༢༠༡༡ ཟླ་ ༡༢ ཚེས་ ༥ རེས་གཟའ་ཟླ་བ།
༄༅། །སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་རྒྱ་གར་ལྷོ་ཕྱོགས་བོད་མིའི་གཞིས་ཆགས་ཧུན་སུར་རབ་རྒྱས་གླིང་ཁུལ་དུ་རྟེན་གཞི་བྱས་པའི་རྒྱུད་སྨད་གྲྭ་ཚང་གིས་ཇི་ལྟར་སྔོན་ནས་གསོལ་འདེབས་ཞུས་དོན་ལྟར་བཀའ་བཞེས་བཟང་པོ་ཐོབ་སྟེ་མགོན་པོ་གང་ཉིད་མཆོག་ཕྱི་ལོ་ ༢༠༡༡ ཟླ་ ༡༢ ཚེས་ ༤ ཉིན་ལྡི་ལི་ནས་མཁའ་ལམ་བརྒྱུད་བེང་ལོར་དང་དེ་ནས་ཐད་ཕུར་གནམ་གྲུ་བརྒྱུད་རྒྱ་གར་ལྷོ་ཕྱོགས་བོད་མིའི་གཞིས་ཆགས་ཧུན་སུར་རབ་རྒྱས་གླིང་ཁུལ་གྱི་གྲོང་ཚོ་( J )ཞེས་པའི་ཉེ་འཁྲིས་ཀྱི་རྐང་རྩེད་པོ་ལོའི་ཐང་ཆེན་དུ་༸ཞབས་སོར་འཁོད་སྐབས་ཧུན་སུར་རབ་རྒྱས་གླིང་གི་ས་གནས་འཐུས་ཚོགས་ཀྱི་ཚོགས་གཙོས་དབུས་ས་གནས་འགོ་འཛིན་དང་། རྒྱུད་སྨད་གྲྭ་ཚང་གི་མཁན་རིན་པོ་ཆེ་མཆོག་སོགས་ཀྱིས་ཕེབས་བསུ་གཟས་རྒྱས་ཞུས་ཡོད། དེ་ནས་མགོན་པོ་གང་ཉིད་མཆོག་རྒྱུད་སྨད་གྲྭ་ཚང་དུ་ཆིབས་སྒྱུར་བསྐྱངས་སྐབས་ཕེབས་ལམ་གཡས་གཡོན་དུ་ཁུལ་དེའི་སེར་སྐྱ་མི་མང་དང་། སོག་པོ་གཙོ་བོར་གྱུར་བའི་ཕྱི་རྒྱལ་བ་དད་ལྡན་ཁག་གཅིག དེ་བཞིན་སྦེལ་ཀོབ་གཞིས་ཆགས་སོགས་ནས་བཅར་བའི་དད་ལྡན་མི་མང་རྣམས་ཀྱིས་ལག་ཏུ་མཆོད་རྫས་སྣ་ཚོགས་ཐོགས་ཏེ་རུ་བསྟར་བསྒྲིགས་ནས་སྤྲོ་སེམས་རབ་ཏུ་འཁོལ་བའི་ངང་རང་ལུགས་སྲི་ཞུ་ཕུན་ཚོགས་ཀྱི་ཕེབས་བསུ་གཟབ་རྒྱས་དང་འབྲེལ་སྐུའི་བྱམས་བརྩེའི་མཐོང་གྲོལ་གྱི་དཀྱིལ་འཁོར་མཇལ་ཁ་ཞུས་ཏེ་ཕེབས་བསུ་གཟབ་རྒྱས་ཞུས་ཡོད། དེ་ནས་མགོན་པོ་གང་ཉིད་མཆོག་རྒྱུད་སྨད་གྲྭ་ཚང་གི་འདུ་ཁང་གི་སྒོ་འཕྱོར་འགྲམ་དུ་༸ཞབས་སོར་འཁོད་སྐབས་དགའ་ལྡན་ཁྲི་རིན་པོ་ཆེ་མཆོག་གིས་དབུས་ཤར་པ་ཆོས་རྗེ་རིན་པོ་ཆེ་མཆོག་དང་ལྷོ་ཕྱོགས་ཁུལ་གྱི་གདན་ས་ཁག་གི་མཁན་ལས་ཟུར་རྣམས་པ།
པར་གི་ངོ་སོ་བང་ཆེན་ལ་ཡོད།
ལྷོ་ཕྱོགས་བོད་མིའི་ཁྲིམས་ཞིབ་པ་རྣམ་པ། ཕྱོགས་བཞུགས་བོད་མི་མང་སྤྱི་འཐུས་རྣམ་པ། ལྷོ་ཕྱོགས་བོད་མིའི་གཞིས་སྒར་ཁག་གི་ས་གནས་འགོ་འཛིན་སོགས་ཀྱིས་ཕེབས་བསུ་དང་སྦྲགས་སྦེལ་ཀོབ་ལྷ་མོའི་ཚོགས་པས་བཀྲིས་ཞོལ་པ་འཁྲབ་སྟོན་གྱི་ལམ་ནས་ཕེབས་བསུ་གཟབ་རྒྱས་ཞུས་ཡོད། དེ་རྗེས་༸གོང་ས་༸སྐྱབས་མགོན་ཆེན་པོ་མཆོག་རྒྱུད་སྨད་གྲྭ་ཚང་གི་བཞུགས་ཁྲི་རིན་པོ་ཆེར་༸ཞབས་སོར་འཁོད་རྗེས་རྒྱུད་སྨད་གྲྭ་ཚང་གི་མཁན་རིན་པོ་ཆེ་མཆོག་དང་དབུ་མཛད་སོགས་ཀྱིས་རིམ་བཞིན་མཎྜལ་རྟེན་གསུམ་འདེགས་འབུལ་ཞུས་གྲུབ་མཚམས་མགོན་པོ་གང་ཉིད་མཆོག་གིས་བཀའ་སློབ་སྩལ་དོན། ངོས་རང་དེ་རིང་རྒྱུད་སྨད་གྲྭ་ཚང་དུ་ཁྱུག་ཙམ་བཅར་རྒྱུའི་གོ་སྐབས་བྱུང་བ་རེད། འདི་གར་རྒྱུད་པའི་བླ་མ་དང་ལས་སྣེ་ཚོ། གཙོ་བོ་ཁྲི་རིན་པོ་ཆེས་གཙོས་ཤར་པ་ཆོས་རྗེ་རེད། དེ་བཞིན་མཁན་པོ་མང་དག་ཅག་གི་ཕེབས་འདུག་པས་ཚང་མར་འཚམས་འདྲི་ཞུ་གི་ཡོད། ཁྱེད་རང་ཚོ་དེ་རིང་འདི་གར་ཆེད་མངགས་ཕེབས་པར་བརྟེན་ཧ་ཅང་དགའ་བོ་བྱུང་བས་ཐུགས་རྗེ་ཆེ་ཟེར་གྱི་ཡིན། ཞེས་སོགས་ཀྱི་བཀའ་སློབ་སྩལ་རྗེས་༸གོང་ས་མཆོག་གིས་གཞིས་ཁོངས་དེར་ཆོས་སྡེ་ཁག་གསུམ་དང་མང་ཚོགས་ཀྱི་གྲངས་འབོར་སྐོར་འབྲེལ་ཡོད་ལ་བཀའ་དྲི་ཕེབས་ཡོད་པ་མ་ཟད། འདི་ལོ་ས་གནས་ཀྱི་ཞིང་པ་ཚོའི་སྟོན་འབྲས་ཀྱི་ཐོན་འབབ་ཇི་བྱུང་སྐོར་ལ་དྲི་བ་ཡང་འདོན་གནང་མཛད་ཡོད། ཕྱི་ཚེས་ ༥ ཉིན་རིམ་ལྔའི་ཆོས་འབྲེལ་དབུ་འཛུགས་བསྐྱངས་ཡོད།
ད་ཐེངས་༸གོང་ས་མཆོག་ཁུལ་དེར་ཆིབས་སྒྱུར་བསྐྱངས་ཏེ་ཉིན་གསུམ་རིང་པཎ་ཆེན་བློ་བཟང་ཆོས་རྒྱན་གྱིས་མཛད་པའི་མགོན་པོ་ཀླུ་སྒྲུབ་གྱི་རིམ་པ་ལྔ་པའི་འགྲེལ་བའི་གསུང་ཆོས་སྩལ་རྒྱུ་ཡིན་འདུག ཕྱི་ཚེས་ ༧ ཉིན་ཧུན་སུར་བོད་མི་རྣམས་ཀྱིས་མགོན་པོ་གང་ཉིད་མཆོག་ལ་བརྟན་བཞུགས་བསྟར་འབུལ་ཞུ་རྒྱུ་དང་། དེ་བཞིན་༸གོང་ས་མཆོག་གིས་རྒྱུད་སྨད་གངས་ཅན་རིག་གནས་སློབ་གྲྭ་དབུ་འབྱེད་མཛད་རྒྱུ་ཡིན་འདུག་པ་བཅས། །
