༢༠༡༠ ཕྱི་ཟླ་ ༤ ཚེས་ ༡༥ རེས་གཟའ་ཕུར་བུ།
ཕྱི་ལོ་ ༢༠༡༠ ཟླ་ ༤ ཚེས་ ༡༤ ཕྱི་དྲོ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བརྙན་འཕྲིན་བརྒྱུད་མདོ་ཁམས་སྐྱེ་རྒུ་མདོར་ས་ཡོམ་གྱི་གོད་ཆག་ཆེན་པོ་བྱུང་བ་དེའི་འོག་རྐྱེན་འདས་དང་ནད་མནར་དུ་གྱུར་བ་རྣམས་ལ་ཐུགས་སྨོན་དང་སེམས་གསོའི་བཀའ་སློབ་སྩལ་དོན།
དེ་རིང་ཞོགས་པའི་གསར་འགྱུར་ནང་གོ་བར་བྱས་ན་སྐྱེ་རྒུ་མདོའི་ས་ཁུལ་དུ་ས་ཡོམ་ཤུགས་ཆེན་པོ་ཞིག་བརྒྱབ་འདུག དེ་རིང་ཞོགས་པའི་གསར་འགྱུར་ལྟར་ན་མི་གྲངས་ ༦༢ ཙམ་ཤི་སྐྱོན་བྱུང་བ་རེད་ཅེས་དང་། ད་གིན་གོ་དུས་བརྒྱ་ཕྲག་ཁ་ཤས་དང་། ཡང་ཁག་གཅིག་གི་སྟོང་ཕྲག་གཉིས་གསུམ་ཤི་སྐྱོན་བྱུང་ཚུལ་བརྗོད་ཀྱི་འདུག་ཀྱང་ཞིབ་ཕྲ་ད་ལྟ་ཤེས་རྟོགས་མ་བྱུང་། ས་ཡོམ་ཤུགས་ཆེན་པོ་གང་ཙམ་ཞིག་བརྒྱབ་འདུག་པས་སྨོན་ལམ་རྒྱག་རྒྱུ་ལས་གཞན་བྱེད་རྒྱུ་གང་ཡང་མི་འདུག ས་ཡོམ་དེ་ང་ཚོ་བོད་ཀྱི་ས་ཁུལ་དུ་བྱུང་བ་རེད། ཆོས་རིག་ལས་ཁུངས་ལ་བཀའ་མོལ་ཞུས་ཏེ་གཙུག་ལག་ཁང་དུ་སྨོན་ལམ་ཞིག་ཚུགས་ཐུབ་ན། སྙིང་རྗེ། ང་ཚོ་སངས་རྒྱས་པའི་ཆོས་པ་རེད། བདེ་སྡུག་གང་བྱུང་བ་ཡིན་ཡང་གཙོ་བོ་སོ་སོའི་ལས་ཀྱི་འབྲས་བུ་སྨིན་པ་ཤ་སྟག་རེད། བྱས་ཙང་ས་ཡོམ་འོག་རྐྱེན་འདས་སུ་གྱུར་བ་དང་། ནད་གཅོང་ཆགས་པ་དེ་དག་སོ་སོའི་སྔོན་བསགས་ལས་ངན་གྱི་འབྲས་བུ་སྨིན་པ་རེད། དེ་འདྲ་ཡིན་དུས་སྡུག་བསྔལ་མྱངས་པ་དེ་སོ་སོས་ཚེ་རབས་མང་པོར་གཞན་ལ་གནོད་པའི་བྱ་བ་བྱས་པའམ་སྡིག་པ་བསགས་པ་དེ་རྣམས་དག་པར་ཤོག་ཅེས་སྨོན་ལམ་བརྒྱབ་པ་ཡིན་ན་ཕན་གྱི་རེད། སོ་སོའི་སེམས་ནང་ཡིན་རུང་ཕྲན་བུ་སྡུག་བསྔལ་གྱི་དངངས་སྐྲག་དེ་ཆུང་དུ་འགྲོ་རྒྱུ་ཞིག་དང་། སྡུག་བསྔལ་བྱུང་བ་དེས་བསོད་ནམས་གསར་པ་གསོག་རྒྱུའི་རྐྱེན་དུ་འགྲོ་རྒྱུར་ཕན་ཐོགས་ཡོང་གི་རེད། ཁྱེད་ཚོས་ཕར་ལ་ལན་སྤྲོད་ས་བྱུང་བ་ཡིན་ན། སྡུག་བསྔལ་དང་རྐྱེན་ངན་ནི་འཕྲད་ཟིན་པ་རེད། སེམས་མ་སྐྱིད་པ་བྱས་ཏེ་སྡོད་པ་ལས་ག་ཚོད་ཐུབ་ཐུབ་ཀྱིས་དགེ་བ་བསག་ཐུབ་ན། གཟུངས་སྔགས་འདྲ་བསག བློ་སྦྱོང་གི་ཉམས་ལེན་བྱེད་ཐུབ་པ་དང་སྡུག་བསྔལ་དང་ལེན་གྱི་བསམ་བློ་ཕྲན་བུ་བཏང་ཐུབ་ན་ཕན་གྱི་རེད། རྐྱེན་ངན་དགེ་བའི་གྲོགས་སུ་འགྱུར་རྒྱུ་དང་རྐྱེན་ངན་བྱང་ཆུབ་ལམ་དུ་འགྱུར་ཐུབ་རྒྱུ་ཞིག་བྱུང་ན་ཡག་པོ་རེད། ཅེས་བཀའ་སློབ་བཀའ་དྲིན་ཆེ་བ་ཕེབས་ཡོད།།
