༢༠༡༠ ཟླ་ ༡༡ ཚེས་ ༡༢ རེས་གཟའ་སྤེན་པ།
༄༅། །འདི་གར་བོད་གཞུང་ཐེ་ཝན་སྐུ་ཚབ་དོན་ཁང་ནས་བཏང་གནས་ནང་འཁོད་དོན། ཕྱི་ལོ་ ༢༠༡༠ ཟླ་ ༡༡ ཚེས་ ༡༡ ནས་ཉིན་གྲངས་གཉིས་རིང་ཐེ་ཝན་དུ་རྒྱ་ནག་མང་གཙོ་ཅན་དུ་འགྱུར་བའི་ཕུགས་རེ་དང་འཚོལ་ཞིབ་ཀྱི་རྒྱལ་སྤྱིའི་བགྲོ་གླེང་ཚོགས་འདུ་ཞིག་ཕྱི་རྒྱལ་ཡུལ་གྲུ་ཁག་ནང་ཡོད་པའི་རྒྱ་ནག་མང་གཙོ་དོན་གཉེར་ཚོགས་པ་ཁག་གསུམ་མཉམ་རུབ་ཐོག་ནས་གོ་སྒྲིག་གནང་ཞིང་། ཚོགས་བཅར་བའི་ཁོངས་སུ་ཨ་རི་དང་། ཨོ་སི་ཊོ་ལི་ཡ། ཧོང་ཀོང་། ཐེ་ཝན་སོགས་ནང་གནས་པའི་མང་གཙོ་དོན་གཉེར་བ་དང་། མཁས་དབང་སོགས་མི་གྲངས་བརྒྱ་སྐོར་ཙམ་ལྷན་འཛོམས་གནང་ཡོད་པ་དེའི་ཐོག་བོད་གཞུང་ཐེ་ཝན་སྐུ་ཚབ་དོན་ཁང་གི་དོན་གཅོད་གདན་ཞུ་གནང་དོན་བཞིན་དོན་གཅོད་དང་དྲུང་ཆེ་གཉིས་མཉམ་ཞུགས་གནང་ཡོད། ཉིན་དང་པོའི་དབུ་འབྱེད་མཛད་སྒོའི་ཐོག་སྐུ་མགྲོན་གཙོ་བོ་ཐེ་ཝན་སྲིད་འཛིན་ཕོ་བྲང་གི་དྲུང་ཆེ་ཟུར་པ་དང་། བོད་གཞུང་སྐུ་ཚབ་དོན་གཅོད། ཀོང་ཧོང་གི་གྲོས་ཚོགས་འཐུས་མི་སྐུ་ཞབས་ལེང་གོ་ཞུང་སོགས་ནས་འཚམས་འདྲིའི་གསུང་བཤད་གནང་ཞིང་། ཨོ་སི་ཊོ་ལི་ཡའི་གྲོས་ཚོགས་འཐུས་མི་སྐུ་ཞབས་ Bob Brown ལགས་ཀྱི་བརྙན་འཕྲིན་གསུང་བཤད་སོགས་བསྟན་ཡོད། སྐུ་ཚབ་དོན་གཅོད་ཟླ་བ་ཚེ་རིང་ལགས་ཀྱིས་ཐོག་མར་བོད་གཞུང་བཀའ་བློན་ཁྲི་པམཆོག་གིས་ཚོགས་ཆེན་ལ་གནང་བའི་འཚམས་འདྲིའི་གསུང་བཤད་སྒྲོགས་སྦྱང་གནང། དེ་རྗེས་ཁོང་གིས་བོད་མིའི་མངོན་འདོད་དང་། ཉེ་ཆར་སྐུ་ཞབས་ལིའུ་ཞའོ་པོ་ལ་ནོ་བེལ་ཞི་བདེའི་གཟེངས་རྟགས་ཐོབ་པ་དེ་རྒྱ་ནག་མང་གཙོ་དོན་གཉེར་ཅན་ཚང་མའི་ངོ་བོ་མཚོན་པས་ཕན་ཚུན་འཆམ་མཐུན་དགོས་རྒྱུ་གལ་ཆེ་ཡིན་སྐོར་དང་། ཐེ་ཝན་ནང་གསར་དུ་འཛུགས་འཆར་ཡོད་པའི་བོད་རྒྱ་མཛའ་འབྲེལ་མཐུན་ཚོགས་སོགས་ཀྱི་སྐོར་ངོ་སྤྲོད་གནང་། ཉིན་གཉིས་པའི་རྒྱལ་སྤྱིའི་སྤྱི་ཚོགས་ཀྱིས་རྒྱ་ནག་གི་ཆབ་སྲིད་འཕོ་འགྱུར་གྱི་ནུས་པ་ཞེས་པའི་བརྗོད་གཞིའི་ཐོག་བོད་གཞུང་ཐེ་ཝན་སྐུ་ཚབ་དོན་གཅོད་ནས་དབུ་མའི་ལམ་གྱི་སྲིད་བྱུས་དང་། རྒྱལ་སྤྱིའི་ཐོག་དབུ་མའི་ལམ་ལ་རྒྱབ་སྐྱོར་ཐོབ་པའི་བརྒྱུད་རིམ་སོགས་ངོ་སྤྲོད་གསུང་བཤད་གནང་བ་བརྒྱུད་ཚོགས་བཅར་བ་ཡོངས་ནས་བཙན་བྱོལ་བོད་གཞུང་གི་སྲིད་བྱུས་སྔར་ལྷག་གསལ་རྟོགས་བྱུང་ཡོད་པ་བཅས། །