༄༅། །ཕྱི་ལོ་ ༢༠༢༣ ཟླ་བ་ ༠༧ ཚེས་ ༠༦ ཉིན་ཨིན་ཡུལ་སྐུ་ཚབ་དོན་ཁང་དང་ཨིན་ཡུལ་བོད་ཁང་ཐེབས་རྩ་ཟུང་སྦྲེལ་གྱིས་རེ་ཇེནྚ་གཙུག་ལག་སློབ་གཉེར་ཁང་ (Regents’ University London) དུ་ཆེ་བསྟོད་སྐུ་མགྲོན་ནང་པའི་ལྷན་ཚོགས་ཀྱི་ཚོགས་གཙོ་འབུམ་རམས་པ་ཊོས་མོན་བྷི་དུལ་པ་ (Dr Desmond Biddulph) ལགས་དང་། དམིགས་བསལ་སྐུ་མགྲོན་ཨིན་ཡུལ་སྲིད་བློན་གྱི་ཆོས་དད་རང་དབང་དང་འབྲེལ་བའི་དམིགས་བསལ་སྐུ་ཚབ་གཞོན་པ་ཊེ་ཝིཊ་བྷོ་རོ་སི་ (David Burrowes) ལགས་གཙོ་བཞུགས་ཐོག་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དགུང་གྲངས་ ༨༨ ལ་ཕེབས་པའི་༸སྐུའི་འཁྲུངས་སྐར་སྲུང་བརྩི་ཞུས་ཡོད།

དེ་ཡང་མཛད་སྒོའི་ཐོག་མར་སྐྱབས་རྗེ་སླེ་ལུང་རིན་པོ་ཆེ་དང་། འཇམ་དབྱངས་ཆོས་ཚོགས་ཀྱི་དགེ་འདུན་པ་རྣམས་ནས་ཤིས་བརྗོད་གསོལ་འདེབས་དང་། དེ་རྗེས་བོད་རྒྱལ་ཁབ་ཆེན་པོ་རྒྱལ་གླུ་བླངས་ཏེ་མཛད་སྒོ་དངོས་སུ་དབུ་འཛུགས་ཞུས་མཚམས་ཨིན་ཡུལ་སྐུ་ཚབ་དོན་གཅོད་ཕར་སི་བསོད་ནམས་ཚེ་རིང་ལགས་ཀྱིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་སྐུ་ཁམས་གསལ་ཤིང་སྐུ་ཚེ་ཡུན་དུ་བརྟན་པའི་སྨོན་ལམ་དང་བཅས་རྒྱ་ནག་གི་བཙན་གནོན་འོག་བོད་ཀྱི་ཆོས་དང་རིག་གཞུང་ཤུལ་མེད་རྩ་སྟོང་དུ་འགྲོ་ཉེན་ཡོད་སྟབས། རྒྱལ་སྤྱིའི་མི་མང་ནས་བོད་ཀྱི་བདེན་པའི་འཐབ་རྩོད་ལ་རྒྱབ་སྐྱོར་གནང་སྐྱོང་ཡོང་བའི་འབོད་སྐུལ་ཞུས། དེ་རྗེས་ཨིན་ཡུལ་གྱི་སྲིད་བློན་གྱི་ཆོས་དད་རང་དབང་དང་འབྲེལ་བའི་དམིགས་བསལ་སྐུ་ཚབ་གཞོན་པ་ཊེ་ཝིཊ་བྷོ་རོ་སི་ལགས་ཀྱིས་བར་ལམ་ནས་བཟུང་ཨིན་ཡུལ་གཞུང་གི་སྲིད་བྱུས་ནང་བོད་ནང་གི་འགྲོ་བ་མིའི་ཐོབ་ཐང་སྐོར་གླེང་སློང་ཤུགས་ཆེ་གནང་འགོ་ཚུགས་ཡོད་པའི་སྐོར་དང་། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུའི་འཁྲུངས་སྐར་སྲུང་བརྩི་ཞུ་རྒྱུའི་གལ་གནད། དུས་ཆེན་དེ་ཉིད་འཛམ་གླིང་ཡོངས་ཀྱི་ཆོས་དད་རང་དབང་དང་སྐབས་དོན་འབྲེལ་བ་ཇི་ཡོད་སྐོར་གསུང་བཤད་གནང་།

དེ་བཞིན་ཆེ་བསྟོད་སྐུ་མགྲོན་ནང་པའི་ལྷན་ཚོགས་ཀྱི་ཚོགས་གཙོ་འབུམ་རམས་པ་ཊོས་མོན་བྷི་དུལ་པ་ལགས་ཀྱིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་རྗེ་བཀའ་དྲིན་ལ་བརྟེན་ནས་ནང་པ་སངས་རྒྱས་པའི་བསྟན་པ་འཛམ་གླིང་ཡོངས་སུ་དར་འཕེལ་འགྲོ་བཞིན་པའི་སྐོར་ངོ་སྤྲོད་གནང་ཡོད།

མཐར་བོད་མི་སྒྱུ་རྩལ་བ་གཉིས་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་བསྟོད་གཞས་ཕུལ་རྗེས་ཨིན་ཡུལ་སྐུ་ཚབ་དོན་ཁང་གི་དྲུང་ཆེ་བློ་ཆོས་ལགས་ཀྱིས་ཐུགས་རྗེ་ཆེ་ཞུའི་གསུང་བཤད་གནང་སྟེ་མཛད་སྒོ་ལེགས་པར་གྲོལ་ཡོད་པ་བཅས།།