༢༠༡༠ ཕྱི་ཟླ་ ༥ ཚེས་ ༡༧ རེས་གཟའ་ཟླ་བ།

༄༅། །འབིར་བོད་ཚོགས་ས་གནས་འགོ་འཛིན་ལས་ཁང་གིས་ཕྱི་ལོ་ ༢༠༠༩ ཟླ་ ༤ ཚེས་ ༡ ནས་ཕྱི་ལོ་ ༢༠༡༠ ཟླ་ ༣ ཚེས་ ༣༡ བར་ལོ་གཅིག་ཧྲིལ་པོ་རིང་ཕྱི་དྲིལ་དང་འབྲེལ་བའི་ལས་དོན་ཁག་གཅིག་སྤེལ་ཡོད། དེ་ཡང་ཕྱི་ལོ་ ༢༠༠༩ ཟླ་ ༩ ཚེས་ ༢ ཉིན་ས་གནས་སུ་མང་གཙོའི་དུས་དྲན་ཐེངས་ ༤༩ པ་སྲུང་བརྩི་གཟབ་རྒྱས་ཞུས་ཡོད། དེ་བཞིན་ཕྱི་དྲིལ་ལས་ཁུངས་ནས་འགྲེམས་སྤེལ་གནང་བའི་བཙན་བྱོལ་བོད་ཀྱི་དྲ་བརྙན་གསར་འགྱུར་ཁག་མི་མང་འདུ་འཛོམས་དང་། དེ་མིན་གཞིས་ཆགས་ཀྱི་གློག་འཕྲིན་ (Cable) བརྒྱུད་མང་ཚོགས་ལ་བསྟན་ཡོད།

ཕྱི་ལོ་ ༢༠༠༩ ཟླ་ ༦ ཚེས་ ༢༦ ཉིན་རྒྱ་གར་བདེ་སྲུང་བློན་ཆེན་ཟུར་པ་ཇོར་ཇི་ཕར་ནེན་ཌེ་སི་ (George Fernendes) མཆོག་དང་། ཁོང་གི་ཕྱག་རོགས་ཨ་ཇེ་སིངྒ་ (Ajay Singh) བོད་མི་མང་སྤྱི་འཐུས་ཚོགས་གཞོན་རྒྱ་རི་སྒྲོལ་མ་མཆོག་བཅས་ས་གནས་སུ་གཟིགས་སྐོར་ཕེབས་སྐབས་ས་གནས་འགོ་འཛིན་གྱི་གཙོས་ ཚོགས་པ་ཁག་གི་ཚོགས་གཙོ་དང་རྒྱུན་ལས་ཐུན་མོང་ནས་ཕེབས་བསུ་ཞུས་ཡོད་པ་མ་ཟད། དེའི་ཉིན་རྒྱབ་ཏུ་སུ་ཇ་དང་སམ་བྷོ་ཊ་སློབ་གྲྭ་བཅས་ཀྱིས་གཞས་སྣ་ཁག་གཅིག་ཀྱང་ཁྲབ་སྟོན་ཞུས་ཡོད་པ་བཅས།།