གསར་ལས་ཁང་གི་གསར་འགོད་པས།

༢༠༡༧ ཟླ་ ༡༢ ཚེས་ ༢༡ རེས་གཟའ་ཕུར་བུ།

༄༅། །རྒྱ་གར་དབུས་ནང་སྲིད་ལས་ཁུངས་ནས་སྐྱབས་བཅོལ་ལག་ཁྱེར་  R.C དུས་འགྱངས་གནང་ཕྱོགས་དང་།  དེ་བཞིན་ཕྱིར་ལོག་ཐོངས་མཆན་  Return Visa  སོགས་ཀྱི་སྒྲིག་གཞིར་འགྱུར་བ་བཏང་སྟེ་མངའ་སྡེ་ཁག་གི་སྤྱི་ཁྱབ་དྲུང་ཆེ་དང་། ཕྱི་མི་དེབ་སྐྱེལ་ལས་ཁུངས་ FRO བཅས་ལ་བཀོད་ཁྱབ་གནང་བའི་ནང་འཁོད་དོན།

༡། རྒྱ་གར་ནང་བསྡད་ནས་ལོ་ངོ་ ༢༠ ཕྱིན་པའི་བོད་མི་རྣམས་ནས་གལ་སྲིད་སྐྱབས་བཅོལ་ལག་ཁྱེར་དྲ་ཐོག་ online དེབ་སྐྱེལ་ཐོ་འགོད་ཕྱི་ལོ་ ༢༠༡༨ ཟླ་ ༣ ཚེས་ ༣༡ གོང་བྱེད་ཚེ་སྐྱབས་བཅོལ་ལག་དེབ་དུས་འགྱངས་མུ་མཐུད་ལོ་ལྔ་གནང་རྒྱུ་དང་། གལ་ཏེ་བཙན་བྱོལ་བོད་མི་སུ་རུང་ལ་སྐྱབས་བཅོལ་ལག་དེབ་དྲ་ཐོག་དེབ་སྐྱེལ་ཐོ་འགོད་བྱ་རྒྱུར་དཀའ་ངལ་འཕྲད་དེ་དྲ་ཐོག་དེབ་སྐྱེལ་ཐོ་འགོད་མི་དགོས་པར་མུ་མཐུད་དུས་འགྱང་ཞུ་འདོད་ཡོད་རིགས་ལ་སྔར་ལྟར་ལོ་གཅིག་རིང་དུས་ཡུན་ཕར་འགྱངས་གནང་རྒྱུ།

༢། སྐྱབས་བཅོལ་ལག་དེབ་ས་གནས་གཅིག་ནས་གཞན་དུ་སྤོ་ Transfer སླད་དོ་བདག་རང་ཉིད་བཅར་མི་དགོས་པ་དང་དུས་འགོར་མི་ཡོང་བར་སྟབས་བདེ་ཡོང་སླད་དྲ་ཐོག་ Transfer གནང་གཏན་འཁེལ་ཡོད།

༣། གལ་ཏེ་བོད་མི་སུ་རུང་ལ་དངོས་ཡོད་དཀའ་ངལ་དང་། སྣང་མེད་དབང་གི་དྲན་པ་བརྗེད་པ་སོགས་ལ་བརྟེན་ནས་དུས་ཐོག་སྐྱབས་བཅོལ་ལག་དེབ་དུས་འགྱངས་ཞུ་མ་ཐུབ་ཚེ་ཁྲིམས་སྒྲིག་ལྟར་ཉེས་ཆད་འབུལ་ཏེ་དུས་འགྱངས་ཞུ་འཐུས་ཆོག་པ་དང་། འོན་ཀྱང་ནང་འགྲིག་བྱེད་མ་ཐུབ་པའི་ཁྲིམས་དང་འགལ་རིགས་ (Non Compoundable offences)ཀྱིས་སྐྱབས་བཅོལ་ལག་དེབ་དུས་འགྱངས་ཞུ་མ་ཐུབ་ཚེ་བཙོན་འཇུག་སོགས་ཉེས་ཆད་ཕོག་སྲིད།

༤། བོད་མིའི་སྒྲིག་འཛུགས་ནས་རྒྱབ་གཉེར་ངོས་སྦྱོར་ཡོད་པའི་བོད་མི་སུ་རུང་ཕྱི་རྒྱལ་ཡུལ་གྲུ་ཁག་ཏུ་བསྐྱོད་ཆེད་འབྲེལ་ཡོད་ཕྱི་མི་དེབ་སྐྱེལ་ལས་ཁུངས་ (FRO) ནས་ Return Visa  ཐོངས་མཆན་ཞུ་མཁན་རྣམས་ལ་ལོ་གཅིག་རིང་ Multi Entry ཞེས་ཕར་ཐོན་ཕྱིར་ལོག་ཐེངས་གཅིག་ལས་མང་བ་བྱེད་ཆོག་པའི་ཕྱིར་ལོག་ཐོངས་མཆན་ Return Visa གནང་རྒྱུ།

༥། མངའ་སྡེ་སོ་སོའི་འབྲེལ་ཡོད་ལས་བྱེད་རྣམས་ནས་བཙན་བྱོལ་བོད་མི་རྣམས་དང་འབྲེལ་བ་བྱེད་སྐབས་ཆེ་མཐོང་ལྡན་པའི་ཐོག་ནས་འབྲེལ་བ་བྱེད་དགོས། འོན་ཀྱང་བོད་མི་སུ་རུང་ནས་ཁྲིམས་འགལ་རིགས་བྱ་ཚེ་ཕྱི་རྒྱལ་ཡུལ་མི་གཞན་ལྟར་ཁྲིམས་ཆད་ནན་པོ་གཏོང་དགོས།

Share with your friends










Submit