༢༠༡༠ ཕྱི་ཟླ་ ༣ ཚེས་ ༣ རེས་གཟའ་ལྷག་པ།
༄༅། །ཕྱི་ལོ་ ༢༠༡༠ ཟླ་ ༣ ཚེས་ ༣ ཉིན་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་འཁོན་རིགས་བསྟན་པའི་མངའ་བདག་ས་སྐྱ་གོང་མ་བདག་ཁྲི་རིན་པོ་ཆེ་མཆོག་དང་། དཔལ་ལྡན་རྒྱུད་སྟོད་གྲྭ་ཚང་ནས་ཇི་ལྟར་གསོལ་འདེབས་ཞུས་དོན་ལྟར་བཀའ་བཞེས་བཟང་པོ་སྨིན་སྩལ་གྱིས་༸གོང་ས་༸སྐྱབས་མགོན་ཆེན་པོ་མཆོག་གིས་རྒྱུད་ཀྱི་རྒྱལ་པོ་དཔལ་གསང་བ་འདུས་པའི་འགྲེལ་བ་བཞི་སྦྲགས་ཀྱི་བཀའ་ཁྲིད་སྔ་ལོའི་འཕྲོས་ནས་དབུ་འཛུགས་བསྐྱངས་པ། དེ་ཡང་སྔ་དྲོ་ཆུ་ཚོད་ ༩།༣༠ ཐོག་༸གོང་ས་མཆོག་ཕོ་བྲང་ནས་ས་སྐྱ་བདག་ཁྲི་རིན་པོ་ཆེ་མཆོག་དང་། དཔལ་རྒྱལ་བ་ཀརྨ་པ་རིན་པོ་ཆེ་མཆོག དགའ་ལྡན་ཁྲི་རིན་པོ་མཆོག་བཅས་ཀྱིས་སྤོས་སྣེས་སྔོན་བསུས་ཏེ་གཙུག་ལག་ཁང་གི་ཡང་སྟེང་དུ་བཞུགས་ཁྲི་རིན་པོ་ཆེར་༸ཞབས་སོར་འཁོད་རྗེས་གསུང་ཆོས་དབུ་འཛུགས་སྩལ་དོན། དེ་སྔོན་ཆེད་དུ་འབྲེལ་བ་ས་སྐྱ་བདག་ཁྲི་རིན་པོ་ཆེ་དང་། ཀརྨ་པ་རིན་པོ་ཆེ་ཁྱེད་རང་རྣམ་གཉིས་གཙོ་བོ་བྱས་ཏེ་འགྲེལ་པ་བཞི་སྦྲགས་འགོ་བཙུགས་པ་རེད། དེའི་རྗེས་ལ་ཆམ་པ་ཅུང་ཙམ་བརྒྱབ། དེ་ནས་ལོ་ཤས་ནང་བོད་ནང་ཞི་བའི་ངོ་རྒོལ་བྱུང་སྟེ་ལྷ་ཕབ་པའི་བཟོ་འདྲ་ཞིག་རེད། དེའི་འཕྲོས་དེ་ལོ་སྔོན་མ་དུས་ཚོད་མ་བྱུང་བ་རེད། ད་ལོ་བྲེལ་བ་ཧ་ཅང་ཆེན་པོ་འདུག་ཀྱང་སྨོན་ལམ་གྱི་མཇུག་འདིར་དུས་ཚོད་བཙལ་ནས་གཏན་འཁེལ་ཏེ་ང་ཚོ་བསྐྱར་དུ་འཛོམས་ཏེ་རུབ་རུབ་བྱེད་རྒྱུ་ཞིག་བྱུང་བ་རེད། ཁྱེད་རང་ཚོ་མི་གསར་པ་དེ་འདྲ་ཡོད་ཤས་ཆེ་གསར་འབྱོར་ཚོ་དབང་ཐོབ་མ་ཐོབ་སྐད་ཆ་མེད་ཡོང་ན་འགྲིགས་ཀྱི་ཡོད། དེ་རིང་ཁྲིད་བྱེད་རྒྱུའི་པེ་ཆ་འདི་མཐུག་པོ་ཞེ་དྲག་ཡོད་ཕལ་ཆེར་ཡིག་ཕྲེང་དྲུག་བྱས་ཏེ་ཤོག་གྲངས་བདུན་བརྒྱ་ཙམ་ཡོད། མང་ཆེ་བ་ཚར་བ་རེད་དེ་འཕྲོས་འདོན་གྱི་ཡིན། གང་ལྟར་འདི་གསང་འདུས་རྩ་རྒྱུད་ཀྱི་འགྲེལ་པ་རྒྱ་གར་དཔལ་ན་ལེཎྜའི་མཁས་པའི་གཙུག་རྒྱན་དཔལ་ལྡན་ཟླ་བ་གྲགས་པས་གསང་འདུས་རྩ་རྒྱུད་འགྲེལ་པ་སློབ་དཔོན་ཀླུ་སྒྲུབ་ཀྱི་དགོངས་པ་ཇི་བཞིན་བྱས་ཏེ་བཀྲོལ་གཞག་པ་རྨད་དུ་བྱུང་བའི་བསྟན་འགྱུར་ནང་རྒྱུད་ཀྱི་འགྲེལ་བའི་ནང་ནས་གལ་ཆེ་ཤོས་ཤིག་ཆགས་ཡོད། འགྲེལ་པ་སྒྲོན་གསལ་དང། མ་གཞི་ཆོས་བརྒྱུད་སོ་སོའི་རང་རང་གི་ཆོས་བརྒྱུད་འཆད་པའི་སྐབས་ལ་བསྟོད་པ་ནམ་མཁར་མི་ཤོང་ཞིག་བཏང་གི་ཡོད། སྤྱིར་བཏང་ཤོད་རྒྱུར་གནམ་ལ་ཉི་ཟླ་རྣམ་གཉིས་ཞེས་དང་ས་ལ་གསལ་བ་རྣམ་གཉིས་ཞེས་སྐར་ཚོགས་གཞན་རྩ་བ་ནས་མེད་པར་ཉི་མ་དང་ཟླ་བ་ཞེས་བརྗོད་པ་ལྟར་ས་ཐོག་ན་དཔལ་ལྡན་ཟླ་བ་གྲགས་པས་ལེགས་བཤད་དབུ་མའི་སྐོར་ལ་རྩ་བ་ཤེས་རབ་ཀྱི་འགྲེལ་པ་ཚིག་གསལ་ཞེས་པ་གཅིག་དང་། གསང་སྔགས་རྩ་རྒྱུད་ཀྱི་འགྲེལ་པ་སྒྲོན་གསལ་ཞེས་པ་གཉིས་ལ་ས་ལ་གསལ་བ་རྣམ་གཉིས་ཞེས་བརྗོད་ཀྱི་ཡོད། གང་ལྟར་གཞུང་དེ་དག་དཔེ་མི་སྲིད་པའི་གལ་ཆེན་པོ་དང་རྩ་ཆེན་པོ་རེད། དེ་རིང་སྔོན་མ་བཤད་པའི་འཕྲོས་མར་མཐུད་དེ་འདོན་རྒྱུ་ཡིན། ཞེས་སོགས་ཀྱི་ཆོས་འབྲེལ་བཀྲིན་ཆེ་དབུ་འཛུགས་དང་། འཛམ་གླིང་ས་ཕྱོགས་གང་ས་ནས་དད་ལྡན་ཆོས་ཞུ་བ་སྟོང་ཕྲག་ཁ་ཤས་བཅར་ཡོད་ལ་བཀའ་ཆོས་བདུན་ཕྲག་གཅིག་རིང་བཀའ་དྲིན་སྩལ་རྒྱུ་ཡིན་འདུག་པ་བཅས།
