༄༅། ལྡི་ལི་སྐུ་ཚབ་དོན་གཅོད་བརྒྱུད་བཏང་འབྱོར་བའི་གནས་ཚུལ་ལྟར་ན། ཕྱི་ལོ་ ༢༠༡༠ ཟླ་ ༡༠ ཚེས་ ༣ ཉིན་ཁེ་ཎ་ཌའི་རྩེད་རིགས་བློན་ཆེན་སྐུ་ཞབས་གྷེ་རི་ལུན་མཆོག་དང་། ལྡི་ལིར་བཅར་བཞུགས་ཁེ་ཌྷ་ཌའི་གཞུང་ཚབ་ཆེན་མོ་སྐུ་ཞབས་སི་ཏྲེ་སྦེ་ཀི་མཆོག ཁེ་ཎ་ཌའི་གྲོས་ཚོགས་གོང་མའི་འཐུས་མི་ཝིམ་ཀོ་ཆི་ཧར་སོགས་ཁེ་ཌྷ་ཌའི་གཞུང་གི་གནད་ཡོད་དཔོན་རིགས་ ༡༥ ཙམ་རྒྱལ་སྤྱིའི་བྱམས་བརྩེ་བདེ་རྩར་གཟིགས་སྐོར་དུ་ཕེབས་ཤིང་། དུས་ཡུན་ཆུ་ཚོད་གཉིས་ལྷག་ལྷོད་བཞུགས་ཐོག་སློབ་ཕྲུག་ཚོས་བོད་ཀྱི་གཞས་སྣ་འཁྲབ་སྟན་ཞུས་པ་དང་། བོད་ཀྱི་རྩ་དོན་འབྲེལ་བའི་གལ་ཆེའི་གནད་དོན་ཁག་གཅིག་གི་ཐོག་གླེང་མོལ་དང་འབོད་སྐུལ་ཞུ་རྒྱུའི་གོ་སྐབས་བྱུང་ཡོད། གཟིགས་སྐོར་ཕེབས་དོན་ནི། ཁེ་ཎ་ཌའི་གཞུང་ཚབ་ཀྱིས་རྒྱལ་སྤྱིའི་བྱམས་བརྩེ་བདེ་རྩར་དེ་སྔོན་མཁོ་ཆས་ཁག་གཅིག་རོགས་རམ་གནང་མྱོང་ཡོད་པ་དང་། དེ་དག་བརྒྱུད་རིམ་ནང་ཚོགས་པས་ཕྲུ་གུ་ཚོར་སོ་སོའི་ཁྱིམ་ཚང་ངོ་མའི་བྱམས་སྐྱོང་དང་། རོགས་རམ་ཞུ་ཕྱོགས་སོགས་དགོས་ངེས་ཕན་ངེས་ཅན་དུ་མྱོང་ཚོར་ཟབ་མོ་བྱུང་བར་བརྟེན། དེ་རིང་ཆེད་མངགས་གཟིགས་སྐོར་དུ་ཕེབས་པ་ཞིག་ཆགས་ཡོད། གོང་ཚེས་ཉིན་ཁོང་རྣམས་ཚོགས་པར་ཕེབས་འབྱོར་སྐབས། བདེ་རྩའི་ངེས་སྟོན་པ་འབྲས་སྤུངས་བློ་གསལ་གླིང་གྲགས་པ་རིན་པོ་ཆེ་སྐུ་ཕྲེང་བརྒྱད་པ་བསྟན་འཛིན་ཆོས་ཀྱི་རྒྱལ་མཚན་མཆོག་གི་དབུས་དགེ་སློབ་རྣམས་ཀྱིས་བོད་ལུགས་ཕེབས་བསུ་གཟབ་རྒྱས་ཞུས། གྲགས་པ་རིན་པོ་ཆེ་མཆོག་གིས་ཁོང་རྣམས་ལ་ཚོགས་པའི་ལས་དོན་ངོ་སྤྲོད་དང་། བོད་རྒྱའི་དཀའ་རྙོག་སེལ་ཆེད་༸གོང་ས་༸སྐྱབས་མགོན་ཆེན་པོ་མཆོག་གིས་འབད་བརྩོན་མཛད་བཞིན་པའི་བོད་རྒྱ་ཞི་མོལ་ལ་རྒྱབ་སྐྱོར་ཡོང་བ་དང་། དེ་སྔོན་བཙན་བྱོལ་བོད་མི་རྣམས་དཀའ་ཚེགས་ཆེ་བའི་སྐབས་སུ་ཁེ་ཎ་ཌའི་གཞུང་ནས་བོད་མི་ཁག་གཅིག་ལ་སྐྱབས་བཅོལ་དུ་བཞེས་གནང་བ་མ་ཟད། དེ་རྗེས་གསར་དུ་བོད་ནང་དཀའ་ངལ་འཕྲད་རིགས་བོད་མི་སྐྱབས་བཅོལ་དུ་འབྱོར་བ་རྣམས་ལ་རོགས་རམ་དང་གནང་བཞིན་པ་སོགས་ལ་ཐུགས་རྗེ་ཞུས་གནང་བར། ཁོང་རྣམས་པས་ཐུགས་སྣང་ཆེན་པོ་གནང་ཡོད། ལྡི་ལི་རྒྱལ་སྤྱིའི་བྱམས་བརྩེ་བདེ་རྩ་ནི། ༸གོང་ས་མཆོག་གི་བཀའ་སློབ་ལམ་སྟོན་འོག་ཕྱི་ལོ་ ༡༩༩༧ ལོར་གསར་འཛུགས་དང་རྒྱ་གར་གཞུང་ལ་ཁྲིམས་མཐུན་དེབ་སྐྱེལ་ཞུས་ཐོག་ཚོགས་པ་གསར་འཛུགས་སྐབས་ཀྱི་མ་རྩ་ནི་༸གོང་ས་མཆོག་གིས་གསོལ་རས་སྩལ་བའི་ཧིན་སྒོར་འབུམ་གཅིག་དང་། རིན་པོ་ཆེར་ཕ་ཡུལ་དགོན་པ་ནས་སྐུ་སྐལ་འབྱོར་བའི་དངུལ་གང་ཡོད་པ་རྣམས་ཆགས་ཡོད་ཅིང་། ཛ་དྲག་གི་ལས་དོན་དང་པོ་ནི་སྐབས་དེར་མན་ཇུ་ཌི་ལར་ཉལ་ཐ་འཐེན་ཞིང་མི་ཚེ་འཕྲོ་བརླག་འགྲོ་བཞིན་པའི་བོད་ཕྲུག ༡༥ ཙམ་ཡོད་པ་རྣམས་ལ་ཌེ་ཊོག་སན་ཊར་སྨན་ཁང་དུ་ཟླ་བ་ ༦ རིང་སྨན་བཅོས་ཀྱི་དྲག་སྐྱེད་བྱུང་མཚམས་སོ་སོའི་ནང་མིར་རྩིས་སྤྲོད་དང་སྨན་ཁང་དེ་བརྒྱུད་འཛམ་གླིང་འཕྲོད་བསྟེན་ལས་ཁུངས་ནས་ཤེས་རྟོགས་བྱུང་རྗེས་གྲགས་པ་རིན་པོ་ཆེའི་དབུས་ལྷན་ཚོགས་དེའི་དབུ་འཛིན་ལས་རོགས་རྣམས་ཕོ་བྲང་དུ་མཇལ་བཅར་གྱི་སྐལ་བཟང་ཐོབ་པ་མ་ཟད། ཐུགས་སྣང་དགྱེས་ཚོར་ཆེན་པོ་གནང་ཞིང་འཕྲོད་བསྟེན་བཀའ་བློན་བསམ་མཁར་དབྱངས་སྐྱིད་ལ་འབྲེལ་བ་དགོས་སྐོར་བཀའ་ཕེབས་པ་ལྟར་སྐབས་དེར་རང་གཞུང་འཕྲོད་བསྟེན་ལྷན་ཚོགས་སྐྱོང་བཞིན་པར། ཁོང་རྣམས་གདན་ཞུས་ངོ་སྤྲོད་དང་བཀའ་ཁྲི་བསོད་ནམས་སྟོབས་རྒྱལ་མཆོག་གིས་ཁ་ཡོད་ལག་ཡོད་སྤྱི་ཚོགས་ཀྱི་བདེ་རྩར་སྨན་པའི་ཕྱག་ལས་འདི་ལྟར་གནང་བ་ནི་དངོས་གནས་རླབས་ཆེན་དང་མིག་དཔེ་འོས་པ་ཡིན་སྐོར་བསྔགས་བརྗོད་གནང་ཡོད། སྐབས་དེར་ལྷན་ཚོགས་ཀྱི་ངོས་ནས་བོད་མིའི་འཕྲོད་བསྟེན་ཆེད་རོགས་དངུལ་ཡང་ཐོབ་ཡོད། དེའི་ལས་དོན་རྣམས་རིན་པོ་ཆེས་འགན་ལེན་དགོས་ཞེས་གསུངས་པར། རིན་པོ་ཆེས་བོད་མིིའི་འཕྲོད་བསྟེན་དང་འབྲེལ་བའི་ལས་དོན་རྣམས་རང་གཞུང་འཕྲོད་བསྟེན་ལས་ཁུངས་ནས་གནང་ན་ལེགས་ཚུལ་ཞུས།བྱམས་བརྩེ་བདེ་རྩས་ད་བར་བཙན་བྱོལ་བོད་མིའི་གཞིས་སྐར་ཁག་དང་། ཧི་མ་ལ་ཡའི་རི་རྒྱུད་བཅས་ནས་དྭ་ཕྲུག་དང་ཕྱེད་དྭ་ཕྲུག དབང་པོ་སྐྱོན་ཅན་བཅས་ཁྱོན་བསྡོམས་གྲངས་ ༢༣ ཙམ་བདག་ཉར་གྱིས་སློབ་གྲྭ་ལེགས་ཤོས་སུ་གཏོང་བཞིན་པའི་ཐོག་སྔ་དགོང་དང་གུང་སེང་སྐབས་བོད་ཡིག་དང་། ནང་ཆོས་སོགས་རིག་གཞུང་ངོ་སྤྲོད་བྱེད་ཀྱི་ཡོད། དེ་མིན་ཉམས་ཐག་ཕྲུ་གུ་གྲངས་ ༣༠ ལ་སློན་ཡོན་དང་རྒས་འཁོགས་གྲངས་ ༡༥ ཙམ་ལ་འཚོ་བའི་རོགས་དངུལ་ཡང་འབུལ་བཞིན་ཡོད། སྤྱིར་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་རྗེ་དང་། རྒྱ་གར་གཞུང་གི་བཀའ་དྲིན། དེ་བཞིན་བཙན་བྱོལ་བོད་གཞུང་དང་བོད་ཁྱིམ་སློབ་གྲྭ་བཅས་ཀྱི་ཐུགས་རྗེ་བཀའ་དྲིན་ལ་བརྟེན་ཚང་མར་སྤྱི་མཚུངས་སློབ་སབྱོང་གི་གོ་སྐབས་བཟང་པོ་ཐོབ་དང་འཐོབ་མུས་ཡིན་འོན་ཀྱང་། སྐབས་རེར་ཟུར་དུ་ལུས་པ་དང་གོ་སྐབས་མ་ཐོབ་པའི་དཀའ་ངལ་ཅན་གྱི་རིགས་ཡོད་ཚེ་གཤམ་གསལ་ཁ་བྱང་ཐོག་འབྲེལ་བ་གནང་རོགས། བོད་ཁྱིམ་ནས་ཕྲུ་གུ་རྣམས་སློབ་གྲྭར་བསུ་སྐྱེལ་ཆེད་ཇིབ་འཁོར་ཊ་ཊ་ས་མོ་ཞིག་གནང་བ་དང་། དབྱར་ཁའི་གུང་སེང་སྐབས་ཕྲུ་གུ་རྣམས་ལ་སྡོད་གནས་སོགས་སློབ་སབྱོང་གི་མཐུན་འགྱུར་གནང་བར་དེ་རིང་གི་གོ་སྐབས་འདི་སྐུའི་གཅེན་མོ་ཨ་མ་རྗེ་བཙུན་པལྨ་ལགས་དང་། སྤྱི་ཁྱབ་དབུ་འཛིན་ཚེ་དབང་ཡེ་ཤེས་ལགས་སོགས་ལ་ཐུགས་རྗེ་ཆེ་ཞུ་རྒྱུ་དང་ཆབས་ཅིག ཚོགས་པ་འདིས་མ་འོངས་སྔར་ལྷག་སྤྱི་ཚོགས་ཞབས་ཞུ་བསྒྲུབ་རྒྱུའི་འདུན་པ་ཤུགས་དྲག་ཡོད་པས་ཚང་མས་དགོངས་འཆར་དང་མཉམ་རུབ་གནང་རོགས་ཞུ་རྒྱུ་ཡིན། ལྡི་ལིར་རྟེན་གཞི་བྱས་པའི་རྒྱལ་སྤྱིའི་བྱམས་བརྩེ་བདེ་རྩའི་ཡིག་ཚང་ནས།།