༢༠༡༢ ཟླ་ ༡༠ ཚེས་ ༩ རེས་གཟའ་མིག་དམར།
༄༅། །ཕྱི་ལོ་ ༢༠༡༢ ཟླ་ ༡༠ ཚེས་ ༥ ཉིན་ལ་དྭགས་ལྕོག་ལམ་སར་རྟེན་གཞི་བྱས་པའི་བོད་ཁྱིམ་སློབ་ཕྲུག་རྣམས་ལ་བོད་ཀྱི་སྲིད་བྱུས་ཉམས་ཞིབ་ཁང་གིས་འགན་འཛིན་ཐུབ་བསྟན་བསམ་འཕེལ་ལགས་དང་། འགན་འཛིན་གཞོན་པ་བློ་བཟང་ལགས་གཉིས་ཀྱིས་བོད་མིའི་སྒྲིག་འཛུགས་ཀྱིས་རྒྱ་མི་རིགས་དང་འབྲེལ་བ་གང་ཐུབ་ཡར་རྒྱས་གཏོང་རྒྱུའི་འབད་བརྩོན་བྱས་དང་བྱེད་མུས་ཡིན་པ་མ་ཟད།རང་ཕྱོགས་ནས་མཐུན་རྐྱེན་དེ་ཙམ་མེད་ཀྱང་རྒྱ་རིགས་མི་འབོར་འཐེར་འབུམ་ ༡་༣ ཡོད་པ་ནི་ཧ་ཅང་གྲངས་འབོར་ཆེ་བར་བརྟེན། དེང་སྐབས་རྒྱ་མི་རིགས་ཀྱིས་བོད་དོན་ཐོག་དོ་སྣང་ཇེ་ཆེར་འགྲོ་བཞིན་པའི་རྣམ་འགྱུར་ལ་གཞིགས་ཚེ་བཟང་ཕྱོགས་ཀྱི་རྣམ་པ་གསལ་པོ་ཡོད་སྐོར་ངོ་སྤྲོད་གནང། ཕྱོགས་མཚུངས་རྒྱ་མི་རིགས་མང་པོ་ཞིག་གིས་གལ་ཏེ་རྒྱ་ནག་ནང་གསར་འགྱུར་རང་དབང་ཡོད་ཚེ་བོད་མི་ཚོའི་དངོས་ཡོད་གནས་ཚུལ་རྟོགས་རྒྱུར་ཧ་ཅང་ཕན་ཐོགས་ཡོང་རྒྱུ་ཡིན་པ་ཡིད་ཆེས་ཡོད་སྐོར་བརྗོད་བཞིན་ཡོད་པ་སོགས་གསུངས། ཕྱོགས་མཚུངས་འགན་འཛིན་གཞོན་པ་མཆོག་གིས་དེང་སྐབས་བོད་རྒྱའི་གནས་སྟངས་ཇི་འདྲ་ཞིག་ཏུ་འགྱུར་ཡོད་སྐོར་གསུང་བཤད་གནང་བ་དང་སྦྲགས། འབྱུང་འགྱུར་རྒྱ་ནག་འགོ་ཁྲིད་གསར་པ་འཕོ་འགྱུར་གྱི་གནས་ཚུལ་དེས་རྒྱ་ནག་དང་བོད་ཀྱི་གནས་སྟངས་སོགས་ལ་ཤུགས་རྐྱེན་ཇི་འདྲ་འགྲོ་རྒྱུ་ཡིན་སྐོར་སོགས་ཀྱི་གསུང་བཤད་གྲུབ་བསྟུན། སློབ་མ་ཁག་གཅིག་གི་དྲི་བར་ལན་འདེབས་གནང་ཡོད། སྤྱིར་ཐེངས་འདིའི་བོད་དོན་ངོ་སྤྲོད་ཀྱི་སུང་བཤད་གོ་སྒྲིག་གནང་མཁན་ལྕོག་ལམ་སའི་སློབ་གྲྭའི་སློབ་སྤྱི་ཆོས་རྒྱལ་བཀྲིས་ལགས་ཡིན་འདུག་པ་བཅས།།