༢༠༡༣ ཟླ་ ༡ ཚེས་ ༢༥ རེས་གཟའ་པ་སངས།
༄༅། །ཡུ་རོབ་གྲོས་ཚོགས་ཀྱི་མང་གཙོ་དང་འགྲོ་བ་མིའི་ཐོབ་ཐང་ཚོགས་པའི་ཚོགས་གཞོན་མཆོག་གིས་ཡུ་རོབ་མཐུན་ཚོགས་ཀྱི་རྒྱ་ནག་གཞུང་ཚབ་པ་ཝུའུ་ཧཱ་ལུང་གིས་བོད་ནང་ཕྱི་རྒྱལ་གྱི་མི་སྣ་འགྲོ་འོང་བྱེད་པར་དགའ་བསུ་ཡོད་སྐོར་བརྗོད་པ་དེ་དངོས་ཡོད་གནས་སྟངས་མིན་སྐོར་བརྗོད་པ་དང་འབྲེལ་རྒྱ་ནག་གཞུང་ནས་བོད་མིས་རང་ལུས་མེར་སྲེག་བཏང་དང་གཏོང་མུས་ཡིན་པའི་དོན་རྐྱེན་ངོས་ལེན་བྱེད་ཀྱི་མེད་པའི་བསྐྱོན་བརྗོད་ཤུགས་ཆེ་གནང་འདུག
དེ་ཡང་གསར་འགྱུར་བརྒྱུད་ལམ་ཁག་ནང་གནས་ཚུལ་ཐོན་གསལ་ལྟར་ན། ཡུ་རོག་མཐུན་ཚོགས་ཀྱི་རྒྱ་ནག་གཞུང་ཚབ་པས་རྒྱ་ནག་གཞུང་ཕྱོགས་ནས་བོད་མིའི་རང་ལུས་མེར་སྲེག་གནད་དོན་ལ་སེམས་འཚབ་བྱེད་བཞིན་ཡོད་སྐོར་བརྗོད་པ་དང་། རང་ལུས་མེར་གཏོང་མཁན་གྱི་ནང་མིར་སེམས་ཁུར་ཆེན་པོ་བྱེད་ཀྱི་ཡོད། འོན་ཀྱང་གནད་དོན་དེ་དག་ཐོན་མ་ཐག་བཙན་བྱོལ་དུ་གནས་པའི་མི་སྣས་རྒྱ་ནག་གཞུང་ལ་སྐྱོན་འཛུགས་བྱས་པ་མ་ཟད། རྒྱལ་སྤྱིའི་གཞུང་ཚབ་ཁག་ལ་གནད་དོན་དེའི་བར་དུམ་བྱེད་དགོས་པའི་རེ་འདུན་བཏོན་པ་ལྟར། ཡུ་རོབ་མཐུན་ཚོགས་ཀྱི་ཚོགས་མི་ཁག་གཅིག་ནས་རྒྱ་ནག་གཞུང་ལ་བསྐྱོན་འཛུགས་བྱེད་བཞིན་ཡོད། བོད་ནང་ཆོས་དད་སོགས་ཀྱི་རང་དབང་ཡོད།
དེ་བཞིན་བོད་ནང་བསྐྱོད་འདོད་ཡོད་མཁན་ཕྱི་རྒྱལ་བ་ཚོར་རྒྱ་ནག་གཞུང་ནས་བཀག་འགོག་བྱ་རྒྱུ་ལྡོག་སྟེ་དགའ་བསུ་ཡོད་སྐོར་སོགས་ཀྱི་འཁྱོག་བཏམ་བརྗོད་པར་བརྟེན། ཡུ་རོབ་གྲོས་ཚོགས་ཀྱི་མང་གཙོ་དང་འགྲོ་བ་མིའི་ཐོབ་ཐང་ཚོགས་པའི་ཚོགས་གཞོན་མཆོག་གིས་ཡུ་རོབ་མཐུན་ཚོགས་ཀྱི་རྒྱ་ནག་གཞུང་ཚབ་པས་བརྗོད་པ་རྣམས་དངོས་ཡོད་ཀྱི་གནས་སྟངས་དང་མཐུན་གྱི་མེད་པའི་སྐྱོན་བརྗོད་གནང་བ་དང་འབྲེལ་ད་བར་བོད་ནང་གི་བོད་མི་ ༩༩ ནས་རང་ལུས་མེར་སྲེག་བཏང་བའི་གནད་དོན་དེའི་ཐོག་ནས་རྒྱ་ནག་གཞུང་གིས་བོད་ནང་དྲག་རྩུབ་ཀྱི་སྲིད་བྱུས་ལག་བསྟར་བྱས་དང་བྱེད་མུས་ཡིན་པ་ཧ་ཅང་གསལ་པོ་རེད། དེ་བཞིན་ཡུ་རོབ་གྲོས་ཚོགས་ཀྱི་བོད་དོན་མཉམ་འབྲེལ་ལས་ཁུངས་སུ་རྒྱ་གཞུང་ནས་བོད་མིའི་ཆོས་དང་རིག་གཞུང་རྩ་གཏོར་གཏོང་བཞིན་པའི་ཁུངས་བཙན་དཔང་རྟགས་ལག་སོན་འབྱུང་བཞིན་ཡོད་སྐོར་གསུངས་འདུག་པ་མ་ཟད། རྒྱ་ནག་གཞུང་ནས་འཛིན་བཟུང་བཙོན་འཇུག་བྱས་པའི་བོད་མི་ཆབ་སྲིད་བཙོན་པ་རྣམས་དམར་གསོད་བཏང་སྟེ་ཁོང་རྣམ་པའི་གཟུགས་པོའི་ཆ་ཤས་རྣམས་གཤག་བཅོས་ཆེད་བེད་སྤྱོད་བྱེད་ཀྱི་ཡོད་པ་ཡང་ར་འཕྲོད་བྱུང་ཡོད།
རྒྱ་ནག་གཞུང་ཚབ་པས་བཤད་པའི་བོད་ནང་ཕྱི་རྒྱལ་གྱི་མི་སྣ་འགྲོ་རྒྱུར་རྒྱ་ནག་གཞུང་ནས་དམ་བསྒྲགས་གང་ཡང་མེད་ཅེས་པའི་བདེན་དཔང་མེད་པའི་ཚིག་དེ་ངེས་པར་དུ་ཕྱིར་བསྡུ་བྱེད་པའི་ཐོག་ཡུ་རོབ་གྲོས་ཚོགས་ཀྱི་འཐུས་མིས་གོ་སྒྲིག་གནང་བའི་རང་དབང་ལྡན་པའི་རྟོག་ཞིབ་ཚོགས་ཆུང་ཞིག་འཕྲལ་མར་བོད་ནང་འགྲོ་བསྐྱོད་བྱེད་འཇུག་དགོས། དེ་བཞིན་ཡུ་རོབ་མཐུན་ཚོགས་ངོས་ནས་བོད་དོན་ཐོག་དམིགས་བསལ་སྐུ་ཚབ་ཅིག་བསྐོ་གཞག་གནང་དགོས་སྐོར་གྱི་དགོས་འདུན་ཡང་བཏོན་འདུག་པ་བཅས། །
