༄༅། །ཕྱི་ལོ་ ༢༠༢༢ ཟླ་བ་ ༠༣ ཚེས་ ༡༣ ནས་དབུ་འཛུགས་ཞུ་བཞིན་པའི་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཚོགས་ཐེངས་ ༥༠ པའི་སྔ་རོལ་དུ་འཛམ་གླིང་མཉམ་འབྲེལ་རྒྱལ་ཚོགས་ཀྱི་ཁྱད་མཁས་མི་སྣ་བཞི་བཅུ་ཐུན་མོང་གིས་གསར་འགོད་བསྒྲགས་གཏམ་ཞིག་སྤེལ་བའི་ནང་རྒྱ་ནག་གཞུང་ནས་འཆར་གཞི་ལྡན་ཞིང་དམིགས་སུ་བཀར་ནས་འགྲོ་བའི་ཐོབ་ཐང་རྡོག་རོལ་གཏོང་བཞིན་པ་མཚམས་འཇོག་དགོས་པ་མ་ཟད། རང་དབང་ལྡན་པའི་ཁྱད་མཁས་པ་རྣམས་རྒྱ་ནག་ཏུ་གེགས་བར་མེད་པའི་ཐོག་འགྲོ་བ་མིའི་ཐོབ་ཐང་གནས་བབ་ཞིབ་འཇུག་ཆེད་གཏོང་དགོས་པའི་འབོད་སྐུལ་གནང་འདུག
ཁྱད་མཁས་པ་རྣམས་ནས་ཉེ་ལམ་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཚོགས་གཙོ་ལྕམ་མཧི་ཀལ་བྷེ་ཅེ་ལེཊ་ལགས་རྒྱ་ནག་ཏུ་ཕྱོགས་བསྐྱོད་དུ་ཕེབས་ཡོད་ནའང་ད་དུང་བོད་དང་། ཤར་ཏུར་ཀིསྟན། ཧོང་ཀོང་ནང་གི་འགྲོ་བ་མིའི་ཐོབ་ཐང་གནས་བབ་ལ་ཞིབ་འཇུག་ཆ་ཚང་བ་བྱ་རྒྱུ་ལུས་ཡོད་པའི་སྐོར་འགྲེལ་བརྗོད་གནང་ཡོད།
དེ་ཡང་གསར་འགོད་བསྒྲགས་གཏམ་ནང་དུ་ཁྱད་མཁས་པ་རྣམས་ཀྱིས་རྒྱ་ནག་གཞུང་ནས་འཆར་གཞི་ལྡན་ཞིང་དམིགས་སུ་བཀར་ནས་འགྲོ་བ་མིའི་ཐོབ་ཐང་རྡོག་རོལ་རྩིས་མེད་གཏོང་བཞིན་པ་མཚམས་འཇོག་དང་། རྒྱ་གཞུང་ནས་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་སྒྲིག་འཛུགས་ལ་ཆ་ཚང་ཞིང་ཕྱི་གསལ་ནང་གསལ་གྱི་རྒྱབ་སྐྱོར་གནང་དགོས་པ་མ་ཟད། རང་དབང་ཅན་གྱི་ཁྱད་མཁས་པ་རྣམས་རྒྱ་ནག་ཏུ་ཞིབ་འཇུག་ཆེད་གེགས་བར་མེད་པར་བསྐྱོད་ཆོག་པའི་ཆོག་མཆན་སྤྲོད་དགོས་པའི་འབོད་སྐུལ་ཞུས་འདུག
དེ་སྔོན་ཕྱི་ལོ་ ༢༠༢༠ ཟླ་བ་ ༠༦ ནང་ལའང་རྒྱལ་ཚོགས་ཀྱི་ཁྱད་མཁས་པ་ལྔ་བཅུ་ཐུན་མོང་གིས་གསར་འགོད་བསྒྲགས་གཏམ་སྤེལ་ཏེ་རྒྱ་གཞུང་གིས་བོད་དང་། ཤར་ཏུར་ཀིསྟན་སོགས་སུ་དྲག་གནོན་མུ་མཐུད་བྱེད་བཞིན་པར་ཐུགས་འཚབ་དང་སྦྲགས། འགྲོ་བ་མིའི་ཐོབ་ཐང་ལྷན་ཚོགས་ནས་རྒྱ་ནག་ཐོག་དམིགས་བསལ་ཚོགས་ཐུན་འཚོགས་རྒྱུ་དང་། རྒྱལ་ཚོགས་ཀྱི་དམིགས་བསལ་དབང་ཚད་ལྡན་པའི་ཁྱད་མཁས་མི་སྣ་བསྐོ་འཛུགས་ཞུ་རྒྱུ། རྒྱ་ནག་གིས་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་པའི་སྙན་ཐོར་ལོ་རེར་ཞིབ་འཇུག་བྱེད་མཁན་རྒྱལ་ཚོགས་ཀྱི་དམིགས་བསལ་སྐུ་ཚབ་བམ་མཁས་པའི་ཚོགས་ཆུང་ཞིག་བསྐོ་བཞག་གནང་དགོས་པའི་རྒྱབ་གཉེར་རེ་འདུན་ཞུས་ཡོད་པ་རེད།།
