ཕྱི་ལོ་ ༢༠༠༨ ཟླ་ ༠༦ ཚེས་ ༡༣ རེས་གཟའ་པ་སངས།
༄༅། །རྒྱལ་སྤྱིའི་གསར་ལམ་ཁག་ནས་གནས་ཚུལ་སྤེལ་གསལ་ལྟར་ན། ཨ་རབ་ཀྱི་ཡུལ་གྲུ་ཇོར་ཌན་(Jordan)གྱི་གྲོང་ཁྱེར་པི་ཊར་(Petra)ནང་འཛམ་གླིང་ནང་སྙན་གྲགས་ཤིན་ཏུ་ཆེ་བའི་ནོ་བེལ་ཞི་བདེའི་གཟེངས་རྟགས་བཞེས་མྱོང་མཁན་གྱི་ཚོགས་ཆེན་ཐེངས་བཞི་པ་དེ་ཕྱི་ལོ་ ༢༠༠༨ ཟླ་ ༠༦ ཚེས་ ༡༨ རེས་གཟའ་ལྷག་པའི་ཉིན་དབུ་འཛུགས་གནང་ཡོད་པ་རེད། ཚོགས་ཆེན་དེ་བཞིན་དུས་ཡུན་ཉིན་གཉིས་རིང་ཚོགས་ཏེ་ཚེས་ ༡༩ རེས་གཟའ་ཕུར་བུའི་ཉིན་མཇུག་བསྒྲིལ་ཡོད་པ་རེད།
ནོ་བེལ་ཞི་བདེའི་གཟེངས་རྟགས་བཞེས་མྱོང་མཁན་གྱི་ཚོགས་ཆེན་ཐེངས་བཞི་པ་དེ་ཇོར་ཌན་གྱི་གྲོང་ཁྱེར་པི་ཊར་ནང་སྐོང་ཚོགས་གནང་བཞིན་པ།
བོད་མིའི་ཆོས་སྲིད་གཉིས་ཀྱི་མངའ་བདག་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཨོ་སི་ཀྲོ་ལི་ཡའི་ནང་ཆོས་སྲིད་ཀྱི་མཛད་འཕྲིན་ཁག་ལེགས་པར་བསྐྱངས་གྲུབ་རྗེས་ཕྱི་ལོ་ ༢༠༠༨ ཟླ་ ༠༦ ཚེས་ ༡༧ ཉིན་གྱི་སྔ་དྲོ་ཇོར་ཌན་ནང་ཆིབས་སྒྱུར་བསྐྱངས་ཡོད་པ་རེད། སྐབས་དེར་ཇོར་ཌན་གྱི་རྒྱལ་སྲས་ནས་གནམ་ཐང་དུ་ཕེབས་བསུར་བཅར་ཏེ་༸གོང་ས་༸སྐྱབས་མགོན་ཆེན་པོ་མཆོག་ལ་ཕེབས་བསུ་གཟབ་རྒྱས་ཞུས་པ་མ་ཟད། དེ་ཉིན་ཉིན་གུང་རྒྱལ་པོའི་ཕོ་བྲང་དུ་གསོལ་སྟོན་གཟབ་རྒྱས་ཤིག་ཀྱང་འབུལ་བཞེས་མཛད་ཡོད་པ་རེད་འདུག གསོལ་ཚིགས་གྲུབ་རྗེས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཚོགས་འདུ་ཚོགས་ཡུལ་གྲོང་ཁྱེར་པི་ཊར་ནང་ཆིབས་སྒྱུར་བསྐྱངས་ཡོད་པ་རེད།
ཐེངས་འདིར་ཇོར་ཌན་ནང་ཚོགས་པའི་ཚོགས་ཆེན་དེའི་ནང་༸གོང་ས་༸སྐྱབས་མགོན་ཆེན་པོ་མཆོག་གིས་དབུས་པའི་ནོ་བེལ་ཞི་བདེའི་གཟེངས་རྟགས་བཞེས་མྱོང་མཁན་རླབས་ཆེན་གྱི་མི་སྣ་ ༢༩ ཚོགས་བཅར་གནང་ཡོད་པ་དང་། དེ་དག་གི་ཁོངས་སུ་ཕྱི་ལོ་ ༡༩༨༦ ལོར་ནོ་བེལ་ཞི་བདེའི་གཟེངས་རྟགས་བཞེས་མྱོང་མཁན་ཇེའུ་མི་རིགས་ཀྱི་རྩོམ་པ་པོ་སྐུ་ཞབས་ཨི་ལི་ཝའི་སལ་(Elie Wiesel)དང་། ཨུ་རུ་སུའི་སྲིད་འཛིན་ཟུར་པ་སྐུ་ཞབས་མི་ཁལ་གྷོར་བ་ཅོབ། (Mikail Gorbachav) ཨི་ཛི་རལ་གྱི་སྲིད་འཛིན་སྐུ་ཞབས་ཤི་མོན་པི་རིསེ།(Shimon Peres) ཨ་རབ་ཡུལ་གྲུའི་སྣེ་འབྲེལ་མཐུན་ཚོགས་ཀྱི་སྤྱི་ཁྱབ་དྲུང་ཆེ་སྐུ་ཞབསཨ་མར་མོའུ་ས།(Amr Moussa) དེ་བཞིན་རྒྱལ་ཁབ་ཁག་གི་དབུ་ཁྲིད་དང་ཆབ་སྲིད་ཀྱི་གནད་ཡོད་མི་སྣ་མང་པོ་ཞིག་ཚོགས་བཞུགས་གནང་ཡོད་ཅིང་། ཚོགས་བཅར་བ་དབུ་ཁྲིད་རྣམས་ནས་འཛམ་གླིང་གི་དཔལ་འབྱོར་དང་། ཚན་རིག དེ་བཞིན་ཤེས་རིག་བཅས་གོང་འཕེལ་གཏོང་རྒྱུའི་ཐད་ལ་གྲོས་སྡུར་གཙོ་བོ་གནང་ཡོད་པ་རེད། ད་ལྟ་འཛམ་གླིང་སྤྱི་ལ་འཕྲད་བཞིན་པའི་དཀའ་ངལ་གཅིག་ནི་བཟའ་བཅའི་རིགས་རིན་གོང་འཕར་བཞིན་པའི་དཀའ་ངལ་དེ་ཡིན་པ་རེད། ཕྱི་ལོ་ ༢༠༠༨ ལོ་ནས་བཟུང་བཟའ་བཅའི་རིན་གོང་བརྒྱ་ཆ་ ༧༥ ཙམ་འཕར་ཏེ་མི་ས་ཡ་མང་པོར་བཟའ་རྒྱུ་མེད་པའི་དཀའ་ངལ་འཕྲད་བཞིན་ཡོད་པ་དང་། བཟའ་བཅའི་རིན་གོང་འཕར་བའི་དཀའ་ངལ་དེ་ནི་ཡར་རྒྱས་འགྲོ་བཞིན་པའི་རྒྱལ་ཁབ་ཁག་གཅིག་པུར་འཕྲད་པའི་དཀའ་ངལ་ཙམ་མ་ཡིན་པར། འཛམ་གླིང་གི་རྒྱལ་ཁབ་དབུལ་ཕྱུག་གཉིས་ཀར་འཕྲད་བཞིན་པའི་དཀའ་ངལ་ཞིག་ཏུ་འགྱུར་ཡོད་སྟབས། ཐེངས་འདིར་ཇོར་ཌན་དུ་འཛམ་གླིང་ནང་མཁྱེན་རྒྱ་ཡངས་ལ་སྙན་གྲགས་ལྡན་པའི་འཛམ་གླིང་ཞི་བདེའི་གཟེངས་རྟགས་བཞེས་མྱོང་མཁན་རྣམས་ལྷན་འཛོམས་གནང་བའི་སྐབས། བཟའ་བཅའ་དཀོན་ལ་རིན་གོང་མཐོ་བའི་དཀའ་ངལ་གྱི་གནད་དོན་སྐོར་དང་། གཞན་ཡང་འཛམ་གླིང་ནང་ཟང་ཟིང་གི་དཀའ་ངལ་ཆེ་བའི་གྲས་དཀྱིལ་ཤར་ཡུལ་གྲུའི་གཞོན་སྐྱེས་རྣམས་ཀྱི་ཤེས་ཡོན་ཆུ་ཚད་གོང་མཐོར་གཏོང་རྒྱུ་དང་། ཁོང་ཚོར་འཕྲད་པའི་དཀའ་ངལ་རྣམས་སེལ་ཐབས་བྱེད་རྒྱུ། དེ་བཞིན་ཁུལ་དེའི་དཔལ་འབྱོར་གོང་འཕེལ་གཏོང་ཐབས་བྱེད་རྒྱུ་བཅས་ཀྱི་ཐོག་ལ་གྲོས་སྡུར་གཙོ་བོ་གནང་ཡོད་པ་རེད།
གྲོས་སྡུར་དེའི་ཐོག་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་སློབ་སྩལ་དོན། དེང་སྐབས་འཛམ་གླིང་ནང་དབུལ་ཕྱུག་གི་ཁྱད་པར་ཇེ་ཆེར་འགྲོ་བཞིན་པ་དེ་ནི་འགྲོ་བ་མིའི་བཟང་སྤྱོད་ཀྱི་ཆ་ནས་ཀྱང་མ་འཚམ་པ་ཞིག་ཡིན་པ་མ་ཟད། དེར་བརྟེན་མི་རྣམས་ཡིད་ཐང་ཆད་པའི་རྣམ་པ་ཇེ་ཆེར་འགྲོ་བཞིན་པ་དང་། དྲག་སྤྱོད་ཇེ་མང་དུ་འགྲོ་བ་སོགས་ཀྱི་གནས་ཚུལ་བྱུང་སྟེ་འཛམ་གླིང་གི་བདེ་འཇགས་ལའང་ཉེན་ཁ་བཟོ་བཞིན་ཡོད་པ་རེད། ཅེས་བཀའ་སྩལ་བ་དང་འབྲེལ་བཟའ་བཅའ་མི་འདང་བའི་དཀའ་ངལ་དེ་བྱུང་རྐྱེན་གཞན་ཞིག་ནི་མི་འབོར་སྐྱེ་འཕེལ་འགྲོ་ཤུགས་ཆེ་རུ་ཕྱིན་པའི་རྐྱེན་གྱིས་རེད། ཅེས་བཀའ་ཕེབས་ཡོད་པ་རེད།
ཐེངས་འདིའི་ཉིན་གཉིས་རིང་ཇོར་ཌན་གྱི་གྲོང་ཁྱེར་པི་ཊར་ནང་ཚུགས་པའི་ནོ་བེལ་གཟེངས་རྟགས་བཞེས་མཁན་གྱི་ཚོགས་ཆེན་ཐེངས་བཞི་པ་དེ་ཕྱི་ལོ་ ༡༩༨༦ ལོར་ནོ་བེལ་ཞི་བདེའི་གཟེངས་རྟགས་བཞེས་མཁན་ཇེའུའི་རྩོམ་པ་པོ་སྐུ་ཞབས་ཨི་ལི་ཝའི་སལ་དང་། ཇོ་ཌན་གྱི་རྒྱལ་པོ་ཨབ་ཏུ་ལགས་གཉིས་ནས་གོ་སྒྲིག་ཞུས་པ་ཞིག་རེད་འདུག
ཕྱི་ཚེས་ ༡༩ ཉིན་ཚོགས་ཆེན་མཇུག་བསྡུའི་སྐབས་ཚོགས་བཞུགས་འཐུས་མི་རྣམས་ནས་སྔ་ལོ་དཀྱིལ་ཤར་ཡུལ་གྲུའི་ཚན་རྩལ་ཐེབས་རྩ་ཁང་གི་ནང་ཨ་སྒོར་ས་ཡ་ ༡༠ བཞག་ཡོད་པ་དེ་ནས་དཀྱིལ་ཤར་མངའ་ཁུལ་གྱི་དཀའ་ངལ་སེལ་ཐབས་བྱེད་རྒྱུའི་ཞིབ་འཇུག་གི་ལས་དོན་ལ་དོ་སྣང་བྱེད་མཁན་མངའ་ཁུལ་དེའི་སློབ་ཕྲུག་ཚོར་སློབ་ཡོན་རོགས་རམ་བྱེད་རྒྱུའི་སླད་གཏོང་རྒྱུར་མོས་མཐུན་བྱུང་ཡོད་པ་རེད།།
