ཟླ་བ་ ༥ ཚེས ༡ ༢༠༡༨
Published By སྐལ་བཟང་རྒྱ་མཚོ།

ཕྱི་ལོ་ ༢༠༡༨ ཟླ་ ༥ ཚེས་ ༡ རེས་གཟའ་མིག་དམར། 

༄༅། །ཕྱི་ལོ་ ༢༠༡༨ ཟླ་ ༥ ཚེས་ ༡ ཉིན་གྱི་སྔ་དྲོ་ཆུ་ཚོད་ ༡༠།༣༠ ཙམ་ལ་བོད་མིའི་སྒྲིག་འཛུགས་ཤེས་རིག་ལས་ཁུངས་ཀྱི་བརྡ་ཆད་ལས་འཆར་ཚན་པས་དྲྭ་ཚིགས་གསར་པ་  tibterminology.net  དང་། བརྡ་ཆད་དེབ་ཕྲེང་ ༡༡ དབུ་འབྱེད་ཀྱི་མཛད་སྒོ་ཞིག་རྡ་ས་གངས་སྐྱིད་གཉའ་ཁྲི་ཚོགས་ཁང་དུ་ཚོགས་སོང་། དེ་ཡང་མཛད་སྒོའི་ཐོག་ཤེས་རིག་བཀའ་བློན་པདྨ་དབྱངས་ཅན་མཆོག་གིས་གཙོས་ཤེས་རིག་དྲུང་ཆེ་ཀརྨ་སེངྒེ་ལགས་དང་། ཤེས་རིག་ལས་ཁུངས་ཀྱི་བརྡ་ཆད་ལས་འཆར་ཚན་པའི་འབྲེལ་ཡོད་ལས་བྱེད། དེ་བཞིན་གསར་འགོད་པ་སོགས་མཉམ་ཞུགས་གནང་ཡོད་པ་དང་། ཤེས་རིག་བརྡ་ཆད་ཚན་པའི་དྲྭ་ཚིགས་བཟོ་མཁན་ནི་ཀམ་པུ་ཊར་མཉེན་ཆས་ཐོག་ཆེད་ལས་པ་བསྟན་འཛིན་བསམ་གྲུབ་ལགས་རེད། ཨིན་བོད་ཤན་སྦྱར་གཏན་འབེབས་བརྡ་ཆད་རྩོམ་སྒྲིག་ལས་རོགས་བསྟན་འཛིན་རབ་རྒྱས་ལགས་ཀྱིས་མཛད་རིམ་གཙོ་སྐྱོང་གནང་བ་དང་འབྲེལ་རྩོམ་སྒྲིག་པ་ཨོ་རྒྱན་བསྟན་འཛིན་ལགས་ཀྱིས་བརྡ་ཆད་ལས་འཆར་ཚན་པའི་དྲྭ་ཚིགས་དང་བརྡ་ཆད་དེབ་ཕྲེང་ ༡༡ པའི་གལ་གནད་རང་བཞིན་དང་རྒྱབ་ལྗོངས་སོགས་ཀྱི་སྐོར་ངོ་སྤྲོད་གནང་།

དེ་རྗེས་ཤེས་རིག་བཀའ་བློན་པདྨ་དབྱངས་ཅན་མཆོག་གིས་དྲྭ་ཚིགས་དང་བརྡ་ཆད་དེབ་ཕྲེང་ ༡༡ དབུ་འབྱེད་གནང་སྟེ་གསུང་བཤད་གནང་དོན། སྤྱིར་ཤེས་རིག་བརྡ་ཆད་ཚན་པའི་དྲྭ་ཚིགས་དང་བརྡ་ཆད་དེབ་ཕྲེང་ ༡༡ དབུ་འབྱེད་དང་འབྲེལ་བའི་སྐོར་རྩོམ་སྒྲིག་པ་ཨོ་རྒྱན་བསྟན་འཛིན་ལགས་ཀྱིས་ངོ་སྤྲོད་གནང་སོང་། རྩ་བའི་བོད་སྐད་ནང་ཐ་སྙད་མང་པོ་ཞིག་སྔོན་མ་ནས་ཡོད་ཀྱང་ང་ཚོ་བཀའ་མོལ་གནང་སྐབས་བོད་སྐད་ནང་ཡོད་པའི་ཐ་སྙད་མང་པོ་ཞིག་བེད་སྤྱོད་གཏོང་གི་ཡོད་མ་རེད། དེ་བཞིན་ང་ཚོའི་སྤྱི་ཚོགས་ནང་ཁོར་ཡུག་དང་། འཚོ་བ་སྐྱེལ་སྟངས། སློབ་སྦྱོང་གི་ཁ་ཕྱོགས་སོགས་ལ་བརྟེན་ནས་གློག་ཀླད་དང་། འཕྲུལ་ཆས། སྔོ་ཚལ་དང་འབྲེལ་བའི་ཐ་སྙད་མང་པོ་ཞིག་མེད་སྟབས། དེ་དག་དང་འབྲེལ་བའི་ཐ་སྙད་མང་པོ་ཞིག་ཤེས་རིག་ལས་ཁུངས་ཀྱི་བརྡ་ཆད་ལས་འཆར་ཚན་པས་གཏན་འབེབས་གནང་བཞིན་ཡོད། གཏན་འབེབས་གནང་བའི་ཐ་སྙད་དེ་དག་བེད་སྤྱོད་གནང་དགོས་རྒྱུ་ང་ཚོའི་ལས་འགན་རེད།

གསར་འགོད་པས་དྲི་བ་གཏོང་བཞིན་པ།

སྤྱིར་འཛམ་གླིང་ནང་སྐད་ཡིག་ཐོག་མཁས་དབང་དང་ཉམས་ཞིབ་པ་ཁག་གིས། འཛམ་གླིང་ནང་ད་ལྟ་སྐད་ཡིག་བདུན་སྟོང་ཙམ་ཡོད་པའི་ནང་ནས་བརྒྱ་ཆ་ ༥༠ ཙམ་ལ་མ་གཏོགས་ཡིག་གཟུགས་མེད། ཅེས་སྐོར་བརྗོད་བཞིན་འདུག  བོད་སྐད་ལ་མཚོན་ན་སྐད་དང་ཡིག་གཟུགས་གཉིས་ཀ་ཡོད། ལྷག་པར་བོད་ཀྱི་ཆོས་དང་རིག་གཞུང་མུ་མཐུད་གནས་མིན་བོད་ཀྱི་སྐད་ཡིག་ལ་རག་ལུས་ཡོད།

ང་ཚོར་ཐ་སྙད་གང་ཡོད་པ་རྣམས་བེད་སྤྱོད་ཡག་པོ་གཏོང་དགོས་པ་དང་། བོད་སྐད་ནང་ཡོད་པའི་ཐ་སྙད་མང་པོ་ཞིག་དེང་སྐབས་བེད་སྤྱོད་མ་བཏང་བའི་དབང་གིས་བེད་མེད་ལྟ་བུ་ཆགས་ཡོད། དེར་བརྟེན་ཐ་སྙད་གསར་པ་མང་པོ་ཞིག་གཏན་འབེབས་གནང་དགོས་པ་ཆགས་ཀྱི་ཡོད་སྟབས། ངས་འབོད་སྐུལ་ཞུ་རྒྱུར། བོད་སྐད་ནང་ཐ་སྙད་ཡོད་པ་ཁག་བེད་སྤྱོད་གང་ཐུབ་གཏོང་དགོས་པ་དང་། བོད་པ་ནང་ཁུལ་བཀའ་མོལ་གནང་བའི་སྐབས་སུའང་བོད་སྐད་གཙང་མ་བེད་སྤྱོད་གནང་རོགས་ཞེས་འབོད་སྐུལ་ཞུ་རྒྱུ་ཡིན། ཞེས་གསུང་བཤད་གནང་།

མཐར་ཨིན་བོད་ཤན་སྦྱར་གཏན་འབེབས་བརྡ་ཆད་རྩོམ་སྒྲིག་ལས་རོགས་དབུ་མ་བ་འཕྲིན་ལས་ལགས་ཀྱིས་ཐུགས་རྗེ་ཆེ་ཞུའི་གསུང་བཤད་གནང་བ་དང་སྦྲགས། ཚོགས་བཅར་བ་ཡོངས་ལ་གསོལ་ཇ་ཞལ་ཏོག་ཕུལ་ཏེ་མཛད་སྒོ་བདེ་ལེགས་ངང་གྲོལ་ཡོད་པ་བཅས། །

Share with your friends










Submit