུལ་རྒྱུ། 

ཀ) ཆེས་མཐོའི་ཁྲིམས་ཞིབ་ཁང་གི་ཁྲིམས་དྲུང་དང་ལས་བྱེད།

༡) ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་ལྷན་ཚོགས་སུ་ཁྲིམས་དྲུང་གི་མི་འགྲོའི་སྐོར་གོ་བསྡུར་བྱས་ཏེ་བོད་མིའི་སྒྲིག་འཛུགས་ཀྱི་ལས་བྱེད་པ་སྤྱིའི་སྒྲིག་སྲོལ་ལྟར་གནས་སྤོ་དང༌། གནས་སྤར། ཞབས་གཡར་གང་རུང་གི་ཐོག་ཁྲིམས་ཞིབ་པ་ཆེ་བས་བཀའ་ཤག་ལ་གོ་བསྡུར་གྱིས་བསྐོ་གཞག་བྱ་རྒྱུ།

༢) ཆེས་མཐོའི་ཁྲིམས་ཞིབ་ཁང་དང་ཁྲིམས་ཞིབ་ཁང་འོག་མ་ཁག་བཅས་ཀྱི་ལས་བྱེད་པ་རྣམས་ལས་བྱེད་པ་སྤྱིའི་སྒྲིག་སྲོལ་ལྟར་གསར་བསྐོ་དང་། གནས་སྤོ། གནས་སྤར། ཞབས་གཡར། ཆོད་གན་བཅས་གང་རུང་གི་ཐོག་ནས་བསྐོ་གཞག་བྱ་རྒྱུ།

བཞི།  ཁྲིམས་འཛིན་ཡར་རྒྱས།

ཀ) ཁྲིམས་འཛིན་ཚོགས་འདུ།

༡) ཆེས་མཐོའི་ཁྲིམས་ཞིབ་ཁང་གིས་ས་གནས་དང༌།  དུས་ཚེས་བཀོད་སྒྲིག་བྱས་ཏེ་ལོ་གསུམ་རེའི་མཚམས་སམ། དགོས་གལ་ནམ་བྱུང་བོད་མིའི་ཁྲིམས་ཞིབ་ཁང་གི་ཁྲིམས་ཞིབ་པ་རྣམས་དང༌།  བཤེར་དཔང་བཅས་ཀྱི་ཚོགས་འདུ་སྐོང་འཚོགས་བྱ་རྒྱུ་དང༌།  ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་ཆེ་བས་ཚོགས་འདུ་དེའི་གཙོ་སྐྱོང་བྱ་རྒྱུ།

༢) དགོས་གལ་མཆིས་ཚེ་ཆེས་མཐོའི་ཁྲིམས་ཞིབ་ཁང་ནས་བཀོད་སྒྲིག་བྱས་པའི་ས་གནས་དང༌།  དུས་ཚོད་ཐོག་དམིགས་བསལ་ཚོགས་འདུ་ཡང་སྐོང་འཚོགས་བྱེད་ཆོག་པ་ཡིན།

ཁ) ཁྲིམས་འཛིན་ཡར་རྒྱས་ཁང༌།

བོད་མིའི་སྒྲིག་འཛུགས་ཀྱི་ཁྲིམས་འཛིན་སྡེ་ཚན་ནང་ཁྲིམས་ཞིབ་ཁང་ཁག་གི་ཁྲིམས་ལས་འཛིན་སྐྱོང་ཡར་རྒྱས་གོང་སྤེལ་དང༌།  ལེགས་ཆ་ཕྱོགས་བསྡུའི་ཆེད་ཁྲིམས་འཛིན་ཡར་རྒྱས་ཁང་ཞིག་འཛུགས་ཆོག་པ་ཡིན།

(ད་བར་ཁྲིམས་འཛིན་ཡར་རྒྱས་ཁང་འཛུགས་དགོས་བྱུང་མེད།)

ལྔ།  བྱེད་སྒོའི་རྩ་འཛིན།

ཀ) སྐད་ཡིག་དང་། ཆས་གོས།

༡) བོད་མིའི་ཁྲིམས་ཞིབ་ཁང་གི་སྐད་ཡིག་ནི་བོད་སྐད་དང༌།  བོད་ཡིག་ཡིན།

༢) དཔང་རྟགས་ཀྱིས་མཚོན་ཐོག་མ་ཉིད་ནས་སྐད་ཡིག་གཞན་ནང་ཡོད་པ་ཕུད།  དེ་མིན་ཡིག་ཆ་ཁག་བོད་ཡིག་ནང་དགོས་པ་ཡིན།

༣) ཁྲིམས་ཞིབ་ཁང་གི་རྩ་འཛིན་ཁྲིམས་ཡིག་དང༌། འགྲོ་ལུགས། སྒྲིག་གཞི་བཅས་སྐད་ཡིག་གཞན་ཐོག་གཞུང་འབྲེལ་ཕབ་སྒྱུར་བྱས་པའི་ཚིག་དོན་འགྲེལ་བརྗོད་བྱེད་ཕྱོགས་ལ་རྩོད་གླེང་བྱུང་ཚེ་བོད་ཡིག་ཐོག་བྲིས་པའི་ཡིག་གཞིར་རྩ་འཛིན་བྱ་རྒྱུ།

༤) ཁྲིམས་དུས་ཚུགས་སྐབས་ཁྲིམས་ཞིབ་ཁང་ནང་ཁྲིམས་ཞིབ་པ་དང༌། བཤེར་དཔང༌།  ཁྲིམས་དྲུང༌།  ཁྲིམས་རྩོད་པ་བཅས་ནས་རང་ལུགས་བོད་ཆས་གྱོན་དགོས་རྒྱུ་བཅས་སོ། །

                                                                                                                                                                                                                  ཐོག་མ།