༢༠༡༠ ཕྱི་ཟླ་ ༦ ཚེས་ ༢༤ རེས་གཟའ་ཕུར་བུ།
༄༅། །འདི་གར་ཨ་རིའི་སྐུ་ཚབ་དོན་གཅོད་ཁང་ནས་བཏང་གནས་ནང་གསལ། བྱང་ཨ་རིའི་སྐུ་ཚབ་དོན་གཅོད་བློ་བཟང་སྙན་གྲགས་མཆོག་ཕྱི་ཚེས་ ༢༢ ཉིན་མངའ་སྡེ་ཨོ་རི་གྷན་གྱི་པོ་ཀྲེ་ལན་ཀྲི་གྲོང་ཁྱེར་ནང་ཡོད་པའི་སྙན་བརྒྱུད་བསམ་གཏན་ཆོས་གླིང་ཆོས་ཚོགས་ཀྱི་མཧཱ་གུ་རུའི་འབུམ་ཚོགས་ལ་ཞུགས་རྗེས། དགོང་དྲོ་པོ་ཀྲེ་ལན་ཀྲི་ཁུལ་གྱི་བོད་མི་རྣམས་ལ་གསུང་བཤད་གནང་སྐབས་བོད་མིའི་གནས་སྟངས་སྤྱི་དང་། བྱེ་བྲག་རིང་མིན་འགོ་ཚུགས་གྲབས་ཡོད་པའི་བཀའ་བློན་ཁྲི་པ་དང་། སྤྱི་འཐུས་འོས་བསྡུའི་སྐབས་ས་གནས་ཀྱི་བོད་མི་ཡོངས་ནས་ངེས་པར་དུ་མཉམ་ཞུགས་བྱེད་ཐུབ་དགོས་པ་མ་ཟད། ལྷག་པར་མང་ཚོགས་ཀྱིས་འོས་འདེམས་བྱས་པའི་ས་གནས་བོད་རིགས་སྤྱི་མཐུན་ཚོགས་པའི་ངོས་ནས་ས་གནས་ཀྱི་བོད་མི་རྣམས་མཉམ་ཞུགས་ཐུབ་ཐབས་སུ་ཆ་ཤས་མང་ཙམ་ལེན་དགོས་པ་དང་། དེ་བཞིན་ལས་འགུལ་མང་ཙམ་སྤེལ་དགོས་པའི་འབོད་སྐུལ་ནན་པོ་གནང་ཡོད་པ་རེད། དེ་ཡང་ཁུལ་དེར་དེང་སྐབས་བོད་མི་ ༤༠༠ ཙམ་ཡོད་པ་དང་། པོ་ཀྲི་ས་གནས་བོད་རིགས་སྤྱི་མཐུན་ཚོགས་པ་ནི་བྱང་ཨ་རིའི་ཁྱབ་ཁོངས་སུ་སྤྱི་མཐུན་ཚོགས་པ་ ༣༡ ཡོད་པའི་ཁྲོད་ཀྱི་ས་གནས་འབྲིང་གྲས་ཤིག་ཡིན་པ་མ་ཟད། ལས་འགུལ་སྤེལ་མང་བའི་ས་གནས་ཤིག་ཀྱང་ཡིན། ཕྱི་ཟླ་ ༧ པའི་ནང་ས་གནས་སྤྱི་མཐུན་ཚོགས་པས་སྐུའི་འཁྲུངས་སྐར་དུས་ཆེན་དང་སྟབས་བསྟུན་ཨ་རིའི་ནུབ་རྒྱུད་མཚོ་འགྲམ་ས་ཁུལ་གྱི་བོད་རིགས་སྤྱི་མཐུན་ཚོགས་པ་ཁག་མཉམ་ཞུགས་ཡོད་པའི་བཀའ་བློན་ཁྲི་པའི་འོས་བསྡུ་དང་འབྲེལ་བའི་སྐོར་ལ་བགྲོ་གླེང་གི་ཚོགས་འདུ་ཞིག་གོ་སྒྲིག་བྱེད་བཞིན་ཡོད་པ་རེད། ཕྱི་ཚེས་ ༢༤ ཉིན་སྐུ་ཚབ་དོན་གཅོད་མཆོག་ནིའུ་ཡོཀ་ཏུ་ཕྱིར་འཁོར་གྱི་ཡོད་པ་རེད།
