༢༠༡༠ ཟླ་ ༡༠ ཚེས་ ༨ རེས་གཟའ་པ་སངས།
༄༅། །འདི་གར་ཆོས་རིག་ལས་ཁུངས་ནས་བཏང་གནས་ནང་འཁོད་དོན། ཕྱི་ལོ་ ༢༠༡༠ ཟླ་ ༡༠ ཚེས་ ༡ ཉིན་སྔ་དྲོའི་ཆུ་ཚོད་ ༡༠ ཐོག་རྡ་ས་བོད་ཀྱི་དཔེ་མཛོད་ཁང་གི་ཚོགས་ཁང་དུ་སྐུ་མགྲོན་གཙོ་བོ་དཔལ་ལྡན་ཆོས་རིག་བཀའ་བློན་མཆོག་གིས་དབུས་དགེ་རྒན་རྣམ་པ་དང་དྲུང་ཆེ་སློབ་ཕྲུག་བཅས་བཞུགས་གྲལ་དུ་འཁོད་རྗེས། དབྱིན་བོད་གཉིས་ཀྱིས་ལོ་ཙྭ་བའི་ཟབ་སྦྱོང་ ༢༠༡༠ ཟླ་ ༧ ཚེས་ ༡ ནས་ ༩ ཚེས་ ༣༠ བར་ཟླ་བ་གསུམ་རིང་སྦྱོང་བརྡར་གནང་བའི་བྱུང་རིམ་ངོ་སྤྲོད་ལོ་ཙྭ་བ་མཆོག་བསྟན་འཛིན་སྨོན་ལམ་གྱིས་སྒྲོགས་སྦྱང་གནང་། དེ་རྗེས་རིམ་བཞིན་སྦྱོང་བརྡར་བའི་སྐུ་ཚབ་གཉིས་ནས་སོ་སོའི་མཐོང་ཚུལ་དང་རེ་སྐུལ་གསལ་བཤད་གྲུབ་རྗེས་ནང་ཆོས་དགེ་རྒན་དགེ་བཤེས་བློ་བཟང་བརྩོན་འགྲུས་ལགས་དང། དབྱིན་ཇི་དགེ་རྒན་Kerry Wrightལགས། ལོ་ཙྭ་བའི་དགེ་རྒན་བསྟན་འཛིན་ཚེ་དཔག བསོད་ནམས་ཚེ་རིང་། བོད་དགེ་སངས་རྒྱས་བསྟན་དར་བཅས་ཀྱིས་གསུང་བཤད་གནང་། དེ་རྗེས་སྐུ་མགྲོན་གཙོ་བོ་དཔལ་ལྡན་ཆོས་རིག་བཀའ་བློན་མཆོག་གིས་མིའི་རིན་ཐང་གོང་འཕེལ་བྱ་གལ་ཆེ་བ། དེའི་ཆེད་ཆོས་དང་ཆབ་སྲིད་གང་ལའང་ཚང་མས་དོ་སྣང་གནང་དགོས་པ། རྒྱལ་སྤྱིའི་ནང་ཡོད་གལ་ཆེའི་དོན་སྙིང་ལྡན་པའི་བརྗོད་བྱ་རྣམས་ལོ་ཙྭ་བ་རྣམས་ཀྱིས་བསྒྱུར་ནས་གོ་རྟོགས་སྤེལ་རྒྱུ་ཤིན་ཏུ་གལ་ཆེན་པོ་ཡིན་པ་སོགས་ཀྱི་གསུང་བཤད་གནང་རྗེས་དགེ་རྒན་རྣམས་ལ་བྱ་དགའ་དང་སྦྱོང་བརྡར་བ་རྣམས་ལ་ལག་འཁྱེར་གནང་ཡོད། དེ་ནས་དཔེ་མཛོད་དྲུང་ཆེས་ཐུགས་རྗེ་ཆེ་ཞུས་པ་དང་ཆབས་ཅིག་ཞལ་འདོན་གྲུབ་རྗེས་སྐུ་དཔར་ལྷན་བསྒྲོན་དང་བཅས་མཛད་སྒོ་གྲོལ་ཡོད་པ་བཅས།།།
