༢༠༡༧ ཟླ་ ༡༠ ཚེས་ ༡༦ རེས་གཟའ་ཟླ་བ།
༄༅། །བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དེ་རིང་སྔ་དྲོ་རྒྱ་གར་ཡུ་པི་མངའ་སྡེའི་མེ་རཌ་གྲོང་ཁྱེར་ནང་ Meerut རྟེན་གཞི་བྱས་པའི་གཞུང་གི་སློབ་གྲྭ་ DAV Central Public School ཞེས་པའི་ནང་ཆོས་ལུགས་ལ་མ་བརྟེན་པའི་བཟང་སྤྱོད་ཀྱི་སློབ་དེབ་དབུ་འབྱེད་མཛད་པ་མ་ཟད། མཛད་སྒོའི་སྐུ་མགྲོན་གཙོ་བོའི་ཚུལ་དུ་དགེ་ལས་སློབ་ཕྲུག་གྲངས་ ༡༥༠༠ བརྒལ་བར་བླང་དོར་བཀའ་སློབ་ཡང་སྩལ་འདུག
སྐབས་དེར་༸གོང་ས་མཆོག་གིས་འཇིག་རྟེན་ཀུན་ལ་ཁྱབ་པའི་བཟང་སྤྱོད་ཅེས་པ་དེ་ཆོས་ལུགས་ལ་མ་བརྟེན་པར་གཞི་རྩའི་མིའི་ལྷན་སྐྱེས་དང་འབྲེལ་བ་ཡོད་སྐོར་དང་། རིན་ཐང་དེ་དག་དེང་དུས་ཤེས་ཡོན་གྱི་ལམ་ནས་གོང་མཐོར་གཏོང་ཐབས་བྱེད་དགོས་པའི་ལམ་སྟོན་སྩལ་བ་ལྟར་སློབ་གྲྭ་དེས་མཚོན་གྲོང་ཁྱེར་མུམ་བྷེའི་ནང་རྟེན་གཞི་བྱས་པའི་ཊ་ཊ་སྤྱི་ཚོགས་ཚན་རིག་ Tata Institute of Social Sciences ཤེས་ཡོན་བསྟི་གནས་ཁང་སོགས་རྒྱ་གར་ཙམ་མ་ཟད།
ཕྱི་རྒྱལ་ཡུལ་གྲུ་འདྲ་མིན་ནང་སློབ་དེབ་ངོ་བོའི་ཐོག་ནས་གཞོན་སྐྱེས་རྣམས་ལ་གོ་རྟོགས་སྤེལ་ཐབས་བྱེད་བཞིན་པ་མཇལ་སྐབས་མགོན་པོ་གང་ཉིད་མཆོག་ཐུགས་དགྱེས་ཚོར་བྱུང་བཞིན་ཡོད་སྐོར་བཀའ་སློབ་སྩལ།
སྤྱིར་དེང་དུས་འཛམ་གླིང་ནང་ཕྱི་དངོས་པོའི་མཐུན་རྐྱེན་གཙོ་བོར་བཟུང་ནས་ནང་གི་གཤིས་རྒྱུད་དང་འབྲེལ་བའི་བཟང་པོའི་རིན་ཐང་དེ་དག་སྣང་མེད་དུ་གཏོང་བཞིན་པ་དེར་བརྟེན་འཛམ་གླིང་ནང་རྙོག་གྲ་བསྟུད་མར་ཡོང་བཞིན་པ་དང་། རྙོག་གྲ་དེ་དག་དྲག་པོའི་སྟོབས་ཤུགས་ཀྱི་ལམ་ནས་སེལ་ཐབས་མེད་སྟབས་ནང་གི་བསམ་བློའི་ཐོག་ནས་སེལ་དགོས་པར་བརྟེན་ཕྱི་དངོས་པོའི་འཛུགས་སྐྲུན་དང་ནང་གཤིས་རྒྱུད་ཀྱི་རིན་ཐང་བྱམས་པ་དང་བརྩེ་བ། ཆོག་ཤེས། བཟོད་བསྲན་སོགས་བཟང་པོའི་རིན་ཐང་དེ་དག་ཟུང་འབྲེལ་ཐོག་ནས་འགྲོ་ཐུབ་དགོས་སྐོར་དང་།
དུས་རབས་ ༢༡ འདི་གང་འདྲ་ཆགས་མིན་གཞོན་སྐྱེས་ཚོའི་ལག་ཏུ་ཡོད་པར་བརྟེན་ད་ལྟ་ནས་གཞོན་སྐྱེས་མི་རབས་གསར་པ་ཚོས་གོ་སྐབས་བཟུང་ནས་འཛམ་གླིང་འཚེ་མེད་ཞི་བདེ་དང་བྱམས་བརྩེ་ལྡན་པ་ཞིག་བཟོ་ཐབས་བྱེད་དགོས་སྐོར་སོགས་བཀའ་སློབ་སྩལ།
དེ་ཡང་གཞི་རྩའི་སློབ་ཚན་དེ་དག་གོ་སྒྲིག་གནང་མཁན་ AyurGyan Nyas ཐེབས་རྩ་ཁང་ཡིན་འདུག་ཅིང་། འཛིན་རིམ་དྲུག་པ་ནས་བརྒྱད་པའི་དབར་གྱི་སློབ་མ་ཚོར་ཆོས་ལུགས་ལ་མ་བརྟེན་པའི་བཟང་སྤྱོད་ཀྱི་སློབ་ཚན་ཚོད་ལྟ་གནང་ཡོད། མཛད་སྒོའི་ཐོག་༸གོང་ས་༸སྐྱབས་མགོན་ཆེན་པོ་མཆོག་གིས་སློབ་གྲྭ་ཁག་དགུའི་སློབ་སྤྱི་རྣམས་ལ་ཆོས་ལུགས་དང་མ་འབྲེལ་བའི་བཟང་སྤྱོད་སྐོར་གྱི་སློབ་དེབ་གསོལ་སྩལ་མཛད།
བཀའ་སློབ་ཡོངས་སུ་གྲུབ་བསྟུན་༸གོང་ས་མཆོག་གིས་སློབ་ཕྲུག་ཁག་གཅིག་གི་དྲི་བར་བཀའ་ལན་མཛད་ཡོད་པ་བཅས།།
སྐུ་པར་མཐུན་འགྱུར། དགའ་ལྡན་ཕོ་བྲང་།
