༄༅། །མཉམ་འབྲེལ་རྒྱལ་ཚོགས་ཀྱི་རིག་གཞུང་དང་། དཔལ་འབྱོར། སྤྱི་ཚོགས་བཅས་ཀྱི་ཐོབ་ཐང་གི་ཚོགས་ཆུང་ངོས་ནས་འདི་ལོའི་ཕྱི་ཟླ་ ༠༢ ཟླ་དཀྱིལ་ཙམ་ལ་རྒྱ་ནག་གཞུང་གིས་རྒྱལ་ཚོགས་ཀྱི་གན་རྒྱ་ལྟར་ལག་བསྟར་བྱས་ཡོད་མེད་སྐོར་བསྐྱར་ཞིབ་ཐེངས་གསུམ་པ་གནང་སྟེ་ཉེ་ཆར་བསྐྱར་ཞིབ་ཀྱི་མཇུག་སྡོམ་འདོན་སྤེལ་གནང་ཡོད།
དེ་ཡང་རྒྱལ་ཚོགས་ཀྱི་ཚོགས་ཆུང་གི་ངོས་ནས་རྒྱ་ནག་གཞུང་གིས་རྒྱལ་ཚོགས་ཀྱི་གན་རྒྱ་ཁག་ལ་རྩིས་མེད་རྡོག་རོལ་བཏང་སྟེ་བོད་དང་། ཡུ་གུར། ཧོང་ཀོང་། མ་ཁའོ། རྒྱ་ནག་སྐམ་ས་ཆེན་མོ་བཅས་ཀྱི་ནང་འགྲོ་བ་མིའི་ཐོབ་ཐང་ལ་རྩིས་མེད་རྡོག་རོལ་བཏང་ཡོད་པ་བརྗོད་འདུག
རྒྱལ་ཚོགས་ཀྱི་རྟོག་ཞིབ་ཚོགས་ཆུང་གིས། རྒྱ་ནག་གཞུང་གིས་ཁོར་ཡུག་སྲུང་སྐྱོབ་དང་དབུལ་ཕོངས་ཀྱི་དཀའ་ངལ་སེལ་རྒྱུར་ཁ་གཡར་ཏེ་བཙན་དབང་གིས་བོད་ཀྱི་འབྲོག་པ་རྣམས་གནས་སྤོ་བཅུག་པ་དང་། གུན་གསབ་འདང་ངེས་སྤྲོད་ཀྱི་མེད་པར་ཐུགས་འཚབ་དང་སྦྲགས་རྒྱ་ནག་གཞུང་གིས་འཕྲལ་དུ་བོད་ཀྱི་འབྲོག་པ་རྣམས་གནས་སྤོ་བྱེད་མཚམས་འཇོག་དགོས་པའི་སློབ་སྟོན་གནང་ཡོད།
གཞན་ཡང་རྒྱལ་ཚོགས་ཀྱི་རྟོག་ཞིབ་ཚོགས་ཆུང་གིས། བོད་ནང་ངལ་རྩོལ་པའི་གནས་སྟངས་སྐྱོ་བོ་ཡོད་པ་མ་ཟད། རྒྱ་ནག་གཞུང་གིས་ངལ་རྩོལ་པ་རྣམས་ཀྱི་གནས་སྟངས་སྐོར་རྟོག་ཞིབ་བྱེད་རྒྱུའི་མཐུན་རྐྱེན་བསྐྲུན་མེད་པ་དང་། ལས་ཀ་བྱེད་སར་ངལ་རྩོལ་པ་རྣམས་ལ་སུན་གཙེར་བྱེད་བཞིན་ཡོད་སྟབས། རྒྱ་ནག་གཞུང་ལ་བོད་ནང་གི་ངལ་རྩོལ་པའི་གནས་སྟངས་སྐོར་རྟོག་ཞིབ་ཀྱི་མཐུན་རྐྱེན་བསྐྲུན་དགོས་པའི་སློབ་སྟོན་དང་། དེ་བཞིན་རྒྱ་ནག་གཞུང་གིས་བོད་ནང་གཏན་འཇགས་སློབ་གྲྭ་ཁག་བཙུགས་ཏེ་བོད་ཀྱི་རིག་གཞུང་དང་སྐད་ཡིག་རྩ་གཏོར་གཏོང་བཞིན་ཡོད་སྟབས། རྒྱ་ནག་གཞུང་གིས་གཏན་འཇགས་སློབ་གྲྭ་ཁག་མཚམ་འཇོག་བྱས་ཏེ་སྒེར་གྱི་སློབ་གྲྭ་ཁག་རྒྱག་བཅུག་དགོས་པའི་སློབ་སྟོན་གནང་ཡོད།
ཕྱོགས་མཚུངས་རྒྱལ་ཚོགས་ཀྱི་རྟོག་ཞིབ་ཚོགས་ཆུང་གིས། རྒྱ་ནག་གཞུང་གིས་བོད་ནང་དགོན་སྡེ་ཁག་གཏོར་བཤིག་བཏང་སྟེ་བོད་མི་རྣམས་ལ་ཆོས་ལུགས་ཀྱི་བྱེད་སྒོ་ཁག་སྤེལ་འཇུག་གི་མེད་སྟབས་རྒྱ་ནག་གཞུང་ལ་དགོན་སྡེ་ཁག་སླར་གསོ་བྱེད་བཅུག་དགོས་པའི་སློབ་སྟོན་གནང་ཡོད།
སུད་སི་སྐུ་ཚབ་དོན་གཅོད་འཕྲིན་ལས་ཆོས་སྐྱིད་ལགས་རྒྱལ་ཚོགས་ཀྱི་བསྐྱར་ཞིབ་ཚོགས་འདུར་མཉམ་ཞུགས་ཀྱིས་བོད་དོན་སྐོར་སྙན་ཐོ་ཞིག་ཕུལ་ཏེ་རྒྱལ་ཚོགས་ཀྱི་སློབ་སྟོན་གནང་བ་ལྟར་རྒྱ་ནག་གཞུང་གིས་དུས་ཐོག་ལག་བསྟར་བྱེད་རྒྱུའི་རེ་བ་ཡོད། ཅེས་དང་། རྒྱལ་ཚོགས་ཀྱི་སྐུ་ཚབ་ཚོགས་ཆུང་ནས་ཀྱང་སློབ་སྟོན་གནང་བ་ལྟར་རྒྱ་ནག་གཞུང་ལ་ངེས་པར་ལག་བསྟར་བྱེད་བཅུག་དགོས། ཞེས་གསུངས་ཡོད།།
