༢༠༡༠ ཟླ་ ༨ ཚེས་ ༦ རེས་གཟའ་པ་སངས།
༄༅། །ཕྱི་ལོ་ ༢༠༡༠ ཟླ་ ༩ ཚེས་ ༢ ཉིན་རྒྱ་གར་ལྷོ་ཕྱོགས་སྦེལ་ཀོབ་གཞིས་སྒར་དུ་རྟེན་གཞི་བྱས་པའི་སེར་བྱེས་མཁས་སྙན་གྲྭ་ཚང་གི་འདུ་ཁང་དུ་བཙན་བྱོལ་བོད་མིའི་མང་གཙོ་དབུ་བརྙེས་ནས་མི་ལོ་ཧྲིལ་པོ་ ༥༠ འཁོར་བའི་དུས་དྲན་སྲུང་བརྩི་ཞུ་རྒྱུའི་མཛད་སྒོར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཇི་ལྟར་གདན་ཞུའི་གསོལ་འདེབས་ཞུས་དོན་བཞིན་བཀའ་བཞེས་བཟང་པོ་སྨིན་སྩལ་ཐོབ་སྟེ་མཛད་སྒོའི་ཚོགས་མགོན་དུ་ཆིབས་སྒྱུར་བསྐྱང་གནང་མཛད་རྒྱུ་ཡིན་འདུག ཕྱོགས་མཚུངས་སྐབས་དེར་བཙན་བྱོལ་བོད་གཞུང་གི་ཁྲིམས་ཞིབ་པ་ཆེ་བ་མཆོག་དང་། བོད་མི་མང་སྤྱི་འཐུས་ཚོགས་གཙོ་མཆོག་གི་གཙོས་སྤྱི་འཐུས་རྣམ་པ། བཀའ་བློན་ཁྲི་པས་དབུས་བཀའ་བློན་རྣམ་པ།
གཞན་ཡང་ཡུ་རོབ་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་དང་རྒྱལ་སྤྱིིའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་འབྲེལ་མཐུད་ཟུང་འབྲེལ་ཚོགས་གཙོ་སྐུ་ཞབས་ཐོ་མ་སི་མན་ (Thomas Mann) མཆོག་གིས་གཙོས་ཕྱིའི་རྒྱལ་ཁབ་ཨི་ཊཱ་ལི། རྒྱ་གར། ཁེ་ཎ་ཌ། ཨོ་སི་ཊོ་ལི་ཡ། ཨཡི་སི་ལེན་ཌི། ཌན་མག ལྷོ་ཨ་ཕི་རི་ཀ། པོ་ལེན་ཌི། ཀོ་རི་ཤི་ཡ། ཀམ་བྷོ་ཌི་ཡ། བལ་ཡུལ། ཨན་ཌོ་རཱ། ཨི་ཊཱ་ལིའི་རང་སྐྱོང་མངའ་ཁུལ་ལྷོ་ཊེ་རོལ་བཅས་རྒྱལ་ཁབ་ ༡༣ ཙམ་གྱི་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་གཙོ་དང་སྐུ་ཚབ་ ༡༧ ཙམ་ཆེད་ཕེབས་གནང་རྒྱུ་ཡིན་འདུག དེ་ཡང་མཛད་སྒོའི་ཐོག་མར་བཙན་བྱོལ་བོད་གཞུང་གི་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་ཆེ་བ་མཆོག་དང་། བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་མཆོག བཀའ་བློན་ཁྲི་པ་མཆོག བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཞོན་མཆོག་བཅས་ཀྱིས་སྤོས་སྣེས་སྔོན་བསུས་ཏེ་༸གོང་ས་༸སྐྱབས་མགོན་ཆེན་པོ་མཆོག་མཛད་སྒོའི་ཚོགས་མགོན་དུ་གདན་འདྲེན་ཞུ་རྒྱུ་དང། དེ་ཡང་མགོན་པོ་གང་ཉིད་མཆོག་མི་འཇིག་གདོང་ལྔས་བཏེགས་པའི་གསེར་ཁྲིར་༸ཞབས་སོར་འཁོད་མཚམས། ཚོགས་བཅར་བ་ཚང་མ་སྐུ་བཞེངས་ཀྱིས་བོད་རྒྱལ་ཁབ་ཆེན་པོའི་རྒྱལ་གླུ་འབུལ་སྐབས་བཀའ་ཁྲི་མཆོག་གིས་བོད་རྒྱལ་ཁབ་ཆེན་པོའི་རྒྱལ་དར་མཁའ་དབྱིངས་སུ་བསྒྲེངས་འཛུགས་གནང་རྒྱུ།
དེ་རྗེས་ཚོགས་བཅར་བ་ཚང་མས་བོད་བསྟན་སྲིད་མི་རིགས་ཀྱི་ཆེད་དུ་ལུས་སྲོག་བློས་བཏང་གནང་བའི་རྒྱལ་གཅེས་དཔའ་བོ་དཔའ་མོ་རྣམས་དང་། འདི་ལོ་བོད་མདོ་ཁམས་སྐྱེ་རྒུ་མདོའི་ས་ཡོམ་གྱི་གོད་ཆག་འོག་རྐྱེན་འདས་སུ་གྱུར་བའི་ཤ་ཁྲག་གཅིག་པའི་བོད་རིགས་སྤུན་ཟླ་ཚོར་རྗེས་དྲན་དང་མྱ་ངན་གུས་འདུད་མཚོན་ཆེད་སྐར་མ་གཅིག་རིང་ངག་བཅད་གནང་གྲུབ་བསྟུན། ཚོགས་བཅར་བ་རྣམས་ལ་རྟེན་འབྱུང་གསོལ་ཇ་འབྲས་སིལ་འབུལ་རྒྱུ། དེ་རྗེས་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་མཆོག་གིས་སྐུ་མགྲོན་རྣམས་ལ་ཕེབས་བསུ་དང་སྦྲགས་དུས་ཆེན་དང་འབྲེལ་བའི་བོད་མི་མང་སྤྱི་འཐུས་ལྷན་ཚོགས་ཀྱི་གསུང་བཤད་དང་དཔལ་ལྡན་བཀའ་བློན་ཁྲི་པ་རིན་པོ་ཆེ་མཆོག་གིས་བཀའ་ཤག་གི་གསུང་བཤད་གནང་རྒྱུ། དེ་རྗེས་ཡུ་རོབ་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་དང་རྒྱལ་སྤྱིིའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་འབྲེལ་མཐུད་ཟུང་འབྲེལ་ཚོགས་གཙོ་སྐུ་ཞབས་ཐོ་མ་སི་མན་མཆོག་གིས་གཙོས་ཕྱིའི་རྒྱལ་ཁབ་ ༡༣ ཙམ་གྱི་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་གཙོ་དང་སྐུ་ཚབ་ ༡༧ ཙམ་ཆེད་ཕེབས་གནང་བ་རྣམས་ཀྱིས་རིམ་བཞིན་དུས་ཆེན་དང་འབྲེལ་བའི་གསུང་བཤད་གནང་གྲུབ་རྗེས། ༸གོང་ས་༸སྐྱབས་མགོན་ཆེན་པོ་མཆོག་གིས་བོད་མིར་མང་གཙོ་གསོལ་རས་སྩལ་ཏེེ་མི་ལོ་ཧྲིལ་པོ་ ༥༠ འཁོར་བའི་བཀའ་དྲིན་རྗེས་དྲན་མཚོན་ཆེད་གཞིས་བྱེས་བོད་མི་ཡོངས་ཀྱི་སྐུ་ཚབ་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་སྦྲེལ་པོ་རྣམ་གཉིས་ཀྱིས་༸གོང་ས་༸སྐྱབས་མགོན་ཆེན་པོ་མཆོག་ལ་གསེར་གྱི་གཟེངས་རྟགས་འབུལ་ལམ་ཞུ་རྒྱུ། དེ་ནས་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་སློབ་བཀའ་དྲིན་ཆེ་བ་སྩལ་གྲུབ་བསྟུན་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཞོན་རྒྱ་རི་སྒྲོལ་མ་མཆོག་གིས་ཐུགས་རྗེ་ཆེ་ཞུའི་གསུང་བཤད་གནང་རྒྱུ་དང། དེ་རྗེས་བོད་ཀྱི་ཐུན་མིན་རིག་གཞུང་གི་གཞས་སྣ་འཁྲབ་སྟོན་གྱི་གཟིགས་འབུལ་ཞུ་བ་དང་སྦྲགས་མཛད་སྒོ་དངོས་གཞི་བཀྲ་ཤིས་པའི་ཐོག་གྲོལ་རྒྱུ་ཡིན་འདུག་པ་བཅས།།
