༢༠༡༠ ཟླ་ ༧ ཚེས་ ༢༦ རེས་གཟའ་ཟླ་བ།
རྒྱལ་བ་བྱམས་པའི་སྐུ་བརྙན།
༄༅། །ཕྱི་ལོ་ ༢༠༡༠ ཟླ་ ༧ ཚེས་ ༢༤ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་དྭགས་ལྡུམ་ར་ཡར་མ་མགོན་པོའི་དགོན་པའི་མཛད་འཕྲིན་ཁག་ལེགས་པར་གྲུབ་སྟེ་བདེ་སྐྱིད་དགོན་པའི་ཕོ་བྲང་ཡིད་དགའ་ཆོས་འཛིན་དུ་༸ཞབས་སོར་བདེ་བར་འཁོད་ཡོད།
དེ་ཡང་གོང་ཚེས་ཉིན་གྱི་སྔ་དྲོ་མགོན་པོ་གང་ཉིད་མཆོག་སྔོན་དར་གནམ་ཐང་ནས་ཕོ་བྲང་ཡིད་དགའ་ཆོས་འཛིན་དུ་ཆིབས་སྒྱུར་སྐྱོང་སྐབས་ཕེབས་ལམ་འཁེལ་ཡུལ་སྔོན་ལྟར་དད་ལྡན་མི་མང་དང་ཌེས་ཀིཌ་མི་མང་། ཕྱོགས་མཐའ་ཁག་ནས་ཆོས་ཞུར་བཅར་བའི་དད་ལྡན་བཅས་ནས་ཕེབས་བསུའི་རུ་སྒྲིག་དང་ཕོ་བྲང་རྒྱལ་སྒོའི་མདུན་དུ་རྗེ་ཁྲིག་སེ་ཤར་སྤྲུལ་ངག་དབང་འཇམ་དབྱངས་བྱམས་པ་བསྟན་འཛིན་མཆོག་དང་མཁན་པོ་བླ་སྤྲུལ་དགེ་འདུན་པ་བཅས་ནས་སྤྱན་རྒྱ་སྤོས་སྣེས་གདན་ཞུས་ཀྱིས་ཕོ་བྲང་གི་བཞུགས་ཁྲིར་༸ཞབས་སོར་འཁོད་རྗེས་རྗེ་ཁྲིག་སེ་རིན་པོ་ཆེ་མཆོག་གིས་མཎྜལ་རྟེན་གསུམ་འདེགས་འབུལ་ཞུས་ཏེ་རྟེན་འབྲེལ་གྱི་མཛད་སྒོ་བསྐྱངས་ཡོད།
༸གོང་ས་༸སྐྱབས་མགོན་ཆེན་པོ་མཆོག་གིས་རྒྱལ་བ་བྱམས་པའི་སྐུ་བརྙན་དབུ་འབྱེད་མཛད་བཞིན་པ།
༸གོང་ས་༸སྐྱབས་མགོན་ཆེན་པོ་མཆོག་ལ་ལྡུམ་ར་བདེ་སྐྱིད་དགོན་གྱི་བྱམས་མགོན་གསར་བཞེངས་མཉམ་རོགས་མཐུན་འབྲེལ་ཚོགས་པས་ཇི་ལྟར་གསོལ་འདེབས་ཞུས་དོན་ལྟར་ཆིབས་སྒྱུར་བསྐྱངས་ཏེ་མགོན་པོ་གང་ཉིད་མཆོག་གིས་ཕྱི་ཚེས་ ༢༥ ཉིན་རྣམ་འདྲེན་ལྔ་པ་རྒྱལ་བ་མི་ཕམ་མགོན་པོའི་་སྣང་བརྙན་མཐོང་གྲོལ་རིན་པོ་ཆེར་རབ་གནས་བཀྲིན་བསྐྱངས་པ་དང་ཆབས་ཅིག་རྒྱལ་བ་མི་ཕམ་པའི་གསུང་མངོན་རྟོགས་རྒྱན་གྱི་ལྗགས་ལུང་སྩལ་ཡོད།
ཕྱོགས་མཚུངས་ཁྲིག་སེ་རིན་པོ་ཆེ་མཆོག་གིས་སྐུ་བརྙན་བཞེངས་རྒྱུའི་དམིགས་ཡུལ་ངོ་སྤྲོད་གནང་གསལ།
སྤྱིར་སངས་རྒྱས་ཀྱི་བསྟན་པ་དར་བ་དང་ཡང་སྒོས་༸རྒྱལ་དབང་ཡིད་བཞིན་ནོར་བུའི་དབུས་༸རྒྱལ་བ་ཡབ་སྲས་རྣམ་གཉིས་དང་རིས་མེད་སྐྱེས་ཆེན་དམ་པ་རྣམས་སྐུ་ཚེ་ཡུན་གནས་ཡོང་བ་དང་འཇིག་རྟེན་གྱི་ཁམས་སུ་ནད་ཡམ་མུ་གེ་རིགས་མི་ཡོང་བའི་ཆེད་དང་དེ་བཞིན་ནུབ་ར་ནི་རྒྱ་ནག་དང་པ་ཀི་སི་ཐན་གཉིས་ཀྱི་ས་མཚམས་སུ་ཡོད་སྟབས་དམག་འཁྲུག་སོགས་མེད་པར་ཞི་བདེ་ཡོང་ཆེད་བཞེངས་པ་ཞིག་ཡིན་ཞས་གསུངས་ཡོད་པ་བཅས།།
http://www.tibetonline.tv/videos/187/a-blessing-from-hh-the-dalai-lama:-nubra,-ladhak
