༢༠༡༠ ཟླ་ ༡༢ ཚེས་ ༢༡ རེས་གཟའ་མིག་དམར།
དབུ་འབྱེད་གནང་བའི་དཔེ་དེབ་ཀྱི་མདུན་ཤོག
༄༅། །འདི་གར་ཨ་རིའི་བོད་གཞུང་སྐུ་ཚབ་དོན་ཁང་ནས་བཏང་གནས་ནང་འཁོད་དོན། ཨི་ཊ་ལིར་ཡོད་པའི་འཛམ་གླིང་གཡོ་འགུལ་བཟོ་སྐྲུན་ཚོགས་པས་གདན་ཞུའི་རེ་སྐུལ་གནང་དོན་ལྟར་བྱང་ཨ་རིའི་སྐུ་ཚབ་དོན་གཅོད་བློ་བཟང་སྙན་གྲགས་ལགས་ཀྱིས་་ཚོགས་པ་དེས་པར་སྐྲུན་འགྲེམས་སྤེལ་གནང་བའི་བོད་ཡིག་གི་དཔེ་དེབ་གསར་པ་ཞིག་ཕྱི་ཟླ་ ༡༢ ཚེས་ ༡༠ ཉིན་དབུ་འབྱེད་གནང་ཡོད་པ་རེད། དཔེ་དེབ་དེའི་མིང་ཆ་ཚང་ལ། ༼འདི་ཀ་སྡེར་ཞིག་མ་རེད། འདི་ནི་ཁྱེད་ཀྱི་མེས་པོའི་ཤུལ་བཞག་རིག་གནས། ཁྱེད་ཀྱི་སྐད་ཡིག ཁྱེད་ཀྱི་རིག་གཞུང་།༽ ཞེས་ཟེར་ཞིང་། ཉེ་ཆར་ཕྱི་ཟླ་ ༡༠ པའི་ནང་ཨི་ཊ་ལིར་པར་སྐྲུན་གནང་ཞིང་།
རྫ་བཟོའི་སྒྱུ་རྩལ་བ་ཉེར་བདུན།
དེའི་དམིགས་ཡུལ་གཙོ་བོ་བི་རི་མོའི་སྒྱུ་རྩལ་གྱི་ཐབས་ལམ་སྤྱད་དེ་མི་རིགས་འདྲ་མིན་གྱི་སྐད་ཡིག་དང་། རིག་གཞུང་། མངོན་མེད་ཀྱི་རིག་གནས་མི་ཉམས་རྒྱུན་འཛིན་ཡོང་བའི་ཆེད་དུ་པར་སྐྲུན་གནང་བ་ཞིག་ཡིན་འདུག
དཔེ་དེབ་པར་སྐྲུན་གནང་མཁན་འབྲེལ་ཡོད་མི་སྣ་གཙོ་བོར་གྱུར་བའི་མི་གྲངས་ ༦༠ ཙམ་དབུ་འབྱེད་མཛད་སྒོར་ཕེབས་ཡོད་པདང་། སྐུ་ཚབ་དོན་གཅོད་བློ་བཟང་སྙན་གྲགས་ལགས་ཀྱིས་དེ་འབྲེལ་གྱི་གསུང་བཤད་མདོར་བསྡུས་ཤིག་གནང་དོན། འཛམ་གླིང་གཡོ་འགུལ་བཟོ་སྐྲུན་ཚོགས་པས་ཐུགས་འགན་ཆེ་བཞེས་ཀྱིས་དཔེ་དེབ་འདི་འདྲ་ཞིག་རི་མོའི་སྒྱུ་རྩལ་གྱི་ལམ་ནས་པར་སྐྲུན་འགྲེམས་སྤེལ་གནང་བ་དེ་ནི་སྤྱི་ཚོགས་ཡོངས་ལ་ཕན་ཐོགས་ཡོད་པ་ཞིག་ཡིན་པས་ཐུགས་རྗེ་ཆེ་ཞུ་རྒྱུ་ཡིན་ཞེས་གསུང་པ་དང་འབྲེལ། ཉེ་བའི་དུས་ཡུན་ནང་བོད་ཀྱི་ས་ཁུལ་མང་པོར་བོད་རིགས་དགེ་སློབ་སྟོང་ཕྲག་མང་པོས་རང་སྐད་སྲུང་སྐྱོབ་སླད་ཞི་འཇམ་ཁྲིམས་མཐུན་གྱི་སྒོ་ནས་མངོན་འདོད་རེ་སྐུལ་གནང་བཞིན་པའི་དུས་སྐབས་འདིར་༼འདི་ཀ་སྡེར་ཞིག་མ་རེད། འདི་ནི་ཁྱེད་ཀྱི་མེས་པོའི་ཤུལ་བཞག་རིག་གནས། ཁྱེད་ཀྱི་སྐད་ཡིག ཁྱེད་ཀྱི་རིག་གཞུང་།༽ཞེས་པའི་དཔེ་དེབ་དཔར་སྐྲུན་འགྲེམས་སྤེལ་གནང་བ་ནི་དེ་བས་ཆེས་དོན་སྙིང་ལྡན་པའི་བྱ་བ་ཞིག་ཡིན་པར་བརྟེན་བསྔགས་བརྗོད་གནང་ཡོད། དཔེ་དེབ་འདི་བོད་ཡིག་ཏུ་བསྒྱུར་མཁན་ནི་ཨོཀ་སིཔོརཌ་གཙུག་ལག་སློབ་གྲྭ་ཆེན་མོའི་ (Oxford University) སྒང་ཀ་ཚེ་རིང་དོན་གྲུབ་ལགས་ཡིན་པ་དང་། དེབ་འདིར་ཁྱོན་ཤོག་གྲངས་ ༩༧ ཡོད་ཅིང་། དེ་ནི་རྫ་བཟོའི་སྒྱུ་སྩལ་བ་ཉི་ཤུ་རྩ་བདུན་གྱི་རིག་རྩལ་ལས་གྲུབ་པ་ཞིག་ཡིན་པ་རེད།
