ཕྱི་ལོ་ ༢༠༡༧ ཟླ་ ༩ ཚེས་ ༡ རེས་གཟའ་པ་སངས།
༄༅། །འདི་གར་ཚོགས་དྲུང་ལས་ཁུངས་ནས་བཏང་གནས་ནང་འཁོད་དོན། སྐབས་ ༡༦ པའི་བོད་མི་མང་སྤྱི་འཐུས་རྣམས་བོད་མིའི་འདུ་སྡོད་གཞིས་ཆགས་ཁག་ལ་ཕྱོགས་བསྐྱོད་ཕེབས་རྒྱུའི་ས་བགོས་ཡོད་པ་ལྟར། སྤྱི་འཐུས་བསྟན་འཛིན་འཇམ་དབྱངས་ལགས་ཕྱི་ལོ་ ༢༠༡༧ ཟླ་ ༧ ཚེས་ ༢༢ ནས་ ༢༧ བར་རྒྱ་གར་བྱང་ཕྱོགས་ཧི་མ་ཅཱལ་མངའ་སྡེའི་ནང་རྟེན་གཞི་བྱས་པའི་མན་ཌི་དང་། སྤོན་ཌོ་བཀྲ་ཤིས་གླིང་། མཚོ་པདྨ། སུན་རྡར་ན་གྷར། བཀྲ་ཤིས་ལྗོངས་བཅས་ཀྱི་ས་གནས་ཁག་སོ་སོའི་ཁྱབ་ཁོངས་བོད་མིའི་སྡོད་སྒར་ཁག་ལ་གཞུང་འབྲེལ་ཕྱོགས་བསྐྱོད་ལེགས་པར་གྲུབ་སྟེ་ཕྱི་ཟླ་ ༧ ཚེས་ ༢༨ ཉིན་བཞུགས་གནས་སྡེ་ར་ལྡུན་ལ་ཕེབས་འབྱོར་གནང་ཡོད་འདུག
དེ་ཡང་ཕྱི་ཟླ་ ༧ ཚེས་ ༢༢ ཉིན་གྱི་དགོང་དྲོ་སྡེ་ར་ལྡུན་ནས་རྡ་ས་བརྒྱུད་བཀྲ་ཤིས་ལྗོངས་སུ་ཕེབས་ཐོན་གྱིས་ས་གནས་སུ་འབྱོར་འཕྲལ་བཀྲ་ཤིས་ལྗོངས་ཀྱི་ས་གནས་འབྲེལ་མཐུད་པ་རིན་ཆེན་དཔལ་ལྡན་ལགས་ཀྱིས་སྣེ་ལེན་ཕེབས་བསུ་གནང་བ་དང་། དེ་བཞིན་མན་ཌི། སྤོན་ཊོ་བཀྲ་ཤིས་གླིང་། མཚོ་པདྨ། སུན་རྡར་ན་གྷར་བཅས་སུ་ཕེབས་སྐབས་ཀྱང་ས་གནས་འགོ་འཛིན་གྱིས་གཙོས་མི་མང་ནས་ཕེབས་བསུའི་སྣེ་ལེན་གཟབ་རྒྱས་ཞུས་གནང་ཡོད་འདུག
ཕྱི་ཟླ་ ༧ ཚེས་ ༢༤ ཉིན་ནས་ས་གནས་ཁག་གི་ལས་རིམ་དབུ་འཛུགས་ཀྱིས་ཐོག་མར་བཀྲ་ཤིས་ལྗོངས་ས་གནས་ཀྱི་དཔལ་ཕུན་ཚོགས་གླིང་དགོན་པར་གནས་མཇལ་དང་། དེ་ནས་ས་གནས་ཀྱི་སྔོན་འགྲོའི་སློབ་གྲྭ བཤད་གྲྭ སྨན་ཁང་བཅས་ལ་གཟིགས་བསྐོར་དང་གནས་སྟངས་རྒྱུས་ལོན། རིམ་བཞིན་མན་ཌི་ཁྱབ་ཁོངས་བོད་མིའི་སྡོད་སྒར་ཁག མཚོ་པདྨར་རྟེན་གཞི་བྱས་པའི་དབུ་རྩེ་རི་ཁྲོད་དང་དགོན་སྡེ་ཁག་ལ་གནས་མཇལ། ས་གནས་མི་མང་དཔེ་མཛོད་ཁང་། སུན་རྡར་ན་གྷར་ས་གནས་ཁྱབ་ཁོངས་བོད་མིའི་སྡོད་སྒར་ཁག་སོགས་ལ་གཟིགས་བསྐོར་དང་གནས་སྟངས་རྒྱུས་ལོན་གནང་ཡོད་འདུག
ལྷག་པར་གཟིགས་བསྐོར་སྐབས་མན་ཌི་ས་གནས་འགོ་འཛིན་དང་ལྷན་མན་ཌི་རྗོང་ཁོངས་གྲོང་སྡེ་ལས་ཁུངས་ཀྱི་ཚོགས་གཙོ་ལྕམ་སྐུ་ནི་ལམ་ཤར་མ་ Smt.Neelam Sharma ལགས་དང་། ཚོགས་གཞོན་སྐུ་ཞབས་ཝི་ཤལ་ཁྲ་ཀུར་ Shri.Vishal Thakur ལགས། ཧིན་བོད་མཛའ་འབྲེལ་ཚོགས་པའི་ཚོགས་མི་སྐུ་ཞབས་པུཤ་པཱ་རཇ་ Shri. Pushpa Raj ལགས་བཅས་དང་མཇལ་འཕྲད་གནང་བ་དང་། དེ་བཞིན་ས་གནས་ཀྱི་ཉེན་རྟོག་འགོ་འཛིན་ཨ་ཤོག་ཀུ་མར་ Shri.Ashok Kumar ལགས། སྐུ་ཞབས་Shri Kulbushan Verma,A.S.P ལགས། སྐུ་ཞབས་ Shri Hitesh Lakhan Pal, D.S.Pལགས་བཅས་དང་མཇལ་འཕྲད་གནང་ཡོད་འདུག མཇལ་འཕྲད་སྐབས་སྤྱི་འཐུས་བསྟན་འཛིན་འཇམ་དབྱངས་ལགས་ཀྱིས་ས་གནས་བོད་མིར་ད་བར་རྒྱབ་སྐྱོར་གནང་བར་ཐུགས་རྗེ་ཆེ་ཞུས་གནང་བ་མ་ཟད། མ་འོངས་པར་མུ་མཐུད་རྒྱབ་སྐྱོར་གནང་སྐྱོང་ཡོང་བའི་རེ་སྐུལ་ཡང་ཞུས་གནང་བ་དང་ཆབས་ཅིག་བོད་མི་མང་སྤྱི་འཐུས་ལྷན་ཚོགས་ཀྱི་ངོ་སྤྲོད་དང་། ད་ལྟའི་བོད་ནང་གི་ཛ་དྲག་གནས་སྟངས་སྐོར་སོགས་ཀྱང་ཁོང་རྣམ་པར་གསུངས་གནང་ཡོད་འདུག
ཕྱོགས་བསྐྱོད་སྐབས་ས་གནས་སོ་སོའི་མི་མང་གི་བསམ་ཚུལ་བསྡུ་ལེན་དང་། མི་མང་འདུ་འཛོམས་ཐོག་གསུང་བཤད་ཐེངས་ ༤ གནང་ཡོད་པ་དང་། ཐེངས་འདིའི་མི་མང་འདུ་འཛོམས་སྐབས་སོ་སོར། གཙོ་བོ་རང་ཅག་གངས་ཅན་པ་ཡོངས་ཀྱི་མགོན་སྐྱབས་བླ་ན་མ་མཆིས་པ་འཛམ་གླིང་ཞི་བདེའི་དེེད་དཔོན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུའི་མཛད་འཕྲིན་དང་། བོད་ནང་གི་ཛ་དྲག་གནས་སྟངས། སྤྱི་འཐུས་སྐབས་ ༡༦ པའི་གྲོས་ཚོགས་ཚོགས་དུས་གསུམ་པའི་ལས་རིམ་སྐོར། བོད་དོན་དང་འབྲེལ་བའི་རྒྱལ་སྤྱིའི་ཆབ་སྲིད་ཀྱི་གནས་བབ་སོགས་ཀྱི་ཐོག་གསུང་བཤད་དང་དྲི་བར་ལན་འདེབས་གནང་འདུག
དེ་བཞིན་སློབ་ཕྲུག་དང། མི་མང་། ཁོངས་སོ་སོ་ནས་དཀའ་སེལ་མཇུག་སྐྱོང་དགོས་རིགས་སྙན་ཞུ་དང་། ཉམ་ཐག་གི་གནས་ཚུལ་རྒྱུས་ལོན་དང་དཀའ་སེལ་མཇུག་སྐྱོང་། དགོན་སྡེ་ཁག་དང་། མི་མང་སོགས་ཀྱི་གནས་སྟངས་ཐོག་གཟིགས་ཞིབ་གནང་ཆེད་ཕར་ཕེབས་ཚུར་འོང་ཐེ་བའི་ཁྱོན་ཉིན་གྲངས་ ༦ ཙམ་གྱི་གཞུང་འབྲེལ་ཕྱོགས་བསྐྱོད་ཀྱི་ལས་དོན་ཡོངས་སུ་གྲུབ་པ་གནང་ཡོད་འདུག ད་རེས་ས་བགོས་ལྟར་ཕྱོགས་བསྐྱོད་རིང་ས་གནས་སོ་སོ་ནས་བདེ་སྡུག་ཞུས་ཁག་ལ་འབྲེལ་ཡོད་ལྷན་ཁང་སོ་སོས་དཀའ་སེལ་དགོངས་བཞེས་དང་འབྲེལ་བའི་ཕྱག་བསྟར་མཇུག་སྐྱོང་གནང་དགོས་རིགས་རྣམས་དོན་གནད་རེ་རེ་བཞིན་སྤྱི་འཐུས་རྒྱུན་ལས་བརྒྱུད་འཛིན་སྐྱོང་བཀའ་ཤག་ཏུ་འབུལ་ལམ་ཞུ་རྒྱུ་ཡིིན་པ་བཅས།།
