༢༠༡༠ ཟླ་ ༤ ཚེས་ ༢༩ རེས་གཟའ་ཕུར་བུ།

༄༅། །ཨ་རི་དང་ཡུ་རོབ་རྒྱལ་ཁབ་ཆེ་ཁག་ལྔ་བཅས་ཁྱོན་རྒྱལ་ཁབ་དྲུག་ནང་གི་མི་མང་ནས་བསམ་ཤོག་བསྡུ་ལེན་བྱས་པའི་ནང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་ཨ་རིའི་སྲིད་འཛིན་ཨོ་བྷ་མ་རྣམ་གཉིས་མང་ཚོགས་ཀྱི་དགའ་མོས་ཆེ་ཤོས་ཞུ་སའི་འཛམ་གླིང་གི་དབུ་ཁྲིད་སྙན་གྲགས་ཆེ་ཤོས་ཞུ་སར་འདེམས་ཐོན་བྱུང་འདུག དེ་ཡང་ཕ་རན་སིའི་ Harris Interactive for France 24 hP- Radio France Internationale རླུང་འཕྲིན་ལས་ཁང་གཉིས་ཟུང་འབྲེལ་ཐོག་དྲྭ་རྒྱ་བརྒྱུད་མི་གྲངས་ ༦༡༣༥ ལ་བསམ་ཤོག་བསྡུ་ལེན་ཞུས་པའི་གྲུབ་འབྲས་སུ་མང་ཚོགས་ཀྱི་དགའ་མོས་ཆེ་ཤོས་ཞུ་སའི་འཛམ་གླིང་ནང་གི་དབུ་ཁྲིད་ཨང་དང་པོར་ཨ་རིའི་སྲིད་འཛིན་ཨོ་བྷ་མར་བརྒྱ་ཆ་ ༧༧ ཐོབ་ཡོད་པ་དང་། གཉིས་པ་༸གོང་ས་༸སྐྱབས་མགོན་ཆེན་པོ་མཆོག་ལ་བརྒྱ་ཆ་ ༧༥། གསུམ་པ་ཨ་རིའི་ཕྱི་སྲིད་དྲུང་ཆེ་ལྕམ་སྐུ་ཧི་ལེ་རི་ཁེ་ལིན་ཊོན་ Hillary Clinton མཆོག་ལ་བརྒྱ་ཆ་ ༦༢ ཐོབ་ཡོད། དེ་བཞིན་ཨང་བཞི་པར་ཇར་མན་གྱི་སྲིད་བློན་ཨན་ཇི་ལ་མར་ཁེལ་ Angela Merkel མཆོག་དང་། དེ་ནས་ཕ་རན་སིའི་སྲིད་འཛིན་དང་མཉམ་སྦྲེལ་རྒྱལ་ཚོགས་ཀྱི་སྤྱི་ཁྱབ་དྲུང་ཆེ་བཅས་རིམ་པས་བང་སྒྲིག་འདུག དེ་ཡང་དབྱིན་ཡུལ་དང་། ཇར་མན། ཕ་རན་སི། ཨི་ཊ་ལི། སི་པེན། ཨ་རི་བཅས་རྒྱལ་ཁབ་དྲུག་ནང་གི་རང་ལོ་ ༡༦ ནས་ ༦༤ བར་གྱི་མི་ཚོས་བསམ་ཤོག་བསྡུ་ལེན་ཞུས་པའི་ལས་རིམ་དེ་བཞིན་ཕྱི་ཟླ་ ༣ ཚེས་ ༣༡ ནས་ཕྱི་ཟླ་ ༤ ཚེས་ ༡༢ བར་གྱི་དུས་ཡུན་ནང་མང་ཚོགས་ཀྱི་བསམ་ཤོག་བསྡུས་པ་ཞིག་ཡིན་པ་དང་། ཡང་འཛམ་གླིང་ནང་མང་ཚོགས་ཀྱི་འདོད་མོས་མི་བྱེད་སའི་ (Most Unpopular Leaders) མགོ་ཁྲིད་ཀྱི་ནང་ནས་ཨི་རན་གྱི་ (Iran) སྲིད་འཛིན་དང་། ལི་བྷི་ཡའི་ (Libya) དབུ་ཁྲིད། རྒྱ་ནག་གི་ (China) སྲིད་འཛིན་ཧུ་ཅིན་ཐའོ་བཅས་ལ་བརྒྱ་ཆ་མང་ཤོས་ཐོན་འདུག