༢༠༡༠ ཟླ་ ༡༡ ཚེས་ ༢༣ རེས་གཟའ་མིག་དམར།
༄༅། །འདི་གར་བོད་གཞུང་འཕྲོད་བསྟེན་ལས་ཁུངས་ནས་བཏང་གནས་ནང་འཁོད་དོན། བོད་གཞུང་འཕྲོད་བསྟེན་ལས་ཁུངས་ནས་འདི་ཟླའི་ཚེས་ ༡༩ དང་ ༢༠ ཉིན་གཉིས་རིང་བཀའ་བློན་དཔལ་འབྱོར་ཚེ་རིང་མཆོག་དབུ་བཞུགས་ཐོག་བོད་རིགས་སློབ་གྲྭའི་ནང་མྱོས་རྫས་ངན་གོམས་སྔོན་འགོག་ཆེད་སློབ་གྲྭ་ཁག ༡༦ གི་སློབ་སྤྱི་དང་། རེག་ཊར། དགེ་ཆེ། སློབ་ཕྲུག་གི་འཐུས་མི་གཅིག་བཅས་ཚང་འཛོམས་ཀྱིས་ཟབ་སྦྱོང་དང་ཚོགས་འདུ་ཞིག་ལྡི་ལི་ཏཱ་ར་མགྲོན་ཁང་དུ་ཚོགས་ཡོད།
དེ་ཡང་ཉིན་དང་པོར་བོད་ལུགས་གསོ་རིག་དང་ཕྱི་ལུགས་སེམས་ཁམས་རིག་པ་གཉིས་ཟུང་འབྲེལ་ཐོག སྨན་རྩིས་ཁང་གི་སྨན་རམས་པ་པདྨ་རྡོ་རྗེ་ལགས་དང་རྒྱ་གར་ཁྱད་ལས་པ་གྲངས་བཞི་བཅས་གདན་ཞུས་ཀྱིས་མྱོས་རྫས་ངན་གོམས་ངོ་སྤྲོད་དང་། ལྷག་པར་དུ་སློབ་གྲྭའི་ནང་དགེ་ལས་རྣམ་པས་མྱོས་རྫས་སྐོར་གོ་རྟོགས་སྤེལ་ཕྱོགས། ཕྲུ་གུ་གང་ཞིག་ངན་གོམས་འགྲོ་ཉེན་ཡོད་པར་སློབ་གསོ་རྒྱག་ཕྱོགས་བཅས་ཟབ་འཁྲིད་གནང་། ཉིན་གཉིས་པར་དེ་སྔ་ཕྱི་ལོ་ ༢༠༠༦ ལོར་ཚོགས་འདུ་ཚོགས་པའི་གྲོས་ཆོད་ལ་བསྐྱར་ཞིབ་དང་། སློབ་གྲྭ་སོ་སོའི་ལས་བསྡོམས་སྙིང་བསྡུས་སྒྲོགས་སྦྱང་ཟིན་མཚམས་འདས་པའི་ཉམས་མྱོང་ལ་གཞིགས་ཏེ་མ་འོངས་པར་འཕྲོད་བསྟེན་ལས་ཁུངས་དང་སློབ་གྲྭ ཀུན་ཕན་ཚོགས་པ་བཅས་ཕྱོགས་ཡོངས་ནས་དངོས་སུ་ལག་བསྟར་ཐུབ་པ་རྣམས་སྤྱི་མོས་གྲོས་ཆོད་ཀྱི་ལམ་ནས་གཏན་འབེབས་གནང་ཡོད། བཀའ་བློན་མཆོག་གིས་ད་རེས་དམིགས་བསལ་དུས་ཚོད་ཟུར་དུ་བཏོན་ཏེ་ལྡི་ལི་ས་གནས་འགོ་འཛིན་ལས་ཁུངས་དང་འཕྲོད་བསྟེན་སྨན་ཁང་གཉིས་ལ་གཟིགས་བསྐོར་གནང་སྟེ་ས་གནས་འགོ་འཛིན་དང། བརྒྱ་དཔོན་ལྷན་དུ་མི་མང་གི་འཕྲོད་བསྟེན་སྐོར་ལ་གསུང་བཤད་དང་བཀའ་བསྡུར་གནང་ཡོད་པ་བཅས།།
