༢༠༡༥ ཟླ་ ༤ ཚེས་ ༢༩ རེས་གཟའ་ལྷག་པ།
༄༅། །ཕྱི་ལོ་ ༢༠༡༥ ཟླ་ ༤ ཚེས་ ༢༨ ཉིན་ཕྱི་དྲིལ་རྒྱ་ཡིག་ཚན་པའི་གསར་འགོད་པ་ཡེ་ཤེས་བསྟན་འཛིན་ལགས་ཀྱིས་ས་གནས་ནས་བཏང་གནས་ནང་འཁོད་དོན། ན་གཞོན་འགོ་ཁྲིད་སྦྱོང་བརྡར་ཚོགས་འདུའི་ཉིན་གཉིས་པ་སྟེ་ཟླ་བ ༤ པའི་ཚེས ༢༨ ཉིན་གྱི་ལས་རིམ་ནང་། སྔ་དྲོའི་ཆུ་ཚོད ༡༠་༣༠ ནས་འགྲོ་བ་མིའི་ཐེབས་རྩ་ཚོགས་པའི་རྩ་ཁྲིམས་གྲོས་འདོན་པ་ཝིས་ལན་ཧན་གྱིས་གཙོ་སྐྱོང་གནང་ནས་དབུས་བོད་མིའི་སྒྲིག་འཛུགས་སྲིད་བྱུས་ཉམས་ཞིབ་ཁང་གི་འགན་འཛིན་ཐུབ་བསྟན་བསམ་འཕེལ་ལགས་དང་། ཡུ་གུར་ཨ་རི་མཐུན་ཚོགས་འགན་འཛིན་གཞོན་པ་ཡི་ལི་ཤ་ཐེས་སོགས་ནས་གཏམ་བཤད་གནང་།
ཐུབ་བསྟན་བསམ་འཕེལ་ལགས་ཀྱིས་གནང་བའི་གསུང་བཤད་ནང་། རྒྱ་གཞུང་གིས་ཉེ་ཆར་བོད་སྐོར་བཏོན་པའི་རྒྱབ་ཤ་དཀར་པོའི་དེབ་ཟེར་བ་དེ་ནི་ཁུངས་མེད་ལུང་མེད་ཀྱི་ལོག་བཤད་ཡིག་ཆ་ཞིག་ཡིན་པ་དང་། ལོག་བཤད་ཡིག་ཆ་དེ་ལས་བོད་སྐོར་ཇི་ལྟར་ལོག་འགྲེལ་བྱས་པར་གསལ་འདོན་བྱས་པ་མ་ཟད། དེའི་དམིགས་ཡུལ་གང་ཡིན་འགྲེལ་བརྗོད་བྱས་པ་དང་ལྷན་དུ་ཚོགས་བཅར་བའི་དྲི་བར་ལན་འདེབས་གནང་།
གུང་ཟས་དུས་ཚོད་ ༡༢ ནས་ ༡་༤༥ བར། སྤྱི་ཐབ་གུང་ཟས་ཚོགས་ཁང་དུ་ཨ་རི་རྒྱལ་ཁབ་མང་གཙོ་ཐེབས་རྩ་ཚོགས་པའི་འགན་འཛིན་ Dr.Carl Gershman དང་། འགྲོ་བ་མིའི་ཐོབ་ཐང་བློ་འདོན་པ་རྒན་པ Mr.Javier El-Hage གཉིས་ནས་གཏམ་བཤད་བྱས། Dr.Car Gershman ལགས་ནས་གསུང་དོན། རྒྱ་ནག་གིས་བོད་རྒྱ་ནག་གི་ཆ་ཤས་ཡིན་པ་བཤད་ཀྱི་ཡོད། ཡིན་ནའང་དོན་ངོ་མར། བོད་ནི་རྒྱ་ནག་གི་ཆ་ཤས་མ་རེད། དེ་ལས་ལྡོག་སྟེ་བོད་ནི་དེ་སྔོན་རླབས་ཆེ་བའི་རྒྱལ་ཁབ་ཅིག་ཡིན་པ་རེད། དེ་འདྲ་རེད་དེ། ༸གོང་ས་ཏཱ་ལའི་བླ་མས་དབུ་མའི་ལམ་གྱི་སྲིད་བྱུས་ཁྱབ་བསྒྲགས་མཛད་ཡོད། རྒྱ་གཞུང་གི་འོག་ཏུ་འདུག་གི་ཡིན་གསུངས་པ་རེད། ཡིན་ནའང་རྒྱ་གཞུང་གིས་དེ་ལའང་ཡ་ལན་སྤྲོད་ཀྱི་མེད་པ་དེ་ནི་ཚད་ལས་བརྒལ་བའི་ཧམ་པ་རེད། བོད་མི་ཚོས་ལོ་རྒྱུས་ཐོག་ཏུ་བོད་རང་བཙན་གཙང་མའི་རྒྱལ་ཁབ་ཅིག་ཡིན་པ་གཞི་ལ་བཞག་ནས་རྒྱ་ནག་དང་གྲོས་བསྡུར་བྱེད་དགོས་པ་ལས། ལོ་རྒྱུས་ཀྱི་རང་བཙན་གནས་སྟངས་དུས་ནམ་ཡང་བསྐྱུར་འཇོག་བཟོ་མི་ཉན་ཟེར།
ཕྱི་དྲོ་ཆུ་ཚོད ༢ ནས་ཨ་རིའི་གདན་ཞུས་དགེ་རྒན་ཆེན་མོ་རྒ་མི་ཤ་ཡེ་ལིང་གིས་གཙོ་སྐྱོང་བྱས་ཏེ་རྒྱལ་སྤྱིའི་བོད་དོན་རྒྱབ་སྐྱོར་ཚོགས་པའི་ལས་བྱེད་བསྟན་ཆོས་དང་། འཛམ་གླིང་ཡུ་གུར་ཚོགས་ཆེན་འགན་འཛིན་གཞོན་པ་ཏོ་ལུ་ཧྲི་ཨེ་ཧྲ། ལྷོ་སོག་འགྲོ་བ་མིའི་ཐོབ་ཐང་ལྟེ་གནས་ཞིབ་འཇུག་པ་ཆོ་ལུ་ཝེ་ཅི་བཅས་ནས་གཏམ་བཤད་དང་དྲི་བ་དྲིས་ལན་བྱས།
རྒྱལ་སྤྱིའི་བོད་དོན་རྒྱབ་སྐྱོར་ཚོགས་པའི་ལས་བྱེད་བསྟན་ཆོས་ལགས་ནས་བོད་ཀྱི་ཁོར་ཡུག་སྐོར་གཏམ་བཤད་གནང་། ཁོང་གིས་གཏམ་བཤད་བྱས་དོན། རྒྱ་གཞུང་གིས་བོད་བཙན་བཟུང་བྱས་ནས་དུས་རབས་ཕྱེད་ལྷག་སོང་བའི་རིང་བོད་ཀྱི་རང་བྱུང་ཁོར་ཡུག་ཚབས་ཆེའི་གཏོར་བཤིག་བྱས་པས། ད་ལྟ་བོད་ཀྱི་གདོད་མའི་ནགས་ཚལ་ཧ་ལམ་ལྷག་མེད་རྩ་གཏོར་བྱས་ཟིན་པ་དང་། དེ་བཞིན་དུ་བོད་ཀྱི་ས་ཁུལ་ནས་གསེར། ཟངས། རྡོ་སོལ་ལ་སོགས་པའི་གཏེར་དངོས་འདྲ་མིན་ཚོད་མེད་སྔོག་འདོན་བྱས་སྟབས་བོད་ཀྱི་ཁོར་ཡུག་ཉམས་ཆག་ཚད་བརྒལ་བཏང་ཟིན་པ་རེད། ཁོར་ཡུག་གཏོར་བཤིག་བཏང་ཟིན་པ་དེ་དག་དུས་ནམ་ཡང་སླར་གསོ་བྱེད་ཐབས་བྲལ་བ་དེ་ཧ་ཅང་བློ་ཕམ་རང་བཞིན་ཞིག་རེད། དཔེར་ན། བོད་ཀྱི་རྒྱལ་ས་ལྷ་སའི་ཉེ་སྐོར་རྒྱ་མ་ནས་ཟངས་གཏེར་ཚོད་མེད་བསྔོགས་པའི་རྐྱེན་གྱིས་གཏེར་ཁ་སྔོག་འདོན་བྱེད་མཁན་ཧ་ཅང་མང་པོ་ཞིག་རི་ཉིལ་ནས་ཤི་བའི་གནས་ཚུལ་ལྷག་པ་རེད། རྒྱ་ནག་གིས་བོད་ལ་བཙན་འཛུལ་མ་བྱས་གོང་བོད་ཀྱི་ཡུལ་ལུང་མཐའ་དག་ལ་རི་རྒྱ་ཀླུང་རྒྱ་བྱས་ནས་མི་ལོ་སྟོང་ཕྲག་ནས་སྟོང་ཕྲག་རིང་ཁོར་ཡུག་སྲུང་སྐྱོབ་མཐར་ཕྱིན་པ་བྱས་ཡོད། རྒྱ་མིས་བོད་ལ་བཙན་འཛུལ་བྱས་པ་ནས་བཟུང་བོད་ཀྱི་རི་ཀླུང་ཐམས་ཅད་གཏོར་བཤིག་ཚད་མེད་བཏང་ཡོད་ཅེས་གསུངས་པ་དང་སྦྲགས་དྲི་བ་ཁག་ལ་ལན་འདེབས་བྱས་ཡོད།
དེ་རིང་གི་ཚོགས་འདུ་མུ་མཐུད་དགོང་ཟས་རྗེས་ནས་ཡང་བསྐྱར་འཚོགས་ཏེ་ཆུ་ཚོད ༧་༣༠ ནས་ ༩་༣༠ བར་འཚོགས་པ་རེད།
