གང་ལྟར་འཛམ་གླིང་ནང་འགྱུར་བ་འགྲོ་གི་ཡོད། ཕྱི་དངོས་པོ་དང་འབྲེལ་བའི་ཤེས་ཡོན་སོགས་ཡར་རྒྱས་འགྲོ་གི་ཡོད། ང་ཚོ་བོད་པ་རྣམས་སྔ་ལམ་ལྟར་བྱས་ནས་སྡོད་སྐབས། སྔ་མོ་ཡིན་རུང་རྗེས་ལུས་ཐེབས་པ་རེད། དཔེར་ན། དུས་ཚོད་འགྱུར་བ་ཆེན་པོ་ཕྱིན་མེད་ན། ཕལ་ཆེར་ང་ཚོ་རྗེས་ལུས་སུ་ཐེབས་རྒྱུའི་ཉེན་ཁ་ཏན་ཏན་ཡོད། ང་ཚོས་ཧ་ཅང་དཀའ་ངལ་མྱངས་ཏེ་དུས་ཚོད་གཉན་འཕྲང་ཞིག་འགྲིམ་ནས་འགྲོ་སྐབས། དཀའ་ངལ་འཕྲད་སྐབས་དངོས་ཡོད་གནས་ཚུལ་ངོས་ལེན་བྱས་ནས་འགྲོ་དགོས་པ་རེད་མ་གཏོགས་འདྲ་ཆགས་པོ་དང་སྤམ་པོ་བྱས་ནས་འགྲོ་རྒྱུ་མེད་ལ་སོ་སོ་སྣང་བ་དག་ནས་སྐད་ཆ་ཤོད་རྒྱུ་མེད། ངོས་རང་སྒེར་ལ་ཆ་མཚོན་ན་བཙན་བྱོལ་བ་ཆགས་ནས་ལོ་ལྔ་བཅུ་ང་གྲངས་ཕྱིན་པ་དེའི་རིང་ལ་ཉམས་མྱོང་མང་དག་ཅིག་བསགས་ནས་ཉམས་མྱོང་ཐོབ་ཡོད། དེ་བཞིན་མི་མང་པོ་ཞིག་ངོས་ཤེས་ཆགས་པའི་ཐོག་ནས་ཕྱི་ལོ་ ༡༩༥༩ དང་༦༠ལོ་འགོར་འཛམ་གླིང་འདིའི་སྒང་ལ་སྤྱིར་བོད་དང་ཡང་སྒོས་བོད་ཀྱི་ཆོས་དང་རིག་གཞུང་ཤེས་མཁན་ཧ་ཅང་ཉུང་ཉུང་རེད། ཤེས་མཁན་ཚོས་ཀྱང་བོད་ཀྱི་ཆོས་དེ་བླ་མའི་ཆོས་དང་ལྷ་འདྲེ་གདོན་གེགས་གསོལ་རྒྱུ་ལྟ་བུ་རེད་ཅེས་གང་ལྟར་གོ་བ་ཕྱིན་ཅི་ལོག་པ་དེ་འདྲ་ཤོད་ཀྱི་ཡོད། ལོ་ལྔ་བཅུ་ང་གྲངས་ཕྱིན་རྗེས་དེང་སྐབས་འཛམ་གླིང་འདིའི་ཐོག་ལ་བོད་ཀྱི་སངས་རྒྱས་པའི་ཆོས་དང་དེ་འབྲེལ་བོད་ཀྱི་རིག་གཞུང་བརྗོད་སྐབས་རྣམ་དཔྱོད་དང་དོ་སྣང་ཡོད་མཁན་ཚོས་མངོན་པར་བསྟོད་ཡུལ་ཞིག་དང་མང་དག་ཅིག་གིས་དེ་ནས་སོ་སོ་རང་ཉིད་ལ་ཕན་ཐོགས་ཡོད་པའི་བསླབ་ཆ་ལེན་རྒྱུ་དང་མདོར་ན། ཚན་རིག་པའི་ནང་ནས་ནམ་རྒྱུན་ཆོས་ཁས་ལེན་གྱི་མེད། ཚན་རིག་པའི་ནང་ནས་མང་པོ་ཞིག་གིས་སངས་རྒྱས་པའི་ཆོས་ཀྱི་ནང་ནས་སེམས་ལ་སྦྱོང་བརྡར་སྤྲོད་རྒྱུའི་རིགས་དེར་དམིགས་བསལ་གྱིས་དོ་སྣང་བྱས་པ་ཙམ་མ་ཟད། སོ་སོའི་འབྲེལ་ཡོད་ནང་དེ་ཁྱབ་སྤེལ་བཏང་སྟེ་འགྲོ་གི་འདུག འཛམ་གླིང་འདིའི་སྒང་ལ་བོད་སྤྱིའི་གནས་སྟངས་ཀྱང་ཧ་གོ་མཁན་མང་པོ་བྱུང་ཡོད།

གཙོ་ཆེ་གཞིས་ལུས་རྒྱ་ཆེའི་མི་མང་གི་ལྷག་བསམ་དང་སྙིང་སྟོབས་ཞུམ་མེད་ཐོག་གནས་པ་དེའི་ཐོག་ནས་བྱུང་བ་རེད། དེར་བརྟེན་ལོ་ལྔ་བཅུ་ང་གྲངས་དེ་ང་ཚོ་ལུང་པ་བྲལ་ནས་བཙན་བྱོལ་བ་བྱས་ཏེ་བསྡད་པ་རེད། ཐོག་མར་བོད་པ་ཚོ་མི་ས་མ་རི་འབྱོར་སྐབས་ངོ་ཤེས་པ་ས་དང་གནམ་མ་གཏོགས་མེད། དེ་དུས་འབྱུང་འགྱུར་ལོ་ལྔ་བཅུར་དེ་འདྲ་ཡོང་གི་རེད་བསམ་པ་ཞིག་ཕལ་ཆེར་མེད། ཕྱོགས་གཅིག་ནས་ལོ་གསུམ་ནང་བོད་ལ་ལོག་ཐུབ་མི་ཡོང་ངམ་བསམ་པ་དེ་འདྲ་བྱུང་ཡོད། གང་ལྟར་ལོ་ཡུན་དེ་དག་འགོར་གྱི་རེད་བསམ་པ་ཞིག་དང་། ལོ་ཡུན་དེ་དག་རིང་ང་ཚོ་གང་ཅིའི་ཐོག་ནས་མི་གྲལ་ལ་ཚུད་ཀྱི་རེད་བསམ་པ་ཞིག་སྐབས་དེ་དུས་ཕལ་ཆེར་མེད། ངོས་རང་ཐོག་མར་ཌལ་ཧོར་དུ་ཡོང་སྐབས་གདན་ས་གསུམ་གྱི་དགེ་འདུན་པ་གང་ཙམ་ཡོད། དེ་ཆ་སློབ་གྲྭ་ཚུགས་ནས་ལོ་ལྔ་བཅུ་ཕྱིན་ཡོད། སློབ་གྲྭ་འདིའི་སློབ་སྤྱི་དང་པོ་ཀུན་བདེ་གླིང་ངག་དབང་རྒྱལ་མཚན་རེད། ཁྱེད་རང་ཚོ་སློབ་གྲྭ་འདིར་ཐོག་མར་བཞུགས་ཏེ་རིམ་བཞིན་སློབ་གྲྭ་ཐོན་རྗེས་བོད་གཞུང་དགའ་ལྡན་ཕོ་བྲང་གི་སྒྲིག་འཛུགས་ནང་ལས་ཀ་བྱེད་མཁན་མང་དག་ཅིག་བྱུང་ཡོད། ད་ལྟ་བདེ་སྲུང་བཀའ་བློན་ལ་ཆ་བཞག་ན་བཀའ་བློན་ཡིན་མུས་རེད། དེ་མིན་སྒྲིག་འཛུགས་དང་སྒེར་པ་སོ་སོའི་ལས་རིགས་འདྲ་མིན་ནང་ལས་ཀ་བྱས་ཏེ་མི་ཚེ་བསྐྱལ་གྱི་ཡོད། འོན་ཀྱང་བོད་མི་རིགས་ཀྱི་ལ་རྒྱ་ཞེན་ཁོག་ནམ་ཡང་ཉམས་པ་མེད་པར་གནས་ཏེ་བསྡད་ཡོད། ས་ཆ་གང་དུ་བསྡད་ཡོད་ཀྱང་བོད་མིའི་ཚབ་བྱས་ཏེ་སྡོད་ཀྱི་ཡོད། དེ་ལྟ་བུ་སོ་སོའི་ལ་རྒྱ་ཞེན་ཁོག་དང་གཞུང་བཟང་པོ་ཞིག་ཡོད་སྟབས། ལོ་ལྔ་བཅུ་འཁོར་བའི་དུས་དྲན་ལ་ཁྱེད་རང་ཚོས་ཆེད་མངགས་ཡོང་བ་རེད།

གང་ལྟར་སློབ་གྲྭ་འདི་ནས་ཐོན་པའི་མི་མང་པོ་ཞིག་སྤྱི་སྒེར་ཚང་མའི་ནང་ཕན་ཐོགས་དང་སོ་སོ་རང་འགོ་ཐོན་པ་ཞིག་བྱུང་ཡོད། ང་ཚོ་ཕྱི་ལོ་ ༡༩༥༩ ཟླ་ ༤ པའི་ནང་མ་སུ་རིར་འབྱོར་སོང། ལོ་གཅིག་ནང་ཚུན་ལ་སློབ་གྲྭ་དང་པོ་མ་སུ་རིར་བཙུགས་པ་རེད། དེ་དུས་ཁྱིམ་ཚང་དང་བུ་ཕྲུག་མེད་སྟབས་ཕྲུ་གུ་ཆུང་ཆུང་དེ་འདྲ་མེད་ཀྱང་ལོ་ན་གཞོན་པའི་ཕྲུ་གུ་ལྔ་བཅུ་བྱས་ནས་སློབ་གྲྭ་ཐོག་མར་བཙུགས་པ་རེད། གང་ལྟར་དེའི་ཚེ་དེའི་དུས་དགེ་འདུན་སྡེ་ལྷ་ས་ནས་བྲོས་ཡོང་མཁན་ནང་ལ་མཁན་ལས་ཟུར་མཁས་པའི་དབང་པོ་མང་དག་ཅིག་ཡོད་ལ་སློབ་གཉེར་རྒྱག་མཁན་མང་དག་ཅིག་ཀྱང་སླེབས་ཡོད། དེ་དུས་རྒྱ་གར་གཞུང་ལ་དགེ་འདུན་པ་ ༡༥༠༠ དེ་དག་སློབ་སྦྱོང་བྱེད་མཁན་ཆགས་ཡོད་སྟབས། རྒྱ་གར་གཞུང་ནས་ད

མིགས་བསལ་གནང་དགོས་ཀྱི་འདུག་ཅེས་པ་ལྟར་སྦག་ས་གནང་བ་རེད་མ་གཏོགས། ང་ཚོས་སློབ་གྲྭ་འཛུགས་རྒྱུ་གལ་ཆེ་ཤོས་བརྩིས་པའི་ཐོག་ཤེས་རིག་ལས་ཁུངས་ནས་འགན་འཁྱེར་ཏེ་ཤུགས་ཡོད་ཚད་སློབ་གྲྭ་ཁག་ཏུ་བརྒྱབ་པ་རེད། དེ་ལྟར་རྒྱག་དགོས་དོན་ཡང་ང་ཚོའི་གནས་ཚུལ་ཐབས་སྐྱོ་པོ་དེ་ལྟར་ཆགས་རྒྱུ་དེ་དེང་དུས་ཀྱི་ཤེས་ཡོན་ཐོག་ནས་རྗེས་ལུས་ཐེབས་པ་ཉམས་མྱོང་གསལ་པོ་བྱུང་ཡོད་སྟབས། དེང་དུས་ཀྱི་ཤེས་ཡོན་སློབ་སྦྱོང་འཛུགས་རྒྱུ་དེ་ཧ་ཅང་གལ་ཆེན་པོ་མཐོང་ནས་སློབ་གྲྭ་འཛུགས་རྒྱུ་གཙོ་འདོན་བྱས་པ་རེད།

དེ་ནས་གཞིས་ཆགས་ཁག་བཙུགས་ཟིན་རྗེས་དེའི་ནང་མ་སྐུལ་དང་བླང་ཐོག་ལྷ་ཁང་དང་དགོན་པ་ཆུང་ཆུང་དེ་འདྲ་རྒྱག་མཁན་བྱུང་ཡོད། དེ་རྗེས་རིམ་བཞིན་བཤད་གྲྭ་ཆེ་ཁག་དེ་དག་གཞིས་ཆགས་ཁག་ནང་ཚུགས་པ་རེད། འདས་པའི་བཙན་བྱོལ་གྱི་མི་ཚེ་འདིའི་རིང་ལ་གྲུབ་འབྲས་ཆེ་ཤོས་དེང་དུས་ཀྱི་ཤེས་ཡོན་ཐོག་ལ་མི་དམན་པ་ཞིག་ཐོབ་ཡོད། ད་དུང་ཡིན་རུང་ཡར་རྒྱས་གཏོང་དགོས་རྒྱུ་དང་ཚད་ལོང་བ་ཞིག་བཟོ་དགོས་རྒྱུའི་ལས་ཀ་བྱེད་དགོས་པ་དེ་འདྲ་ལྷག་ཡོད། ཤེས་རིག་ལས་ཁུངས་རེད། དེ་དང་འབྲེལ་ཡོད་ཚོས་འབད་བརྩོན་བྱས་དང་བྱེད་བཞིན་པ་རེད། བར་སྐབས་ནས་ང་ཚོའི་སློབ་གྲྭ་ཁག་དེ་དག་ཤེས་རིག་ལས་ཁུངས་ནས་ལྟ་རྟོག་བྱ་རྒྱུའི་ལས་གཞི་ཞིག་གི་སྟེང་ལ་འགྲོ་བཞིན་ཡོད། རིམ་བཞིན་དུས་ད་ལྟ་བར་དུ་ང་ཚོར་ཉམས་མྱོང་བྱུང་ཡོད་པ་དེ་དག་གཞི་ལ་བཞག་ནས་མུ་མཐུད་ཡར་རྒྱས་གཏོང་དགོས་པ་ག་རེ་ཡོད་མེད་དང་གསར་གཏོད་བྱེད་དགོས་པ་ག་རེ་ཡོད་མེད་ཐོག་བསམ་བློ་བཏང་སྟེ་ཡར་རྒྱས་གཏོང་དགོས་རྒྱུ་ཧ་ཅང་གལ་ཆེན་པོ་རེད།

འཛམ་གླིང་ཕྱི་ལ་ཨ་རི་དང་ཡུ་རོབ་ཉི་ཧོང་སོགས་ལུང་པ་གཙོ་ཆེ་བ་དེ་དག་ང་ཚོ་ངོ་ཤེས་ཆགས་ཡོད། དེའི་ནང་གི་ཤེས་ཡོན་མཁས་པ་དང་སྤྱི་ཚོགས་ལ་ཞབས་འདེགས་སྒྲུབ་མཁན་ཚན་རིག་པ་མཁས་ཅན་མང་པོ་ཞིག་གིས་དེ་རིང་ཁ་སང་གི་དེང་དུས་ཀྱི་ཤེས་ཡོན་ནང་ཡ་རབས་སྤྱོད་བཟང་གི་སློབ་ཚན་གྱི་འདང་གི་མེད་པ་དང་། མདོར་ན་སེམས་ཀྱི་ཞི་བདེ་སྒྲུབ་རྒྱུ་སེམས་ཡར་རྒྱས་གཏོང་རྒྱུ་སོགས་ཀྱི་སྐོར་སློབ་ཚན་གྱི་འདང་གི་མེད་པ་ཞིག་རེད། དེར་བརྟེན་བསམ་བློའི་ཡ་རབས་སྤྱོད་བཟང་གི་སློབ་ཚན་སྤྲོད་རྒྱུ་འདང་གི་མེད་པ་རེད། སྤྱིར་བཏང་དེར་ཁག་མི་འདུག ནུབ་ཕྱོགས་ཆོས་ལུགས་ནང་དཀོན་མཆོག་ལ་དད་པ་བྱ་རྒྱུ་དང་དེ་འབྲེལ་བྱམས་པ་དང་བརྩེ་བ་བཟོད་པ་ཆོག་ཤེས་ཚུལ་ཁྲིམས་ཀྱི་ཉམས་ལེན་དེ་དག་ནང་པའི་གཞུང་ནས་གསུངས་པ་དང་ཕལ་ཆེར་གཅིག་པ་བརྗོད་ཆོག་གི་རེད། སེམས་ཀྱི་རྣམ་གཞག་སྐོར་ལ་སྤྱིར་རྒྱ་གར་གྱི་ཆོས་དང་དེའི་ནང་ནས་ནང་ཆོས་དེའི་ནང་བོད་ལ་ཡོད་པའི་ནང་ཆོས་དེར་ནང་སེམས་ཀྱི་འགྲོ་སྟངས་དེ་དག་ཧ་ཅང་ཞིབ་ཚགས་ཡོད། དེང་སྐབས་ཨ་རིའི་གཙུག་ལག་སློབ་གཉེར་ཁང་དང་དེ་མིན་གྱི་དགེ་རྒན་གྱི་སློབ་སྦྱོང་སྤྲད་ནས་དེ་ཚོའི་ནང་སེམས་ཀྱི་ཞི་བདེ་སྐྲུན་ཐབས་དང་ཞི་བདེའི་དཀྲུག་མཁན་དེ་སེལ་ཐབས་བྱ་རྒྱུ་སོགས་ལ་གཙོ་བོ་ཚན་རིག་པ་དང་། ཡང་སྒོས་སེམས་དང་ཀླད་པའི་

ཚན་རིག་པ་དེ་དག་གིས་ནང་པའི་གཞུང་ནས་སེམས་ཀྱི་འགྲོ་སྟངས་སྐོར་གསུངས་ཡོད་པ་དེ་ནས་ཚུར་བསླབ་ཆ་བླངས་ཏེ་བརྟག་དཔྱད་བྱེད་ཀྱི་འདུག ཕལ་ཆེར་ཨ་རིའི་ནང་ཕོན་ཆེན་པོ་ཡོད་པ་ལྟ་བུ་འདུག ཕྱི་ཕྱོགས་ནས་འདི་ལྟ་བུ་ཞིག་དོ་སྣང་བྱེད་ཀྱི་ཡོད། དེར་བརྟེན་ང་ཚོ་བོད་པའི་ཤེས་ཡོན་སྡེ་ཚན་ནང་ལ་སྐད་ཡིག་གཞན་དག་ནས་བསྒྱུར་དགོས་མེད། ལེགས་སྦྱར་སྐད་ཡིག་ནས་བསྒྱུར་དགོས་པ་དེ་དག་ང་ཚོས་ལོ་བརྒྱ་ཕྲག་སྔོན་ནས་ཆ་ཚང་བསྒྱུར་ཟིན་པ་ཙམ་མ་ཟད། དེ་ནས་བསྒྱུར་བའི་གཞུང་དེ་དག་གི་ཐོག་ནས་ལོ་བརྒྱ་རིང་སློབ་སྦྱོང་སྤྲོད་རྒྱུ་དང་ཉམས་ལེན་བྱ་རྒྱུ་སོགས་བྱས་ཏེ་མི་དང་མ་སོང་ན་དུལ་པོ་ཞིག་ཆགས་ཡོད།

དེང་སྐབས་འཛམ་གླིང་འདིའི་སྟེང་ནང་ཆོས་དང་སེམས་ཀྱི་སྐོར་འགྲེལ་བཤད་རྒྱག་རྒྱུའི་བོད་ཡིག་ལས་ལྷག་པ་ཞིག་མེད་པ་ཧ་ཅང་གསལ་པོ་རེད་འདུག དེ་ངོས་རང་བོད་པ་ཞིག་ཡིན་པའི་ངོས་ནས་འབོར་ཤོར་བཤད་ནས་བརྗོད་པ་མིན། ལོ་སུམ་ཅུ་སོ་གྲངས་རིང་ལ་ཉམས་མྱོང་བསགས་ནས་དངོས་སུ་མྱོང་ཚོར་བྱུང་བའི་ཐོག་ནས་ངོས་ཀྱིས་ཤོད་བཞིན་ཡོད།དེར་བརྟེན་མི་གཞན་གྱིས་དབྱིན་ཡིག་སོགས་ནང་བསྒྱུར་རྒྱུའི་དཀའ་ངལ་མང་དག་ཅིག་བརྒྱབ་ཀྱི་ཡོད། ང་ཚོ་ད་ལྟར་དཀའ་ངལ་རྒྱག་དགོས་ཀྱི་མེད། འགོ་སྟོད་སློབ་གྲྭའི་ནང་ཆོས་དགེ་བྱས་ནས་སྐབས་རེ་ཡག་པོ་བྱུང་ཡོད་ཀྱང་སྐབས་རེ་འཐུས་ཤོར་ཕྱིན་པ་ལྟ་བུ་འདུག གང་ལྟར་ཆོས་བསླབ་བརྗོད་སྐབས་འདོན་པ་འདོན་རྒྱུ་དང་ཁ་ཐུག་འདོན་པའི་ཚིག་འགྲེལ་ཕྲན་བུ་རྒྱག་གི་ཡོད་ན་མ་གཏོགས་གཞུང་སྤྱིའི་འགྲོ་སྟངས་གཞི་ལམ་འབྲས་གསུམ་གྱི་རྣམ་གཞག་འགྲོ་སྟངས་ངོ་སྤྲོད་ཞེ་དྲག་ཡོང་གི་ཨེ་ཡོད་བསམ་གྱི་འདུག ཆོས་བསླབ་བརྗོད་སྐབས་ཟུར་དུ་མ་གཏོགས་རྩ་བའི་ཤེས་ཡོ

ན་སྡེ་ཚན་ཞིག་ཡིན་པའི་ངོས་འཛིན་གསལ་པོ་མི་ཐུབ་པ་ལྟ་བུའི་ཐོག་འཐུས་ཤོར་འགྲོ་གི་མེད་དམ་སྙམ་གྱི་འདུག ནམ་རྒྱུན་ངོས་རང་ཕར་ཚུར་འགྲོ་སྐབས་ཁྱེད་རང་ཚོས་ཆོས་འབྲེལ་བྱ་རྒྱུ་ག་སྒྲིག་བྱེད་ཀྱི་ཡོད་པ་རེད་ལ་ཆོས་འབྲེལ་བྱ་རྒྱུ་ངོས་ཀྱི་ལས་འགན་རེད། ངོས་ཀྱི་ཤེས་པ་དེ་རེད་མ་གཏོགས་གཞན་གང་ཡང་ཤེས་ཀྱི་མེད། ཅེས་བཀའ་སློབ་སྩལ་ཏེ་ནང་ཆོས་ངོ་

སྤྲོད་སྤྱི་བཤད་དང་དེ་ནས་དངུལ་ཆུ་རྒྱལ་སྲས་ཐོགས་མེད་བཟང་པོས་མཛད་པའི་ལག་ལེན་སོ་བདུན་པའི་བཀའ་ཆོས་དབུ་འཛུགས་ཀྱིས་མཇུག་སྒྲིལ་རྗེས་སེམས་སྐྱེད་དང་ཚེ་དབང་སྩལ་ཡོད།

ཐེངས་འདིའི་མཛད་སྒོར་སློབ་ཟུར་བ་ཨ་རི་དང་ཁེ་ན་ཌ། དབྱིན་ཡུལ། སུད་སི། ཨོ་སི་ཊོ་ལི་ཡ། ཨི་ཊ་ལི། ཨ་སི་ལན་ཌི། ཕ་རན་སི། སྦེལ་ཇམ། ཐེ་ཝན། སེ་པན་བཅས་ནས་སློབ་ཟུར་བ་ ༥༧༧ བརྒལ་བ་དང་དེ་བཞིན་རྒྱ་གར་དང་བལ་ཡུལ་ནང་ནས་ཆེད་བཅར་ཞུས་འདུག་པ་མ་ཟད། ཁྱོན་བསྡོམས་དད་ལྡན་ཆོས་ཞུ་བ་ཆིག་སྟོང་བརྒལ་བ་ཆེད་བཅར་ཞུས་འདུག་པ་བཅས། །