༢༠༡༠ ཟླ་ ༡༠ ཚེས་ ༡༡ རེས་གཟའ་ཟླ་བ།
༄༅། །ཕྱི་ལོ་ ༢༠༡༠ ཟླ་ ༡༠ ཚེས་ ༡༠ ཉིན་རྒྱ་གར་གྱི་གྲོང་ཁྱེར་པུ་ནེ་ནང་གི་མཛད་འཕྲིན་ཁག་གྲུབ་རྗེས་༸གོང་ས་༸སྐྱབས་མགོན་ཆེན་པོ་མཆོག་ཨ་རིར་ཆིབས་སྒྱུར་བསྐྱངས་ཏེ་ཁལ་ལི་ཕོ་ནི་ཡའི་ (California) མངའ་སྡེ་སན་ཇོ་སི་ (San Jose) གྲོང་ཁྱེར་དུ་མང་ཚོགས་ལ་བློ་སྦྱོང་ཚིགས་བརྒྱད་མ་དང་འོད་དཔག་མེད་ཀྱི་རྗེས་གནང་ཆོས་འབྲེལ་དང་། དེ་བཞིན་པཱ་ལོ་ཨལ་ཊོ་(Palo Alto) གྲོང་ཁྱེར་དུ་ཆིབས་སྒྱུར་བསྐྱང་སྟེ་ (Stanford University)སི་ཊེན་ཕོཌ་གཙུག་ལག་སློབ་གཉེར་ཁང་དུ་ནང་ཆོས་དང་ཚན་རིག་དབར་གྱི་འབྲེལ་བའི་སྐོར་གྱི་ལྷན་ཚོགས་ཀྱི་མཛད་སྒོའི་གཙོ་མགོན་དུ་ཆིབས་སྒྱུར་བསྐྱང་སྟེ་མང་ཚོགས་ལ་བཀའ་སློབ་སྩལ་གནང་མཛད་རྒྱུ་དང་། དེ་རྗེས་ཨེཊ་ལན་ཊར་ (Atlanta)  ཆིབས་སྒྱུར་བསྐྱང་སྟེ་ཨེ་མོ་རིའི་གཙུག་ལག་སློབ་གཉེར་ཁང་དུ་(Emory University) ཉིན་གྲངས་གསུམ་རིང་འཚོགས་རྒྱུའི་ཕྱི་ལོ་ ༢༠༡༠ རྒྱལ་སྤྱིའི་བོད་བརྒྱུད་ནང་བསྟན་ལྷན་ཚོགས་དབུ་འབྱེད་དང་བགྲོ་གླེང་ཞིག་ལ་དབུ་བཞུགས་མཛད་རྗེས་ཨོ་ཧ་ཡོ་མངའ་སྡེའི་གྲོང་ཁྱེར་སིན་སི་ན་ཊི་ (Cincinnati) ཁུལ་དུ་རང་དབང་གི་ཆེ་བསྟོད་གཟེངས་རྟགས་འབུལ་བཞེས་དང་། གཞན་ཡང་ཨོ་སི་ཕོཌ་ (Oxford) དང་མི་ཡ་མི་གཙུག་ལག་སློབ་གཉེར་ཁང་ (Miami University) གཉིས་ཀྱིས་གོ་སྒྲིག་འོག་མང་ཚོགས་ལ་དེང་གི་དུས་སྐབས་ལ་འཁྲི་པའི་ཀུན་སྤྱོད་སྐོར་བཀའ་སློབ་སྩལ་རྒྱུ་དང་། དེ་ནས་༸གོང་ས་མཆོག་ཁེ་ཎ་ཌའི་གྲོང་ཁྱེར་ཊོ་རན་ཊོར་ཆིབས་སྒྱུར་བསྐྱང་སྟེ་ཕྱི་ཟླ་ ༡༠ ཚེས་ ༢༢ ནས་ ༢༥ བར་ཊོ་རན་ཊོར་གཙུག་ལག་སློབ་གཉེར་ཁང་དུ་ནང་ཆོས་དང་ཚན་རིག་དབར་གྱི་འབྲེལ་བའི་སྐོར་ལྷན་ཚོགས་ཤིག་ལ་ལྷན་ཞུགས་དང་གངས་ལྗོངས་ཆོས་ལྡན་གླིང་ཞེས་པའི་རིག་གཞུང་བསྟི་གནས་ཁང་དབུ་འབྱེད་མཛད་རྒྱུ་མ་ཟད། བསྟི་གནས་ཁང་དེ་ནས་གོ་སྒྲིག་འོག་མང་ཚོགས་ལ་འཛམ་གླིང་ཞི་བདེའི་སྐོར་ལ་བཀའ་སློབ་དང་དེ་བཞིན་བློ་སྦྱོང་ཚིགས་བརྒྱད་མ་བཅས་ཀྱི་ཆོས་འབྲེལ་མཛད་རྒྱུ་ཡིན་འདུག་པ་བཅས།།