ཕྱི་ལོ་ ༢༠༢༠ ཟླ་ ༤ ཚེས་ ༢༡ རེས་གཟའ་མིག་དམར།

༄༅། །དེང་སྐབས་འཛམ་གླིང་གང་སར་ཏོག་དབྱིབས་གཉན་རིམས་ཁྱབ་གདལ་ཤུགས་ཆེན་འགྲོ་བཞིན་པའི་སྐབས་འདིར་གནས་ཡུལ་རྒྱ་གར་དབུས་གཞུང་ནས་ནད་ཡམས་སྔོན་འགོག་སླད་རྒྱལ་ཡོངས་ཐེམ་སྤངས་བཀའ་རྒྱ་གནང་བར་འཕགས་ཡུལ་ཇོ་ནང་མ་དགོན་རྟག་བརྟན་ཕུན་ཚོགས་ཆོས་གླིང་ནས་རྒྱབ་སྐྱོར་ཞུ་རྒྱུ་དང་། ད་ལན་ཛ་དྲག་གི་དུས་འདིར་རང་ཅག་རྣམས་ཀྱི་མགོན་སྐྱབས་བླ་ན་མ་མཆིས་པ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཉེ་ལམ་ཏོག་དབྱིབས་གཉན་རིམས་དང་འབྲེལ་གལ་ཆེའི་བཀའ་སློབ་དགོངས་དོན་དང་། རྒྱ་གར་གྱི་མངའ་སྡེ་འདི་ལ་བཀའ་དྲིན་རྗེས་དྲན་མཚོན་བྱེད་དུ་འཕགས་ཡུལ་ཇོ་ནང་མ་དགོན་རྟག་བརྟན་ཕུན་ཚོགས་ཆོས་གླིང་གི་སྐྱབས་རྗེ་མཁན་རིན་པོ་ཆེ་ཀུན་དགའ་ཆོས་འཕེལ་མཆོག་གིས་ཧི་མ་ཅལ་མངའ་སྡེའི་སྤྱི་ཁྱབ་བློན་ཆེན་ཇེ་རཱམ་ཐཱ་ཀུར་ Jai Ram Thakur མཆོག་དང་ཐུག་འཕྲད་ཀྱིས་སྤྱི་ཁྱབ་བློན་ཆེན་གྱི་ངལ་སེལ་ཐེབས་རྩར་ཁྱོན་བསྡོམས་ཧིན་སྒོར་ ༡༡༥༠༠༡།༠༠ ཐམ་པ་ཞལ་འདེབས་ཕུལ་གནང་ཡོད་པ་མ་ཟད།

ཧི་མཱ་ཅལ་མངའ་སྡེའི་ཉེན་རྟོག་རུ་དཔོན་མཆོག་ Director General of Police གི་མཚན་ཐོག་ཏུ་མཁོ་ཆས་ཁ་རས་དང་། ལག་ཤུབ། ལག་པ་དག་རྫས་ hand sanitizer སོགས་གང་མང་ཕུལ་བ་དང་། ཕྱོགས་མཚུངས་རྒྱ་གར་མི་མང་ཉམ་ཆུང་རྣམས་ལ་ཡང་འབྲས་དང་སྣུམ་ཚྭ་སོགས་བཟའ་འབྲུའི་རིགས་སྦྱིན་པ་བཏང་ཡོད་པ་བཅས། །