༢༠༡༠ ཟླ་ ༥ ཚེས་ ༥ རེས་གཟའ་ལྷག་པ།
༄༅། །ཕྱི་ལོ་ ༢༠༡༠ ཟླ་ ༥ ཚེས་ ༥ ཉིན་གྱི་སྔ་དྲོ་ཆུ་ཚོད་ ༩།༣༠ ཐོག་སྐུ་མགྲོན་རྣམས་བཞུགས་གྲལ་དུ་འཁོད་བསྟུན་དཔེ་མཛོད་དྲུང་ཆེས་ཚོགས་ཁང་གསར་པ་དབུ་འབྱེད་ཀྱི་ལྷན་ཚོགས་འགོ་འཛུགས་དང་སྦྲགས་དེར་ཆེད་དུ་ཕེབས་པའི་བཙན་བྱོལ་བོད་གཞུང་གི་མང་གཙོའི་ཀ་བ་གསུམ་གྱི་མཛད་གཙོ་རྣམས་དང་། རང་དབང་ཅན་གྱི་འགན་འཛིན་རྣམ་པ། དྲུང་ཆེ་ཁག་དང་ས་གནས་འགོ་འཛིན། དེ་བཞིན་དཔེ་མཛོད་ལས་བྱེད་སོགས་བརྒྱ་ཕྲག་ཙམ་ཕེབས་ཡོད་པ་རྣམས་ལ་འཚམས་འདྲི་ཞུས་ཡོད། དེ་རྗེས་སྐུ་མགྲོན་གཙོ་བོ་དཔལ་ལྡན་བཀའ་བློན་ཁྲིན་པ་རིན་པོ་ཆེ་མཆོག་ནས་སྣང་གསལ་ཞལ་ཕྱེ་གནང་གྲུབ་པ་དང་དཔེ་མཛོད་འགན་འཛིན་དགེ་བཤེས་ལྷག་རྡོར་ལགས་ནས་སྐུ་མགྲོན་རྣམས་ལ་འཚམས་འདྲི་དང་སྦྲགས་བོད་ཀྱི་དཔེ་མཛོད་ཁང་གི་ལས་དོན་སྒྲུབ་ཕྱོགས་དང་ཚོགས་ཁང་གསར་པ་གསར་བཞེངས་བྱེད་དགོས་སྐོར་གྱི་གསུང་བཤད་གནང་ཡོད། དེ་ཡང་བོད་ཀྱི་དཔེ་མཛོད་ཁང་གི་ལས་འགན་གཙོ་བོ་ནི་བོད་ཀྱི་ཆོས་དང་རིག་གཞུང་ཉམས་པ་སླར་གསོ་དང་མི་ཉམས་རྒྱུན་འཛིན་ཞུ་བཞིན་ཡོད་པའི་སྐོར་དང་། ད་ལྟའི་ཆར་བོད་ཀྱི་དཔེ་མཛོད་ཁང་གི་ལས་དོན་གང་དང་གང་ཞིག་སྒྲུབ་བཞིན་ཡོད་པ་རེ་རེ་བཞིན་ངོ་སྤྲོད་གནང་ཡོད་པའི་ནང་། ལོ་གཅིག་གི་ནང་བོད་ཡིག་དང་དབྱིན་ཡིག ཧིན་རྡི་བཅས་ཀྱི་དཔེ་དེབ་གྲངས་སུམ་ཅུ་ནས་བཞི་བཅུ་པར་སྐྲུན་གནང་གི་ཡོད་པ་སོགས་ཀྱི་གསུང་བཤད་གནང་ཡོད་པ་མ་ཟད། ཚོགས་ཁང་འདི་གསར་རྒྱག་བྱེད་དགོས་པའི་རྒྱུ་མཚན་ནི་བོད་ཀྱི་དཔེ་མཛོད་ཁང་གི་ལས་དོན་རྒྱ་ཆེ་ཙམ་བསྒྲུབ་རེ་དང་དགོང་དྲོ་ཆུ་ཚོད་ལྔ་པའི་རྗེས་གཞུང་ཞབས་རྣམས་དང་དེ་བཞིན་མི་མང་ལ་ཕན་ཐོགས་ཡོང་རྒྱུ་སོགས་ལ་དམིགས་པ་ཡིན་སྐོར་གསུངས་པ་དང་། ཚོགས་ཁང་གསར་རྒྱག་གི་འགྲོ་སོང་ཚང་མ་རྒྱ་གར་དབུས་རིག་གཞུང་བློན་ཆེན་ལས་ཁུངས་ནས་གནང་སོན་བྱུང་བར་བརྟེན་རྒྱ་གར་གཞུང་ལའང་ཐུགས་རྗེ་ཆེ་ཞུས་ཡོད།
དེ་ནས་བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་ནས་གསུང་བཤད་གནང་བའི་ནང་། བོད་ཀྱི་དཔེ་མཛོད་ཁང་ནས་ཕྱག་དཔེ་མང་པོ་ཞིག་དང་གསུང་འབུམ། དེ་བཞིན་རྒྱལ་རབས་ཆོས་བྱུང་གི་དེབ་རིགས་སོགས་ཕལ་ཆེར་བོད་ཀྱི་དཔེ་མཛོད་ཀྱིས་བསྡུ་རུབ་བྱས་པ་གྲངས་ ༣༣༠༠༠ ལྷག་ཙམ་ཟིན་གྱི་ཡོད་སྐོར་དང་། སྤྱི་ཡོངས་ཀྱི་ཆ་ནས་བོད་ཀྱི་ཆབ་སྲིད་དང་སྤྱི་ཚོགས། དཔལ་འབྱོར་སོགས་ཀྱི་དེབ་རིགས་མང་པོ་ཞིག་འཚོལ་བསྡུ་གནང་ཡོད། ཕྱི་ལོ་ ༡༩༩༡ ལོར་རྒྱ་གར་གཞུང་ཕྱོགས་ནས་བོད་ཀྱི་སློབ་གཉེར་བསྟི་གནས་ཁང་ཞེས་ངོས་ལེན་གནང་ཡོད་ལ། བོད་མི་མང་སྤྱི་འཐུས་ལྷན་ཚོགས་ནས་ཀྱང་ཕྱི་ལོ་ ༡༩༩༦ ལོར་བོད་ཀྱི་དཔེ་མཛོད་ཁང་འདི་དཔེ་མཛོད་ཙམ་མིན་པར་འགྲེམས་སྟོན་དང་ཡིག་མཛོད་བྱེད་སའི་བསྟི་གནས་གལ་ཆེན་པོ་ཞིག་ལ་ངོས་འཛིན་གྱི་གྲོས་ཆོད་བཞག་ཡོད་ཅེས་སོགས་ཀྱི་གསུང་བཤད་གནང་ཡོད། དེ་རྗེས་སྐུ་མགྲོན་གཙོ་བོ་བཀའ་ཁྲི་ཟམ་གདོང་རིན་པོ་ཆེ་མཆོག་ནས་གསུང་བཤད་གནང་ཡོད་པའི་ནང་། ཐོག་མར་དེར་བཅར་བའི་སྐུ་མགྲོན་རྣམས་ལ་འཚམས་འདྲི་གནང་བ་དང་སྦྲགས། ༸གོང་ས་༸སྐྱབས་མགོན་ཆེན་པོ་མཆོག་བཙན་བྱོལ་དུ་ཆིབས་སྒྱུར་བསྐྱངས་པ་ནས་བཟུང་བསམ་གྱིས་མི་ཁྱབ་པའི་ཐུན་མོང་དང་ཐུན་མོང་མ་ཡིན་པའི་མཛད་པ་འཕྲིན་ལས་མང་པོ་བསྐྱངས་ཡོད་པའི་ནང་དུས་དང་དུས་སུ་སྒྲིག་འཛུགས་གལ་ཆེ་ཁག་འཛུགས་གནང་མཛད་པ་དེས་༸གོང་ས་མཆོག་གི་མཛད་འཕྲིན་རྒྱུ་གནས་ཐུབ་རྒྱུའི་བརྒྱུད་ལམ་ལྟ་བུ་ཆགས་ཡོད། སྒྲིག་འཛུགས་དེ་དག་མང་ཆེ་བ་༸གོང་ས་མཆོག་གི་ཐུགས་ནང་འཆར་སྣང་བྱུང་བའི་རྗེས་སུ་མི་རྒྱུ་གང་ཐད་ནས་རོགས་སྐྱོར་མཛད་དེ་བཙུགས་པ་མང་ཆེ་བ་རེད། ཅེས་དང་། བོད་ཀྱི་རིག་གཞུང་ཐོག་ང་ཚོར་ཞན་ཆ་དང་ངོ་ཚ་དགོས་དོན་མེད།
རིག་གཞུང་ཚང་མའི་ནང་ནས་ཕུལ་དུ་ཕྱིན་པ་དང་མདུན་དུ་ཐོན་མཁན་ཞིག་ཡིན་པ་ལས་རིག་གཞུང་གཞན་ལ་དཔེ་ལྟ་དགོས་པ་ཞིག་དང་རིག་གཞུང་གཞན་ལ་སྐྱབས་བཅོལ་ཞུ་དགོས་པ་དང་ལེགས་ཆ་ལེན་དགོས་པ་ཞིག་མེད། ང་ཚོས་ལེགས་ཆ་ཕར་སྤྲོད་པ་ལས་ཚུལ་ལེན་དགོས་རྒྱུ་ཉུང་ཉུང་ཡིན། ཞེས་གསུངས་ཡོད། ཡང་རིན་པོ་ཆེ་མཆོག་ནས་གསུང་དོན། ཆིག་སྟོང་དགུ་བརྒྱ་བདུན་ཅུ་དོན་གྲངས་ནང་དཔེ་མཛོད་འདི་འགོ་འཛུགས་སྐབས་བོད་ནས་འབྱོར་བའི་གནད་ཆེ་བའི་ཕྱག་དཔེ་དང་ཡིག་ཆ་མང་པོ་ཞིག་དཔེ་མཛོད་འདིའི་ནང་བསྡུས་རུབ་བྱུང་ཡོད། ལྷག་པར་དཔེ་མཛོད་འདིའི་ནང་ལྷོ་བྲག་བཀའ་འགྱུར་ཞེས་པ་བྲིས་མ་ཞིག་ཡོད། བོད་ནང་བཀའ་འགྱུར་བྲིས་མ་སྟོང་ཕྲག་མང་པོ་ཡོད།
འོན་ཀྱང་ཚུར་གདན་འདྲེན་ཞུ་ཐུབ་པ་ཉུང་ཉུང་ཡིན། བོད་ནས་གདན་འདྲེན་ཞུས་པའི་ལྷོ་བྲག་བཀའ་འགྱུར་ད་ལྟ་དཔེ་མཛོད་འདིའི་ནང་བཞུགས་ཡོད་པ་འདི་འཛམ་གླིང་འདིའི་ནང་ད་ལྟ་ཡོད་པའི་བྲིས་མ་ཕར་བཞག་པར་མའི་བཀའ་འགྱུར་དེ་དག་ལས་མི་འདྲ་བར་དམིགས་བསལ་གྱི་ཁྱད་ཆོས་མང་པོ་ཡོད་པ་ཞིག་ཡིན། ཞེས་སོགས་ཀྱི་བོད་ཀྱི་དཔེ་མཛོད་ཁང་འདི་ཐོག་མ་འགོ་འཛུགས་སྐབས་ནས་ད་ལྟ་བར་གྱི་གནས་སྟངས་རྣམས་ཟབ་རྒྱས་གསུང་བཤད་གནང་གྲུབ་རྗེས་ཚོགས་ཁང་འདི་བེད་སྤྱོད་ཆེན་པོ་ཡོང་བའི་སྨོན་ལམ་ཡོད། ཅེས་གསུངས་རྗེས་བོད་ཀྱི་དཔེ་མཛོད་ཁང་གི་དྲུང་ཆེས་ཐུགས་རྗེ་ཆེ་ཞུའི་གསུང་བཤད་གནང་སྟེ་མཛད་སྒོ་གྲོལ་བ་དང་སྦྲགས་སྐུ་མགྲོན་རྣམས་ཚོགས་ཁང་དེའི་འོག་ཐོག་ཏུ་ཡོད་པའི་འགྲེམས་སྟོན་ཁང་གསར་པར་གདན་ཞུས་ཀྱི་པར་རིགས་དང་དེབ་རིགས་དེ་བཞིན་འོད་སྡེར་སོགས་འགྲེམས་སྟོན་ཞུས་ཡོད་པར་གཟིགས་ཞིབ་གནང་ཡོད་པ་བཅས།།
