༢༠༡༤ ཟླ་ ༢ ཚེས་ ༡༣ རེས་གཟའ་ཕུར་བུ།
༄༅། །ཕྱི་ལོ་ ༢༠༡༤ ཟླ་ ༢ ཚེས་ ༡༢ ཉིན་གྱི་ཕྱེད་ཡོལ་ཆུ་ཚོད་ ༣ པའི་ཐོག་འཕྲོད་བསྟེན་བཀའ་བློན་ཚེ་རིང་དབང་ཕྱུག་མཆོག་གིས་རྡ་ས་ས་གནས་བདེ་དོན་ཚོགས་ཁང་ནང་རྡ་སའི་ཉེ་འཁྲིས་སུ་གནས་པའི་དགོན་སྡེ་དང་ཚོགས་སྐྱིད་ཁག་གི་སྐུ་ཚབ། དེ་བཞིན་མི་མང་བཅས་ཁྱོན་མི་གྲངས་ ༤༠ བརྒལ་བར་ནད་གཞི་སྔོན་འགོག་དང་འབྲེལ་བཙན་བྱོལ་བོད་མིའི་སྨན་བཅོས་ལྟ་སྐྱོང་སྐོར་གསུང་བཤད་གནང་དོན། དེ་རིང་ང་རང་རྡ་ས་མི་མང་ཚོགས་ཁང་ནང་བཅར་དགོས་པའི་རྒྱུ་མཚན་གཙོ་བོ་ནི། 
བོད་མིའི་སྒྲིག་འཛུགས་ཀྱི་འཕྲོད་བསྟེན་ལས་ཁུངས་ནས་བར་ལམ་ལོ་གཉིས་ཙམ་ནས་བཙན་བྱོལ་བོད་མིའི་སྨན་བཅོས་ལྟ་སྐྱོང་ལས་གཞི་གལ་ཆེན་ཞིག་གསར་འཛུགས་ཞུས་ཡོད། རྡ་ས་ཁུལ་དུ་ཚོགས་པ་སྐྱིད་སྡུག་ཁག་མང་པོ་ཡོད་པ་མ་ཟད། དགོན་སྡེ་ཁག་ནང་གྲྭ་བཙུན་མང་པོ་ཡོད་པར་བརྟེན་སོ་སོའི་མངའ་ཁོངས་སུ་ཡོད་པ་རྣམས་ལ་བཙན་བྱོལ་བོད་མིའི་སྨན་བཅོས་ལྟ་སྐྱོང་ལས་གཞི་སྐོར་མ་གོ་མ་ཐོས་མེད་པའི་གོ་རྟོགས་སྤེལ་རོགས་གནང་ཞུ་རྒྱུ་ཡིན། བཙན་བྱོལ་བོད་མིའི་སྨན་བཅོས་ལྟ་སྐྱོང་ལས་གཞི་འདི་འཕྲོད་བསྟེན་ཉེན་སྲུང་གི་ལས་གཞི་ཞིག་རེད། ལས་གཞི་འདི་བཙན་བྱོལ་བོད་མི་ཚོར་སྨན་བཅོས་རིམ་པ་གཉིས་པ་དང་གསུམ་པའི་ཐོག་དཔལ་འབྱོར་གྱི་མཐུན་རྐྱེན་བསྐྲུན་རྒྱུའི་ལས་གཞི་ཞིག་ཀྱང་ཡིན། སྤྱིར་ཉེན་སྲུང་ལ་དབྱེ་ན་མང་པོ་ཡོད་པའི་ནང་ནས་འཕྲོད་བསྟེན་ཉེན་སྲུང་གལ་ཆེན་ཆགས་ཡོད། མི་ཚང་མར་འཕྲོད་བསྟེན་གྱི་ཉེན་ཁ་ཡོད། བཙན་བྱོལ་བོད་མིའི་སྤྱི་ཚོགས་ནང་མི་མང་བརྒྱ་ཆ་བཅུ་ཙམ་ལ་འཕྲོད་བསྟེན་ཉེན་སྲུང་ངམ་སྨན་བཅོས་མཐུན་རྐྱེན་ཡོད། དེ་མིན་བརྒྱ་ཆ་ ༩༠ ཙམ་ལ་འཕྲོད་བསྟེན་ཉེན་སྲུང་དང་སྨན་བཅོས་མཐུན་རྐྱེན་མེད། དཔེར་ན། བོད་མིའི་སྒྲི་འཛུགས་ཀྱི་མཛད་གཙོ་རྣམ་པ་དང་། སྲི་ཞུའི་ལས་བྱེད། ལས་བྱེད་བགྲེས་ཡོལ་སྨན་དོད་འབུལ་མཁན་རིགས། ཆབ་སྲིད་བཙོན་པ། ཉམ་ཐག་ཁ་པ་དང་ང་པ། བོད་མིའི་སྒྲིག་འཛུགས་ཀྱི་ཐད་ཀར་ཁྱབ་ཁོངས་འོག་མེད་པའི་བོད་ཀྱི་སྨན་རྩིས་ཁང་། རྡ་ས་དང་མ་སུ་རི་བོད་ཁྱིམ་གྱི་ལས་བྱེད་བཅས་ལ་སྨན་བཅོས་མཐུན་རྐྱེན་ཡོད། བཙན་བྱོལ་བོད་མིའི་སྨན་བཅོས་ལྟ་སྐྱོང་ལས་གཞི་གསར་འཛུགས་དང་། དེའི་དམིགས་ཡུལ། ལས་གཞི་འདི་ཉིད་གསར་འཛུགས་མ་ཞུ་གོང་འཕྲོད་བསྟེན་ལས་ཁུངས་ནས་ཛ་དྲག་སྨན་བཅོས་མཐུན་རྐྱེན་སྦྱོར་བཞིན་ཡོད། སྲི་ཞུའི་ལས་བྱེད་དང་ཉམ་ཐག་ཕུད་པའི་མི་མང་ནང་ཛ་དྲག་ནད་མནར་གྱི་སྨན་བཅོས་འགྲོ་གྲོན་ཆེན་པོ་འགྲོ་མཁན་རིགས་ཀྱིས་སྨན་བཅོས་འགྲོ་གྲོན་བྱུང་འཛིན་འབྱོར་དོན་བཞིན། བརྒྱ་ཆ་བཅུ་ཉི་ཤུ་སོགས་འབུལ་བཞིན་ཡོད་པར་བརྟེན་སྤྱི་ཡོངས་ཀྱི་འགྲོ་གྲོན་ཆེན་པོ་དང་། མི་རེར་ཁ་ཡོད་ལག་ཡོད་ཀྱི་ཕན་ཐོགས་དེ་ཙམ་བྱུང་མེད་པའི་ཚོར་སྣང་ཞིག་ཡོང་བཞིན་ཡོད།
བཀའ་ཤག་སྐབས་ ༡༣ པས་འདིའི་ཐོག་དམིགས་བསལ་དགོངས་པ་བཞེས་ནས་ཛ་དྲག་སྨན་བཅོས་མིན་པར་མ་འོངས་པར་ཕུགས་རྒྱང་རིང་པོའི་ལས་གཞི་བསམ་བློ་གཏོང་རྒྱུ་མི་འདུག་གམ་ཞེས་བཀའ་ཕེབས་དོན་བཞིན། 
འཕྲོད་བསྟེན་ལས་ཁུངས་ནས་ཞིབ་འཇུག་མང་པོ་བྱས་མཐར་བཙན་བྱོལ་བོད་མིའི་སྨན་བཅོས་ལྟ་སྐྱོང་ལས་གཞིའི་སྲིད་བྱུས་བཟོས་ནས་བཀའ་ཤག་ལ་ཕུལ་ཏེ་བཀའ་ཤག་གིས་བཀའ་འཁྲོལ་གནང་ནས་བོད་མི་མང་སྤྱི་འཐུས་ལྷན་ཁང་གིས་གཏན་འབེབས་གནང་ཡོད། ལས་གཞི་འདི་ཉིད་གསར་འཛུགས་བྱེད་དགོས་པའི་དམིགས་ཡུལ་ནི། ཛ་དྲག་སྨན་བཅོས་ལས་ལྷག་པའི་མཐུན་རྐྱེན་ཞིག་མང་ཚོགས་ནང་བསྐྲུན་རྒྱུ་དང་། བཙན་བྱོལ་བོད་མི་ཚོར་སྨན་བཅོས་རིམ་པ་གཉིས་པ་དང་གསུམ་པའི་ཐོག་འཕྲོད་བསྟེན་ལས་ཁུངས་ནས་སྔར་ལྷག་དཔལ་འབྱོར་གྱི་རྒྱབ་རྟེན་མཐུན་རྐྱེན་བསྐྲུན་རྒྱུ། མི་མང་གི་དཀའ་ངལ་སེལ་ཐབས་བཅས་ཡིན། བཙན་བྱོལ་བོད་མིའི་སྨན་བཅོས་ལྟ་སྐྱོང་ལས་གཞི་འགྲོ་སྟངས་དང་། ཁྲོམ་རྭ་ནང་ཡོད་པའི་འཕྲོད་བསྟེན་ཉེན་སྲུང་བར་ཁྱད་པར་ཇི་ཡོད། འཕྲོད་བསྟེན་ཉེན་སྲུང་ལ་དབྱེ་ན་གཉིས་ཡོད། ཉེན་ཁ་ཡག་པ་དང་། སྡུག་པ། ཉེན་ཁ་ཡག་པ་ནི་ལོ་གཞོན་པ་ད་ལྟ་གཟུགས་ཁམས་བདེ་པོ་ཡིན་པ་རྣམས་དང་། ཉེན་ཁ་སྡུག་པ་ནི་ལོ་རྒན་པ་ད་ཆ་གཟུགས་ཁམས་ཐང་པོ་མེད་པ་རྣམས་ཡིན། ཁྲོམ་རྭ་ནང་ཡོད་པའི་འཕྲོད་བསྟེན་ཉེན་སྲུང་ནང་ཉེན་ཁ་ཡག་པ་དེ་གང་མང་མང་འཇུག་རྒྱུའི་འཆར་གཞི་བྱེད་ཀྱི་ཡོད་པ་མ་ཟད། ལོ་རྒན་པ་རྣམས་དང་ན་ཚབས་ཆེ་བ་ཡོད་རིགས་འཛུལ་བྱས་ཆོག་གི་མེད། གལ་ཏེ་འཛུལ་རྒྱུའི་ཆ་རྐྱེན་ཚང་ཡོད་ནའང་དངུལ་ཆེན་པོ་བསྡུ་དགོས་ཀྱི་ཡོད། བོད་མིའི་སྒྲིག་འཛུགས་ཀྱི་ལས་གཞི་འདིའི་ནང་ལོ་རྒན་གཞོན་སོགས་ཀྱི་དབྱེ་བ་གང་ཡང་མེད་པའི་ཐོག་འཛུལ་འདོད་ཡོད་མཁན་ཚང་མར་གོ་སྐབས་གནང་བཞིན་ཡོད། སྨན་བཅོས་ལྟ་སྐྱོང་ལས་གཞི་འདིའི་ནང་རྒྱ་གར་དུ་གཏན་སྡོད་བོད་མིའི་དང་བླངས་དཔྱ་ཁྲལ་དུས་ལྟར་འབུལ་མཁན་གྱི་བོད་མི་ཞིག་ཡིན་ན་འཛུལ་ཞུགས་བྱེད་ཆོག་གི་རེད། སྨན་བཅོས་ལྟ་སྐྱོང་ལས་གཞིའི་ནང་ལོ་གཉིས་པའི་ནང་འཛུལ་ཏེ་ལོ་གསུམ་པ་མཚམས་བཞག་སྟེ་བཞི་པའི་ནང་འཛུལ་ཆོག་གི་མེད། མུ་མཐུད་ནས་འཛུལ་ཞུགས་གནང་དགོས་ཀྱི་ཡོད། དེ་བཞིན་ལས་གཞི་འདིའི་ནང་འཛུལ་ཞུགས་ཀྱི་དུས་ཚོད་འདི་ལོ་ཕྱི་ཟླ་ ༡། ༢། ༣ ཚེས་ ༡༥ བར་ཡིན།
དེ་ནས་ཉེན་སྲུང་ལེན་རྒྱུའི་དུས་ཚོད་ལོ་ལྟར་ཕྱི་ཟླ་ ༤ ཚེས་ ༡ ནས་ལོ་རྗེས་མའི་ཕྱི་ཟླ་ ༣ ཚེས་ ༣༡ བར་རེད། འཛུལ་ཞུགས་བྱེད་སྟངས་ལ་རིགས་གཉིས་ཡོད། ཐོ་འགོད་བྱེད་ཡུལ་ནི། ས་གནས་གཞིས་འགོ་ལས་ཁུངས་དང་ས་གནས་སྨན་ཁང་གང་རུང་ལ་ཐོ་འགོད་བྱེད་ཆོག་གི་རེད། འཛུལ་ཞུགས་བྱེད་སྟངས་ལ་རིགས་གཉིས་ཡོད། ནང་མི་ཡོད་མཁན་ཞིག་ཡིན་ན། ནང་མི་གཉིས་ནས་ལྔ་བར་ལོ་གཅིག་གི་ཉེན་སྲུང་ཚོགས་དངུལ་ཧིན་སྒོར་ ༣༥༦༥ ཡིན་པ་དང་། ཉེན་སྲུང་ལོ་གཅིག་ནང་ཚུད་ལ་ཧིན་སྒོར་ ༡༠༠༠༠༠ གཅིག་རག་གི་རེད། ནང་མི་མེད་མཁན་ཧྲེང་ཧྲེང་དང་དགོན་སྡེ་ཁག་ནང་མ་བསྡད་པའི་གྲྭ་རྐྱང་རིགས་ཀྱིས་ཚོགས་དངུལ་ལོ་གཅིག་ལ་ཧིན་སྒོར་ ༩༥༠ སྤྲོད་དགོས་པ་དང་། ཉེན་སྲུང་ཧིན་སྒོར་ ༥༠༠༠༠ རག་གི་རེད། ཅེས་སོགས་ཀྱི་གསུང་བཤད་དང་མང་ཚོགས་ཀྱི་དོགས་དྲི་ཁག་ལ་ལན་འདེབས་གནང་ཡོད།
