༢༠༡༠ ཕྱི་ཟླ་ ༥ ཚེས་ ༢༦ རེས་གཟའ་ལྷག་པ།

༄༅། །ཕྱི་ལོ་ ༢༠༡༠ ཟླ་ ༥ ཚེས་ ༢༧ ས་ག་ཟླ་བའི་དུས་ཚིགས་ཁྱད་པར་ཅན་གྱི་ཉིན་༸གོང་ས་༸སྐྱབས་མགོན་ཆེན་པོ་མཆོག་གིས་རྒྱ་གར་བྱང་ཕྱོགས་མངའ་སྡེ་བྷི་ཧཱར་གྱི་རྒྱལ་ས་པ་ཊི་ནའི་ནང་སྟོན་པ་རྗེས་དྲན་གྱི་སྐྱེད་མོས་ཚལ་དབུ་འབྱེད་རབ་གནས་མཛད་རྒྱུ་ཡིན་པ་མ་ཟད།

ལྡི་ལིར་རྟེན་གཞི་བྱས་པའི་ཤེས་རབ་བཟང་པོ་ཚོགས་པས་གོ་སྒྲིག་གནང་བའི་ནང་ཆོས་ངོ་སྤྲོད་ཀྱི་ལས་རིམ་ཞིག ས་ཌ་ན་བརྙན་འཕྲིན་བརྒྱུད་ (Sadhana TV Channel) ཉིན་ལྟར་སྐར་མ་ ༢༠ རིང་རྒྱང་སྲིང་གི་ལས་རིམ་དེ་༸གོང་ས་༸སྐྱབས་མགོན་ཆེན་པོ་མཆོག་གིས་དེ་ཉིན་རྒྱལ་ས་པ་ཊི་ནའི་ནང་དབུ་འབྱེད་མཛད་རྒྱུ་ཡིན་འདུག དེ་ཡང་ཤེས་རབ་བཟང་པོ། (Noble Wisdom) ཞེས་པའི་ནང་ཆོས་ངོ་སྤྲོད་ཀྱི་བརྙན་འཕྲིན་ལས་རིམ་དབུ་འབྱེད་གནང་དགོས་པའི་རྒྱུ་མཚན་ཇི་ཡིན་ཐོག་ལས་འཆར་དེའི་ཚོགས་གཙོ་མཚོ་སྣ་རིན་པོ་ཆེ་མཆོག་གིས་གསུང་དོན། ༸གོང་ས་༸སྐྱབས་མགོན་ཆེན་པོ་མཆོག་གིས་སྐབས་གཅིག་ང་རང་ལ་ཧི་མ་ལ་ཡའི་རི་རྒྱུད་ཀྱི་ནང་པ་ཚོ་ཕན་ཚུན་མཐུན་འབྲེལ་གོང་མཐོར་གཏོང་རྒྱུའི་ལས་གཞི་གཅིག་འགོ་འཛུགས་དགོས་པའི་ལམ་སྟོན་བཀའ་སློབ་སྩལ་བྱུང་། ངས་བསམ་པར་ནང་ཆོས་ངོ་སྤྲོད་ཀྱི་བརྙན་འཕྲིན་ལས་རིམ་འདི་༸གོང་ས་མཆོག་གི་བཀའ་དགོངས་བསྒྲུབ་རྒྱུའི་ཆ་ཤས་གཅིག་ཡིན་པར་ངོས་འཛིན་ཞུ་བཞིན་ཡོད་ཅེས་གསུངས། ས་ཌ་ན་བརྙན་འཕྲིན་བརྒྱུད་ལམ་འདི་བཞིན་རྒྱལ་ཁབ་ ༢༧ ཙམ་གྱི་ནང་གཙོ་བོ་སྤྱི་ཚོགས་དང་འབྲེལ་བའི་ལས་རིམ་རྒྱང་སྲིང་ཞུ་བཞིན་ཡོད་པ་མ་ཟད། ཆོས་ཕྱོགས་ཀྱི་ལས་རིམ་ཡང་རྒྱང་སྲིང་ཞུ་བཞིན་ཡོད་འདུག་པ་བཅས།།