ཞི་བ་འཚོ་དཔེ་མཛོད་ཁང་ནས་ཕ་མ་རྣམས་ལ་བྱིས་པའི་ཀློག་རྩལ་དང་འབྲེལ་བའི་གསུང་བཤད་གོ་སྒྲིག་ཞུས་པ།

གསར་ལས་ཁང་གི་གསར་འགོད་པས།

༢༠༢༣-༠༢-༠༩

༄༅། །འདི་གར་མོན་གྷོ་འདོད་རྒུ་གླིང་ས་གནས་འགོ་འཛིན་ལས་ཁུངས་ནས་བཏང་གནས་ནང་འཁོད་དོན། ཕྱི་ལོ་ ༢༠༢༣ ཟླ་ ༠༢ ཚེས་ ༠༨ ཉིན་མོན་གྷོ་འདོད་རྒུ་གླིང་ས་གནས་འགོ་འཛིན་ལས་ཁུངས་ཀྱི་ཁྱབ་ཁོངས་ཞི་བ་འཚོ་མི་མང་དཔེ་མཛོད་ཁང་ནས་བོད་ཁྱིམ་སློབ་གྲྭའི་ཨིན་ཡིག་རྒྱུས་སྟོན་པ་རྒན་བསྟན་འཛིན་དཔལ་མོ་ལགས་ཆེད་འབོད་ཀྱིས་སྔོན་འགྲོ་ནས་འཛིན་རིམ་བཅུ་གཉིས་བར་གྱི་ཕྲུ་གུའི་ཕ་མ་རྣམས་ལ་བྱིས་པའི་ཀློག་རྩལ་ཡར་རྒྱས་ཇི་ལྟར་གཏོང་སྟངས་སྐོར་གསུང་བཤད་ཀྱི་ལས་རིམ་ཞིག་གོ་སྒྲིག་ཞུས་ཡོད།

དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༡༠།༣༠ ཐོག་ས་གནས་འགོ་འཛིན་ལྷག་པ་སྒྲོལ་མ་ལགས་ཀྱིས་ཐེངས་འདིའི་གསུང་བཤད་ལས་རིམ་གོ་སྒྲིག་ཞུ་དགོས་པའི་དམིགས་ཡུལ་དང་འབྲེལ་བའི་ངོ་སྤྲོད་གསུང་བཤད་དང་། དེ་ནས་རྒན་བསྟན་འཛིན་དཔལ་མོ་ལགས་ཀྱིས་གཞིས་གྲོང་དང་པོ་ནས་ལྔ་པའི་སློབ་མའི་ཕ་མ་དང་། ཕྱེད་ཡོལ་ཆུ་ཚོད་ ༢།༡༥ ཐོག་གཞིས་གྲོང་དྲུག་པ་ནས་བཅུ་པའི་སློབ་མའི་ཕ་མར་སྐད་ཤུགས་ཆེན་པོས་དཔེ་ཀློག་གནང་སྟངས་དང་དེའི་དགེ་མཚན་དང་། ཁྱིམ་ཚང་དུ་དཔེ་ཀློག་གི་ཁོར་ཡུག་སྐྲུན་སྟངས་སོགས་ཀྱི་སྐོར་ལམ་སྟོན་གནང་བར་ཕ་མ་ཚོའང་ཐུགས་སྣང་ཆེན་པོས་གསན་འཇོག་གནང་སོང་། དཔེ་མཛོད་དོ་དམ་པ་བདེ་སྐྱིད་ལགས་ཀྱིས་རྒན་བསྟན་འཛིན་དཔལ་མོ་ལགས་དང་། གསུང་བཤད་ལ་ཕེབས་པའི་ཕ་མ་ཚོར་ཐུགས་རྗེ་ཆེ་ཞུས་གྲུབ་པ་དང་བསྟུན་ལས་རིམ་གང་ལེགས་བྱུང་ཡོད་པ་བཅས། །