༢༠༡༠ ཟླ་ ༨ ཚེས་ ༥ རེས་གཟའ་ཕུར་བུ།
༄༅། འདི་གར་ཁུངས་ལྡན་གྱི་གནས་ཚུལ་འབྱོར་གསལ། བོད་ཀྱི་ས་ཁུལ་གང་སར་བོད་སྐྱོར་ལས་བྱེད་དང་འཛུགས་སྐྲུན་རྣམ་གྲངས་ཞེས་པའི་ལས་གཞི་མང་དག་ཅིག་སྤེལ་བཞིན་པར་བརྟེན། རྒྱ་རིགས་བོད་ནང་གནས་སྤོ་བྱེད་པའི་གྲངས་འབོར་ཉིན་རེ་ལས་ཉིན་རེ་མང་དུ་འགྲོ་བཞིན་ཡོད་པ་དང་། ལྷག་པར་ཕྱི་ལོ་ ༢༠༠༦ ལོར་མེ་འཁོར་ལྕགས་ལམ་ཤར་གཏོང་བྱས་རྗེས་བོད་ནང་ཡུལ་བསྐོར་སྤྲོ་འཆམ་པའི་མིང་ཐོག་ནས་རྒྱ་རིགས་ཁྱོན་ཆེ་ཡོང་སྟེ་བོད་ནང་གཏན་སྡོད་བྱས་ཏེ་ལས་རིགས་གཉེར་བཞིན་པ་དང་། དེ་བཞིན་ཕྱི་ལོ་ ༢༠༠༨ ལོར་བོད་ནང་ཞི་རྒོལ་ཆེན་མོ་བྱུང་རྗེས་གྲོང་ཁྱེར་ཁག་ནང་གཏན་སྡོད་བྱེད་བཞིན་པའི་བོད་མི་མང་པོ་ཞིག་ལ་གཏན་སྡོད་ཐེམ་ཐོ་མེད་པ་སོགས་ཀྱི་བསྙད་བཏགས་ཏེ་ཚོང་གཉེར་དང་ཞོར་ལས་གཉེར་མཁན་གྱི་ཕྱོགས་མཐའི་བོད་མི་མང་པོ་ཞིང་ཁུལ་དང་འབྲོག་ཁུལ་ས་གནས་སུ་ཕྱིར་སློག་བཏང་སྟེ་འཚོ་ཐབས་འཚོལ་རྒྱུར་མུ་མཐུད་དཀའ་ངལ་འཕྲད་བཞིན་ཡོད་ནའང་། རྒྱ་ནག་ནང་ཁུལ་ནས་ཡོང་བའི་རྒྱ་རིགས་མང་པོ་ཞིག་བོད་ནང་ཡོང་བཞིན་པ་མ་ཟད། ལྷག་པར་མེ་འཁོར་དུ་བསྡད་དེ་ཡོང་མཁན་ཧ་ཅང་མང་པོ་ཡོད་པས་ད་ཆ་བོད་ནང་ལས་ཀའི་གོ་སྐབས་མང་ཆེ་བ་རྒྱ་རིགས་ཚོས་བདག་བཟུང་བྱེད་བཞིན་ཡོད་པ་དང་། ལོ་ལྟར་རྒྱ་ནག་ནས་ཡོང་བའི་ཉེས་དོན་ཉེས་གསོག་གི་བྱ་ངན་སྤེལ་མཁན་ཡང་མང་དུ་འགྲོ་བཞིན་པ་དེས་བོད་ནང་ཆབ་སྲིད་ཐོག་དམ་བསྒྲགས་དང་སློབ་གསོའི་ལས་འགུལ་ཟེར་བ་སྤེལ་ཏེ་བོད་རིགས་སེར་སྐྱ་མང་ཚོགས་རྣམས་ལ་སུན་གཙེར་དང་དྲག་གནོན་བྱེད་བཞིན་ཡོད་ཀྱང་། རྒྱ་རིགས་བོད་ནང་ལག་འཁྱེར་གང་ཡང་མེད་པར་གཏན་སྡོད་བྱ་བཞིན་པ་དང་། ཉེས་དོན་ཉེས་གསོག་གི་ལས་འགུལ་སྤེལ་མཁན་གྱི་ཚོ་ཁག་མང་དུ་འགྲོ་བཞིན་པར་གདོང་ལེན་བྱ་རྒྱུར་འདང་ངེས་ཀྱི་གཅུན་འདོམས་བྱེད་ཀྱི་མེད་པར་བརྟེན་ས་གནས་བོད་མི་རྣམས་ལ་ལས་ཀའི་གོ་སྐབས་ཉུང་དུ་འགྲོ་བཞིན་ཡོད། རྒྱ་རིགས་ནང་ཉེས་དོན་གྱི་ལས་འགུལ་སྤེལ་ཤུགས་ཆེ་རུ་ཕྱིན་ནས་བོད་ནང་བདེ་འཇགས་མེད་པའི་གནས་སྟངས་ཇེ་ཆེར་འགྲོ་བཞིན་ཡོད་པའི་དཔེ་མཚོན་གཉིས་ཙམ་བཀོད་ན། དཔེ་མཚོན་དང་པོ། ཚ་བ་མཛོ་སྒང་རྫོང་དུ་ཕྱི་ལོ་ ༢༠༡༠ ཟླ་ ༦ པའི་ནང་ས་གནས་སུ་དངོས་སུ་བསྐྱོད་དེ་བསྡོམས་ཐོ་བཀོད་པར་གཞིགས་ན།༡༽ རྒྱ་རིགས་ནས་གཉེར་བའི་ཚོང་ཁང་ ༢༤༩ དང་། བོད་རིགས་ནས་གཉེར་བའི་ཚོང་ཁང་ ༥། ༢༽ རྒྱ་རིགས་ནས་གཉེར་བའི་ཟ་ཁང་ ༥༢ དང་། བོད་རིགས་ནས་གཉེར་བའི་ཟ་ཁང་ ༣༠། ༣༽ རྒྱ་རིགས་ནས་གཉེར་བའི་གཞང་ཁང་ ༥། ༤༽ རྒྱ་བོད་གཉིས་ཀས་གཉེར་བའི་སྦག་ཁང་ ༡༡ ཙམ། ༥༽ བོད་རིགས་ནས་གཉེར་བའི་ནང་མ་ཁང་ ༣ ཙམ་བཅས་ཡོད་པ་དང་། ལྷག་པར་གཞང་ཁང་གཉེར་བཞིན་པ་དེས་མི་རིགས་ཀྱི་ཡུལ་སྲོལ་དང་མ་མཐུན་པའི་གནད་དོན་མང་དུ་ཐོན་བཞིན་པའི་ཐོག་ནད་རིགས་འདྲ་མིན་ཁྱབ་ཉེན་ཆེ་བའི་དཀའ་ངལ་དང་། གཞོན་སྐྱེས་ཁོངས་ནས་བག་གཡེང་གི་འཚོ་བ་སྐྱེལ་མཁན་མང་དུ་འགྲོ་བཞིན་པ་དེས་མང་ཚོགས་ཁྲོད་ཁྱིམ་ཚང་ནང་འཚོ་བ་འཚོལ་རྒྱུར་དཀའ་ངལ་དང་། བཟའ་ཚང་འཆམ་མཐུན་མི་ཡོང་བ་སོགས་ཀྱི་དཀའ་ངལ་སྣ་ཚོགས་ཡོང་དང་ཡོང་མུས་ཡིན་པ་བཅས། རྒྱ་རིགས་ལས་མེད་ཁྱོན་ཆེ་བོད་ནང་ཡོང་བཞིན་པ་དེས་བོད་ཀྱི་སྤྱི་ཚོགས་བདེ་འཇགས་གཏོར་བཤིག་གཏོང་བཞིན་པའི་དཔེ་མཚོན་གཉིས་པ་ནི། སྔར་མང་ཚོགས་སྤྲོ་སྐྱིད་སོགས་ལ་བསྐྱོད་ཡུལ་་ལྷ་སའི་འཇག་མ་གླིང་ཁར། དེང་སྐབས་ཉི་འོད་གླིང་ཕྲན་སྤྲོ་སྐྱིད་ཁང་ཟེར་བས་གཙོས་མགྲོན་ཁང་དང་ཨར་ཁང་སོགས་འདྲ་མིན་གཉེར་བཞིན་ཡོད་པའི་ཐོག་སི་ཁྲོན་ཞིང་ཆེན་སོགས་ནས་ཡོང་བའི་རྒྱ་རིགས་ཚོང་གཉེར་བ་རྣམས་ནས་གཙོ་བོར་བདག་བཟུང་བྱ་བཞིན་པ་ནི་ ༢༠༡༠ ལོར་སླེབས་སྐབས་གླིང་ཁ་དེའི་ནང་མི་འབོར་གྱི་བརྒྱ་ཆ་ ༩༣ ཙམ་ཕྱོགས་མི་ཤ་སྟག་ཆགས་ཏེ་མི་གྲངས་ ༦༠ ལས་གྲུབ་པའི་ཆུ་ཚོད་ ༢༤ བསྐོར་གཡེང་བྱེད་མཁན་གྱི་དྭང་བླངས་བདེ་སྲུང་མི་སྣའང་འཛུགས་དགོས་བྱུུང་ཡོད། ཡང་སྙིང་གླིང་ཁ་དེའི་ནང་གང་ཞིག་བྱེད་ཀྱི་ཡོད་པ་དང་། གླིང་ཁ་དེར་དེ་འདྲའི་དམིགས་བསལ་ཡོད་པའི་རྒྱབ་ཕྱོགས་ཀྱི་གནད་དོན་ཐད་བསམ་གཞིགས་ཞིབ་ནན་བྱས་ཚེ་གཞི་ནས་དེ་ནི་གང་ཞིག་ཡིན་པ་གསལ་རྟོགས་ཐུབ་རྒྱུ་རེད། ཟླ་ ༧ ཚེས་ ༣༠ ཉིན་ལྷ་སའི་དགོང་དྲོའི་ཚགས་དཔར་ཐོག་ལྷ་སར་ཉེས་ཅན་ཚོ་ཁག་ཞིག་ལ་རྡུང་རྡེག་གཏོང་རྒྱུ་ལེགས་གྲུབ་བྱུང་བ་ཟེར་བ་འགོ་བརྗོད་དུ་འཁོད་པའི་གསར་འགྱུར་ཞིག་ཐོན་ཡོད་ཅིང་། ནང་དོན་གཙོ་བོར་ལྷ་སའི་ཉི་འོད་གླིང་ཕྲན་དང་། རྟ་རྒྱུག་ཐང་ཆེན་སོགས་སུ་མི་གྲངས་ ༢༨ ལས་གྲུབ་པའི་ཉེས་དོན་ཉེས་གསོག་པའི་ཚོ་ཁག་གཅིག་འཛིན་བཟུང་ཐུབ་སྟེ་རྡུང་རྡེག་བཏང་ཐུབ་པའི་སྐོར་འཁོད་ཡོད། གནད་དོན་དེ་དག་གཅིག་མཚུངས་ཤིག་ཕྱི་ལོ་ ༢༠༠༩ ཟླ་ ༡༢ ཚེས་ ༡༨ ཉིན་ལྷ་ས་གྲོང་ཁྱེར་འབྲིང་རིམ་མི་དམངས་ཁྲིམས་ཁང་གིས་ནག་ཚོགས་དང་འབྲེལ་བ་ཡོད་པའི་གྱོད་དོན་ཞིག་ཡོངས་བསྒྲགས་བྱས་ཡོད། གནས་ཚུལ་དེ་དག་ཐོག་ནས་རྒྱ་རིགས་ལས་མེད་ཁྱོན་ཆེ་བོད་ནང་ཡོང་སྟེ་ཉེས་དོན་ཉེས་གསོག་གི་གནས་ཚུལ་ལོ་རེ་བཞིན་ཐོན་ཤུགས་ཇེ་ཆེར་འགྲོ་བཞིན་ཡོད་པ་དེ་དག་ལ་རྒྱ་ནག་གཞུང་གིས་ཁྲིམས་ལུགས་ཐོག་ནས་སྟངས་འཛིན་མེད་པའི་རྣམ་པ་ཧ་ཅང་གསལ་པོ་ཡོད་སྟབས་བོད་ནང་སྤྱི་ཚོགས་བདེ་འཇགས་མི་ཡོང་བའི་འབྱུང་གཞི་གཙོ་བོར་གྱུར་ཡོད།།
