༢༠༡༠ ཕྱི་ཟླ་ ༤ ཚེས་ ༨ རེས་གཟའ་ཕུར་བུ།
༄༅། །ཕྱི་ལོ་ ༢༠༡༠ ཟླ་ ༤ ཚེས་ ༤ ཉིན་ཉི་ཧོང་རྒྱལ་ས་ཊོཀ་ཀྱོའི་ནང་རྒྱ་རིགས་ཤེས་ཡོན་མི་སྣ་ཁག་གཅིག་དང་ཐུག་འཕྲད་སྐབས་བཀའ་བློན་བསྟན་པ་ཚེ་རིང་མཆོག་གིས་ད་ལྟའི་བོད་རྒྱ་འབྲེལ་མོལ་གྱི་གནས་སྟངས་དང་། བོད་མི་ཚོས་རྒྱ་ནག་གཞུང་གི་དཔོན་རིགས་ཚོར་སྤྲད་པའི་བོད་རིགས་ཡོངས་ལ་མིང་དོན་མཚུངས་པའི་རང་སྐྱོང་ཡོང་ཐབས་ཀྱི་བསམ་འཆར་ཡིག་ཆ་དེར་རྒྱ་ནག་དཔོན་རིགས་ཚོས་བཟང་ཕྱོགས་ཀྱི་ཡ་ལན་གང་ཡང་གནང་མེད་སྐོར། དེ་བཞིན་རྒྱ་ནག་གཞུང་ལ་བོད་མི་ཚོའི་མངོན་འདོད་ཀྱི་ཡང་དག་པའི་རང་སྐྱོང་དེ་གང་འདྲ་ཡིན་མིན་སྙིང་དོན་ཐོག་གསལ་བཤད་གནང་ཡོད། སྐབས་དེར་རྒྱ་རིགས་གཙུག་ལག་སློབ་དཔོན་དང་རྩོམ་པ་པོ་ཁག་གཅིག་གིས་བོད་ཆེན་པོ་ཟེར་བ་དང་། ཚད་མཐོའི་རང་སྐྱོང་ཟེར་བ་སོགས་ལ་གསལ་བཤད་དགོས་པའི་རེ་འདུན་བཏོན་ཡོད་པར་བཀའ་བློན་མཆོག་གིས་བོད་མི་ཚོས་རྒྱ་ནག་གཞུང་ལ་སྤྲད་པའི་བསམ་ཆར་ཡིག་ཆ་དེའི་ནང་དེ་འདྲ་གང་ཡང་འཁོད་མེད་སྐོར་གསུངས་ཡོད། དེ་རྗེས་བཀའ་བློན་བསྟན་པ་ཚེ་རིང་མཆོག་དང་བཀའ་ཟུར་རྗེ་བཙུན་པདྨ་མཆོག་རྣམ་གཉིས་ལ་ཉི་ཧོང་དུ་གནས་སྡོད་བོད་རིགས་དང་སོག་རིགས་མཐུན་ཚོགས་ཀྱིས་སྐུ་མགྲོན་རྣམ་གཉིས་ལ་མེ་ཏོག་ས་ཀུ་རེའི་སྐྱེད་ཚལ་ནང་དུ་ཐུགས་སྤྲོའི་གསོལ་སྟོན་ཞིག་གོ་སྒྲིག་ཞུས་པ་དེར་མཉམ་ཞུགས་གནང་ཡོད། ཕྱི་ཚེས་ ༥ ཉིན་ཁོང་རྣམ་གཉིས་ཉི་ཧོང་གི་གྲོང་ཁྱེར་ཨོ་ཀི་ན་ར་ཕེབས་ཐོན་གནང་སྟེ་མང་ཚོགས་ལ་བོད་དོན་དྲིལ་བསྒྲགས་དང་བོད་མིའི་ཤེས་ཡོན་ལམ་སྲོལ་སྐོར་གསུང་བཤད་ཀྱང་གནང་ཡོད།
