༢༠༡༧ ཟླ་ ༩ ཚེས་ ༡ རེས་གཟའ་པ་སངས།

༄༅། །ཕྱི་ལོ་ ༢༠༡༨ ལོར་ཨིན་ཡུལ་གྱི་རྒྱལ་ས་ལོན་ཌོན་ནང་རང་དབང་ཅན་གྱི་རྐང་རྩེད་སྤོ་ལོའི་མཐུན་ཚོགས་ CONIFA ཀྱི་གོ་སྒྲིག་འོག་འཛམ་གླིང་རྐང་རྩེད་སྤོ་ལོའི་རྩེད་འགྲན་ CONIFA World Football Cup 2018 ནང་བོད་རྒྱལ་ཡོངས་རྐང་རྩེད་སྤོ་ལོ་རུ་ཁག་མཉམ་ཞུགས་བྱེད་རྒྱུ་ཡིན་འདུག

དེ་ཡང་མཐུན་ཚོགས་དེ་ནི་འཛམ་གླིང་རྐང་རྩེད་སྤོ་ལོའི་སྒྲིག་འཛུགས་ FIFA ནང་དེབ་སྐྱེལ་མེད་པའི་མཐུན་ཚོགས་ཞིག་ཡིན་འདུག ཕྱི་ལོ་ ༢༠༡༨ ལོའི་འཛམ་གླིང་རྐང་རྩེད་སྤོ་ལོའི་རྩེད་འགྲན་ནང་ཞི་བདེ་རྒྱ་མཚོའི་གླིང་ཕྲན་ཁུལ་གྱི་རྒྱལ་ཁབ་ Oceania ནས་རུ་ཁག་གཅིག་དང་། བྱང་ཨ་རི་ནས་གཅིག ཨ་ཕི་རི་ཀ་དང་ཨེ་ཤི་ཡ་ནས་རུ་ཁག་གཉིས་རེ། ཡུ་རོབ་ནས་རུ་ཁག་ལྔ་སོགས་གླིང་ཆེན་བཞི་ནས་རྐང་རྩེད་སྤོ་ལོ་རུ་ཁག་ ༡༦ ཙམ་མཉམ་ཞུགས་གནང་རྒྱུ་ཡིན་འདུག་པ་མ་ཟད། བོད་ཀྱི་རྐང་རྩེད་སྤོ་ལོའི་རུ་ཁག་ལ་གོ་སྒྲིག་ཚོགས་ཆུང་ནས་དམིགས་བསལ་མགྲོན་འབོད་གནང་བ་ཞིག་ཡིན་འདུག འཛམ་གླིང་རྐང་སྤོལ་རྩེད་འགྲན་དེ་ཉིད་འཛམ་གླིང་རྐང་རྩེད་སྤོ་ལོ་སྒྲིག་འཛུགས་  FIFA རྩེད་འགྲན་ཕུད་པའི་རྐང་སྤོལ་རྩེད་འགྲན་རྒྱ་ཆེ་ཤོས་ཤིག་ཡིན་འདུག

ཀོ་ནི་ཕ་འཛམ་གླིང་རྐང་རྩེད་སྤོ་ལོའི་རྩེད་འགྲན་དེ་ཉིད་ཕྱི་ལོ་ ༢༠༡༨ ཟླ་ ༥ ཚེས་ ༣༡ ཉིན་འགོ་འཛུགས་ཀྱིས་ཕྱི་ཟླ་ ༦ ཚེས་ ༩ ཉིན་མཇུག་སྒྲིལ་རྒྱུ་ཡིན་འདུག་པ་བཅས། །