༢༠༡༠ ཕྱི་ཟླ་ ༥ ཚེས་ ༣༡ རེས་གཟའ་ཟླ་བ།
༄༅། །ནང་ཆོས་ངོ་སྤྲོད་ཀྱི་མཛད་རིམ་གོ་སྒྲིག་གནང་མཁན་སྤྱི་འཐུས་ཟླ་བ་ཚེ་རིང་ལགས་ཀྱི་གཙོ་སྐྱོང་གནང་བའི་ནང་ཆོས་ངོ་སྤྲོད་གོ་སྒྲིག་ཚོགས་ཆུང་ནས་ཇི་ལྟར་གསོལ་འདེབས་ཞུས་དོན་བཞིན། ཕྱི་ལོ་ ༢༠༡༠ ཟླ་ ༦ ཚེས་ ༡ ནས་ ༢ བར་ཉིན་གྲངས་གཉིས་རིང་༸གོང་ས་༸སྐྱབས་མགོན་ཆེན་པོ་མཆོག་གིས་རྡ་སྟེང་བོད་ཁྱིམ་སློབ་གྲྭའི་ཚོགས་ཁང་དུ་ཆིབས་སྒྱུར་བཀྲིན་བསྐྱང་སྟེ་སློབ་གྲྭ་ཁག་འདྲ་མིན་ནས་ཆེད་བཅར་ཞུས་པའི་བོད་པའི་སློབ་ཕྲུག་གཙོ་བོར་གྱུར་བའི་གཞོན་སྐྱེས་སློབ་མ་ཚོར་ནང་ཆོས་ངོ་སྤྲོད་ཀྱི་བཀའ་སློབ་བཀྲིན་ཆེ་བ་སྩལ་གནང་མཛད་རྒྱུ་ཡིན་འདུག དེ་ཡང་སྔ་དྲོ་ཆུ་ཚོད་ ༩ པའི་ཐོག་དབུ་འཛུགས་མཛད་རྒྱུའི་ནང་ཆོས་ངོ་སྤྲོད་ཀྱི་བཀའ་སློབ་འདི་བཞིན་ཏཱ་ལའི་བླ་མའི་དྲྭ་རྒྱའི་ཐོག་ཐད་ཀར་རྒྱང་སྲིང་ཞུ་རྒྱུ་ཡིན་འདུག ༸གོང་ས་༸སྐྱབས་མགོན་ཆེན་པོ་མཆོག་གིས་བོད་པའི་སློབ་ཕྲུག་ཚོར་ནང་ཆོས་ངོ་སྤྲོད་ཀྱི་མཛད་རིམ་འདི་བཞིན་ཐོག་མར་ཕྱི་ལོ་ ༢༠༠༧ ལོར་དབུ་འཛུགས་མཛད་པ་ཞིག་ཡིན།
དེ་བཞིན་ནང་ཆོས་ངོ་སྤྲོད་ཚོགས་ཆུང་དེས་རེས་གཟའ་ཉི་མ་ནམ་ཡིན་ལ་རྡ་ས་རིགས་ལམ་སློབ་གཉེར་ཁང་ནས་ཤེས་ཡོན་མི་སྣ་གདན་ཞུ་གནང་སྟེ་སློབ་མ་ཚོར་ནང་ཆོས་ཀྱི་འཛིན་གྲྭ་འཚོགས་རྒྱུའི་ལས་རིམ་ཞིག་ཀྱང་གོ་སྒྲིག་གནང་དང་གནང་བཞིན་ཡོད་པ་བཅས།།
