༢༠༡༠ ཟླ་ ༧ ཚེས་ ༡༢ རེས་གཟའ་ཟླ་བ།

༄༅། །འདི་གར་ལྡི་ལི་སྐུ་ཚབ་དོན་གཅོད་ཁང་ནས་བཏང་གནས་ནང་འཁོད་དོན། ཕྱི་ལོ་ ༢༠༡༠ ཟླ་ ༧ ཚེས་ ༦ ཉིན་ལྡི་ལི་བསམ་ཡས་གླིང་གཞིས་སྒར་དུ་༸གོང་ས་མཆོག་སྐུའི་འཁྲུངས་སྐར་གྱི་གཞུང་འབྲེལ་མཛད་སྒོ་སྐྱོང་སྐབས་ས་གནས་རང་རེ་མང་ཚོགས་ནས་ཤིང་སྣ་འདེབས་འཛུགས་ཀྱི་ལས་འགུལ་ཞིག་སྤེལ་ཡོད་པར་སྐབས་དེར་ (NDTV Greenathon Team)  ཆེད་འབོད་ཞུས་པ་ལྟར་ཤིང་སྣ་འདེབས་འཛུགས་ཀྱི་ལས་འགུལ་དང་མཛད་སྒོ་བཅས་པར་ལེན་གྱིས་ཕྱི་ཚེས་ ༧ སྔ་དྲོ་ (NDTV Greenathon) ལས་རིམ་ཐོག་བརྙན་འཕྲིན་རྒྱང་སྲིང་ཞུས་ཡོད། མཛད་སྒོའི་ཐོག་ལྡི་ལི་སྐུ་ཚབ་དོན་གཅོད་བཀའ་བློན་བསྟན་པ་ཚེ་རིང་མཆོག་ནས་ (NDTV Greenathon) ལས་རིམ་ཐོག་ལྡི་ལི་གནས་འཁོད་བོད་རིགས་ཐུན་མོང་ནས་རྒྱ་གར་གྱི་གྲོང་གསེབ་སྐྱོ་བོ་ཞིག་ལ་ཁོར་ཡུག་དང་འབྲེལ་བའི་ལས་འགུལ་ཐོག་མཉམ་ཞུགས་རོགས་རམ་བྱེད་རྒྱུའི་དམ་བཅའ་བཞག་ཡོད། དེ་བཞིན་ལྡི་ལི་དོན་གཅོད་ནས་འབྲེལ་ལམ་ཞུས་དོན་ལྟར་དེ་ཉིན་དགོང་དྲོ་ཆུ་ཚོད་ ༡༠ ཐོག་རྒྱ་གར་གྱི་གསར་འགྱུར་བརྒྱུད་ལམ་གྲགས་ཅན་ (NDTV) གསར་འགྱུར་བརྙན་འཕྲིན་བརྒྱུད་ལམ་ཐོག་༸གོང་ས་མཆོག་དབུ་བཞུགས་ཐོག་ཕྱི་ནང་གི་མི་སྣ་ཁག་མཉམ་དམིགས་བསལ་བཅར་འདྲིའི་ལས་རིམ་ཞིག་རྒྱང་སྲིང་གནང་ཡོད་པ་བཅས།