༢༠༡༠ ཟླ་ ༡༠ ཚེས་ ༨ རེས་གཟའ་པ་སངས།
༄༅། །འདི་གར་ཆོས་རིག་ལས་ཁུངས་ནས་བཏང་གནས་ནང་འཁོད་དོན། ཕྱི་ལོ་ ༢༠༡༠ ཟླ་ ༡༠ ཚེས་ ༢ ཉིན་བཞུགས་སྒར་རྡ་ས་གནས་ཆུང་རྡོ་རྗེ་སྒྲ་དབྱངས་གླིང་དུ་གཞུང་ཆེན་ཁག་ལ་སློབ་གཉེར་དབུ་བཙུགས་ཏེ་བགྲང་བྱ་ཉེར་ལྔ་ཧྲིལ་པོ་འཁོར་བའི་དུས་དྲན་སྲུང་བརྩི་དང་སྟབས་བསྟུན། བསླབ་པ་མཐར་སོན་པའི་དགེ་འདུན་རྣམས་ལ་རབ་འབྱམས་པའི་ཕྱག་འཁྱེར་གནང་རྒྱུའི་མཛད་སྒོ་སྔ་དྲོའི་ཆུ་ཚོད་ ༡༠ ཐོག་འདུ་ཁང་ཆེན་མོའི་ནང་ལྷན་འཛོམས་ཀྱིས་བཞུགས་གྲལ་དུ་འཁོད་མཚམས། སྐུ་མགྲོན་གཙོ་བོ་དཔལ་ལྡན་ཆོས་རིག་བཀའ་བློན་ཚེ་རིང་ཕུན་ཚོགས་མཆོག་དང་རྣམ་གྲྭ་མཁན་ཟུར་རྒན་ཐུབ་བསྟན་ཟླ་བ་སོགས་སྐུ་མགྲོན་རྣམས་ཕེབས་རྗེས། དབུ་མཛད་ནས་ཞལ་འདོན་དབུ་བསྐུལ་དང་གསོལ་ཇ་བཞེས་འབྲས་ཕུལ། དེ་རྗེས་སློབ་དཔོན་ཟུར་པ་དགེ་བཤེས་རྡོ་རྗེ་ལགས་ཀྱིས་མཛད་སྒོའི་ངོ་སྤྲོད་དང་ལོ་འཁོར་ལས་བསྡོམས་སྒྲོགས་སྦྱང་གནང། དེ་བཞིན་ཤེས་ཡོན་ལྷན་ཚོགས་ཀྱི་ཚོགས་མི་དགེ་བཤེས་བསྟན་འཛིན་དགའ་འཕེལ་ལགས་ཀྱིས་ཕར་ཕྱིན་དང་དབུ་མ་རབ་འབྱམས་པའི་སློབ་ཐོན་པ་ཁག་གི་ལོ་རེའི་སྦྱང་འབྲས་བརྒྱ་ཆའི་ཨང་ཐོབ། སྔ་ལོའི་སློབ་གཉེར་བ་རྣམས་ཀྱི་སྦྱང་འབྲས་བཅས་སྒྲོགས་སྦྱངབྱས་རྗེས་སྐུ་མགྲོན་གཙོ་བོ་དཔལ་ལྡན་ཆོས་རིག་བཀའ་བློན་མཆོག་དང་། རྣམ་གྲྭ་མཁན་ཟུར་བཅས་ནས་སློབ་ཐོན་པ་རྣམས་ལ་བྱ་དགའ་དང་ཕྱག་འཁྱེར་ཨང་རིམ་བཞིན་གནང་ཡོད། དེ་ནས་ཆོས་རིག་བཀའ་བློན་མཆོག་གིས་ནང་ཆོས་གལ་ཆེན་པོ་ཡིན་པ་དང། ད་ལྟའི་ཆར་དགོན་ཁག་ནང་ཆ་རྐྱེན་གང་ལེགས་ཡོད་པ། གོ་སྐབས་བཟང་པོ་འདི་ཆུད་ཟོས་སུ་མ་སོང་བར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་དགོངས་བཞིན་དེང་རབ་ཀྱི་ནང་པ་ཚད་ལྡན་བྱ་གལ་སོགས་དང་། མཁན་ཟུར་རྒན་ཐུབ་བསྟན་ཟླ་བ་མཆོག་ནས་ཀྱང་འདུལ་བ་བཞིན་ཀུན་སྤྱོད་གོང་འཕེལ་དགོས་སྐོར་སོགས་གསུང་བཤད་གནང་། གནས་ཆུང་སྐུ་རྟེན་མཆོག་ནས་ལམ་སྟོན་གསུང་བཤད་དང་འབྲེལ་ཐུགས་རྗེ་ཆེ་ཞུས་གནང་རྗེས་སྐུ་མགྲོན་རྣམས་ལ་ལེགས་གསོལ་ཕུལ་བ་དང་དབུ་མཛད་ནས་བཀྲིས་ཚིག་བཅད་དབུ་བསྐུལ་དང་བཅས་མཛད་སྒོ་ལེགས་གྲུབ་བྱུང་ཡོད་པ་བཅས།།
