༢༠༡༣ ཟླ་ ༥ ཚེས་ ༨ རེས་གཟའ་ལྷག་པ།
༄༅། །ཕྱི་ལོ་ ༢༠༡༣ ཟླ་ ༥ ཚེས་ ༨ ཉིན་རྡ་ས་བོད་ཀྱི་བདེ་རྩའི་ཡང་སྟེང་དུ་ནང་སྲིད་ལས་ཁུངས་དང་བོད་ཀྱི་བདེ་རྩ་ཐུན་མོང་ནས་གཉེར་བའི་རྨང་རིམ་ཤེས་ཡོན་འཛིན་གྲྭ་ཞིག་དབུ་འབྱེད་གནང་ཡོད།
དེ་ཉིན་སྔ་དྲོ་ཆུ་ཚོད་ ༡༠ ཐོག་སྐུ་མགྲོན་གཙོ་བོ་ནང་སྲིད་བཀའ་བློན་རྒྱ་རི་སྒྲོལ་མཆོག་དང་། ནང་སྲིད་དྲུང་ཆེ་བསོད་ནམས་སྟོབས་རྒྱལ་ལགས། དྲུང་འཕར་རྣམ་གཉིས། བོད་མི་མང་སྤྱི་འཐུས་རྒྱུན་ལས་ཀྱི་སྐུ་ཚབ་སྤྱི་འཐུས་སྐལ་བཟང་རྒྱལ་མཚན་ལགས། བོད་ཀྱི་བདེ་རྩའི་འགན་འཛིན་ཚེ་རིང་དོན་གྲུབ་ལགས། ཌན་མག་བོད་ཀྱི་འགན་འཛིན་ལྷན་ཚོགས་ཀྱི་ཚོགས་མི་གུན་ཝར་ཇུ་ལི་(Gunver Juul)ལགས། རྡ་སའི་ས་གནས་འགོ་འཛིན་བསོད་ནམས་རྡོ་རྗེ་ལགས་ཀྱིས་གཙོས་གཞུང་འབྲེལ་མིན་པའི་ཚོགས་པ་ཁག་གི་སྐུ་ཚབ། དགེ་ལས་སློབ་ཕྲུག་བཅས་ཁྱོན་མི་གྲངས་བརྒྱ་བརྒལ་བ་ལྷན་འཛོམས་ཀྱི་ཐོག་མར་བོད་ཀྱི་བདེ་རྩ་དབུ་འཛུགས་གནང་མཁན་ཚོགས་གཙོ་ལཱ་ཁ་རིན་པོ་ཆེའི་འཚམས་འཕྲིན་སྒྲོགས་སྦྱང་གནང་རྗེས་བོད་ཀྱི་བདེ་རྩའི་འགན་འཛིན་ཚེ་རིང་དོན་གྲུབ་ལགས་ཀྱིས་འཚམས་འདྲིའི་ངོ་སྤྲོད་གསུང་བཤད་གནང་། དེ་ནས་ཌན་མག་བོད་ཀྱི་འགན་འཛིན་ལྷན་ཚོགས་ཀྱི་ཚོགས་མི་གུན་ཝར་ཇུ་ལི་ལགས་ཀྱིས་གསུང་བཤད་གནང་མཚམས་ནང་སྲིད་དྲུང་ཆེ་བསོད་ནམས་སྟོབས་རྒྱལ་ལགས་ཀྱིས་ན་གཞོན་རོགས་སྐྱོར་ཚན་པའི་ཁོངས་ནས་བོད་ནས་གསར་དུ་ཕེབས་པའི་ན་གཞོན་རྣམས་ཀྱི་ཆེད་ལས་འཆར་སྤེལ་དགོས་པའི་དམིགས་དོན་ངོ་སྤྲོད་གསུང་བཤད་གནང་།
དེ་ནས་སྐུ་མགྲོན་གཙོ་བོ་མཆོག་གིས་དང་བླངས་ཞབས་ཞུ་བ་ཕྱི་རྒྱལ་དགེ་རྒན་སོགས་ལ་ཐུགས་རྗེ་ལེགས་འབུལ་གྱི་མཇལ་དར་བསྒྲོན་ཏེ་གསུང་བཤད་གནང་དོན། དེ་རིང་འདི་གར་ཕེབས་པའི་རྣམ་པ་ལྷན་རྒྱས་ལ་ཐོག་མར་འཚམས་འདྲིའི་བཀྲིས་བདེ་ལེགས་ཞུ་རྒྱུ་ཡིན། སྤྱིར་བཏང་བོད་ཀྱི་ཆབ་སྲིད་གནས་སྟངས་འོག་བོད་མི་བཙན་བྱོལ་བ་ཆགས་རྗེས་༸གོང་ས་མཆོག་གི་ཐུགས་རྗེའི་བཀའ་དྲིན་ལ་བརྟེན་ནས་བར་སྐབས་ཤིག་ནས་ལོ་ཚད་གང་ཙམ་སླེབས་ཀྱང་སྐད་ཡིག་སྦྱོང་འདོད་ཡོད་པ་གང་མང་ཡོང་གི་ཡོད་པར་བརྟེན། ང་ཚོ་བོད་པའི་སྤྱི་ཚོགས་ནང་སྤྱི་ཟུར་ལཱ་ཁ་རིན་པོ་ཆེས་གཙོས་བོད་ཀྱི་བདེ་རྩ་ཚོགས་པ་དང་། ལྷ་ཚོགས་པ། ཆུ་བཞི་སྒང་དྲུག་སོགས་ཀྱི་སྐད་ཡིག་སྦྱོང་བརྡར་སྤྲོད་རྒྱུས་མཚོན་ཕན་ཐོགས་ཡོད་པའི་ལས་དོན་གནང་བར་བསྔགས་བརྗོད་ཞུ་རྒྱུ་ཡིན། གང་ལྟར་ང་ཚོ་མིའི་ལུང་པར་སླེབས་པ་ཡིན་སྟབས་མ་མཐར་ཟ་སྐད་འཐུང་སྐད་ཤེས་པ་དགོས་ཀྱི་འདུག འདི་འདྲ་བའི་སློབ་ཚན་རིམ་པ་སྦྱོང་རྒྱུའི་གོ་སྐབས་ནི་ཧ་ཅང་བཟང་པོ་ཡིན།
འོན་ཀྱང་ལས་གཞི་ཡག་པོ་ཡོང་མིན་ནི་སློབ་ཕྲུག་ཚོར་རག་ལུས་པ་ཡིན་པར་བརྟེན་སློབ་ཕྲུག་ཚོས་སློབ་སྦྱོང་མཐའ་འཁྱོངས་བ་བྱ་རྒྱུ་གལ་ཆེན་པོ་རེད། ད་ལྟའི་ཆར་བོད་ཀྱི་གནས་སྟངས་ཛ་དྲག་ཡིན་སྟབས། བོད་མི་མི་རེ་ངོ་རེ་ནས་འགན་འཁྲི་དང་ལྷན་ནུས་ལྡན་གྱི་སློབ་སྦྱོང་བྱེད་དགོས་སྐོར་སོགས་ཀྱི་གསུང་བཤད་གནང་རྗེས་བོད་ཀྱི་བདེ་རྩའི་ཤེས་ཡོན་ཚན་པའི་འགན་འཛིན་རིག་འཛིན་དབང་མོ་ལགས་ཀྱིས་ཐུགས་རྗེ་ཆེ་ཞུས་ཏེ་གྲོལ།
སྤྱིར་བཏང་བོད་ཀྱི་བདེ་རྩའི་ལས་འཆར་ཚན་པ་བཞི་ཡོད་པ་རྣམས་ནི། སྤྱི་ཚོགས་ཞབས་ཞུ་དང་། འཕྲོད་བསྟེན། དུད་འགྲོ་ལྟ་སྐྱོང་། ཤེས་ཡོན་བཅས་ཡིན་པ་དང་། རྨང་རིམ་ཤེས་ཡོན་འཛིན་གྲྭ་དང་གློག་ཀླད་འཛིན་གྲྭ་སོགས་ལ་ཁྱོན་སློབ་མ་གྲངས་ ༡༧༢ ཡོད་པ་མ་ཟད
ད་ཐེངས་འཛིན་གྲྭའི་སློབ་ཕྲུག་ཚོར་འདིར་རྒྱ་གར་གཞུང་གི་ངོས་ལེན་ཡོད་པའི་ལག་འཁྱེར་ཡང་ཐོབ་ཀྱི་ཡོད་འདུག་པ་བཅས།
