༢༠༡༠ ཕྱི་ཟླ་ ༥ ཚེས་ ༢༩ རེས་གཟའ་སྤེན་པ།
༄༅། །ཨོ་སི་ཊོ་ལི་ཡ་སྐུ་ཚབ་དོན་ཁང་ནས་བཏང་གནས་ནང་འཁོད་དོན། འདི་ག་ཨོ་སི་ཊོ་ལི་ཡ་སྐུ་ཚབ་དོན་གཅོད་ལས་ཁང་དང་། ཁྱབ་ཁོངས་ས་གནས་བོད་རིགས་མཐུན་ཚོགས་ཁག་ནས་ཕྱི་ལོ་ ༢༠༡༠ ཟླ་ ༤ དང་ཟླ་ ༥ ནང་ལས་དོན་ཇི་སྤེལ་གཤམ་གསལ།
ཕྱི་ལོ་ ༢༠༡༠ ཟླ་ ༤ ཚེས་ ༡༤ ཉིན་སྔ་དྲོ་ཆུ་ཚོད་ ༧།༤༩ ཐོག་བོད་ཁམས་སྐྱེ་རྒུ་མདོའི་ཁུལ་དུ་ས་ཡོམ་ཤུགས་ཆེན་བརྒྱབ་པའི་རྐྱེན་གྱིས་མི་རྒྱུ་ཟོག་གསུམ་ལ་བསམ་ཡུལ་ལས་འདས་པའི་གནོད་སྐྱོན་ཚབས་ཆེ་ཕོག་པ་ཤེས་རྟོགས་བྱུང་འཕྲལ་དོན་གཅོད་ལས་ཁང་གི་ཁྱབ་ཁོངས་བོད་དོན་རྒྱབ་སྐྱོར་ཚོགས་པ་ཁག་དང་། བོད་བརྒྱུད་ནང་པའི་ཆོས་ཚོགས་ཁག ས་གནས་བོད་རིགས་མཐུན་ཚོགས་ཁག་གིས་གདུང་སེམས་མཉམ་སྐྱེ་མཚོན་ཆེད་སྨོན་ལམ་གསུང་འདོན་ཞུ་རྒྱུའི་ལས་རིམ་གོ་སྒྲིག་དགོས་པའི་བརྡ་ཁྱབ་ཞུས་པ་ལྟར་འདི་ག་ཨོ་སི་ཊོ་ལི་ཡའི་རྒྱལ་ས་ཀེན་སྦེ་རའི་ཁུལ་དུ་གནས་བཞུགས་བོད་རིགས་མཐུན་ཚོགས་ཀྱིས་གོ་སྒྲིག་འོག་སྐུ་ཚབ་དོན་ཁང་དུ་འདུ་འཛོམས་ཀྱིས་སྨོན་ལམ་གསུང་འདོན་གནང་བ་མ་ཟད། བདུན་རེའི་རེས་གཟའ་ཉི་མའི་ཕྱེད་ཡོལ་ཆུ་ཚོད་ ༣།༠༠ ནས་ ༦ བར་སྐུ་ཚབ་དོན་ཁང་དུ་འདུ་འཛོམས་ཐོག་བཟང་སྤྱོད་སྨོན་ལམ་དང་། གཟུངས་སྔགས་ཡིག་དྲུག་མ། གུ་རུའི་གཟུངས་སྔགས། ༸རྒྱལ་བའི་ཞབས་བརྟན། འཕྲིན་བཅོལ་རྒྱས་བསྡུས་གང་མང་བཅས་གསོག་སྒྲུབ་གནང་དང་གནང་བཞིན་ཡོད་པ་མ་ཟད། རང་ལུགས་ལྟར་ཞག་ཞེ་དགུ་ཉིན་ཡང་ས་ཟླའི་ཚེས་ ༡༥ བཞིན་སྨོན་ལམ་གསུང་འདོན་གནང་རྒྱུའི་གྲོ་སྒྲིག་ཞུ་བཞིན་ཡོད། དེ་བཞིན་བོད་མིའི་གནས་སྡོད་ས་གནས་སི་ཌེ་ནི་དང་། ཨེ་ཌི་ལེ་ཌི། ཀྲ་སི་མ་ནི་ཡ། སྦིར་སེ་སྦེན། མེལ་བྷོན་བཅས་སུ་གནས་བཞུགས་བོད་བརྒྱུད་ནང་པའི་ཆོས་ཚོགས་ཁག་དང་། ས་གནས་བོད་རིགས་མཐུན་ཚོགས་ཁག་བཅས་ནས་སྨོན་ལམ་གསུང་འདོན་ཞུ་རྒྱུ་དང་། དཔལ་ལྡན་རང་གཞུང་བཀའ་ཤག་ནས་ལམ་སྟོན་བཀའ་ཡིག་ཇི་ཕེབས་དགོངས་དོན་བོད་བརྒྱུད་ནང་པའི་ཆོས་ཚོགས་ཁག་དང་། ༸གོང་ས་༸སྐྱབས་མགོན་ཆེན་པོ་མཆོག་ཨོ་སི་ཊོ་ལི་ཡར་གདན་ཞུ་ཚོགས་ཆུང་། ས་གནས་བོད་རིགས་མཐུན་ཚོགས་དང་བོད་མི་སྒེར་བཅས་ལ་འདི་ནས་འབོད་སྐུལ་ཞུས་པ་ལྟར་ཞལ་འདེབས་ཇི་བྱུང་རྣམས་རང་གཞུང་བཀའ་ཤག་གིས་ལམ་སྟོན་ཕེབས་མཚམས་ཁུངས་འབུལ་ཞུ་རྒྱུར་དུས་འབྲེལ་ཞུ་འཆར་དང་། འདི་ཁུལ་རྒྱ་བོད་མཛའ་འབྲེལ་མཐུན་ཚོགས་དང་། རྒྱ་ནག་ངལ་རྩོལ་ཚོགས་པ། ཨོ་སི་ཊོ་ལི་ཡ་གནམ་བདེ་སྒོ་མོ་ཆེ་གསར་ཁང་། རྒྱ་ནག་རང་དབང་རིག་གཞུང་མཐུན་ཚོགས། རྒྱ་རིགས་གང་ཟག་སྒེར་བཅས་ནས་ས་ཡོམ་གྱི་གནོད་སྐྱོན་ཚབས་ཆེན་ཕོག་སྟེ་རྐྱེན་འདས་སུ་གྱུར་བའི་རྗེས་ཤུལ་ནང་མི་རྣམས་ལ་སེམས་གསོ་དང་། རྨས་སྐྱོན་ཕོག་པ་རྣམས་གང་མྱུར་དྲག་སྐྱེད་ཡོང་བའི་རེ་སྨོན་ཞུ་བཞིན་ཡོད་པའི་འཚམས་འཕྲིན་ཁག་འདི་ནས་ཕྱི་དྲིལ་ལས་ཁང་བརྒྱུད་སྐབས་འཕྲལ་གོང་སྙན་འབུལ་ལམ་ཞུས། གོང་གི་རྒྱ་རིགས་ཚོགས་སྡེ་རྣམས་ཀྱིས་རྒྱ་ནག་ནང་དུ་ཡོད་པའི་འབྲེལ་ཆགས་སོ་སོའི་བརྒྱུད་བོད་ནང་ས་ཡོམ་གྱི་གནོད་སྐྱོན་ཕོག་པའི་བོད་རིགས་མི་མང་ལ་རང་ནུས་གང་ཡོད་ཀྱིས་རོགས་སྐྱོར་ཞལ་འདེབས་འབུལ་རྒྱུར་སྐུལ་སློང་སྤེལ་འཆར་ཡོད་པའི་གནས་འཕྲིན་འདི་ག་ལས་ཁུངས་སུ་འབྱོར་ཡོད། ཕྱི་ལོ་ ༢༠༡༠ ཟླ་ ༥ ཚེས་ ༡ ནས་ཚེས་ ༢ བར་ནིའུ་སའུ་ཐི་ཝེལ་སི་ནང་པའི་ཆོས་ཚོགས་ལྷན་ཚོགས་ནས་སྐུ་ཚབ་དོན་ཁང་གི་སྐུ་ཚབ་དོན་གཅོད་དྭགས་པོ་བསོད་ནམས་ནོར་བུ་ལགས་ལ་ནང་པའི་ཚོགས་ཁག་གི་དུས་སྟོན་དུ་མགྲོན་འབོད་བྱུང་བ་ལྟར་ཆེད་བཅར་གྱིས་ཆེས་མཐོའི་སྐུ་མགྲོན་མི་སྣ་ཁག་དང་། ཆོས་ཚོགས་ཁག་གི་གཙོ་འཛིན། དགེ་བཙུན། ཆོས་ལུགས་གཞན་ཁག་གི་སྐུ་ཚབ་རྣམ་པ་བཅས་གནད་ཡོད་མི་སྣ་མང་དག་ཅིག་དང་ལྷན་མཇལ་མོལ་ཞུས་ཡོད། དེ་བཞིན་ཕྱི་ལོ་ ༢༠༡༠ ཟླ་ ༥ ཚེས་ ༤ ནས་ ༦ བར་སིཌ་ནིར་ཝ་ཛ་ར་ཡ་ན་བོད་བརྒྱུད་ནང་པའི་ཆོས་ཚོགས་ནས་ཨ་རིའི་མཁས་དབང་རོ་སྦརཊི་ཐུར་མན་ལགས་ཀྱི་གཙོས་རྒྱལ་ཁབ་མང་པོའི་མཁས་དབང་དང་། ཚོགས་ཞུགས་གནང་མཁན་མི་གྲངས་ ༢༠༠༠ བརྒལ་བ་མཉམ་ཞུགས་ཐོག་བདེ་བ་དང་། བདེ་བའི་རྒྱུ་ཞེས་པའི་བརྗོད་གཞིའི་ཐོག་བགྲོ་གླེང་གི་ཚོགས་ཆེན་ནང་སྐུ་ཚབ་དོན་གཅོད་ཆེད་བཅར་གྱིས་ལས་རིམ་ཐོག་མཉམ་ཞུགས་ཀྱིས་མཁས་དབང་ཁག་དང།མཇལ་མོལ་ཞུས་ཡོད། ཕྱི་ལོ་ ༢༠༡༠ ཟླ་ ༥ ཚེས་ ༧ ཉིན་གོང་གི་ཆོས་ཚོགས་ནས་རྒྱལ་བ་བྱམས་པའི་སྐུའི་གཟུངས་གཞུག་འབུལ་རྒྱུར་རིང་བསྲེལ་སྣ་ཚོགས་དང་། རིན་ཐང་ཆེ་བའི་བྱིན་རྟེན་བཅས་མང་ཚོགས་ལ་མཇལ་ཁ་གནང་བའི་ལས་རིམ་ཐོག་མཉམ་ཞུགས་ཞུས་ཡོད་པ་བཅས།།
