༄༅། །༸གོང་ས་ལྷ་མིའི་རྣམ་འདྲེན་༸སྐྱབས་མགོན་ཡིད་བཞིན་ནོར་བུ་མཆོག་གིས་ཕྱི་ལོ་ ༢༠༢༢ ཟླ་བ་ ༠༧ ཚེས་ ༣༠ ཉིན་ལ་དྭགས་ཀྱི་རྒྱལ་ས་གླེའི་ཞི་བའི་ཚལ་གྱི་གསུང་ཆོས་ར་བར་དད་ལྡན་ཆོས་ཞུ་བ་སྟོང་ཕྲག་བརྒལ་བར་འཕགས་པ་ཐུགས་རྗེ་ཆེན་པོའི་བཀའ་དབང་སྩལ་སོང་། དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༠༧ ཙམ་ལ་མགོན་པོ་གང་ཉིད་མཆོག་ཞི་བའི་ཚལ་གྱི་གསུང་ཆོས་ར་བར་ཞབས་སོར་འཁོད་རྗེས་བཀའ་སློབ་སྩལ་དོན། དེ་རིང་ཐུགས་རྗེ་ཆེན་པོའི་དབང་ཆེན་བྱ་རྒྱུ་རེད། འཕགས་པ་ཐུགས་རྗེ་ཆེན་པོ་ཟེར་བ་དེ། ཇི་སྐད་དུ། སངས་རྒྱས་ཀུན་གྱིས་རབ་ཏུ་བསྔགས།། ཡོན་ཏན་དམ་པ་ཀུན་བསགས་པ།། སྤྱན་རས་གཟིགས་ཞེས་མཚན་གསོལ་བ།། རྟག་པར་བརྩེ་ལ་ཕྱག་འཚལ་ལོ།། ཞེས་གསུངས་ཏེ། འཕགས་པ་སྤྱན་རས་གཟིགས་ནི་རྒྱལ་བ་ཀུན་གྱི་བརྩེ་བ་ཆེན་པོའི་ཡེ་ཤེས་གཟུགས་སྐུའི་རྣམ་པར་ཤར་བ་དེར་ཟེར་གྱི་ཡོད་པ་དང་། སྤྱན་རས་གཟིགས་ཀྱིས་སྤྱིར་སེམས་ཅན་མཐའ་དག་ལ་མ་བུ་གཅིག་ལྟར་བརྩེ་བ་ཡོད་པ་མ་ཟད། བྱེ་བྲག་ཏུ་བོད་གངས་ཅན་གྱི་ལྗོངས་ནི་འཕགས་པ་སྤྱན་རས་གཟིགས་ཀྱི་གདུལ་ཞིང་ཐུན་མོང་མ་ཡིན་པ་ཞིག་ཡིན་སྐོར་གསུངས། གཞན་ཡང་ང་ཚོས་ཚེ་རབས་མང་པོའི་ལས་ཀྱི་འབྲེལ་བའི་ཐོག་ནས་འཕགས་པ་སྤྱན་རས་གཟིགས་ལ་གསོལ་བ་བཏབ། མ་ཎི་བགྲང་ན་བྱིན་རླབས་གཞན་ལས་མྱུར་བ་དང་ཆེ་བ་ཡོང་གི་ཡོད། ཅེས་སོགས་ཀྱི་བཀའ་སློབ་སྩལ་ནས་མགོན་པོ་གང་ཉིད་མཆོག་གིས་སྒྲུབ་ཞག་སྨིན་བསྐྱངས་གནང་ཡུན་རིང་ཆོས་ཞུ་བ་རྣམས་ལ་མ་ཎི་གསུང་འདོན་གྲངས་གསོག་དགོས་པའི་བཀའ་གནང་སྟེ་སྒྲུབ་ཞག་སྨིན་སྒྲུབ་མཛད། སྒྲུབ་ཞག་གནང་གྲུབ་མཚམས་སྔོན་འགྲོའི་སྟ་གོན་གནང་སྐབས་བཀའ་སྩལ་དོན། རྣམ་འདྲེན་བཞི་པ་སངས་རྒྱས་བཅོམ་ལྡན་འདས་ཀྱིས་གསང་སྔགས་ཀྱི་ཆོས་འཁོར་བསྐོར་ཡོད། སྐལ་བཟང་སངས་རྒྱས་སྟོང་གཞན་ཚོས་གསང་སྔགས་རྡོ་རྗེ་ཐེག་པའི་ཆོས་འཁོར་བསྐོར་མིན་གསལ་ཁ་མེད། སངས་རྒྱས་སྟོང་གི་མཐའ་མ་སངས་རྒྱས་མོས་པའི་སྐབས་གསང་སྔགས་ཀྱི་ཆོས་འཁོར་ཕལ་ཆེར་བསྐོར་ཡོད་པར་སྣང་། སྟོན་པ་ཤཱཀྱ་སེངྒེའི་བསྟན་པ་ལ་གསང་སྔགས་ཀྱི་ཆོས་འཁོར་ཡོད། གསང་སྔགས་ཀྱི་ཆོས་འཁོར་ལའང་བྱ་རྒྱུད་དང། སྤྱོད་རྒྱུད། རྣལ་འབྱོར་རྒྱུད། རྣལ་འབྱོར་བླ་མེད་ཀྱི་རྒྱུད་བཅས་ཡོད་པ་ལས་སྐབས་བབ་ཐུགས་རྗེ་ཆེན་པོ་ནི་བྱ་རྒྱུད་ལྟར་བསྒྲུབ་རྒྱུ་རེད། བྱ་རྒྱུད་ནི་ཕྱིའི་བྱ་བ་གཙོ་བོ་བྱ་རྒྱུ་དང་། སྤྱོད་རྒྱུད་ནི་ཕྱིའི་བྱ་བ་དང་ནང་གི་རྣལ་འབྱོར་ཆ་སྙོམ་པར་སྤྱོད་རྒྱུ། རྣལ་འབྱོར་དང་རྣལ་འབྱོར་བླ་མེད་རྒྱུད་ནི་ནང་གི་རྣལ་འབྱོར་གཙོ་བོ་བསྒྲུབ་རྒྱུ་ཡིན་ཞེས་སོགས་དང་།སྤྱིར་སངས་རྒྱས་ཀྱི་ཆོས་དང་ཡང་སྒོས་གསང་སྔགས་ཀྱི་ཆོས་ཉམས་ལེན་བྱེད་མཁན་རིགས་གཅིག་གིས་དབང་ཐང་དང་། རྒྱུ་ནོར་ཡོང་རྒྱུ། སྡུག་ས་ནས་བཤད་ན་ངན་བསྔགས་བརྒྱབ་ནས་རང་གི་དགྲ་བོ་གདུལ་རྒྱུ་སོགས་ཚེ་འདིའི་དོན་དུ་བེད་སྤྱོད་བྱེད་ཀྱི་ཡོད། དེ་ཚོའི་གྲས་ཚད་ལྡན་མིན། གསང་སྔགས་རྡོ་རྗེ་ཐེག་པ་འདི་རྣམ་མཁྱེན་དང་མཐའ་ཡས་པའི་སེམས་ཅན་མཐའ་དག་གི་དོན་བསྒྲུབ་རྒྱུ་ཞིག་ཡིན་པ་ལས་དགྲ་གདུལ་གཉེན་སྐྱོང་བྱ་རྒྱུ་ཞིག་རྩ་བ་ནས་མིན་ཞེས་གསང་སྔགས་ཉམས་ལེན་པ་རྣམས་ནས་ངེས་པར་དུ་གསང་སྔགས་ཀྱི་ཐབས་དེ་རྣམ་མཁྱེན་རྒྱལ་བའི་གོ་འཕང་མངོན་དུ་བྱ་བའི་ལམ་དུ་བསྟེན་དགོས་པ་ལས་ཚེ་འདི་སྣང་གི་གནས་སྟབས་ཀྱི་ཁེ་ཕན་དུ་བེད་སྤྱོད་བྱ་རྒྱུ་མེད་པའི་ལམ་སྟོན་གནང་། གཞན་ཡང་མགོན་པོ་གང་ཉིད་མཆོག་གིས། ང་ཚོས་ཚང་མས་འཛམ་གླིང་ཞི་བདེ་ཞེས་ཟེར་གྱི་ཡོད། ཞི་བདེ་ངོ་མ་དེ་སེམས་ཀྱི་ནང་འཚེ་བ་ལ་མཐའ་ཅིག་ཏུ་སྐྱོན་ཏུ་བལྟས་ནས་སེམས་ཅན་ཐམས་ཅད་གནས་སྐབས་དང་མཐར་ཐུག་གི་བདེ་བ་ལ་དགོད་སྙམ་པའི་བློ་ཡོད་ན་ཡོང་གི་རེད་ཅེས་གསུངས་མཚམས་བྱང་ཆུབ་སེམས་པའི་སྡོམ་པ་འབོགས་འགོ་བརྩམས་སོང་བ་དང་། སྐབས་དེར་ཆོས་ཞུ་བ་རྣམས་ནས་སེམས་ནང་འཕགས་པ་སྤྱན་རས་གཟིགས་ཀྱི་སྐུ་གསུང་ཐུགས་ཀྱི་སྤྲུལ་པ་དགེ་སློང་འདུལ་བ་འཛིན་པ་ཞིག་གིས་དོན་གཉིས་མཐར་ཕྱིན་པའི་སངས་རྒྱས་ཀྱི་ས་ལ་འཁྲིད་ཀྱི་ཡོད་སྙམ་པའི་བློ་འཛིན་དགོས་པའི་ལམ་སྟོན་སྩལ་བ་མ་ཟད། དེ་དང་འབྲེལ་ནས་མགོན་པོ་གང་ཉིད་མཆོག་གིས་བོད་རྒྱ་ཆེ་མི་མང་གིས་གཙོས་དྲ་རྒྱ་བརྒྱུད་ནས་གསན་གཟིགས་གནང་མཁན་དད་ལྡན་ཆོས་ཞུ་བ་རྣམས་ས་གནས་སུ་འདུས་མེད་ནའང་སེམས་ནས་མགོན་པོ་གང་ཉིད་མཆོག་ལ་དད་པ་རྩེ་གཅིག་ཡོད་མཁན་ཚང་མར་སྡོམ་པ་ཐོབ་ཀྱི་ཡོད་ཅེས་གསུངས་སོང་། སྔོན་འགྲོའི་སྟ་གོན་གྲུབ་མཚམས་དངོས་གཞིའི་མཎྚལ་དང་། གསོལ་བ་འདེབས་པ། མིག་དར་སྦྱིན་པ། ཐམས་ཅད་རྣལ་འབྱོར་གྱི་སེམས་སྐྱེད་པ། དངོས་གཞིའི་བཀའ་དབང་ཆུ་དང་ཅོད་པཎ་གྱི་དབང་ཞུའི་མཎྚལ། དེ་རྗེས་གསོལ་བ་འདེབས་པ་དང་། བཟླས་ལུང་སྦྱིན་པ། རྒྱལ་སྲིད་སྣ་བདུན་གྱི་རྗེས་གནང་སོགས་མཛད་དེ་བཀའ་དབང་ལེགས་པར་གྲུབ།