༢༠༡༠ ཟླ་ ༡༠ ཚེས་ ༣༠ རེས་གཟའ་སྤེན་པ།
༄༅། །འདི་གར་བོད་གཞུང་ཨ་རི་སྐུ་ཚབ་དོན་ཁང་ནས་བཏང་གནས་ནང་འཁོད་དོན། འདི་ལོའི་གསུམ་བཅུའི་དུས་དྲན་དང་སྟབས་བསྟུན་ནས་དོན་གཅོད་ཁང་གིས་གོ་སྒྲིག་འོག་བྱང་ཨ་རིའི་རྒྱ་རིགས་གསར་འགོད་པའི་འཚམས་འདྲི་ཚོགས་པ་ཞིག་བཞུགས་སྒར་རྡ་རམ་ས་ལར་བསྐྱོད་ཡོད། འཚམས་འདྲི་ཚོགས་པ་དེར་བརྙན་འཕྲིན་དང་། དྲྭ་རྒྱ། གསར་ཤོག དུས་དེབ་སོགས་གསར་འགྱུར་གྱི་ལས་ཀ་བྱེད་མཁན་མི་གྲངས་ ༡༧ ཡོད་པ་དང་། ཁོང་ཚོས་བཞུགས་སྒར་རྡ་རམ་ས་ལར་བཅར་ཏེ་གཙོ་བོ་༸གོང་ས་༸སྐྱབས་མགོན་ཆེན་པོ་མཆོག་མཇལ་བཅར་གྱིས་བོད་དོན་སྐོར་བཀའ་འདྲི་དགོངས་སྐོར་དང་། རྒྱལ་བ་ཀརྨ་པ་མཆོག་དང་བཀའ་བློན་ཁྲི་པ་མཆོག་ལ་བཅར་འདྲི། སྤྱི་འཐུས་ལྷན་ཚོགས་འཚོགས་སྐབས་གཟིགས་སྐོར། དེ་མིན་སློབ་གྲྭ་དང་། དཔེ་མཛོད། སྨན་རྩིས་ཁང་། སྣེ་ལེན་ཁང་།
ནོར་གླིང་སོགས་ལ་གཟིགས་སྐོར་གནང་སྟེ་ཁོང་རྣམས་རང་རང་གནས་ཡུལ་ས་གནས་སུ་ཕྱིར་ལོག་རྗེས་བཞུགས་སྒར་རྡ་རམ་ས་ལར་དུས་ཡུན་ཉིན་ལྔའི་འཚམས་འདྲི་གནང་རིང་སོ་སོའི་ཚོར་སྣང་ཇི་བྱུང་སྐོར་ལ་རྒྱ་ཡིག་གི་དཔེ་དེབ་ཤོག་གྲངས་ ༢༢༠ བྱས་པ་ཞིག་བྲིས་ཡོད་པ་དང་། དེབ་འདིའི་མིང་ལ་བཙན་བྱོལ་བོད་མིའི་སེམས་ནང་གི་སྐད་ཆ་ཉན་པ་ཞེས་བཏགས་ཡོད་ཅིང་། ཕྱི་ཟླ་ ༡༠ ཚེས་ ༢༣ ཉིན་༸གོང་ས་༸སྐྱབས་མགོན་ཆེན་པོ་མཆོག་གིས་ཁེ་ཎ་ཌའི་གྲོང་ཁྱེར་ཊོན་རོན་ཊོར་ལས་རིགས་འདྲ་མིན་ཁག་གི་རྒྱ་རིགས་གསུམ་བརྒྱ་ཙམ་ལ་མཇལ་ཁ་སྩོལ་སྐབས་དཔེ་དེབ་ཀྱི་པར་ཕུད་དེ་མགོན་པོ་གང་ཉིད་མཆོག་ལ་འབུལ་ལམ་ཞུས་ཡོད། དེ་བཞིན་འཚམས་འདྲི་ཚོགས་པ་དེས་བཞུགས་སྒར་རྡ་རམ་ས་ལ་ངོ་སྤྲོད་ཀྱི་བརྙན་པར་འོད་སྡེར་སྐར་མ་ ༢༠ བྱས་པ་ཞིག་བཟོས་ཡོད་པ་དེ་ཡང་གོང་ཚེས་ཉིན་༸གོང་ས་༸སྐྱབས་མགོན་ཆེན་པོ་མཆོག་མཇལ་འཕྲད་ཞུ་སྐབས་འབུལ་ལམ་ཞུས་ཡོད། རྡ་རམ་ས་ལ་ངོ་སྤྲོད་ཀྱི་བརྙན་པར་འོད་སྡེར་དེ་རྒྱ་སྐད་དང་དབྱིན་སྐད་ཤན་སྦྱར་ཐོག་བཟོས་ཡོད་སྟབས། རྡ་སར་འགྲོ་མ་མྱོང་མཁན་རྒྱ་རིགས་ཤིག་ཡིན་ནའང་། འོད་སྡེར་དེ་བལྟས་ཚེ། ས་གནས་དེའི་གནས་སྟངས་རོབ་ཙམ་ཤེས་རྟོགས་ཐུབ་ཀྱི་ཡོད་པ་ནི་འོད་སྡེར་དེའི་ཁྱད་ཚོས་གཙོ་བོ་ཡིན་པ་རེད། འདི་ལོ་ཕྱི་ཟླ་ ༥ པར་༸གོང་ས་༸སྐྱབས་མགོན་ཆེན་པོ་མཆོག་གིས་ཨ་རིའི་གྲོང་ཁྱེར་ནིའུ་ཡོཀ་ནང་རྒྱ་རིགས་སློབ་ཕྲུག་དང་། བོད་རིགས་སློབ་ཕྲུག་བརྒྱ་དང་ལྔ་བཅུ་ལྷག་ཙམ་ལ་བཀའ་སློབ་སྩལ་ཏེ་དྲི་བ་དྲིས་ལན་མཛད་ཡོད་ཅིང་། སྐབས་དེར་རྒྱ་ནག་སྐམ་ས་ཆེན་པོ་ནས་མཁས་དབང་ཁག་གཅིག་ཆེད་དུ་གདན་ཞུ་བྱས་ཡོད་པ་ལྟར་ཚོགས་འདུར་མཉམ་ཞུགས་གནང་ཡོད། བོད་རྒྱའི་སློབ་ཕྲུག་ཁག་གཅིག་ནས་གོ་སྒྲིག་གནང་བའི་ཚོགས་འདུ་དེའི་བརྙན་འཕྲིན་འོད་སྡེར་ཡང་ཉེ་ཆར་གསར་བཟོ་ཚར་ནས་རྒྱ་རིགས་རྣམས་ལ་བོད་གཞུང་ཨ་རི་སྐུ་ཚབ་དོན་གཅོད་ཁང་ནས་འགྲེམས་སྤེལ་གནང་ཡོད་པ་རེད། ༸གོང་ས་༸སྐྱབས་མགོན་ཆེན་པོ་མཆོག་གིས་བོད་རྒྱའི་སློབ་ཕྲུག་རྣམས་ལ་དབྱིན་སྐད་ཐོག་བཀའ་སློབ་སྩལ་བ་དང་། དེ་བཞིན་བོད་རྒྱའི་གཞོན་སྐྱེས་དབར་གྱི་བགྲོ་གླེང་ཚོགས་འདུ་ཞེས་པའི་འོད་སྡེར་དེའི་ནང་དབྱིན་སྐད་ཀྱི་འོག་ཏུ་རྒྱ་ཡིག་གི་འགྲེལ་བརྗོད་ཡོད་པར་བརྟེན་བོད་རྒྱ་སུས་བལྟས་ཀྱང་འགྲིག་གི་ཡོད། དེར་དུས་ཡུན་ཁྱོན་བསྡོམས་ཆུ་ཚོད་གཅིག་ལྷག་ཙམ་ཡོད་པ་བཅས།།
