༢༠༡༤ ཟླ་ ༣ ཚེས་ ༡༧ རེས་གཟའ་ཟླ་བ།
༄༅། །འདི་གར་ཆོས་རིག་ལས་ཁུངས་ནས་ཕྱི་ལོ་ ༢༠༡༤ ཟླ་ ༣ ཚེས་ ༡༧ ཉིན་བཏང་གནས་ནང་འཁོད་དོན། 
ཕྱི་ཚེས་ ༡༦ ཉིན་གྱི་ཕྱེད་ཡོལ་ཆུ་ཚོད་ ༢་༠༠ ཐོག་ཝཱཎ་དབུས་བོད་ཀྱི་གཙུག་ལག་སློབ་གཉེར་ཁང་གི་མགོན་མེད་ཟས་སྦྱིན་གྱི་ཚོགས་ཁང་ནང་སྐུ་མགྲོན་གཙོ་བོ་ཝཱཎ་མཐོ་སློབ་ཀྱི་རིགས་བདག་དགེ་བཤེས་ངག་དབང་བསམ་གཏན་ལགས་དབུ་བཞུགས་ཐོག བོད་མིའི་སྒྲིག་འཛུགས་ཆོས་རིག་ལས་ཁུངས་དང་ཝཱཎ་དབུས་བོད་ཀྱི་གཙུག་ལག་སློབ་གཉེར་ཁང་གཉིས་ཟུང་འབྲེལ་ཐོག་གཞུང་ཆེན་རིགས་གཅིག་རྐང་འཛིན་པ་རྣམས་ལ་ཕྱི་ལོ་ ༢༠༡༤ ཟླ་ ༣ ཚེས་ ༡༢ ནས་ ༡༦ བར་ཉམས་ཞིབ་རིག་པའི་ཟབ་སྦྱོང་གནང་བའི་ལས་འགུལ་མཇུལ་བསྒྲིལ་གནང་འདུག
ཟབ་སྦྱོང་ཉིན་བཞིའི་རིང་ཝཱཎ་མཐོ་སློབ་ཀྱི་སློབ་དཔོན་ཆེན་པོ་དགེ་བཤེས་ཡེ་ཤེས་ཐབས་མཁས་ལགས་ཀྱིས་དབུས། མཐོ་སློབ་ཀྱི་བོད་རིགས་སློབ་དགེ་བརྒྱད་ཀྱིས། ལྟ་གྲུབ་དང་། 
དབུ་མའི་ལྟ་བ། ཞུ་སྒྲིག རྩོམ་རིག གསང་འདུས་ཀྱི་གཞུང་། ཕབ་བསྒྱུར། ལུང་ཁུངས་འཚོལ་ཞིབ། ཚད་མ་བཅས་ལ་ཉམས་ཞིབ་བྱེད་ཚུལ་དང་། རྒྱ་གར་ཧིན་དྷུ་གཙུག་ལག་སློབ་ཁང་གི་སློབ་དཔོན་ཟུར་པ་གནའ་རྫས་ཤུལ་བཞག་རིག་པའི་མཁས་དབང་། གཙུག་ལག་སློབ་དཔོན་་ཝིདྷུལཱ་ཇཱེས་ཝལ་ལགས་ཀྱིས་ལོ་རྒྱུས་ཐོག་གམ་གནའ་རྫས་ཤུལ་བཞག་གི་ཐོག་ནས་ཉམས་ཞིབ་བྱེད་ཕྱོགས། དེ་བཞིན་ཝཱཎ་མཐོ་སློབ་རང་གི་གཙུག་ལག་སློབ་དཔོན་ཆེན་པོ་སྤི་སྤི་གྷོག་ལེ་ལགས་ཀྱིས་ཚད་མའི་སྐོར་དང་། འབུམ་རམས་པ་བནཱརཱསི་ལཱལ་ལགས་ཀྱིས་ནང་པའི་གསང་སྔགས་ཀྱི་གཞུང་ལ་ཉམས་ཞིབ་བྱེད་ཕྱོགས་དང་དེའི་དཀའ་ངལ་ཞེས་པའི་བརྗོད་གཞི་བཅས་ཀྱི་ཐོག་གསུང་བཤད་དང་བགྲོ་གླེང་གནང་འདུག
ཟབ་སྦྱོང་གི་ཉིན་གསུམ་པར་ཚོགས་ཞུགས་པ་རྣམས་ཝཇརཱ་ཝིདྷྱ་དགོན་པར་སྒྲུབ་བརྒྱུད་བསྟན་པའི་གཙུག་རྒྱན་དཔལ་རྒྱལ་བ་ཀརྨ་པ་ཨོ་རྒྱན་འཕྲིན་ལས་རྡོ་རྗེ་རིན་པོ་ཆེའི་མཇལ་ཁ་བཀའ་སློབ་ཞུས་པ་སོགས་གནང་སྟེ་ཟབ་སྦྱོང་གི་ལས་རིམ་རེ་ཞིག་མཇུག་བསྒྲིལ་གནང་འདུག
