༢༠༡༢ ཟླ་ ༩ ཚེས་ ༡༧ རེས་གཟའ་ཟླ་བ།
༄༅། །འདི་གའི་ཕྱི་དྲིལ་བོད་ཡིག་ཚན་པའི་སྤྱི་ཁྱབ་རྩོམ་སྒྲིག་པ་སྐལ་བཟང་མཁས་གྲུབ་ལགས་ཀྱིས་བཏང་གནས་ནང་འཁོད་དོན། ཕྱི་ལོ་ ༢༠༡༢ ཟླ་ ༩ ཚེས་ ༡༥ ཉིན་གྱི་སྔ་དྲོ་ཆུ་ཚོད་ ༧།༣༠ ཐོག་༸གོང་ས་༸སྐྱབས་མགོན་ཆེན་པོ་མཆོག་གིས་འབྲི་གུང་བཀའ་བརྒྱུད་རྡོ་རྗེ་དབྱིངས་ཀྱི་གཙུག་ལག་སློབ་གཉེར་ཁང་དུ་བཞུགས་ཞག་མཛད་ཡོད་པ་ནས་ཁལ་མན་ཊོན་དོན་གྲུབ་གླིང་གཞིས་ཆགས་སུ་རྟེན་གཞི་བྱས་པའི་བཀྲ་ཤིས་ཁྱིལ་དགོན་པར་ཆིབས་སྒྱུར་གྱི་༸ཞབས་སོར་འཁོད་སྐབས་དགོན་དེའི་དབུ་བླ་དང་འདུས་དམངས་ཚོས་དུང་རྒྱ་སྤོས་སྣེས་སྔོན་བསུས་ཏེ་བཞུགས་ཁྲིར་འཁོད་བསྟུན་ཐོག་མར་སྒྲུབ་ཞག་སྔོན་དུ་མཛད། དེ་རྗེས་སྔ་དྲོའི་ཆུ་ཚོད་ ༩ ཐོག་སྡེ་ར་ལྡུན་གཡས་གཡོན་གྱི་གཞིས་ཆགས་ཁག་ནས་བཅར་བའི་ཆོས་ཞུ་བ་ཧ་ལམ་མི་གྲངས་ཁྲི་ཕྲག་བརྒལ་བར་འཕགས་མཆོག་སྤྱན་རས་གཟིགས་ཀྱི་བཀའ་དབང་དང་དགོན་དེར་གསར་དུ་བཞེངས་པའི་བྱང་ཆུབ་མཆོད་རྟེན་ཆེན་མོར་རབ་གནས། དགོན་དེའི་རྒྱབ་ཕྱོགས་སུ་མ་འོངས་པར་སློབ་གྲྭ་གསར་བཞེང་བྱ་རྒྱུའི་ས་སྟོང་ལ་བྱིན་རླབས་བཅས་མཛད་ཡོད།
དེ་ཡང་ཆོས་འབྲེལ་སྐབས་ཐོག་མར་ནང་ཆོས་ངོ་སྤྲོད་དང་དེ་ནས་ཁྱིམ་པ་ཕོ་མོ་རྣམས་ལ་དགེ་བསྙེན་དང་བྱང་ཆུབ་སེམས་དཔའི་སྡོམ་པ་འབོགས་ཆོག་མཛད་དེ་བཀའ་དབང་དངོས་གཞི་སྩལ་ཡོད། སྐབས་དེར་ནང་ཆོས་ངོ་སྤྲོད་སྐབས་སེམས་བཟང་པོ་བྱེད་དགོས་པའི་བཀའ་སློབ་ཕེབས་པའི་ནང་། དཔེར་ན། མི་སེམས་བཟང་པོ་ཞིག་འདས་གྲོངས་སུ་གྱུར་ཚེ་མི་དེ་ཤི་རྒྱུ་སྔ་དྲགས་སོང་ཞེས་མང་པོས་བརྗོད་ཀྱི་རེད་ལ་ཆོས་ཡོད་མཁན་ཞིག་ཡིན་ན་སྨོན་ལམ་འདེབས་ཀྱི་རེད། ཆོས་མེད་མཁན་ཞིག་ཡིན་ནའང་ཧ་ཅང་ཕང་པོ་བྱུང་ཞེས་བརྗོད་ཀྱི་རེད། དེ་མིན་རང་ཉིད་གསོན་པའི་རིང་ལ་མི་ལ་རྒྱག་རེས་བརྒྱབ། རྐུན་མ་བརྐུས། རྫུན་དང་ཧམ་པ། དེ་བཞིན་མགོ་སྐོར་བཏང་བ་སོགས་བྱས་ན་རང་ཉིད་འཆི་ཁར་ཡང་ངས་མི་ཚེ་འདིར་ཡག་པོ་གང་ཡང་བྱུང་མ་སོང་བསམས་ཏེ། འགྱོད་པ་སྐྱེས་ནས་འཆི་གི་རེད་མ་གཏོགས་ཧམ་པ་དང་སྐྱག་རྫུན། ཐུབ་ཚོད་བཤད་པས་ང་བློ་བདེ་པོ་ཡིན་བསམས་པ་ཕལ་ཆེར་ཡོང་གི་མ་རེད། འཛམ་གླིང་འདིའི་སྟེང་བཙན་དབང་དང་གདུག་རྩུབ་བྱེད་མཁན་གྱི་མི་དེ་ཚོའི་གྲས་འཆི་ཁར་གྲ་སྒྲིག་མདོག་ཁ་པོ་ཞིག་མི་འདུག དཔེར་ན། ཕར་ཕྱོགས་དེར་སི་ཏ་ལིང་གི་ལོ་རྒྱུས་ལ་ཆ་བཞག་ན་ཧ་ལས་པའི་གདུག་རྩུབ་དང་མ་རབས་ཡོད་པ་རེད། འོན་ཀྱང་གྲོངས་ཁར་ཡིན་མདོག་ཁ་པོ་གང་ཡང་མི་འདུག ཚུར་ཕྱོགས་འདིར་མཱཧ་ཏ་མཱ་གན་དྷི་ལྟ་བུ་རེད། ཁོང་ཚོའི་གྲས་ལ་མི་ཚང་མས་དགའ་པོ་བྱེད་རྒྱུ་དང་རྗེས་དྲན་ཞུ་མཁན་ཡོང་བཞིན་ཡོད། དེར་བརྟེན་ངོས་ཀྱིས་བརྗོད་རྒྱུར་མི་ཚེར་སྡུག་ཆགས་བྱས་ནས་སྡོད་མཁན་ཚོ་ཡིན་ནའང་འཆི་ཁར་འགྱོད་པ་སྐྱེས་ཏེ་འཆི་རྒྱུ་རེད་ལ། ཤི་བའི་རྗེས་སུ་སོ་སོའི་ངོ་ཤེས་ཚོས་སྟབས་ཡག་སོང་མི་ཁོ་ཤི་སོང་། འོན་ཀྱང་ཁོ་ཤི་རྒྱུ་དེ་ཕྱིས་དྲགས་སོང་མགྱོགས་ཙམ་ཤི་དགོས་ཡོད། ཁོ་ཤི་ནས་སྟབས་ཡག་སོང་ཞེས་བརྗོད་ཀྱི་རེད། དེ་ལྟར་མི་དགོས་པ་རེད། སོ་སོ་ཤི་བའི་རྗེས་སུའང་མི་ཚོས་སོ་སོའི་མིང་ནས་འབོད་སྐབས་དགའ་པོ་བྱེད་རྒྱུ་དང་སྨོན་ལམ་ཞིག་ལས་མེད་ཀྱང་འདེབས་མཁན་ཞིག་བྱུང་ན་ཡག་གི་རེད། རང་ཉིད་གསོན་པའི་དུས་འདིར་བསམ་པ་རྣམ་དག་གི་ཆོས་པ་ཞིག་བྱས་ན་སྐྱེ་བ་ཕྱི་མ་དེ་སྐྱེ་གནས་བཟང་པོ་ཡོང་རྒྱུ་ཡིན་པ་བརྒྱ་ཆ་བརྒྱ་ཐམ་པ་ཐག་ཆོད་པ་རེད། ཅེས་སོགས་ཀྱི་ནང་ཆོས་ངོ་སྤྲོད་སྤྱི་བཤད་མཛད་རྗེས་ཁྱིམ་པ་ཕོ་མོ་རྣམས་ལ་དགེ་བསྙེན་གྱི་སྡོམ་པ་དང་བྱང་ཆུབ་སེམས་པའི་སྡོམ་པ་འབོགས་ཆོག་དང་དེ་ནས་འཕགས་པ་སྤྱན་རས་གཟིགས་ཀྱི་བཀའ་དབང་དངོས་གཞི་སྩལ་ཡོད། ༸གོང་ས་༸སྐྱབས་མགོན་ཆེན་པོ་མཆོག་དགོན་འདིར་དེ་སྔ་ཐེངས་བཞི་ཆིབས་སྒྱུར་བསྐྱངས་འདུག་པ་བཅས།།
