ཕྱི་ལོ་ ༢༠༡༧ ཟླ་ ༦ ཚེས་ ༧ རེས་གཟའ་ལྷག་པ།
༄༅། །ཕྱི་ལོ་ ༢༠༡༧ ཟླ་ ༦ ཚེས་ ༦ ཉིན་བོད་མིའི་སྒྲིག་འཛུགས་ཀྱི་ཕྱི་དྲིལ་ལྷག་པ་ཚེ་རིང་དྲན་རྟེན་ཚོགས་ཁང་ནང་བཀའ་ཤག་སྐབས་ ༡༥ ལྔ་དང་ལྔ་བཅུའི་ཐབས་བྱུས་སྐོར་དངོས་བྱུང་གློག་བརྙན་བཟོ་རྒྱུའི་སླད་ཚོགས་འདུ་ཞིག་བསྐོང་ཚོགས་གནང་ཡོད།
དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༡༡།༤༥ ཙམ་ལ་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་དང་། དྲིལ་བསྒྲགས་དྲུང་ཆེ་ཤར་གླིང་བསྟན་འཛིན་ཟླ་སྒྲོན་ལགས། དཔལ་འབྱོར་ལས་ཁུངས་ཀྱི་སྤྱི་ཚོགས་ཡར་རྒྱས་ཐེབས་རྩའི་འགན་འཛིན་དབུ་དཀར་ཚང་སྐལ་རྡོར་ལགས། གློག་བརྙན་བཟོ་ལས་པ་ཚེ་རིང་སྲི་མཐར་ལགས། རྒྱ་གར་གསར་ཤོག་གྲགས་ཅན་ཨིན་ཌི་ཡེན་ཨེཀ་སི་པྲེས་སི་ (The Indian Express) ནང་ཕྱག་ལས་གནང་མཁན། བོད་མི་པར་ལེན་གསར་འགོད་པ་བཀྲ་ཤིས་སྟོབས་རྒྱལ་ལགས། བུ་ཆུང་བསོད་ནམས་ལགས། བསོད་ནམས་ཚེ་བརྟན་ལགས། བསྟན་འཛིན་སྐལ་ལྡན་ལགས་བཅས་ལྷན་འཛོམས་ཐོག་དཔལ་ལྡན་སྲིད་སྐྱོང་མཆོག་གིས་ལྔ་དང་ལྔ་བཅུའི་འཐབ་བྱུས་སྐོར་གློག་བརྙན་བཟོ་ཕྱོགས་དང་། ང་ཚོའི་དམིགས་ཡུལ་ནི་བཙན་བྱོལ་ནང་མུ་མཐུད་ལོ་ལྔ་བཅུ་ལྷག་བསྡད་རྒྱུ་མིན་པ་དང་། གལ་ཏེ་ད་དུང་ལོ་ལྔ་བཅུ་གནས་དགོས་བྱུང་ཚེ་དུས་ཡུན་ལོ་ལྔ་བཅུའི་རིང་བོད་མིའི་འཐབ་རྩོད་དེ་ཡང་ལོ་ལྔ་བཅུ་བར་འཚོ་གནས་ཐུབ་ཐབས་སྐོར། གློག་བརྙན་གྱི་ནང་དོན་སོགས་ཀྱི་ཐད་བཀའ་ཤག་གི་དགོངས་གཞི་ཇི་ཡིན་སོགས་ངོ་སྤྲོད་གནང་།
སྐབས་དེར་ཚེ་རིང་སྲི་མཐར་ལགས་ཀྱིས། ཚོགས་འདུར་བཅར་ཏེ་ལྔ་དང་ལྔ་བཅུའི་ཐབས་བྱུས་སྐོར་བརྙན་འཕྲིན་བརྒྱུད་མང་ཚོགས་ལ་ཁྱབ་སྤེལ་ཇི་ལྟར་བྱེད་ཐུབ་པའི་སྐོར་བསམ་ཚུལ་བརྗེ་ལེན་སླད་བཅར་བ་ཡིན་སྐོར་དང་། གལ་ཏེ་དེ་ལྟ་བུའི་གློག་བརྙན་བཟོ་སྐྲུན་ཐུབ་པ་ཡིན་ན། བོད་མིའི་སྒྲིག་འཛུགས་ཀྱི་བྱེད་སྒོ་ཁག་དང་། ལས་ཀ་བྱེད་སའི་ཁོར་ཡུག བོད་མིའི་སྒྲིག་འཛུགས་ནི་བོད་པའི་སྤྱི་ཚོགས་ནང་བོད་མི་གཞོན་སྐྱེས་རྣམས་ལ་ལས་ཀ་བྱེད་རྒྱུའི་གོ་སྐབས་གནང་མཁན་གཙོ་བོ་ཞིག་ཆགས་ཡོད་པ་མང་ཚོགས་ནས་མཁྱེན་ཐུབ་སྐོར་སོགས་གསུངས།
བཀྲ་ཤིས་སྟོབས་རྒྱལ་ལགས་ཀྱིས། ང་རང་འདིར་དངོས་བྱུང་གློག་བརྙན་བཟོ་རྒྱུའི་སླད་ཚོགས་འདུར་བཅར་དགོས་དོན་ནི། གཞོན་སྐྱེས་རྣམས་དང་ཐུག་འཕྲད་ཀྱིས་དྲྭ་རྒྱའི་བརྒྱུད་ལམ་ཐོག་ནས་བོད་དང་བོད་མིའི་གནད་དོན་སྐོར་སྒྲ་བརྙན་གྱི་སྡིངས་ཆ་ཞིག་མ་འོངས་པར་སྐྲུན་ཐུབ་པ་རེ་བ་བྱེད་ཀྱི་ཡོད་སྐོར་སོགས་གསུངས།
བུ་ཆུང་བསོད་ནམས་ལགས་ཀྱིས། ང་འདིར་ལྔ་དང་ལྔ་བཅུའི་ཐབས་བྱུས་སྐོར་གློག་བརྙན་བཟོ་རྒྱུ་དང་འབྲེལ་ནས་བཅར་བ་ཡིན། ངའི་ལས་འགན་གཙོ་བོ་ནི་གློག་བརྙན་བཟོ་ཕྱོགས་ཐད་རྒྱབ་ལྗོངས་ལོ་རྒྱུས་དང་ཉམས་ཞིབ་བྱེད་རྒྱུ་དེ་ཡིན། དངོས་བྱུང་གློག་བརྙན་གང་འདྲ་ཞིག་ཡིན་རུང་གནད་དོན་ཁྱབ་བསྒྲགས་བྱེད་རྒྱུར་ཧ་ཅང་ཕན་ཐོགས་ཡོད། དངོས་བྱུང་གློག་བརྙན་བརྒྱུད་བོད་པའི་སྤྱི་ཚོགས་ཙམ་མིན་པར་རྒྱལ་སྤྱིའི་ཐོག་བོད་མིའི་སྒྲིག་འཛུགས་ཀྱི་ལོ་རྒྱུས་དང་མ་འོངས་འཆར་སྣང་རིགས་ཁྱབ་སྤེལ་བྱེད་རྒྱུའི་བརྒྱུད་ལམ་བཟང་ཤོས་ལྟ་བུ་རེད། ཅེས་སོགས་གསུངས།
བསོད་ནམས་ཚེ་བརྟན་ལགས་ཀྱིས། བོད་ཀྱི་བརྙན་འཕྲིན་འདི་ཉིད་ཚགས་ཆུད་པོ་ཆགས་ཐུབ་ན། བོད་པའི་སྤྱི་ཚོགས་ནང་ཆིག་སྒྲིལ་ཡོང་རྒྱུ་དང་། གོ་རྟོགས་སྤེལ་རྒྱུའི་བརྒྱུད་ལམ་གཙོ་བོ་ཞིག་ཆགས་ཡོད། དེར་བརྟེན་ངས་བོད་ཀྱི་བརྙན་འཕྲིན་འདི་ཧ་ཅང་གལ་ཆེན་པོ་མཐོང་གི་འདུག ཅེས་སོགས་གསུངས།
བསྟན་འཛིན་སྐལ་ལྟན་ལགས་ཀྱིས། གསར་འགྱུར་བརྒྱུད་ལམ་ནི་སྤྱི་ཚོགས་ནང་ལས་འགན་ཧ་ཅང་ཆེན་པོ་སྒྲུབ་ཀྱི་ཡོད། གསར་འགྱུར་བརྒྱུད་ལམ་ཁག་གི་བརྒྱུད་མི་མང་དང་ཐད་ཀར་འབྲེལ་བ་ཡོང་ཐུབ་ཀྱི་ཡོད་སྟབས། གློག་བརྙན་བཟོ་རྒྱུའི་ལས་གཞི་འདིའི་བརྒྱུད་བོད་མིའི་སྒྲིག་འཛུགས་དང་བོད་མི་དབར་ཐད་ཀར་འབྲེལ་བ་སྔར་ལྷག་ཡོང་ཐུབ་སྐོར་གསུངས།
དྲིལ་བསྒྲགས་དྲུང་ཆེ་ཤར་གླིང་ཟླ་སྒྲོན་ལགས་ཀྱིས། ལས་གཞི་འདི་ཉིད་ལྔ་དང་ལྔ་བཅུའི་ཐབས་བྱུས་དང་འབྲེལ་བའི་གློག་བརྙན་དང་པོ་ལྟ་བུ་ཆགས་ཀྱི་ཡོད་པ་དང་། གློག་བརྙན་དེའི་བརྒྱུད་བོད་མིའི་སྒྲིག་འཛུགས་ནི་བོད་མིའི་འཐབ་རྩོད་སྣེ་ཁྲིད་མཁན་དང་བོད་མིའི་རིག་གཞུང་སྲུང་སྐྱོབ་གནང་མཁན་གཙོ་བོ་ཡིན་པ་ཁ་གསལ་སྟོན་རྒྱུའི་སླད་ཡིན་པ་མ་ཟད། ཚོགས་འདུ་འདིའི་བརྒྱུད་བོད་ཀྱི་བརྙན་འཕྲིན་ཚན་པ་ཡར་རྒྱས་གཏོང་ཕྱོགས་སྐོར་ལམ་སྟོན་ཡང་ཞུ་རྒྱུའི་ཆེད་ཡིན་སྐོར་སོགས་གསུངས།
སྤྱིར་ཉིན་གྲངས་གསུམ་རིང་གི་ཚོགས་འདུའི་ཐོག་བཙན་བྱོལ་བོད་མིའི་སྤྱི་ཚོགས་ནང་ནས་གློག་བརྙན་བཟོ་ལས་པ་ཁག་གཅིག་མགྲོན་འབོད་ཀྱིས་བསམ་ཚུལ་བརྗེ་རེས་དང་གློག་བརྙན་བཟོ་ཕྱོགས་སླད་གོ་བསྡུར་གནང་རྒྱུ་ཡིན་འདུག་པ་མ་ཟད། ཕྱི་དྲིལ་བོད་ཀྱི་བརྙན་འཕྲིན་གསར་ཁང་གི་ལས་རིམ་ཁག་ཡར་རྒྱས་གཏོང་ཕྱོགས་དང་ལེ་ཚན་གསར་གཏོད་ཇི་དགོས་སོགས་ཀྱི་སྐོར་ལ་བསམ་ཚུལ་བསྡུ་རུབ་གནང་རྒྱུ་ཡིན་འདུག་པ་བཅས།།
