༢༠༡༤ ཟླ་ ༦ ཚེས་ ༢༧ རེས་གཟའ་པ་སངས།
༄༅། །ཕྱི་ལོ་ ༢༠༡༤ ཟླ་ ༦ ཚེས་ ༢༥ ཉིན་དཀར་མཛེས་ལམ་བྲག་དགོན་པའི་བཙུན་མ་སྨན་པ་འཆི་མེད་ལགས་རྒྱའི་བཙོན་འོག་ནས་ལོ་ ༣ གྱི་དུས་བཀག་བཙོན་འཇུག་གི་དུས་ཡུན་རྫོགས་ཏེ་བཙོན་བཀྲོལ་ཐོབ་སྟེ་རང་ཁྱིམ་དུ་འབྱོར་ཡོད་འདུག
དེ་ཡང་གསར་འགྱུར་བརྒྱུད་ལམ་ཁག་གཅིག་ནང་གནས་ཚུལ་ཐོན་གསལ་ལྟར་ན། རྒྱ་གཞུང་གིས་བོད་མི་ཚོ་ཁོང་མོ་ཕེབས་བསུར་ཡོང་རྒྱུ་བཀག་འགོག་ཆེད། ཕྱི་ཚེས་ ༢༥ ཉིན་གྱི་མཚན་མོའི་ཆུ་ཚོད་ ༡༢ ཙམ་ལ་གསང་སྟབས་ཀྱིས་བཙུན་མ་འཆི་མེད་ལགས་རླངས་འཁོར་ནང་བཞག་སྟེ་ཁྱིམ་ནང་བསྐྱལ་ཡོད་ཀྱང་། ས་གནས་མང་ཚོགས་ཀྱིས་ཁོང་བཙོན་བཀྲོལ་ཐོབ་པའི་གནས་ཚུལ་ཐོས་མ་ཐག ཕྱི་ཚེས་ཚེས་ ༢༦ ཉིན་ལམ་བྲག་དགོན་པའི་བཙུན་མ་རྣམས་ཀྱིས་གཙོས་ས་གནས་མི་མང་གིས་དགའ་བསུའི་མཇལ་དར་བསྒྲོན་ཡོད་འདུག
བཙུན་མ་འཆི་མེད་ལགས་ནི། ཕྱི་ལོ་ ༢༠༡༡ ལོར་དཀར་མཛེས་རྫོང་ཐོག་ཏུ་བོད་མི་མང་པོས་རྒྱ་གཞུང་ལ་ངོ་རྒོལ་སྐད་འབོད་བྱེད་སྐབས། རྒྱ་གཞུང་གིས་གྲྭ་བཙུན་ཚོ་དཀར་མཛེས་གྲོང་ཁྱེར་ནང་ཡོང་ན་ཞང་སོ་སོ་ནས་ཆོག་མཆན་ཡི་གེ་དང་། ཁག་ཐེག་འགན་ལེན་བྱེད་མཁན་ལས་བྱེད་གཅིག་དང་མཉམ་དུ་མ་ཡོང་ཚེ་འཛིན་བཟུང་བྱེད་རྒྱུའི་བཙན་བཀའ་གཏོང་སྐབས། བཙུན་མ་འཆི་མེད་ལགས་དང་ཁོང་གི་སྨན་གཡོག་བཙུན་མ་ཆོས་དགའ་གཉིས་དཀར་མཛེས་གྲོང་ཁྱེར་ནང་ཡོད་པའི་ལམ་བྲག་སྨན་ཁང་དུ་སྐྱོད་བཞིན་པའི་ལམ་བར་ནས་ཉེན་རྟོག་པས་འཛིན་བཟུང་བྱས་ཡོད་པ་དང་། སྐབས་དེ་ནས་ལོ་གཅིག་ཙམ་རིང་ནང་མི་ཚོས་ཁོང་མོའི་གནས་ཚུལ་གང་ཡང་མཐོང་ཐོས་བྱུང་མེད་ཀྱང་། རྗེས་སུ་ཤེས་རྟོགས་བྱུང་བར་ཁོ་མོ་དཀར་མཛེས་རྫོང་ནས་འཛིན་བཟུང་བྱས་ཏེ་དར་རྩེ་མདོའི་བཙོན་ཁང་ཞིག་ནང་ལོ་གཅིག་རིང་བཀག་ཉར་བྱས་ཡོད་པ་དང་། དེ་ནས་དར་རྩེ་མདོའི་ཁྲིམས་ཁང་གིས་ཁོ་མོར་ཆབ་སྲིད་ཀྱི་ཉེས་མིང་འོག་ལོ་ ༣ ཀྱི་བཙོན་འཇུག་ཁྲིམས་ཐག་བཅད་དེ། རྒྱ་ནག་གི་བུད་མེད་ཀྱི་བཙོན་ཁང་གཞན་ཞིག་ཏུ་ཁྲིད་དེ་ལོ་གཉིས་ལ་བཙོན་འཇུག་བྱས་མཐར་ཟླ་འདིའི་ཕྱི་ཚེས་ ༢༥ ཉིན་བཙོན་འཇུག་དུས་ཡུན་རྫོགས་ཏེ་གློད་བཀྲོལ་བཏང་ཡོད་འདུག
བཙུན་མ་འཆི་མེད་ལགས་ནི་དཀར་མཛེས་རྫོང་ཁོག་བཙན་ཁུལ་ཨ་རུ་ར་གྲོང་པ་ནས་ཡིན་པ་དང་། ཁོང་གི་ཕ་ཚེ་འདས་ཀྱི་མིང་ལ་རྡོ་རྗེ་ཚེ་རིང་དང་མ་མིང་ལ་ངག་དབང་ཆོས་སྒྲོན་རྗོད་བཞིན་ཡོད་འདུག
