༢༠༢༠ ཟླ་ ༤ ཚེས་ ༢༧ རེས་གཟའ་ཟླ་བ། 

༄༅། །དེང་སྐབས་རྒྱ་ནག་གྲོང་ཁྱེར་ཝུ་ཧན་ནས་ཆེས་ཐོག་མར་ཁྱབ་གདལ་བྱུང་བའི་ཏོག་དབྱིབས་གཉན་རིམ་གྱི་གོད་ཆག་ལ་བརྟེན་ནས་འཛམ་གླིང་ས་ཕྱོགས་གང་སར་ཐེམ་སྤང་བཀའ་རྒྱ་བསྡམས་པར་བརྟེན་ཡུལ་མི་སྤྱི་དང་། ལྷག་པར་ཉིན་གླར་བརྟེན་ནས་འཚོ་བཞིན་པའི་ཡུལ་མི་ཧ་ཅང་མང་པོ་དང་།  གཞན་ཡང་དབུལ་ཕོང་ཉམ་ཐག་བཅས་པར་འཚོ་བའི་དཀའ་ངལ་གྱི་དུས་འདའ་བཞིན་པའི་སྐབས་འདིར། སྦས་ཡུལ་འབྲས་མོ་ལྗོངས་སུ་གནས་འཁོད་རང་རིགས་བཙན་བྱོལ་བོད་མི་རྣམས་ཀྱིས་མངའ་སྡེའི་བཀའ་དྲིན་བསམ་ཤེས་ཐོག སྤྱི་ཁྱབ་བློན་ཆེན་མཆོག་གི་མཚན་ཐོག་ངལ་སེལ་ལས་གཞིར་ཧིན་སྒོར་ ༧༧༨༧༩༡  ཞལ་འདེབས་སུ་ཕུལ་འདུག  དེ་ཡང་སྒང་ཏོག་ས་གནས་འགོ་འཛིན་མི་འགྱུར་གཡུ་སྒྲོན་ལགས་དང་། ས་འཐུས་ཚོགས་གཞོན་སྦྱིན་པ་ཕུན་ཚོགས་ལགས་གཉིས་ཀྱིས་འབྲས་ལྗོངས་མངའ་སྡེའི་སྤྱི་ཁྱབ་བློན་ཆེན་སྐུ་ཞབས་པྲེམ་སིངྒ་རྟ་མང་Prem Singh Tamang མཆོག་ལ་ངོ་བཅར་ཞུས་ནས་དངུལ་འཛིན་ཕུལ་འདུག 

ཟུར་མང་བཤད་གྲུབ་ཆོས་འཁོར་དགོན་པའི་སྐུ་ཚབ།

དེ་ཡང་ས་གནས་སུ་རྟེན་གཞི་བྱས་པའི་མི་འཐུས་དང་སྐྱིད་སྡུག་གཉེར་པ། དེ་བཞིན་གཞོན་ནུ་དང་བླངས་རུ་ཁག་བཅས་ཀྱིས་ས་གནས་འགོ་འཛིན་ལས་ཁུངས་ཀྱིས་ངལ་སེལ་ལས་གཞིར་ཕྱར་གྲུ་མཉམ་འདེགས་གནང་དང་གནང་མུས་ཡིན་འདུག

ཏིང་སྐྱེས་དགོན་བྱང་རིན་པོ་ཆེ།

ཕྱོགས་མཚུངས་འབྲས་ལྗོངས་སུ་རྟེན་གཞི་བྱས་པའི་དཔལ་སྐར་མ་ཟུར་མང་བཤད་གྲུབ་ཆོས་འཁོར་དགོན་པས་ཞལ་འདེབས་ཧིན་སྒོར་ ༤༠༠༠༠༠ ཕུལ་བ་དང་། གཏིང་སྐྱེས་དགོན་བྱང་རིན་པོ་ཆེ་མཆོག་ནས་ཧིན་སྒོར་ ༡༥༠༠༠༠ ཕུལ་ཅིང་། དཔལ་ས་ངོར་ཆོས་ཚོགས་ཀྱིས་ཧིན་སྒོར་འབུམ་གཉིས་ཀྱི་བཟའ་འབྲུ་མཁོ་འགྲེམས་གནང་བ་དང་།  སེར་བྱེས་འགྲོ་ཕན་གླིང་དགོན་པའི་ཁྲི་སྤྲུལ་བྱམས་པ་སྐལ་ལྡན་ལགས་དང་ཕྱག་མཛོད་དོན་གྲུབ་དབང་རྒྱལ་ནས་ཧིན་སྒོར་ ༣༠༠༠༠ ཕུལ་འདུག ། 

སེར་བྱེས་འགྲོ་ཕན་གླིང་དགོན་པའི་ཁྲི་སྤྲུལ་བྱམས་པ་སྐལ་ལྡན་ལགས་དང་ཕྱག་མཛོད་དོན་གྲུབ་དབང་རྒྱལ།