༢༠༡༠ ཟླ་ ༨ ཚེས་ ༤ རེས་གཟའ་ལྷག་པ།
༄༅། ཕྱི་ལོ་ ༢༠༡༠ ཟླ་ ༨ ཚེས་ ༣ ཉིན་རྡ་ས་སྟོད་པ་སྐྱིད་སྡུག་ཚོགས་ཁང་དུ་དབུ་མའི་ལམ་གྱི་མི་མང་ལས་འགུལ་ཁང་ཞེས་པའི་རྒྱུན་ལས་སྐབས་གཉིས་པའི་འགན་འཛིན་ལྷན་ཚོགས་དང་པོ་དབུ་འཛུགས་གནང་ཡོད།
དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༩ ཐོག་སྐུ་མགྲོན་གཙོ་བོ་བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་ དང་། སྤྱི་འཐུས་རྣམ་པ། ཚོགས་པ་དེའི་རྒྱུན་ལས་དང་རྒྱུན་ལས་ཟུར་པ་རྣམ་པ། ཚོགས་པ་ཁག་གི་སྐུ་ཚབ་རྣམ་པ། དེ་བཞིན་ས་གནས་ཁག་ ༡༨ གྱི་འབྲེལ་མཐུད་རྣམ་པ་བཅས་ཁྱོན་མི་གྲངས་ ༡༠༠ བརྒལ་བ་ལྷན་འཛོམས་ཀྱིས་ཐོག་མར་སྐུ་མགྲོན་གཙོ་བོ་བོད་མི་མང་སྤྱི་འཐུས་ཚོགས་ གཙོ་སྤེན་པ་ཚེ་རིང་མཆོག་གིས་སྣང་གསལ་ཞལ་འབྱེད་དང་། དེ་ནས་བོད་རྒྱལ་ཁབ་ཆེན་མོའི་རྒྱལ་གླུ་དང་རྒྱལ་བསྟན་ཆབ་སྲིད་ཆེད་ལུས་སྲོག་ ལོངས་སྤྱོད་བློས་གཏོང་གནང་མཁན་གྱི་རྒྱལ་གཅེས་དཔའ་བོ་དཔའ་མོ་རྣམས་ཀྱི་ཆེད་ བདེན་ཚིག་སྨོན་ལམ་དང་མྱ་ངན་གུས་འདུད་སྐར་མ་གཅིག་གནང་།
བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་ནས་གསུང་བཤད་གནང་བཞིན་པ།
དེ་རྗེས་དབུས་འབྲེལ་མཐུད་པ་སྨན་པ་མཁྱེན་རབ་ལགས་ཀྱིས་ཚོགས་འདུའི་ངོ་སྤྲོད་གསུང་བཤད་གྲུབ་མཚམས་འབྲེལ་མཐུད་པ་སྤྱི་ཟུར་ཡོན་ཏན་རྒྱ་མཚོ་ལགས་ཀྱིས་ལོ་གཅིག་དང་ཕྱེད་ཀའི་ལས་བསྡོམས་དང་རྩིས་ཁྲ་སྒྲོགས་སྦྱང་གྲུབ་བསྟུན་སྐུ་མགྲོན་གཙོ་བོ་མཆོག་གིས་གསུང་བཤད་གནང་དོན། དེ་རིང་འདིར་དབུ་མའི་ལམ་གྱི་ལས་འགུལ་ཁང་གི་འགན་འཛིན་ལྷན་ཚོགས་ཐོག་དམིགས་བསལ་གསར་པ་ཞིག་ཞུ་རྒྱུ་མི་འདུག ན་ནིང་འགན་འཛིན་ལྷན་ཚོགས་སྐབས་བཅར་རྒྱུ་བྱུང་ལ་བཀའ་ཁྲི་མཆོག་གིས་གནད་དོན་འདི་དང་འབྲེལ་བའི་ཐོག་གསུང་བཤད་ཟབ་རྒྱས་གནང་ཡོད། ལྷག་པར་༸གོང་ས་མཆོག་གིས་དུས་ནས་དུས་སུ་བཀའ་སློབ་མང་པོ་ཕེབས་ཡོད་སྟབས་ངས་དམིགས་བསལ་འགྲེལ་བཤད་རྒྱག་རྒྱུའི་དགོས་པ་མཐོང་གི་མི་འདུག འོན་ཀྱང་ཁྱེད་རང་ཚོ་སྒྲིག་འཛུགས་འདི་གལ་ཆེན་པོ་ཆགས་ཡོད་པ་ལྟར་ལས་འགུལ་ཡང་སྤྱི་ཚོགས་ནང་ཕན་ཐོགས་ཡོད་པ་མང་པོ་ཞིག་སྤེལ་དང་སྤེལ་མུས་རེད། ཁྱེད་རང་ཚོ་དབུ་མའི་ལམ་གྱི་སྒྲིག་འཛུགས་འདི་ཡང་དམིགས་ཡུལ་དང་དགོས་པ་ངེས་ཅན་ཞིག་གི་ཐོག་ནས་བཙུགས་པ་རེད། དེ་བཞིན་འདིིར་དཔལ་འབྱོར་གྱི་རྒྱབ་བརྟེན་གནང་མཁན་ཚང་མར་བསྔགས་བརྗོད་ཞུ་རྒྱུ་ཡིན། དེང་སང་འོས་བསྡུ་ཆེན་མོའི་བྲེལ་ཟིང་སྐབས་ཚགས་པར་སོགས་ཆ་ཚང་ཀློག་རྒྱུ་མ་རག་ནའང་དཔྱད་པ་བྱེད་སྐབས་ང་རང་ཚོའི་སྤྱི་ཚོགས་ནང་མི་ཁག་གཅིག་ལ་ཆབ་སྲིད་ཀྱི་ལྟ་བ་བརྟན་པོ་ཨེ་ཡོད་སྙམ་པའི་བསམ་བློ་མང་པོ་ཞིག་འཁོར་ཡོང་གི་འདུག དཔེར་ན། རང་བཙན་གྱི་ལྟ་བ་འཁྱེར་མཁན་གྱི་ཚོགས་པའི་ནང་ལ་ཡང་རང་ཐག་རང་ཆོད་དང་དབུ་མའི་ལམ་གྱི་ལྟ་བ་འཁྱེར་མཁན་འདུག ལམ་དབུ་མའི་ཡིན་ཟེར་མཁན་ནང་ལ་རང་ཐག་རང་ཆོད་ལ་རྒྱབ་སྐྱོར་གནང་མཁན་འདུག དབུ་མའི་ལམ་གྱི་ཚགས་པར་ཡིན་ཟེར་མཁན་དེ་ཚོའི་ནང་དབུ་མའི་ལམ་གྱི་ལྟ་བ་མ་ཡིན་པའི་གཞན་མིང་འཁྱེར་མཁན་དེ་འདྲ་འདུག དེ་ཚང་མར་བལྟས་ཡོང་དུས་ཡང་ན་རྐུབ་སྟེགས་ཆེད་ལངས་ཕྱོགས་ལ་འགྱུར་བ་གཏོང་གི་ཡོད་དམ། ཡང་ན་སྒྲིག་འཛུགས་ཁོང་རང་ལ་ལངས་ཕྱོགས་ཡོད་དམ་མེད། དབུ་མའི་ལམ་གྱི་སྒྲིག་འཛུགས་ཀྱི་ལས་འགན་འདི་མང་ཚོགས་ནང་སྔར་ལྷག་ཡོང་རྒྱུ་དང་། མ་འོངས་པར་ལས་འགུལ་ཤུགས་ཆེར་སྤེལ་ཏེ་མི་མང་ལ་བསམ་བློའི་གོ་རྟོགས་གསལ་པོ་ཞིག་དང་ཆབ་སྲིད་ཀྱི་ལངས་ཕྱོགས་གསལ་པོ་ཞིག་བཟོ་ཐུབ་རྒྱུའི་ཕན་ནུས་ལྡན་པ་ཞིག་ལ་ངོས་འཛིན་ཞུ་གི་ཡོད། 
ང་ཚོ་བཙན་བྱོལ་ནས་སླེབས་ཏེ་མང་གཙོ་དབུ་བརྙེས་ཏེ་ལོ་ལྔ་བཅུ་འཁོར་གྱི་ཡོད། ༸གོང་ས་༸སྐྱབས་མགོན་ཆེན་པོ་མཆོག་གིས་ཐུགས་རྗེ་བཀའ་དྲིན་ལ་བརྟེན་ནས་སྒྲིག་འཛུགས་དང་གང་ཟག་སུ་ཞིག་ཡིན་རུང་སོ་སོའི་་བརྗོད་རང་དབང་སོགས་ཆ་ཚང་ཡོད། འོན་ཀྱང་ལྟ་བ་དང་ལངས་ཕྱོགས་ཕར་འདྲེས་ཚུར་འདྲེས་མེད་པ་གསལ་པོ་དགོས་རྒྱུ་དེ་རིང་སྤྱི་སྙོམས་ཐོག་ནས་ཞུ་འདོད་བྱུང་། ཞེས་སོགས་གསུང་བཤད་གནང་རྗེས་སྤྱི་འཐུས་པ་ཡེ་ཤེས་ཕུན་ཚོགས་ལགས་ཀྱིས་གཙོ་བོ་མཐུན་འགྱུར་གནང་མཁན་སོགས་ལ་ཐུགས་རྗེ་ཆེ་ཞུས་ཏེ་མཛད་སྒོ་གྲོལ། དབུ་མའི་ལམ་གྱི་ལས་འགུལ་ཁང་ཞེས་པ་དེ་ཕྱི་ལོ་ ༢༠༠༧ ལོར་བཙུགས་པ་ཞིག་ཡིན་པ་དང་། བཙན་བྱོལ་བོད་མི་གནས་ཡུལ་ཁག་ཏུ་དབུ་མའི་ལམ་གྱི་སྲིད་བྱུས་གོ་རྟོགས་ཆེད་ལས་འགུལ་སྤེལ་མུས་དང་། ད་རེས་ཚོགས་འདུ་དེར་ས་གནས་ཁག ༡༨ ནས་འབྲེལ་མཐུད་པ་མཉམ་ཞུགས་གནང་སྟེ་ཉིན་གསུམ་རིང་འཚོགས་རྒྱུ་ཡིན་འདུག
