༢༠༡༥ ཟླ་ ༨ ཚེས་ ༦ རེས་གཟའ་ཕུར་བུ།
༄༅། །ཕྱི་ལོ་ ༢༠༡༥ ཟླ་ ༨ ཚེས་ ༥ ཉིན་ཆོས་རིག་ལས་ཁུངས་ནས་བཏང་གནས་ནང་འཁོད་དོན། དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་བཀའ་བློན་ཁྲི་པའི་ལས་ཁུར་དམ་འབུལ་གནང་ནས་ལོ་བཞི་ཧྲིལ་པོར་འཁོར་བའི་དུས་ཚོད་དང་བསྟུན་བཀའ་དྲུང་ཡིག་ཚང་གི་བཀའ་འབྲེལ་འོག་ཆོས་རིག་ལས་ཁུངས་ཀྱིས་གོ་སྒྲིག་ཞུས་ཏེ། ཕྱི་ལོ་ ༢༠༡༥ ཟླ་ ༨ ཚེས་ ༧ ཉིན་གྱི་ཕྱི་དྲོ་ཆུ་ཚོད་ ༤ ནས་ ༥ བར་རྡ་ས་ཐེག་ཆེན་གཙུག་ལག་ཁང་དུ་དབུས་བོད་མིའི་སྒྲིག་འཛུགས་ཀྱི་མཛད་གཙོ་རྣམ་པ་དང་། སྲི་ཞུའི་ལས་བྱེད་རྣམ་པ་བཅས་མཉམ་འཛོམས་ཐོག་མཆོད་འབུལ་སྨོན་ལམ་གྱི་འདུ་འཛོམས་རྒྱས་པ་ཞིག་གནང་གཏན་འཁེལ་ཡོད།
ཐེངས་འདིའི་མཆོད་འབུལ་སྨོན་ལམ་དེ་བཞིན་སྲིད་སྐྱོང་མཆོག་བཀའ་བློན་ཁྲི་པའི་ལས་ཁུར་དམ་འབུལ་གནང་ནས་ལོ་བཞི་ཧྲིལ་པོར་འཁོར་བ་དང་། ལས་ཡུན་དེའི་རིང་གཙོ་བོ་སྤྱི་ནོར་༸གོང་ས་༸སྐྱབས་མགོན་ཆེན་པོའི་ཐུགས་རྗེའི་བྱིན་མཐུ་དང་། གཞུང་བསྟེན་ཆོས་སྲུང་རྣམས་ཀྱི་འཕྲིན་ལས་གདོང་གྲོགས་སོགས་ལ་བརྟེན་ཕྱི་ནང་ལས་དོན་ཆེ་ཕྲ་གང་ཅི་གེགས་མེད་ལམ་ལྷོངས་བྱུང་བའི་བཀའ་དྲིན་གཏང་རག་མཚོན་ཕྱིར། ༸གོང་ས་མཆོག་གི་སྐུ་ཚེའི་ཚེ་སྒྲུབ་དང་། ད་ཕན་བོད་བསྟན་སྲིད་མི་རིགས་རང་དབང་སོགས་ཀྱི་དོན་དུ་གཞིས་བྱེས་གཉིས་སུ་ལུས་སྲོག་ལོངས་སྤྱོད་བློས་བཏང་གནང་མཁན་རྒྱལ་གཅེས་པ་སྤྱི་དང་། ལྷག་པར་ཕྱི་ལོ་ ༢༠༠༩ ནས་བཟུང་རང་ལུས་མེར་སྲེག་གནང་མཁན་འདས་གསོན་འབྲེལ་ལྟོས་ཡོངས་ཀྱི་ཆེད་དུ་མཆོག་གསུམ་རྒྱལ་བ་རྒྱ་མཚོར་གདུང་འབོད་གསོལ་འདེབས་ཞུ་སླད་དུ་ཡིན་འདུག་པ་བཅས། །
