༢༠༡༥ ཟླ་ ༧ ཚེས་ ༢༢ རེས་གཟའ་ལྷག་པ།
༄༅། །འདི་ལོ་ཕྱི་ཟླ་ ༧ ནང་དབུས་བོད་མིའི་སྒྲིག་འཛུགས་ཀྱི་ཕྱི་དྲིལ་འགྲེམས་སྟོན་ཚན་པས་༸གོང་ས་༸སྐྱབས་མགོན་ཆེན་པོ་མཆོག་གི་སྐུའི་འཁྲུངས་སྐར་དུས་ཆེན་དང་བསྟུན་ནས་རྒྱ་གར་བྱང་ཤར་ཀ་རྡོར་སྒང་གསུམ་ཁུལ་གྱི་ས་གནས་མང་ཚོགས་ལ་བོད་དང་བོད་མིའི་སྐོར་གྱི་པར་རིགས་འགྲེམས་སྟོན་གྱི་སྐོར་བསྐྱོད་ལས་གཞི་དེ་བཞིན་ཕྱི་ལོ་ ༢༠༡༥ ཟླ་ ༧ ཚེས་ ༡༩ ཉིན་མཇུག་སྒྲིལ་ཡོད་འདུག
ཐེངས་འདིའི་འགྲེམས་སྟོན་སྐོར་བསྐྱོད་ལས་གཞི་དེ་བཞིན་ཕྱི་ཟླ་ ༧ ཚེས་ ༦ ཉིན་རྡོར་གླིང་དང་། ཕྱི་ཚེས་ ༡༣ དང་། ཕྱི་ཚེས་ ༡༤ ཉིན་ཀ་སྦུག་ཏུ་འགྲེམས་སྟོན་གནང་ཡོད། ཕྱོགས་མཚུངས་ཀ་སྦུག་མ་ནི་ལྷ་ཁང་ཞེས་པའི་སྤྱི་ཁང་ནང་༸གོང་ས་༸སྐྱབས་མགོན་སྐུ་ཕྲེང་བཅུ་བཞི་པ་ཆེན་པོ་མཆོག་གི་སྐུ་ཚེའི་མཛད་རྣམ་དང་། བོད་ནང་རང་རིགས་རྣམས་ཀྱིས་རང་ལུས་མེར་སྲེག་གཏོང་དགོས་དོན་ཅི་ཡིན། ཞེས་པའི་བརྗོད་གཞི་གཙོ་བོ་གཉིས་ཐོག་གོང་གསལ་ས་ཁུལ་ཁག་གི་སློབ་ཕྲུག་དང་། དགེ་ལས། དེ་བཞིན་ས་གནས་བོད་མི་གཙོ་བོར་གྱུར་བའི་མང་ཚོགས་བཅས་ལ་འགྲེམས་སྟོན་གནང་ཡོད། ཕྱོགས་མཚུངས་སྒང་ཏོག་ནང་ཡོད་པའི་ཆོལ་ཁ་གསུམ་ཚོགས་ཁང་ནང་པར་རིགས་འགྲེམས་སྟོན་གནང་ཡོད།
ཐེངས་འདིར་པར་རིགས་འགྲེམས་སྟོན་དེ་བཞིན་བོད་ཀྱི་དུས་སྟོན་དང་འབྲེལ་ནས་ལྡི་ལིར་རྟེན་གཞི་བྱས་པའི་འཕགས་བོད་བོད་འབྲེལ་མཐུད་ལས་ཁང་ ( (ITCO) དང་ཕྱི་དྲིལ་འགྲེམས་སྟོན་ཚན་པ་གཉིས་ཐུན་མོང་ཐོག་གོ་སྒྲིག་གནང་བ་ཞིག་ཡིན་འདུག འགྲེམས་སྟོན་གྱི་སྐུ་མགྲོན་དུ་ཕེབས་པའི་རྒྱ་གར་གྲོས་ཚོགས་འོག་མའི་འཐུས་མི་ཤྲི་པྲེམ་ད་སི་ར་ཡི་ Shri Prem Das Rai མཆོག་གིས་འགྲེམས་སྟོན་དབུ་འབྱེད་གནང་བ་དང་། ཕྱི་ཚེས་ ༡༧ ཉིན་འབྲས་ལྗོངས་མངའ་ཁུལ་དུ་གནས་སྡོད་བོད་མི་དང་། སློབ་གྲྭ་ཁག་བཅོ་ལྔའི་དགེ་རྒན་དང་སློབ་ཕྲུག ས་གནས་ཡུལ་མི་བཅས་མཉམ་ཞུགས་ཐོག་པར་རིགས་འགྲེམས་སྟོན་གནང་ཡོད། དེ་བཞིན་བོད་ཀྱི་ལོ་རྒྱུས་དང་། བོད་ནང་རང་ལུས་མེར་སྲེག་གི་དོན་རྐྱེན་སོགས་ཀྱི་སྐོར་དངོས་བྱུང་གློག་བརྙན་ཡང་བསྟན་ཡོད་འདུག་པ་བཅས། །
